Read Kangri यूहन्ना 3 Bible Online

यूहन्ना 3 - Kangri bible

यूहन्ना 3

¹नीकुदेमुस नांऐ दा इक्क फरीसी माणु था, जेह्ड़ा यहूदी अगुआं दा धार्मिक गुरू था।

²सैह़ राती यीशु अल्ल आई नैं ग्लाया, “हे गुरू, अहां जाणदे हन, कि तू परमात्मे दे पास्से ते गुरू होई नैं आया ऐ, क्जोकि कोई इन्हां चमत्कारां जो जेह्ड़ा तू दस्सदा ऐ, जे परमात्मा तिस सौगी नीं होये तां नीं दस्सी सकदा।”

³यीशुयैं तिस जो जवाब दित्ता, “मैं तिज्जो नैं सच्च-सच्च ग्लांदा, जे कोई दूई बरी जन्म ना लैं, तां परमात्मे दे राज्जे जो कदी नीं दिक्खी सकदा।”

⁴नीकुदेमुसैं तिस नैं ग्लाया, “माणु जाह़लू स्याणा होई जांदा, तां किंआं जन्म लेई सकदा? क्या सैह़ अपणिया माँऊ दे पेटे च दूई बरी अंदर जाई नैं जन्म लेई सकदा ऐ?”

⁵यीशुयैं जवाब दित्ता, “मैं तिज्जो नैं सच्च-सच्च ग्लांदा ऐ, जाह़लू तिकर कोई माणु पाणी कने आत्मा ते नीं जम्में तां सैह़ परमात्मे दे राज्जे च कदी नीं पुज्जी सकदा।

⁶क्जोकि जेह्ड़ा सरीरे ते जम्मेया ऐ, सैह़ सरीर ऐ, कने जेह्ड़ा आत्मा ते जम्मेया ऐ, सैह़ आत्मा ऐ।

⁷हरान मत होयैं कि मैं तिज्जो नैं ग्लाया, ‘तुहां लोकां जो दूई बरी जन्म लैणां जरूरी ऐ।’

⁸हौआ जित्थु चांह़दी ऐ तित्थु चलदी ऐ, कने तू तिसदिया उआज़ा सुणदा ऐ, अपर नीं जाणदा, कि सैह़ कतांह ते ओंदी ऐ कने कुत्थियो जांदी ऐ? जेह्ड़ा कोई आत्मा ते जम्मेया ऐ सैह़ ऐदेया ई ऐ।”

⁹नीकुदेमुसें तिसियो जवाब दित्ता, “एह़ गल्लां किंआं होई सकदियां हन?”

¹⁰एह़ सुणी करी यीशुयैं तिस नैं ग्लाया, “तू इस्राएली लोकां दा गुरू होई नैं भी क्या इन्हां गल्लां जो नीं जाणदा?

¹¹मैं तिज्जो नैं सच्च-सच्च ग्लांदा ऐ, कि अहां जेह्ड़ा जाणदे हन, सैह़ ग्लांदे हन, कने जिसियो अहां दिख्या तिसदी गवाही दिंदे हन, कने तुहां अहां दी गवाही ग्रहण नीं करदे।

¹²जाह़लू मैं तुहां नैं धरतिया दियां गल्लां ग्लाईयां, कने तुहां बसुआस नीं कित्ता, जे मैं तुहां नैं सुअर्गे दियां गल्लां ग्लां तां भिरी किंआं बसुआस करगे?

¹³कोई सुअर्गे च नीं गेआ, सिर्फ सैई जेह्ड़ा सुअर्गे ते आया, मतलब मैं माणु दा पुत्तर जेह्ड़ा सुअर्गे च ऐ।

¹⁴कने जिस तरीके नैं मूसैं सुनसाण जगाह च सर्पे जो ऊचिया जगाह पर चढ़ाया, तिस तरीके नैं जरूरी ऐ, कि मैं माणुये दा पुत्तर भी ऊचिया जगाह पर चढ़ाया जां।

¹⁵तांजे जेह्ड़ा कोई मिन्जो पर बसुआस करगा सैह़ सदा दी ज़िन्दगी पांगा।

¹⁶“क्जोकि परमात्मैं इस संसारे दे लोकां नैं इतणा प्यार कित्ता कि तिन्हीं अपणा इकलौता पुत्तर देई दित्ता, तांजे जेह्ड़ा कोई भी तिस पर बसुआस करगा सैह़ नास नीं हुंगा पर सदा दी ज़िन्दगी पांगा।

¹⁷परमात्मैं अपणे पुत्तरे जो संसारे च इसतांई नीं घल्लेया, कि संसारे दे लोकां पर सज़ा दा हुक्म दैं, अपर इसतांई कि संसार दे लोक तिसदे जरिये उद्धार पान।

