Read Kangri यूहन्ना 19 Bible Online

यूहन्ना 19 - Kangri bible

यूहन्ना 19

¹इसा गल्ला पर पिलातुसैं अपणे सपाईयां जो एह़ हुक्म दित्ता यीशुये जो कोड़े लगान।

²कने सपाईयां कन्डेयां दा मुकट बणाई नैं तिसदे सिरे पर रखी दित्ता, कने तिसियो बैजनी कपड़े लौआई दित्ते,

³कने तिस अल्ल आई-आई नैं ग्लाणा लग्गे, “हे यहूदियां दे राजा, प्रणांम।” कने तिसियो चपेड़ भी मारी।

⁴ताह़लू पिलातुसैं भिरी बाहर निकल़ी नैं लोकां नैं ग्लाया, “दिक्खा, मैं तिसियो तुहां अल्ल भिरी बाहर लेई अंदा; तांजे तुहां जाणन कि मैं इस च कोई भी दोस नीं पांदा।”

⁵ताह़लू यीशुये जो कन्डेयां दा मुकट कने बैजनी कपड़े पैहनाई नैं बाहर लंदा; कने पिलातुसैं तिन्हां नैं ग्लाया, “इस माणुये जो दिक्खा।”

⁶जाह़लू प्रधान याजकां कने सपाईयां तिसियो दिख्या, तां डड्डी करी जोरे नैं ग्लाणा लग्गे, “इसियो सूल़िया पर टूंगा, सूल़िया पर टूंगा।” पिलातुसैं तिन्हां नैं ग्लाया, “तुहां ई इसियो लेई नैं सूल़िया पर टूंगा, क्जोकि मैं तिस च कोई दोस नीं पांदा।”

⁷यहूदियां तिसियो जवाब दित्ता, “अहां दे भी नियम हन कने तिस नियमे मताबक सैह़ मरने दा हक्कदार ऐ, क्जोकि तिन्हीं अप्पु जो परमात्मे दा पुत्तर बणाया ऐ।”

⁸जाह़लू पिलातुसैं एह़ गल्ल सुणी तां होर भी डरी गेआ,

⁹कने भिरी राज्जभवने दे अंदर गेआ कने यीशुये नैं ग्लाया, “तू कतांह दा ऐ?” अपर यीशुयैं तिसियो कुच्छ भी जवाब नीं दित्ता।

¹⁰इसा गल्ला पर पिलातुसैं तिस नैं ग्लाया, “मिन्जो नैं क्जो नीं ग्ला दा ऐ? क्या तू नीं जाणदा कि तिज्जो छड्डणे दा हक्क मिन्जो ऐ, कने तिज्जो सूल़िया पर टूंगणे दा हक्क भी मिन्जो ऐ।”

¹¹यीशुयैं जवाब दित्ता, “क्जोकि एह़ हक्क तिज्जो परमात्मे दित्या ऐ, तां तूं मिन्जो पर एह़ हक्क रखदा ऐ; इसतांई जिन्हीं मिन्जो तेरे हुआलैं कित्या ऐ, तिसदा पाप जादा ऐ।”

¹²इसा गल्ला पर पिलातुस तिसियो छड्डणा चांह़दा था, अपर यहूदी अगुआं जोरे नैं डड्डी-डड्डी करी ग्लाया, “जे तू इस जो छड्डी दिंगा, तां तेरा भाईचारा कैसरे दे पास्से ते नीं। जेह्ड़ा कोई अपणे आप्पे जो राजा बणाणे दा दावा करदा ऐ सैह़ कैसरे दा सामणा करदा ऐ।”

¹³एह़ गल्लां सुणी नैं पिलातुस यीशुये जो बाहरेयो लेई आया कने तिसा जगाह इक्क चबूतरा था जिसियो इब्रानी भासा च गब्ब्ता ग्लांदे थे, कने तित्थु न्याय आसणे पर बैठी गेआ।

¹⁴एह़ फसह दी त्यारिया दा दिन था, कने दोपैरा दा बग्त था। ताह़लू पिलातुसैं यहूदियां नैं ग्लाया, “दिक्खा तुहां दा राजा।”

