Read Kangri यूहन्ना 7 Bible Online

यूहन्ना 7 - Kangri bible

यूहन्ना 7

¹इन्हां गल्लां होणे ते बाद यीशु गलील प्रदेसे च घूमदा फिरदा रेह्आ, क्जोकि यहूदी अगुऐ तिसियो मारने दी साजस करा दे थे, इसतांई सैह़ यहूदिया प्रदेसे च घूमणा नीं चांह़दा था।

²यहूदी अगुआं दा इक्क झोपड़ियां दा त्योहार नेड़े था।

³इसतांई तिसदे भाऊआं तिस नैं ग्लाया, “ऐत्थु ते यहूदिया प्रदेसे जो चली जा, कि जेह्ड़े चमत्कार तू करदा ऐ, तिन्हां जो तेरे चेले तित्थु भी दिक्खन, ।

⁴क्जोकि ऐदेया कोई नीं ऐ जेह्ड़ा मसूर होणा चां, कने लुक्की नैं चमत्कार करैं। जे तू एह़ चमत्कार करदा ऐ, तां अपणे आप्पे जो संसारे दे लोकां सामणै प्रगट कर।”

⁵क्जोकि तिसदे भाऊ भी तिस पर बसुआस नीं करदे थे।

⁶ताह़लू यीशुयैं तिन्हां नैं ग्लाया, “अह्ल्ली तिकर मेरा जाणे दा बग्त नीं आया, अपर तुहां तां कुसी भी बग्त जाई सकदे हन।

⁷संसार दे लोक तुहां नैं बैर नीं करी सकदे हन, अपर सैह़ मिन्जो नैं बैर करदे हन, क्जोकि मैं तिन्हां दे बारे च इसा गल्ला दी गवाही दिंदा कि तिन्हां दे कम्म बुरे हन।

⁸तुहां ई तिस त्योहारे जो जा; मैं हुण इस त्योहारे च नीं जाणा, क्जोकि मेरा अह्ल्ली तिकर ठीक बग्त नीं आया।”

⁹सैह़ तिन्हां नैं एह़ गल्लां ग्लाई नैं गलील प्रदेसे च ई रुकी गेआ।

¹⁰अपर जाह़लू तिसदे भाऊ त्योहारे जो चली गै तां यीशु भी तिस त्योहारे जो गेआ, अपर चोरी छुपे गेआ।

¹¹तिस त्योहारे च यहूदी अगुऐ यीशुये जो तोपा दे थे, तिन्हां लोकां ते पुछया, “क्या सैह़ ऐत्थु आई गेआ ऐ?”

¹²कने लोकां बिच्च तिसदे बारे च खुसर फुशर साइआं मतिआं गल्लां होईयां कुच्छ लोक ग्लांदे थे, “सैह़ भला माणु ऐ।” कने कुच्छ ग्लांदे थे, “नीं सैह़ लोकां जो भटकांदा ऐ।”

¹³भिरी भी यहूदी अगुआं दे डरे दे मारे कोई माणु यीशुये दे बारे च खुली नैं नीं ग्लांदा था।

¹⁴अपर जाह़लू त्योहारे दा अधा दिन बीती गेआ, तां यीशु मंदरे दे अँगणे च जाई नैं सिक्षा दैणा लग्गा।

¹⁵तिसदिया सिक्षा ते यहूदी अगुऐ हरान होई नैं ग्लाणा लग्गे, “इसियो पवित्रशास्त्र पढ़े बगैर ज्ञान कतांह ते आई गेआ?”

