Read Kangri यूहन्ना 4 Bible Online

यूहन्ना 4 - Kangri bible

यूहन्ना 4

¹भिरी जाह़लू प्रभु जो पता लग्गा कि फरीसी माणुआं सुणेया ऐ कि यीशु यूहन्ना ते जादा चेले बणांदा कने तिन्हां जो बपतिस्मा दिंदा ऐ।

²हलांकि यीशु अप्पु नीं अपर तिसदे चेले बपतिस्मा दिंदे थे,

³ताह़लू सैह़ यहूदिया प्रदेसे जो छड्डी नैं भिरी गलील प्रदेसे जो चली गेआ।

⁴कने तिस जो सामरिया प्रदेसे च होई नैं जाणा जरूरी था।

⁵इसतांई सैह़ सामरिया प्रदेसे दे सूखार नांऐ दे इक्की सैहरे च आया, कने एह़ सैहर तिसा जमीना अल्ल ऐ जेह्ड़ी याकूबे अपणे पुत्तर यूसुफे जो दित्तियो थी।

⁶कने जेह्ड़ा खुअ याकूबे खोदेया था सैह़ खुअ भी तित्थु था। कने यीशु रस्ते च चली नैं थकी गेआ था, इसतांई तिस खुऐ बक्खे इआं ई बेई गेआ। एह़ गल्ल दोपैरा दे बग्त होई।

⁷इतणे च इक्क सामरी जणांस पाणी भरणा आई। यीशुयैं तिसायो ग्लाया, “मिन्जो पाणी पिया।”

⁸क्जोकि तिसदे चेले तां सैहरे च खाणा मुल्लैं लैणां गियो थे।

⁹तिन्नै सामरी जणासा यीशुये नैं ग्लाया, “तू यहूदी सामरी जणासा ते पाणी क्जो मंगा दा ऐ?” क्जोकि यहूदी लोक सामरी लोकां सौगी कोई भी बर्ताब नीं रखदे।

¹⁰यीशुयैं जवाब दित्ता, “जे तू परमात्मे दे वरदाने जो जाणदी, कने एह़ भी जाणदी कि सैह़ कुण ऐ जेह्ड़ा तिज्जो ग्लांदा ऐ, ‘मिन्जो पाणी पिया,’ तां तू तिसते मंगदी, कने सैह़ तिज्जो ज़िन्दगी दा पाणी दिंदा।”

¹¹जणासा तिसियो ग्लाया, “हे सुआमी तिज्जो अल्ल पाणी भरणे जो तां कुच्छ भी नीं ऐ, कने खुअ डुगा ऐ, तां सैह़ ज़िन्दगिया दा पाणी तिज्जो अल्ल कतांह ते आया?

¹²क्या तू अहां दे पूर्वज याकूबे ते बड्डा ऐ? जिन्हीं अहां जो एह़ खुअ खोदी करी बणाया। कने अप्पु भी कने तिन्हां दी औलाद कने डंगरे भी इस खुऐ ते पाणी पींदे थे।”

¹³यीशुयैं तिसा जो जवाब दित्ता, “जेह्ड़ा कोई एह़ पाणी पींगा सैह़ भिरी प्यासा नीं रैंह्गा,

¹⁴अपर जेह्ड़ा कोई तिस पांणिये च पींगा, जेह्ड़ा मैं तिसियो दिंगा, सैह़ भिरी सदा काल तिकर प्यासा नीं हुंगा; अपर जेह्ड़ा पाणी मैं तिसियो दिंगा, तिस च इक्क पांणिये दा झरना बणी जांगा, जेह्ड़ा सदा दी ज़िन्दगी तांई कुढदा रैंह्गा।”

¹⁵सामरी जणांस यीशुये नैं ग्लाणा लग्गी, “हे प्रभु सैह़ पाणी मिन्जो दे तांजे मैं प्यासी नीं रैंह् कने ना पाणी भरणे जो इतणी दूर औयें।”

¹⁶यीशुयैं तिसायो ग्लाया, “घरैं जा, कने अपणे लाड़े जो ऐत्थियो सद्दी लियो।”

¹⁷जणासा जवाब दित्ता, मैं बगैर लाड़ैं ऐ। यीशुयैं ग्लाया तू ठीक ग्लांदी ऐ, “मैं बगैर लाड़े ऐ।

¹⁸क्जोकि तू पंज लाड़े करी चुकियो ऐ, कने जिस माणु सौगी तू हुण ऐ सैह़ भी तेरा लाड़ा नीं। एह़ तैं सच्च ग्लाया।”