¹⁵अपर सैह़ जोरे नैं डड्डे, “लेई जा। लेई जा। तिसियो सूल़िया पर टूंगा।” पिलातुस तिन्हां नैं ग्लाणा लग्गा, “क्या मैं तुहां दे राजे जो सूल़िया पर टूंगा?” प्रधान याजकां जवाब दित्ता, “कैसरे जो छड्डी अहां दा होर कोई राजा नीं ऐ।”

¹⁶ताह़लू पिलातुसैं यीशुये जो तिन्हां दे हुआले करी दित्ता तांजे सैह़ सूल़िया पर टुंगी दित्ता जां।

¹⁷ताह़लू सपाई यीशुये जो लेई गै, कने सैह़ अपणिया सूल़िया चुक्की नैं तिसा जगाह तिकर बाहरेयो गेआ, जिसा जो खोपड़ी दी जगाह कने इब्रानी भासा च गुलगुता ग्लांदे थे।

¹⁸तित्थु तिन्हां तिसियो कने तिस सौगी होर दूँ माणुआं जो सूल़िया पर टंगाई दित्ता, इक्की जो सज्जे कने दूये जो खब्बे, कने बिच्च यीशुये जो।

¹⁹पिलातुसैं इक्क दोसपत्र लिखी नैं सूल़िया ऊपर लगाई दित्ता, कने तिस च एह़ लिख्या था, “यीशु नासरी यहूदियां दा राजा।”

²⁰एह़ दोसपत्र मतेआं यहूदी अगुआं पढ़ेया, क्जोकि सैह़ जगाह जित्थु यीशु सूल़िया पर टूंगेया था यरूशलेम सैहरे दे नेड़े थी; कने दोसपत्र इब्रानी, लतीनी कने यूनानी भासा च लिख्या था।

²¹ताह़लू यहूदियां दे प्रधान याजकां पिलातुसे नैं ग्लाया, “‘यहूदियां दा राजा’ मत लिख अपर एह़ कि ‘तिन्हीं ग्लाया यहूदियां दा राजा ऐ’।”

²²पिलातुसैं जवाब दित्ता, “मैं जेह्ड़ा लिखी दित्ता, सैह़ लिखी दित्ता।”

²³जाह़लू सपाई यीशुये जो सूल़िया पर टुंगी बैठे, तां तिसदे कपड़े लेई नैं चार हिस्से कित्ते, कने चौंन्नी सपाईयां अप्पु च इक्क-इक्क हिस्सा बंडी, कने कुरता भी लेआ, अपर कुरता बगैर सित्तेयो ऊपरे ते थल्लै तिकर बुणेया था।

²⁴तां सपाईयां अप्पु च ग्लाया, “अहां इसियो नीं छेकदे, अपर इस पर पर्ची पांदे कि एह़ कुसदा हुंगा।” एह़ इसतांई होएया कि पवित्रशास्त्रे च जेह्ड़ा ग्लाया, सैह़ पूरा होयैं, “तिन्हां मेरे कपड़े अप्पु च बंडी लै कने मेरे कपड़ेयां च पर्ची पाई। सैह़ ऐई ऐ,जेह्ड़ा सपाईयां तित्थु कित्ता।”

²⁵अपर यीशु दी सूल़िया अल्ल तिसदी माँ, कने तिसदिया माँऊ दी बैहण, क्लोपासे दी लाड़ी मरियम, कने मरियम मगदलीनी खड़ोतियो थी।

²⁶जाह़लू यीशुयैं अपणिया माँऊ, कने तिस चेले जो जिस नैं सैह़ प्यार रखदा था बक्खे खड़ोत्यो दिख्या तां अपणिया माँऊ नैं ग्लाणा लग्गा, “हे नारी, दिक्ख, एह़ तेरा जागत ऐ।”

²⁷ताह़लू तिन्हीं तिस चेले नैं ग्लाया, “सुण, एह़ तेरी माँ ऐ।” कने तिसी बग्त सैह़ चेला तिसायो अपणे घरेयो लेई गेआ।