¹⁸जेह्ड़ा मिन्जो पर बसुआस करदा ऐ, तिस पर सज़ा दा हुक्म नीं हुंदा, अपर जेह्ड़ा मिन्जो पर बसुआस नीं करदा, सैह़ दोसी बणी गेआ ऐ; इसतांई कि तिन्हीं परमात्मे दे इकलौते पुत्तरे दे नांऐ पर बसुआस नीं कित्ता।

¹⁹कने सज़ा दे हुक्मे दी बज़ाह एह़ ऐ, कि जोत्ती संसारे च आई, कने माणुआं जो नेहरा जोतिया ते जादा प्यारा लग्गा क्जोकि तिन्हां दे कम्म बुरे थे।

²⁰क्जोकि जेह्ड़ा कोई बुराई करदा ऐ, सैह़ सच्चाईया नैं बैर रखदा ऐ, कने जोतिया दे नेड़े नीं ओंदा, क्जोकि जोतिया च तिसदे बुरे कम्म सामणै आई जांदे हन।

²¹अपर जेह्ड़ा सच्चाईया पर चलदा ऐ, सैह़ जोतिया दे नेड़े ओंदा ऐ, तांजे तिसदे खरे कम्म सामणै ओन क्जोकि सैह़ कम्म परमात्मे दे पास्से ते कित्यो हन।”

²²इसते बाद यीशु कने तिसदे चेले यहूदिया प्रदेसे च आये; कने सैह़ तित्थु तिन्हां सौगी रेई नैं बपतिस्मा दैणा लग्गा।

²³यूहन्ना भी सामरिया प्रदेसे दे शालेम सैहरे दे बक्खे ऐनोन ग्रांऐ च बपतिस्मा दिंदा था, क्जोकि तित्थु मता पाणी था, कने लोक आई नैं बपतिस्मा लैंदे थे।

²⁴यूहन्ना तिस बग्त तिकर जेला च नीं पाया था।

²⁵तित्थु यूहन्ना दे चेलेयां दा कुसकी यहूदी अगुऐ सौगी पवित्रता दे बारे च सवाल जवाब होएया।

²⁶कने तिन्हां चेलेयां यूहन्ने अल्ल आई नैं तिसियो ग्लाया, “हे गुरू, जेह्ड़ा माणु यरदन नदिया पार तिज्जो सौगी था, कने जिसदी तैं गवाही दित्ती, दिक्खा, सैह़ बपतिस्मा दै दा ऐ, कने सारे लोक तिस अल्ल ओआ दे हन।”

²⁷यूहन्ने जवाब दित्ता, जाह़लू तिकर माणुये जो सुअर्गे ते नीं मिल्लैं, ताह़लू तिकर सैह़ कुच्छ नीं पाई सकदा।

²⁸तुहां तां अप्पु ई मेरे गवाह हन, कि मैं ग्लाया, मैं मसीह नीं, अपर तिसदे गांह घल्लेया।

²⁹जिसदी लाड़ी ऐ, सैई लाड़ा ऐ, अपर लाड़े दा साथी जेह्ड़ा सौगी खड़ोई करी तिसदी सुणदा ऐ, लाड़े दिया उआज़ा सुणी करी बड़ा खुस हुंदा ऐ, कने हुण मेरी एह़ खुसी पूरी होई ऐ।

³⁰जरूरी ऐ कि सैह़ बधें कने मैं घटें।

³¹“जेह्ड़ा सुअर्गे ते ओंदा ऐ, सैह़ सबते म्हान ऐ, जेह्ड़ा धरतिया ते ओंदा ऐ सैह़ धरतिया दा ऐ, कने धरतिया दियां गल्लां ग्लांदा ऐ, जेह्ड़ा सुअर्गे ते ओंदा ऐ, सैह़ सबना ते ऊपर ऐ।

³²जेह्ड़ा कुच्छ तिन्हीं दिख्या कने सुणेया ऐ, तिसदी गवाही दिंदा ऐ; कने कोई तिसदी गवाहिया पर बसुआस नीं करदा।

³³अपर जिन्हीं तिसदिया गवाहिया पर बसुआस करी लेआ तिन्हीं इसा गल्ला पर छाप लगाई दित्ती कि परमात्मा सच्चा ऐ।

³⁴क्जोकि जिसियो परमात्मैं घल्लेया ऐ, सैह़ परमात्मे दियां गल्लां ग्लांदा ऐ, क्जोकि परमात्मा तिसियो पवित्र आत्मा नापी-नापी करी नीं दिंदा, अपर भरपूरी नैं दिंदा ऐ।

³⁵पिता परमात्मा पुत्तरे नैं बड़ा प्यार रखदा ऐ, कने तिन्हीं सारियां चीज्जां तिसदे हक्के च करी दित्तियां।

³⁶जेह्ड़ा परमात्मे दे पुत्तरे पर बसुआस करदा ऐ, सदा दी ज़िन्दगी तिसदी ऐ; अपर जेह्ड़ा पुत्तरे दी नीं मनदा, सैह़ सदा दी ज़िन्दगिया जो नीं पांगा, अपर परमात्मे दी सज़ा तिस पर रैंह्दी ऐ।”