¹⁹सामरी जणासा यीशुये नैं ग्लाया, “हे प्रभु मिन्जो लगदा ऐ कि तू भविष्यवक्ता ऐ।

²⁰अहां दे पूर्वजां भी इसी प्हाड़े पर अराधना कित्ती, कने तुहां यहूदी ग्लांदे हन कि सैह़ जगाह जित्थु अराधना करणा चाइदी यरूशलेम सैहरे च ऐ।”

²¹यीशु तिसा नैं ग्लाणा लग्गा, “हे नारी मेरी गल्ला दा बसुआस कर कि सैह़ बग्त ओआ दा ऐ, कि तुहां ना तां इस प्हाड़े पर पिता दी अराधना करी सकगे ना ई यरूशलेम सैहरे च।

²²तुहां सामरी लोक जिसियो नीं जाणदे, तिसदी अराधना करदे हन; कने अहां यहूदी लोक जिसियो जाणदे हन तिसदी अराधना करदे हन; क्जोकि उद्धार यहूदियां बिच्च ते ऐ।

²³अपर बग्त ओआ दा ऐ, कने हुण भी ऐ, जिस च सच्चे भक्त पिता दी अराधना आत्मा कने सच्चाईया नैं करगे, क्जोकि पिता अपणे तांई ऐदेयां भक्तां जो तोपदा ऐ।

²⁴परमात्मा आत्मा ऐ, कने इसतांई जरूरी ऐ कि तिसदी अराधना करणे आल़े आत्मा कने सच्चाईया नैं अराधना करन।”

²⁵जणासा तिसियो ग्लाया, “मैं जाणदी कि मसीह जिसियो ख्रिस्त भी ग्लांदे हन ओणे आल़ा ऐ; जाह़लू सैह़ ओंगा, तां अहां जो सारियां गल्लां दस्सी दिंगा।”

²⁶यीशुयैं तिसा नैं ग्लाया, “मैं सैई ऐ जेह्ड़ा तिज्जो नैं ग्ला करदा ऐ।”

²⁷इतणे च तिसदे चेले बापस आई गै, कने हरान होणा लग्गे कि सैह़ इक्की जणासा नैं गल्लां करा दा ऐ, तमी कुसी जो भी पुछणे दी हिम्मत नीं पेई, “तू क्या चांह़दा ऐ?” या “इसा नैं क्जो गल्लां करा करदा ऐ?”

²⁸ताह़लू जणांस अपणे घड़े छड्डी नैं सैहरे च चली गेई, कने लोकां नैं ग्लाणा लग्गी,

²⁹“ओआ कने दिक्खा, इक्क ऐदेया माणु ऐ, जिन्हीं सब कुच्छ जेह्ड़ा मैं कित्या ऐ, मिन्जो दस्सी दित्ता। कुत्थी ऐई तां मसीह नीं ऐ?”

³⁰एह़ सुणी करी लोक सैहरे ते निकल़ी नैं यीशु अल्ल औणां लग्गे।

³¹इस बिच्च तिसदे चेलेयां यीशुये नैं एह़ विणती कित्ती, “हे गुरू कुच्छ खाई लै।”

³²अपर तिन्हीं अपणे चेलेयां नैं ग्लाया, “मिन्जो अल्ल खाणे तांई देहया खाणा ऐ, जिसियो तुहां नीं जाणदे।”

³³ताह़लू चेले अप्पु च ग्लाणा लग्गे, “जाह़लू अहां ऐत्थु नीं थे, क्या कुणकी गुरू जो खाणे तांई कुच्छ अंदेया?”

³⁴यीशुयैं तिन्हां नैं ग्लाया, “मेरा खाणा एह़ ऐ कि अपणे घल्लणे आल़े दी इच्छा दे मताबक चल्लैं कने तिसदा कम्म पूरा करैं।

³⁵क्या तुहां नीं ग्लांदे, ‘फसला दिया बड्डाईया जो अह्ल्ली तिकर चार मीहने पैयो हन?’ दिक्खा, मैं तुहां नैं ग्लांदा, अपणियां अखीं खोली नैं खेतां पर नजर फेरा कि फसल बडणे तांई पक्की चुकियो ऐ।

³⁶फसला जो बडणे आल़े जो जेह्ड़ी दिहाड़ी मिलदी ऐ, कने सदा दी ज़िन्दगिया तांई फल़ पांदा ऐ, तांजे बाणे आल़ा कने बडणे आल़ा दोयो मिल्ली नैं खुस रैह़न।

³⁷क्जोकि ऐत्थु एह़ गल्ल ठीक बैंहदी ऐ, कि ‘बाणे आल़ा होर ऐ कने बडणे आल़ा होर।’

