Read Kangri यूहन्ना 20 Bible Online

यूहन्ना 20 - Kangri bible

यूहन्ना 20

¹हफ्ते दे पैहल्ले दिन मरियम मगदलीनी कने कुच्छ होर जणासा बड़िया भ्यागा नेहरे च कब्रा पर आईआं, कने तिन्हां पत्थरे जो कब्रा ते हटेया दिख्या।

²ताह़लू सैह़ दौड़ियां कने शमौन पतरस कने तिस दूये चेले अल्ल जिस नैं यीशु प्यार रखदा था, आई नैं ग्लाणा लगियां, “सैह़ प्रभु दिया लाह्सा जो कब्र ते कड्डी लैइयो हन, कने अहां नीं जाणदियां कि तिसियो कतांह रखी दित्या ऐ।”

³ताह़लू पतरस कने सैह़ दूआ चेला निकल़ी नैं कब्रा दे पास्सेयो चल्ले।

⁴सैह़ दोयो सौगी-सौगी दौड़ा दे थे, अपर दूआ चेला पतरस ते गांह निकल़ी नैं क्रबा पर पैहल्लैं पुज्जिया;

⁵कने झुकी नैं कपड़े पैयो दिक्खे, अपर सैह़ अंदर नीं गेआ।

⁶ताह़लू शमौन पतरस तिसदे पचांह़-पचांह़ पुज्जया, कने कब्रा अंदर गेआ कने कपड़े पैयो दिक्खे;

⁷कने सैह़ परना जेह्ड़ा तिसदे सिरे पर बन्नेया था, कपड़ेयां सौगी नीं पेआ था, अपर लग्ग इक्की जगाह पर तैह लगाई नैं रखेया दिख्या।

⁸ताह़लू दूआ चेला भी जेह्ड़ा कब्रा पर पैहल्लैं पुज्जया था, अंदर गेआ कने दिक्खी नैं बसुआस कित्ता, कि यीशु मरेयां ते जिन्दा होई गेआ ऐ।

⁹एह़ तां अह्ल्ली तिकर पवित्रशास्त्रे दी एह़ गल्ल नीं समझेयो थे, कि यीशुये दा मरेयां ते दुवारी जिन्दा होणा जरूर हुंगा।

¹⁰ताह़लू एह़ चेले अपणे घरेयो बापस चली गै।

¹¹अपर मरियम रोंदी कब्रा अल्ल बाहर ई खड़ोई रेई, कने रोंदे-रोंदे कब्रा दे पास्से झुकी नैं,

¹²दूँ सुअर्गदूतां जो चिट्टे चमकदार कपड़े पैहनेयो इक्की जो सरहाणे कने दूये जो पैंदिया बैठेया दिख्या, जित्थु यीशु दी लाह्स रखियो थी।

¹³तिन्हां तिसा नैं ग्लाया, “हे नारी, तू क्जो रोआ दी ऐ?” तिन्नै तिन्हां नैं ग्लाया, सैह़ मेरे प्रभु दिया लाह्सा जो चुक्की लेई गियो हन, कने मैं नीं जाणदी कि तिसियो कुत्थू रखेया ऐ।

¹⁴एह़ ग्लाई नैं सैह़ पचांह़ मुड़ी कने यीशुये जो खड़ोत्यो दिख्या, अपर तिन्नै नीं पणछैणयां कि एह़ यीशु ऐ।

¹⁵यीशुयैं तिसा नैं ग्लाया, “हे नारी, तू क्जो रोआ दी ऐ? कुसियो तोपा दी ऐ?” तिन्नै माली समझी नैं तिस नैं ग्लाया, “हे महाराज, जे तैं तिसियो चुक्की लेआ ऐ तां मिन्जो दस्स कि तिसियो कुत्थू रखेया ऐ, कने मैं तिसियो लेई जांगी।”

¹⁶यीशुयैं तिसा नैं ग्लाया, “मरियम।” तिन्नै पचांह़ मुड़ी करी तिस नैं ग्लाया, “रब्बूनी।” इब्रानी भासा च ग्लाया, मतलब हे गुरू जी।