²⁸इसते बाद यीशुयैं एह़ जाणी नैं कि हुण सब कुच्छ पूरा होईया, इसतांई कि पवित्रशास्त्रे दा ग्लाया वचन पूरा होयैं, तां तिन्हीं ग्लाया, “मैं प्यासा ऐ।”

²⁹तित्थु सिरके नैं भरोया इक्क भांडा रखेया था, तिन्हां च इक्की सपाईयें सिरके च स्पंजे सेड़ी नैं जूफे दिया डाल़िया पर रखी करी तिसदे मुँऐ नैं लगाया।

³⁰कने जाह़लू यीशुयैं सैह़ सिरका चखेया, तां ग्लाया, “हुण सब कुच्छ पूरा होएया।” कने सिरे लटकाई नैं प्राण छड्डी दित्ते।

³¹इसतांई कि सैह़ त्यारी दा दिन था, यहूदियां पिलातुसैं नैं विणती कित्ती कि तिन्हां दियां लत्तां तोड़ियां जान कने सैह़ लौआये जान, तांजे बिस्रामे आल़े दिन सैह़ सूल़िया पर नीं रैह़न, क्जोकि सैह़ बिस्रामे आल़ा दिन बड्डा दिन था।

³²सपाईयां आई नैं तिन्हां माणुआं च पैहल्ले दी लत्तां तोड़ियां ताह़लू दूये दियां भी, जेह्ड़े तिस सौगी सूल़िया पर टूंगेयो थे;

³³अपर जाह़लू यीशु अल्ल आई नैं दिख्या कि सैह़ मरिया ऐ, तां तिसदियां लत्तां नीं तोड़ियां।

³⁴अपर इक्की सपाईयें बरछे नैं तिसदी पसली बिन्नी, कने तिस च ताह़लू ई खून कने पाणी निकल़ेया।

³⁵जिन्हीं एह़ दिख्या, तिन्हीं गवाही दित्ती ऐ, कने तिसदी गवाही सच्ची ऐ; कने सैह़ जाणदा ऐ, जेह्ड़ा तिन्हीं ग्लाया सैह़ सच्च ऐ, कि तुहां भी बसुआस करन।

³⁶एह़ गल्लां इसतांई होईयां कि पवित्रशास्त्रे च जेह्ड़ा लिख्या था सैह़ पूरा होयैं, “तिसदी कोई हड्डी नीं तोड़ी जांगी।”

³⁷भिरी इक्क होर जगाह पर एह़ पवित्रशास्त्रे च लिख्या ऐ; “जिसियो तिन्हां बिन्नेया ऐ, तिस पर तिन्हां दी नजर हुंगी।”

³⁸इन्हां गल्लां ते बाद अरिमतिया सैहरे दा रैहणे आल़ा यूसुफ जेह्ड़ा यीशुये दा चेला था, (अपर यहूदियां दे डरे ते इसा गल्ला जो छुपाई रखदा था,) तिन्हीं पिलातुसे नैं विणती कित्ती कि क्या सैह़ यीशु दी लाह्स लेई जाई सकदा ऐ। पिलातुसैं तिसदी विणती सुणी, कने सैह़ आई नैं तिसदी लाह्सा लेई गेआ।

³⁹नीकुदेमुस भी, जेह्ड़ा पैहल्ले यीशु अल्ल राती गेआ था, कने लगभग तीई किलो मिठ्ठी खुसबुदार सम्रगी लेई आया।

⁴⁰ताह़लू तिन्हां यीशु दी लाह्स लेई, कने यहूदियां दे दब्बणे दी रीतिया मताबक तिसियो खुसबुदार समग्रिया सौगी कफने च लपेटया।

⁴¹कने तिसा जगाह दे नेड़े जित्थु यीशु सूल़िया पर टूंगेया था, इक्क बाग था, कने तिस बागे च इक्क नौई कब्र थी जिसा च अह्ल्ली तिकर कोई भी नीं रखेया था।

⁴²इसतांई यहूदी अगुआं दे बिस्रामे दी त्यारिया आल़े दिने दिया बज़ाह ते तिन्हां यीशु दिया लाह्सा जो तिसा कब्रा च रखेया, क्जोकि सैह़ नेड़े थी।