Read Kangri यूहन्ना 18 Bible Online

यूहन्ना 18 - Kangri bible

यूहन्ना 18

¹जाह़लू यीशु प्रार्थना करी बैठा, तां एह़ गल्लां ग्लाई नैं अपणे चेलेयां सौगी किद्रोन नाल़े दे पारले पास्सेयो चली गेआ। तित्थु इक्क बाग था, जिस च सैह़ कने तिसदे चेले गै।

²तिसियो पकड़ुआणे आल़ा यहूदा भी सैह़ जगाह जाणदा था, क्जोकि यीशु अपणे चेलेयां सौगी तिसा जगाह जांदा था।

³ताह़लू यहूदा, सपाईयां दे इक्की झुंडे जो कने प्रधान याजकां कने फरीसी माणुआं दे पास्से ते सपाईयां जो लेई नैं, दीय्ये कने मशालां कने हत्थयारां जो लेई नैं तिसा जगाह आया।

⁴ताह़लू यीशु, तिन्हां सारियां गल्लां जो जेह्ड़ियां तिस पर होणे आल़िआं थियां जाणी नैं, निकल़ेया कने तिन्हां नैं ग्लाया, “कुसियो तोपा दे हन?”

⁵तिन्हां तिसियो जवाब दित्ता, “यीशु नासरिये जो।” यीशुयैं तिन्हां नैं ग्लाया, “सैह़ मैं ऐ।” कने तिसियो पकड़ुआणे आल़ा यहूदा भी तिन्हां सौगी खड़ोत्या था।

⁶जाह़लू यीशुयैं तिन्हां नैं ग्लाया, कि “मैं ऐ,” सैह़ पचांह़ हटी नैं जमीना पर पेई गै।

⁷ताह़लू तिन्हीं भिरी तिन्हां ते पुछया, “तुहां कुसियो तोपा दे हन।” सैह़ ग्लाणा लग्गे, “यीशु नासरिये जो।”

⁸यीशुयैं जवाब दित्ता, “मैं तां तुहां नैं ग्लाई बैठा ऐ कि मैंई ऐ, जे मिन्जो तोपा दे हन तां इन्हां लोकां जो जाणा देआ।”

⁹एह़ इसतांई होएया कि सैह़ वचन पूरा होयैं जेह्ड़ा तिन्हीं ग्लाया था, “जेह्ड़े तैं मिन्जो दित्ते तिन्हां ते मैं इक्क भी नीं गुआया।”

¹⁰ताह़लू शमौन पतरसैं तलवार, जेह्ड़ी तिस अल्ल थी, खींजी कने महायाजके दे दासे पर चलाई कने तिसदा सज्जा कंन्न बड्डी दित्ता। तिस दासे दा नां मलखुस था।

¹¹ताह़लू यीशुयैं पतरसे जो ग्लाया, अपणिया तलवारा म्याना च रख। जेह्ड़ा दुखे दा कटोरा पितैं मिन्जो दित्या ऐ, क्या मैं तिसियो ना पीयैं।

¹²ताह़लू सपाईयां कने तिन्हां दे सूबेदार कने यहूदियां दे सपाईयां यीशुये जो पकड़ी करी बन्नी लेआ,

¹³कने पैहल्ले तिसियो हन्ना अल्ल लेई गै, क्जोकि सैह़ काइफे दा सौरा था, कने काइफा तिस साल्ले दा महायाजक था

¹⁴एह़ सैई काइफा था, जिन्हीं यहूदियां जो सलाह दित्तियो थी कि अहां दे लोकां तांई इक्की मर्दे दा मरना खरा ऐ।

¹⁵शमौन पतरस कने इक्क होर चेला भी यीशुये पचांह़ चली पेआ। एह़ चेला महायाजके दा बाकम था, इसतांई सैह़ यीशुये सौगी महायाजके दे अँगणे च गेआ।

¹⁶अपर पतरस बाहर दरवाजे पर खड़ोई रेह्आ। ताह़लू सैह़ दूआ चेला जेह्ड़ा महायाजके दा बाकम था, बाहर निकल़ेया कने दुआरपालिनिया नैं ग्लाई करी पतरसे जो अंदर लेई आया।

¹⁷तिन्नै दासिया जेह्ड़ी दुआरपालिनी थी, पतरसे नैं ग्लाणा लग्गी, “कुत्थी तू भी इस माणु दे चेलेयां च इक्क तां नीं ऐ?” तिन्हीं ग्लाया, “मैं नीं ऐ।”

¹⁸दास कने सपाई ठंडी दिया बज़ाह ते क्योले पखाई नैं अग्गी तप्पा दे थे, कने पतरस भी तिन्हां सौगी अग्गी तपणा खड़ोई गेआ।

¹⁹ताह़लू महायाजकैं यीशु ते तिसदे चेलेयां दे बारे च कने तिसदिया सिक्षा दे बारे च पुछताछ कित्ती।

²⁰यीशुयैं तिसियो जवाब दित्ता, “मैं संसारे दे लोकां नैं खुली नैं गल्लां कित्तियां; मैं आराधनालयां कने मंदरे च, जित्थु सारे यहूदी कठ्ठरोंदे थे, सदा सिक्षा दित्ती कने पिठ्ठी पचांह़ कुच्छ भी नीं ग्लाया।

²¹तू मिन्जो ते एह़ सवाल क्जो पुछा दा ऐ? सुणने आल़ेआं ते पुछ कि मैं तिन्हां नैं क्या ग्लाया दिक्ख, सैह़ जाणदे हन कि मैं क्या-क्या ग्लाया ऐ।”

²²जाह़लू तिन्हीं एह़ ग्लाया, तां सपाईयां च इक्की जेह्ड़ा बक्खे खड़ोत्या था, यीशुये जो चपेड़ मारी नैं ग्लाया, “क्या तू महायाजके जो इस तरीकैं जवाब दिंदा ऐ?”

