Read Kangri यूहन्ना 21 Bible Online

यूहन्ना 21 - Kangri bible

यूहन्ना 21

¹इन्हां गल्लां ते बाद यीशुयैं अपणे आप्पे जो तिबिरियास झीला दे कनारे चेलेयां पर प्रगट कित्ता, एह़ इआं होएया,

²शमौन पतरस, कने थोमा जिसियो दिदुमुस ग्लांदे थे, कने गलील प्रदेसे दे काना सैहरे दा नतनएल, कने जबदिये दे पुत्तर, कने तिसदे चेलेयां च दो होर जणे कठ्ठरोयो थे।

³शमौन पतरसैं तिन्हां नैं ग्लाया, “मैं मच्छी पकड़णा चलेया ऐ।” तिन्हां तिसियो ग्लाया, “अहां भी तिज्जो सौगी चलदे।” कने सैह़ निकल़ी नैं किस्तिया पर चढ़े, अपर तिसा राती तिन्हां जो कुच्छ नीं मिल्ला।

⁴भ्याग हुंदेया ई यीशु कनारे पर आई खड़ोता; तमी चेले तिसियो पणछैणी नीं सके कि एह़ यीशु ऐ।

⁵ताह़लू यीशुयैं तिन्हां नैं ग्लाया, हे जागतो, क्या तुहां अल्ल कुच्छ मच्छियां हन? तिन्हां जवाब दित्ता, “नीं हन।”

⁶तिन्हीं तिन्हां नैं ग्लाया, किस्तिया दे सज्जे कनारे जाल़ पा तां मिलणियां हन। कने तिन्हां जाल़ पाया, कने मतिआं मच्छियां होणे दिया बज़ाह ते जाल़े जो खींजी नीं सके।

⁷ताह़लू तिन्हीं चेलैं जिस नैं यीशु प्यार रखदा था, तिन्हीं पतरसैं नैं ग्लाया, “एह़ तां प्रभु ऐ।” शमौन पतरसैं एह़ सुणी नैं कि सैह़ प्रभु ऐ, तिन्हीं अपणे बाहरे दे कपड़े पैहनी लै, जेह्ड़े तिन्हीं कम्मे करणे तांई खोलेयो थे, कने झीला च छाल़ देई दित्ती, क्जोकि सैह़ यीशुये नैं मिलणे तांई बड़ा उतावल़ा था।

⁸अपर दूये चेले छोटिया किस्तिया पर मच्छियां नैं भरोये जाल़े जो खींजदे-खींजदे आये, क्जोकि सैह़ कनारे ते जादा दूर नीं थे, अपर कोई सौ मीटर दूर थे।

⁹जाह़लू सैह़ कनारे पर लौत्थे, तां तिन्हां क्योले दी अग्ग कने तिस पर मच्छी रखियो, कने रोटी दिक्खी।

¹⁰यीशुयैं तिन्हां नैं ग्लाया, “जेह्ड़ियां मच्छियां तुहां हुण पकड़ियां हन, तिन्हां च कुच्छ लेई ओआ।”

¹¹तां शमौन पतरसैं किस्तिया पर चढ़ी नैं इक्क सौ त्रियुन्जा बड्डियां मच्छियां नैं भरोया जाल़ कनारे पर खिंज्या, कने इतणी मच्छियां होणे पर भी जाल़ नीं फटेया।

¹²यीशुयैं तिन्हां नैं ग्लाया, “ओआ, खाणा खांदे।” चेलेयां च कुसी जो हिम्मत नीं होई कि तिसते पुछन, “तू कुण ऐ?” क्जोकि सैह़ जाणदे थे कि एह़ प्रभु ई ऐ।

¹³यीशु आया कने रोटी लेई नैं तिन्हां जो दित्ती, कने तिंआं ई मच्छी भी।

¹⁴एह़ त्री बरी ऐ कि यीशु मरेयां ते जिन्दा होणे दे बाद चेलेयां जो दुस्सेया।

¹⁵खाणा खाणे ते बाद यीशुयैं शमौन पतरसैं नैं ग्लाया, “हे शमौन, यूहन्ने दे पुत्तर, क्या तू इन्हां ते बधी करी मिन्जो नैं प्यार रखदा ऐ?” तिन्हीं तिस नैं ग्लाया, “हाँ प्रभु; तू तां जाणदा ऐ कि मैं तिज्जो नैं प्यार करदा ऐ।” तिन्हीं तिस नैं ग्लाया, “जेह्ड़े लोक मेरे हन तिन्हां दा ध्यान रख, जिंआं इक्क गुआल़ा अपणियां भेड्डां देयां बच्चेयां दी रखवाल़ी करदा ऐ।”

