Read Kangri यूहन्ना 5 Bible Online

यूहन्ना 5 - Kangri bible

यूहन्ना 5

¹इन्हां गल्लां ते बाद यहूदी अगुआं दा इक्क त्योहार आया, कने यीशु यरूशलेम सैहरे जो गेआ।

²यरूशलेम सैहरे च भेड्डां दे ओबरे दे फाटके अल्ल इक्क तल़ाह ऐ, जिसियो इब्रानी भासा च बैतसैदा ग्लांदे हन। कने तिसदे चौंन्नी पास्से पंज बरांडे हन।

³जिन्हां च मते बमार, अन्ने, लंगड़े कने सुक्के अंगा आल़े माणु पाणी दे हिलणे दी उम्मीदा च रैंह्दे थे।

⁴क्जोकि खास बग्ते पर परमात्मे दे सुअर्गदूत तल़ाऐ च लौई करी पांणिये जो हिलांदे थे। पांणिये हिलांदे ई जेह्ड़ा कोई पैहल्ले पुज्जदा ऐ, सैह़ खरा होई जांदा था, चाहे तिसदी कोई भी बमारी क्जो ना होयैं।

⁵इन्हां बमारां च इक्क ऐदेया माणु था, जेह्ड़ा ठतियां साल्लां ते बमारिया च पेआ था।

⁶यीशुयैं तिस बमारे जो दिक्खी नैं कने एह़ जाणी नैं कि सैह़ मतेआं दिनां दा इसा हालता च पेआ ऐ, तिसते पुछया, “क्या तू खरा होणा चांह़दा ऐ?”

⁷तिन्हीं बमारें तिसियो जवाब दित्ता, “हे प्रभु जाह़लू सैह़ पांणिये जो हिलांदे तां मिन्जो तल़ाऐ च पजाणे तांई कोई भी मेरी मदत नीं करदा, अपर मेरे पुज्जदे-पुज्जदे कोई दूआ मिन्जो ते पैहल्ले पुज्जी जांदा ऐ।”

⁸यीशुयैं तिस नैं ग्लाया, “उठ अपणे मंजोल़ूये चुक, कने चल फिर।”

⁹सैह़ माणु तिसी बग्त खरा होई गेआ, कने अपणे मंजोल़ूये चुक्की नैं चलणा फिरणा लग्गी पेआ। जिस दिने सैह़ खरा होएया, सैह़ बिस्रामे आल़ा दिन था।

¹⁰इसा गल्ला पर यहूदी अगुऐ तिस बमार माणुये जो जेह्ड़ा खरा होएया था। ग्लाणा लग्गे, “अज्ज तां बिस्रामे आल़ा दिन ऐ, कने मूसा दिया व्यबस्था दे मताबक तिज्जो मंजोल़ू चुकणा ठीक नीं ऐ।”

¹¹भिरी तिन्हीं बमार माणुये तिन्हां जो जवाब दित्ता, “जिन्हीं मिन्जो खरा कित्ता, तिन्हीं मिन्जो ग्लाया, ‘अपणे मंजोल़ूये चुक, कने चल फिर’।”

¹²तिन्हां यहूदी अगुआं तिस माणुये ते पुछया, “सैह़ कुण माणु ऐ, जिन्हीं तिज्जो ग्लाया, ‘मंजोल़ूये चुक कने चल फिर’?”

¹³अपर जेह्ड़ा माणु खरा होई गेआ था, सैह़ नीं जाणदा था कि मिन्जो खरा करणे आल़ा कुण ऐ; क्जोकि यीशु तिसा जगाह च मती भीड़ होणे दिया बज़ाह ते तित्थु ते चली गेआ था।

¹⁴इन्हां गल्लां होणे दे बाद सैह़ बमार माणु यीशुये जो मंदरे दे अँगणे च मिल्ला। यीशुयैं तिस नैं ग्लाया, “दिक्ख तू खरा होई गेआ ऐ; हुण भिरी ते पाप मत करदा, नीं तां बड़े दुख तिज्जो पर आई सकदे हन।”

¹⁵भिरी तिन्हीं माणुये जाई करी यहूदी अगुआं नैं ग्लाई दित्ता कि जिन्हीं मिन्जो खरा कित्या सैह़ यीशु ऐ।

¹⁶इसा बज़ाह ते यहूदी अगुऐ यीशुये जो सताणा लग्गे, क्जोकि सैह़ ऐदेय कम्म बिस्रामे आल़े दिने ई करदा था।