²³यीशुयैं तिसियो जवाब दित्ता, “जे मैं बुरा ग्लाया, तां मिन्जो दस्स कि सैह़ क्या था; अपर जे खरा ग्लाया, तां मिन्जो क्जो मारा दा ऐ?”

²⁴यीशुये जो, जेह्ड़ा अह्ल्ली भी बन्नेया ई था, हन्ने काइफा महायाजके अल्ल घल्ली दित्ता।

²⁵शमौन पतरस खड़ोई नैं तिन्हां सौगी अग्गी तप्पा दा था। ताह़लू तिन्हां तिस नैं ग्लाया, “कुत्थी तू भी तिसदे चेलेयां च तां नीं ऐ?” तिन्हीं मुकरी नैं ग्लाया, “मैं नीं ऐ।”

²⁶महायाजके दे दासां च इक्की, जेह्ड़ा तिसदे रिस्तेदारां च था जिसदा कंन्न पतरसैं बड्डी दित्या था, ग्लाणा लग्गा, “क्या मैं तिज्जो यीशु सौगी बागे च नीं दिख्या था?”

²⁷पतरस भिरी मुकरी गेआ, कने तिस बग्त ई कुक्ड़ैं बांग दित्ती।

²⁸ताह़लू सैह़ यीशुये जो काइफा दे घरे ते रोमी राज्जभवने जो लेई गै, कने भ्यागा दा बग्त था, अपर सैह़ अप्पु राज्जभवने अंदर नीं गै तांजे असुद्ध नीं होन अपर फसह खाई सकन।

²⁹ताह़लू पिलातुस तिन्हां अल्ल बाहर निकल़ी नैं आया कने ग्लाणा लग्गा, “तुहां इस माणुये पर कुसा गल्ला दा दोस लगांदे हन?”

³⁰तिन्हां तिसियो जवाब दित्ता, “जे एह़ माणु अपराधी नीं हुंदा तां अहां इसियो तिज्जो अल्ल क्जो लेई करी ओंदे।”

³¹पिलातुसैं तिन्हां नैं ग्लाया, “तुहां ई इसियो लेई जाई करी अपणे नियमे मताबक तिसदा न्याय करा।” यहूदी अगुऐ तिस नैं ग्लाणा लग्गे, “अहां जो हक्क नीं ऐ कि कुसी दे प्राण लैन।”

³²एह़ इसतांई होएया कि यीशु दी सैह़ गल्ल पूरी होयैं जेह्ड़ी तिन्हीं एह़ इसारा दिंदे होये ग्लाईयो थी कि तिसदी मौत्त किंआं हुंगी।

³³ताह़लू पिलातुस भिरी राज्जभवने अंदर गेआ, कने यीशुये जो अंदर सद्दी नैं तिसते पुछया, “क्या तू यहूदियां दा राजा ऐ?”

³⁴यीशुयैं जवाब दित्ता, “क्या तू एह़ गल्ल अपणिया तरफा ते ग्लांदा ऐ या दूयेयां मेरे बारे च तिज्जो नैं एह़ ग्लाया ऐ?”

³⁵पिलातुसैं जवाब दित्ता, “तू जाणदा ऐ कि मैं यहूदी नीं ऐ। तेरे अपणे लोकां कने प्रधान याजकां तिज्जो मेरे हुआलैं कित्या ऐ। तैं देहया क्या कित्या ऐ?”

³⁶यीशुयैं जवाब दित्ता, “मेरा राज्ज इस संसारे दा नीं ऐ; जे मेरा राज्ज इस संसारे दा हुंदा, तां मेरे दास लड़दे, कने अज्ज मैं यहूदी अगुआं दे हुआलैं नीं हुंदा, अपर मेरा राज्ज ऐत्थु दा नीं ऐ।”

³⁷पिलातुसैं तिस नैं ग्लाया, “तां क्या तू राजा ऐ?” यीशुयैं जवाब दित्ता, “तू अप्पु ग्ला दा ऐ कि मैं राजा ऐ। मैं इसतांई जन्म लेआ कने इसतांई संसारे च आया तांजे सैह़ सारे जेह्ड़े लोक सच्च जो सुणदे कने मनदे हन, तिन्हां जो सच्च दी सिक्षा देई सकैं।”

³⁸पिलातुस तिस नैं ग्लाणा लग्गा, “सच्च क्या ऐ?” एह़ ग्लाई नैं सैह़ भिरी यहूदी अगुआं अल्ल गेआ कने तिन्हां नैं ग्लाया, “मैं तां तिस च कोई दोस नीं पांदा।

³⁹अपर तुहां दी एह़ रीत ऐ कि मैं फसह च तुहां तांई इक्की माणुये जो छड्डी दैं तां होर तुहां क्या चांह़दे हन कि मैं तुहां तांई यहूदियां दे राजे जो छड्डी दैं।”

⁴⁰ताह़लू तिन्हां भिरी डड्डी नैं ग्लाया, “यीशुये जो नीं, अपर अहां तांई बरअब्बा जो छड्डी देआ।” कने बरअब्बा डाकू था।