¹⁶तिन्हीं भिरी दूई बरी तिस नैं ग्लाया, “हे शमौन, यूहन्ने दे जागत, क्या तू मिन्जो नैं प्यार रखदा ऐ?” तिन्हीं तिस नैं ग्लाया, “हाँ प्रभु; तू तां जाणदा ऐ, कि मैं तिज्जो नैं प्यार रखदा ऐ।” तिन्हीं तिस नैं ग्लाया, “जेह्ड़े लोक मेरे हन तिन्हां दा ध्यान रख, जिंआं इक्क गुआल़ा अपणियां भेड्डां दी रखवाल़ी करदा ।”

¹⁷तिन्हीं त्री बरी भिरी तिस नैं ग्लाया, “हे शमौन, यूहन्ने दे पुत्तर, क्या तू मिन्जो नैं प्यार रखदा ऐ?” पतरस उदास होई गेआ कि तिन्हीं तिस नैं त्री बरी इआं ग्लाया, “क्या तू मिन्जो नैं प्यार रखदा ऐ?” कने तिस नैं ग्लाया, “हे प्रभु, तू तां सब कुच्छ जाणदा ऐ; कने तू एह़ भी जाणदा ऐ कि मैं तिज्जो नैं प्यार रखदा ऐ।” यीशुयैं तिस नैं ग्लाया, “जेह्ड़े लोक मेरे हन तिन्हां दा ध्यान रख, जिंआं इक्क गुआल़ा अपणियां भेड्डां दा ध्यान रखदा कने चगांदा ऐ।

¹⁸मैं तिज्जो नैं सच्च-सच्च ग्लांदा ऐ, जाह़लू तू जुआन था तां अपणे लक्के बन्नी नैं जित्थु चांह़दा था औत्थू फिरदा था; अपर जाह़लू तू जबरा हुंगा तां अपणेयां हत्थां फलांगा; कने दूआ तेरा लक्के बन्नी नैं जित्थु तू नीं चांह़गा औत्थू तिज्जो लेई जांगा।”

¹⁹तिन्हीं इन्हां गल्लां ते इसारा कित्ता कि पतरस कदेई मौत्ती ते परमात्मे दी महिमा करगा। कने ताह़लू तिन्हीं तिस नैं ग्लाया, “मेरे पचांह़ चली पौ।”

²⁰पतरसैं मुड़ी नैं तिस चेले जो पचांह़ ओंदे दिख्या, जिसियो यीशु प्यार रखदा था, कने जिन्हीं खांदे बग्त यीशुये दे बक्खे जाई नैं पुछया था, “हे प्रभु, तेरा पकड़ुआणे आल़ा कुण ऐ?”

²¹तिसियो दिक्खी नैं पतरसैं यीशुये नैं ग्लाया, “हे प्रभु तिसदा क्या हाल हुंगा?”

²²यीशुयैं तिस नैं ग्लाया, “जे मैं चां कि सैह़ मेरे ओणे तिकर रैंह्, तां तिज्जो इसते क्या? तू मिन्जो पचांह़ चली पौ।”

²³इसतांई भाऊआं च एह़ गल्ल फैली गेई, कि सैह़ दूआ चेला नीं मरगा; अपर अह्ल्ली तिकर यीशुयैं तिस नैं एह़ नीं ग्लाया था, कि सैह़ नीं मरगा, अपर एह़ ग्लाया, कि “जे मैं चां कि सैह़ मेरे ओणे तिकर रैंह्, तां तिज्जो इसते क्या?”

²⁴एह़ सैई चेला ऐ, जेह्ड़ा इन्हां गल्लां दी गवाही दिंदा ऐ कने जिन्हीं इन्हां गल्लां जो लिख्या ऐ, कने अहां जाणदे हन, कि तिसदी गवाही सच्ची ऐ।

²⁵होर भी मते कम्म हन, जेह्ड़े यीशुयैं कित्यो हन; जे सैह़ इक्क-इक्क करी नैं लिखे जांदे तां मैं समझदा कि जेह्ड़ियां कताबां लिखियां जांदियां सैह़ संसारे च भी नीं समांदियां।