¹⁷इसा गल्ला पर यीशुयैं तिन्हां नैं ग्लाया, “परमात्मा जेह्ड़ा मेरा पिता ऐ, सैह़ हमेसा कम्म करदा ऐ, कने मिन्जो भी तिंआं ई करणा चाइदा।”

¹⁸यीशु दी इसा गल्ला सुणी करी यहूदी अगुऐ तिस जो मारने दी होर भी जादा कोसस करणा लग्गे, क्जोकि सैह़ ना सिर्फ बिस्रामे आल़े दिने दे नियमे जो तोड़दा था, अपर परमात्मे जो अपणा पिता ग्लाई नैं अप्पु जो परमात्मे बराबर बणांदा था।

¹⁹इसा गल्ला पर यीशुयैं तिन्हां नैं ग्लाया, “मैं तुहां नैं सच्च-सच्च ग्लांदा ऐ, पुत्तर अप्पु ते कुच्छ नीं करी सकदा, सिर्फ तिन्हां कम्मां करी सकदा, जेह्ड़ा सैह़ अपणे पिता परमात्मे जो करदे दिक्खदा ऐ। क्जोकि जिन्हां-जिन्हां कम्मां जो सैह़ करदा ऐ तिन्हां जो पुत्तर भी तिसा रीतिया नैं करदा ऐ।

²⁰क्जोकि पिता परमात्मा अपणे पुत्तरे सौगी प्यार रखदा ऐ कने जेह्ड़ा-जेह्ड़ा कम्म सैह़ अप्पु करदा ऐ, अपणे पुत्तरे जो दस्सदा ऐ; कने पुत्तरें इसते भी बड्डे-बड्डे कम्म तिसियो करी नैं दस्सणे तांजे तुहां हरान होन।

²¹जिंआं पिता परमात्मा मरेयां जो ठुआल़दा कने भिरी जिन्दा करदा ऐ, तिंआं ई पुत्तर भी तिन्हां जो चांह़दा ऐ जिन्हां जो जिन्दा करदा ऐ।

²²पिता परमात्मा कुसी दा न्याय नीं करदा, अपर न्याय करणे दा सारा हक्क पुत्तरे जो सौंपी दित्या ऐ,

²³कि सारे लोक जिंआं पिता परमात्मे दा आदर करदे हन तिंआं ई पुत्तरे दा भी आदर करन। जेह्ड़ा पुत्तरे दा आदर नीं करदा, सैह़ पिता परमात्मे दा जिन्हीं तिसियो घल्लेया ऐ, आदर नीं करदा।

²⁴मैं तिज्जो नैं सच्च-सच्च ग्लांदा ऐ, जेह्ड़ा मेरा वचन सुणी नैं मेरे घल्लणे आल़े पर बसुआस करदा ऐ, सदा दी ज़िन्दगी तिसदी ऐ; कने तिस पर सज़ा दा हुक्म नीं हुंदा, अपर तिन्हीं मरने दे बाद भी सदा दी ज़िन्दगी पाई लियो ऐ।

²⁵“मैं तिज्जो नैं सच्च-सच्च ग्लांदा ऐ, सैह़ बग्त ओआ दा ऐ, कने हुण भी ऐ, जिस च मरेयो माणु परमात्मे दे पुत्तरे दी उआज़ा सुणगे, कने जेह्ड़े सुणगे सैह़ जींगे।

²⁶क्जोकि जिस तरीके नैं परमात्मा अप्पु च ज़िन्दगी रखदा ऐ, तिसा रीतिया नैं तिन्हीं पुत्तरे जो भी ज़िन्दगी रखणे दा हक्क दित्या;

²⁷क्जोकि तिसियो संसारे दे सारे लोकां दा न्याय करणे दा भी हक्क दित्या ऐ, इसतांई कि सैह़ माणुये दा पुत्तर ऐ।

²⁸इन्हां गल्लां सुणी करी हरान मत होआ; क्जोकि सैह़ बग्त ओआ करदा ऐ कि जितणे लोक मरेयो हन, सैह़ तिसदी उआज़ सुणी नैं निकल़ी ओंगे।

²⁹जिन्हां खरे कम्म कित्यो हन, सैह़ दुवारी सदा दी ज़िन्दगी पाणे तांई भिरी जिन्दे हुंगे, कने जिन्हां बुरे कम्म कित्यो हन, सैह़ सज़ा पाणे तांई जिन्दे हुंगे।