¹⁷यीशुयैं तिसा नैं ग्लाया, “मिन्जो मत छु, क्जोकि मैं अह्ल्ली तिकर पिता अल्ल ऊपर नीं गेआ, अपर मेरे भाऊआं अल्ल जाई नैं तिन्हां नैं ग्लाई दे, कि मैं अपणे पिता कने तुहां दे पिता, कने अपणे परमात्मे कने तुहां दे परमात्मे अल्ल ई ऊपरेयो चलेया ऐ।

¹⁸मरियम मगदलीनिया जाई नैं चेलेयां जो दस्सेया, मैं प्रभु जो दिख्या कने तिन्हीं मिन्जो नैं एह़ गल्लां ग्लाईयां।”

¹⁹तिसी दिने जेह्ड़ा हफ्ते दा पैहल्ला दिन था संझा दे बग्त यहूदियां ते डरी नैं चेले कमरे दे दरवाजे बंद करी नैं किठ्ठे होएयो थे, ताह़लू यीशु तित्थु आया कने तिन्हां बिच्च खड़ोई नैं तिन्हां नैं ग्लाणा लग्गा, तुहां जो सांति मिल्ले।

²⁰कने एह़ ग्लाई नैं तिन्हीं अपणा हत्थ कने अपणी पसली तिन्हां जो दस्सी ताह़लू चेले प्रभु जो दिक्खी नैं खुस होये।

²¹यीशु भिरी तिन्हां नैं ग्लाणा लग्गा, “तुहां जो सांति मिल्ले; जिंआं पितैं मिन्जो घल्लेया ऐ, तिंआं ई मैं भी तुहां जो इस संसारे च घल्लदा ऐ।”

²²एह़ ग्लाई नैं तिन्हीं तिन्हां पर फूंक मारी कने तिन्हां नैं ग्लाया, “पवित्र आत्मा लेआ।

²³जिन्हां लोकां दे पाप तुहां माफ करगे, तिन्हां दे माफ हुंगे; जिन्हां दे पाप तुहां माफ नीं करगे, तिन्हां दे माफ नीं हुंगे।”

²⁴अपर बाराह चेलेयां च इक्क, मतलब थोमा जिसियो दिदुमुस भी ग्लांदे थे, जाह़लू यीशु आया तां सैह़ तिन्हां सौगी नीं था।

²⁵जाह़लू होर चेले तिस नैं ग्लाणा लग्गे, “अहां प्रभु जो दिख्या ऐ,” ताह़लू तिन्हीं तिन्हां नैं ग्लाया, “मैं तां तिसदेयां हत्थां च मेखां देयां बिन्नां च उंगली पाई नैं, कने तिसदिया बक्खिया च अपणा हत्थ पाई नैं ई बसुआस करगा।”

²⁶अठां दिनां बाद तिसदे चेले भिरी घरे अंदर थे, कने थोमा तिन्हां सौगी था; कने दरवाजे बंद थे, ताह़लू यीशु आया कने तिन्हां बिच्च खड़ोई नैं ग्लाणा लग्गा, “तुहां जो सांति मिल्ले।”

²⁷ताह़लू तिन्हीं थोमे नैं ग्लाया, “अपणी उंगलिया नैं मेरे हत्थां जो छुई नैं दिक्ख कने अपणा हत्थ गांह करी नैं मेरिया बक्खिया च पा, कने बेबसुआसी नीं पर बसुआसी बण।”

²⁸एह़ सुणी थोमे जवाब दित्ता, “हे मेरे प्रभु हे मेरे परमात्मा।”

²⁹यीशुयैं तिस नैं ग्लाया, “क्या तैं दिक्खी नैं मिन्जो पर बसुआस कित्ता ऐ? धन हन सैह़ जिन्हां मिन्जो नीं दिख्या, भिरी भी बसुआस कित्ता।”

³⁰यीशुयैं होर भी मते चमत्कार चेलेयां सामणै दस्से, जेह्ड़े इसा कताबा च लिखे नीं गै;

³¹अपर एह़ इसतांई लिखयो हन, कि तुहां बसुआस करा कि यीशु ई परमात्मे दा पुत्तर मसीह ऐ, कने बसुआस करी नैं तिसदे नांऐ ते सदा दी ज़िन्दगी पा।