³⁸मैंई तुहां जो सैह़ खेतां दी फसल बडणे तांई घल्लेया जिस च तुहां मेहनत नीं कित्ती, दूयेयां माणुआं मेहनत कित्ती कने तुहां तिन्हां दिया मेहनता दे फल़े च साझी होये।”

³⁹तिस सैहरे दे मते सामरी लोकां तिसा जणासा दे ग्लाणे नैं यीशु पर बसुआस कित्ता, क्जोकि तिन्नै यीशुये दे बारे च ग्लाया था, “कि इन्हीं सब कुच्छ जेह्ड़ा मैं कित्या, मिन्जो दस्सी दित्ता।”

⁴⁰इसतांई जाह़लू एह़ सामरी तिस अल्ल आये, तां तिस नैं विणती करणा लग्गे, कि अहां दे सैहरे च रैह्। कने सैह़ तित्थु दो दिन तिकर रेह्आ।

⁴¹यीशुये दे वचन सुणी करी मतेआं लोकां बसुआस कित्ता।

⁴²कने तिसा जणासा नैं ग्लाया, “हुण अहां तेरे ग्लाणे पर ई बसुआस नीं करदे; क्जोकि अहां अप्पु ई सुणी लेआ, कने जाणदे हन कि ऐई सच्च बिच्च संसारे दा उद्धार करणे आल़ा ऐ।”

⁴³भिरी दूँ दिनां बाद सैह़ तित्थु ते निकल़ी नैं गलील प्रदेसे जो चली गेआ।

⁴⁴क्जोकि यीशुयैं अप्पु ई गवाही दित्ती कि भविष्यवक्ता अपणे देसे च आदर मान नीं पाई सकदा।

⁴⁵जाह़लू सैह़ गलील प्रदेसे च आया, तां गलीली माणुआं तिसदा सुआगत कित्ता; क्जोकि तिन्हां सब कुच्छ दिख्या था, जेह्ड़ा तिन्हीं यरूशलेम सैहरे च इक्क त्योहारे दे दिने कित्या था, (क्जोकि सैह़ सारे माणु भी इस त्योहारे च सामिल थे)

⁴⁶ताह़लू सैह़ भिरी गलील प्रदेसे दे काना सैहरे च आया जित्थु तिन्हीं पांणिये जो अंगूरा दा रस बणाया था। तित्थु राजे दा इक्क रोमी मुलाजम था जिसदा जागत कफरनहूम सैहरे च बमार था।

⁴⁷सैह़ एह़ सुणी नैं कि यीशु यहूदिया प्रदेस ते गलील प्रदेसे च आई गेआ, तिस अल्ल गेआ कने तिस नैं विणती करणा लग्गा कि चली नैं मेरे जागते जो खरा करी दे, क्जोकि सैह़ मरने आल़ा था।

⁴⁸यीशुयैं तिस नैं ग्लाया, “जाह़लू तिकर तुहां चमत्कार कने अनोखे कम्म नीं दिक्खगे ताह़लू तिकर कदी भी बसुआस नीं करगे।”

⁴⁹राजैं दे मुलाजमें तिस नैं ग्लाया, “हे प्रभु मेरे जागते दी मौत्त होणे ते पैहल्लैं चल,”

⁵⁰यीशुयैं तिस नैं ग्लाया, “घरे जो जा, तेरा जागत जिन्दा ऐ।” तिन्हीं माणुयैं यीशु दी ग्लाईया गल्ला पर बसुआस कित्ता कने चली गेआ।

⁵¹सैह़ रस्ते च ई था कि तिसदे दास तिस नैं आई मिल्ले कने ग्लाणा लग्गे, “तेरा जागत जिन्दा ऐ।”

⁵²तिन्हीं अपणे दासां ते पुछया, “कुस बग्त सैह़ ठीक होणा लग्गा?” तिन्हां तिस नैं ग्लाया, “कल दोपैरा दे इक्क बजे तिसदा बुखार उतरी गेआ था।”

⁵³ताह़लू तिस जागते दा बुढ़ा जाणी गेआ, कि एह़ तिसी बग्त ठीक होएया जिस बग्त यीशुयैं तिस नैं ग्लाया, “तेरा जागत जिन्दा ऐ,” कने तिन्हीं कने तिसदे सारे टबरें बसुआस कित्ता।

⁵⁴एह़ दूआ चमत्कार था जेह्ड़ा यीशुयैं यहूदिया प्रदेसे ते बापस आई नैं गलील प्रदेसे च दस्सेया।