³⁰“मैं अप्पु ते कुच्छ नीं करी सकदा; जिंआं पिता परमात्मे ते सुणदा ऐ, तिंआं ई न्याय करदा; कने मेरा न्याय सच्चा ऐ, क्जोकि मैं अपणी इच्छा नीं अपर अपणे घल्लणे आल़े दी इच्छा चांह़दा।

³¹जे मैं अप्पु ई अपणे बारे च गवाही दैं तां मेरी गवाही सच्ची नीं होणी।

³²इक्क होर ऐ जेह्ड़ा मेरे बारे च गवाही दिंदा ऐ, कने मैं जाणदा कि जेह्ड़ी गवाही सैह़ मेरे बारे च दिंदा ऐ, सच्ची ऐ।

³³जाह़लू तुहां लोकां जो यूहन्ना बपतिस्मा दैणे आल़े अल्ल मेरे बारे च पुछणे तांई घल्लेया, तां तिन्हीं भी सच्च दी गवाही दित्ती ऐ।

³⁴अपर मैं अपणे बारे च माणु दी गवाही नीं चांह़दा; भिरी भी मैं एह़ गल्लां इसतांई ग्लांदा ऐ, कि तुहां उद्धार पान।

³⁵यूहन्ना तां बल़दे कने चमकदे दीय्ये साइआं था, कने तुहां जो थोड़ी देर तिकर तिसदी जोतिया च मग्न होणा खरा लग्गा।

³⁶अपर मिन्जो अल्ल जेह्ड़ी गवाही ऐ सैह़ यूहन्ना दी गवाहिया ते बड्डी ऐ; क्जोकि जेह्ड़े कम्म पिता परमात्मे मिन्जो पूरा करणे दी जिम्मेवारी दित्तियो मतलब जिन्हां कम्मां जो मैं करदा ऐ, सैई कम्म मेरे गवाह हन, कि मिन्जो मेरे पिता परमात्मे घल्लेया ऐ।

³⁷कने पिता जिन्हीं मिन्जो घल्लेया ऐ, तिन्हीं मेरी गवाही दित्ती ऐ। तुहां ना कदी तिसदी उआज़ सुणी, कने ना तिसदा रूप दिख्या।

³⁸कने तुहां तिसदेयां वचनां जो नीं मनदे, क्जोकि तुहां मिन्जो पर बसुआस नीं करदे जिसियो परमात्मे घल्लेया ऐ

³⁹तुहां पवित्रशास्त्रे च तोपदे हन, कने समझदे हन कि तिस च सदा दी ज़िन्दगी ऐ, कने एह़ पवित्रशास्त्र ई जेह्ड़ा मेरे बारे च गवाही दिंदा ऐ।

⁴⁰अपर भिरी भी तुहां सदा दी ज़िन्दगी पाणे तांई मिन्जो अल्ल औणां नीं चांह़दे।

⁴¹मैं माणुआं ते आदर नीं चांह़दा।

⁴²अपर मैं तुहां जो जाणदा ऐ, कि तुहां च परमात्मे तांई प्यार नीं ऐ।

⁴³मैं अपणे पिता परमात्मे दे हक्के नैं आया ऐ, कने तुहां मिन्जो नीं अपनांदे; अपर जे होर कोई अपणे हक्के नैं औयें, तां तिसियो तुहां अपनाई लैंदे हन।

⁴⁴तुहां मिन्जो च बसुआस किंआं करी सकदे हन, क्जोकि तुहां जेह्ड़े इक्की दूये ते आदर चांह़दे हन। कने सैह़ आदर जेह्ड़ा सिर्फ इक्क सच्चे परमात्मे दे पास्से ते ऐ तिसियो नीं पाणा चांह़दे।

⁴⁵एह़ मत सोचा कि मैं परमात्मे दे सामणै तुहां पर दोस लगांगा; तुहां पर दोस लगाणे आल़ा तां मूसा ऐ जिस पर तुहां आस रखियो ऐ।

⁴⁶क्जोकि जे तुहां मूसा दा बसुआस करदे, तां मेरा भी बसुआस करदे, इसतांई कि तिन्हीं मेरे बारे च लिख्या ऐ।

⁴⁷अपर तुहां मूसा दे लिखेयां लेखा पर बसुआस नीं करदे, तां मेरेयां वचनां पर किंआं बसुआस करगे?”