¹⁶यीशुयैं तिन्हां जो जवाब दित्ता, “मेरी सिक्षा मेरी अपणी नीं ऐ, अपर मेरे घल्लणे आल़े दी ऐ।

¹⁷जे कोई माणु परमात्मे दी इच्छा पर चलणा चां, तां सैई इसा सिक्षा दे बारे च जाणी जांगा, कि एह़ परमात्मे दे पास्से ते ऐ या मैं अपणिया तरफा ते ग्लांदा ऐ।

¹⁸जेह्ड़ा अपणिया तरफा ते कुच्छ ग्लांदा ऐ, सैह़ अपणी बाह-बाह चांह़दा ऐ; अपर जेह्ड़ा अपणे घल्लणे आल़े दी बाह-बाह चांह़दा ऐ सैई सच्चा ऐ, कने तिस च बुरे कम्म नीं।

¹⁹मूसैं तुहां तांई व्यबस्था दित्ती, अपर तुहां च कोई तिन्हां व्यबस्था दे नियमां पर नीं चलदा। इसतांई सच्चाई ऐ कि तुहां मिन्जो मारणा चांह़दे हन।”

²⁰लोकां यीशुये जो जवाब दित्ता, “तिज्जो च दुष्टआत्मां ऐ। कुण तिज्जो मारणा चांह़दा ऐ?”

²¹भिरी यीशुयैं तिन्हां जो जवाब दित्ता, “मैं बिस्रामे आल़े दिन इक्क चमत्कार कित्ता, कने तुहां सारे हरान हुंदे हन।

²²तुहां ग्लांदे हन, कि मूसैं तुहां जो खतणा करणे दा हुक्म दित्या ऐ, इसा बज़ाह ते तुहां बिस्रामे आल़े दिन माणु दा खतणा करदे हन। एह़ नीं कि सैह़ मूसा दे पास्से ते ऐ अपर पूर्वजां ते चली ओआ दा ऐ।

²³तुहां बिस्रामे आल़े दिने माणु दा खतणा इसतांई करदे हन कि मूसा दिया व्यबस्था दा उल्लंघन नीं होयैं, इसतांई तुहां मिन्जो पर गुस्सा करा दे हन, कि मैं बिस्रामे आल़े दिन इक्की माणुये जो पूरिया रीतिया नैं खरा कित्ता।

²⁴मुँ दिक्खी करी न्याय मत करा। अपर ठीक-ठीक न्याय करा।”

²⁵ताह़लू यरूशलेम सैहरे दे कुच्छ लोक ग्लाणा लग्गे, क्या एह़ सैई माणु नीं ऐ, जिसियो यहूदी अगुऐ मारने दी कोसस करा दे हन।

²⁶अपर दिक्खा, सैह़ तां लोकां नैं खुल्लमखुल्ला गल्लां करा दा ऐ कने कोई तिसियो कुच्छ नीं ग्ला करदा ऐ, क्या यहूदी अगुआं जो सच्च-सच्च पता लग्गी गेआ ऐ कि ऐई मसीह ऐ?

²⁷क्जोकि इसियो तां अहां जाणदे हन कि एह़ माणु कुत्थू ते ओंदा ऐ; अपर मसीह जाह़लू ओंगा तां कुसियो पता नीं लगणा कि सैह़ कुत्थू ते आया ऐ।

²⁸ताह़लू यीशु मंदरे दे अँगणे च सिक्षा दिंदे बग्त जोरे नैं ग्लाणा लग्गा, “तुहां मिन्जो जाणदे हन, कने एह़ भी जाणदे हन कि मैं कुत्थू दा ऐ। मैं तां अप्पु ते नीं आया, अपर मेरा घल्लणे आल़ा सच्चा ऐ, तिसियो तुहां नीं जाणदे।

²⁹अपर मैं तिसियो जाणदा ऐ; क्जोकि मैं तिसदे पास्से ते ऐ कने तिन्हीं मिन्जो घल्लेया ऐ।”

³⁰इसा गल्ला पर यहूदी अगुआं तिसियो पकड़णा चाया, अपर कुसियो भी तिसियो हत्थ लगाणे दी हिम्मत नीं पेई, क्जोकि तिसदे मरने दा बग्त अह्ल्ली तिकर नीं आया था।

³¹भिरी भी भीड़ा च मतेआं माणुआं तिस पर बसुआस कित्ता, कने ग्लाणा लग्गे, “मसीह जाह़लू ओंगा तां क्या इसते जादा चमत्कार दस्सगा जेह्ड़े इन्हीं दस्से?”

³²फरीसी माणुआं लोकां जो तिसदे बारे च लुक्की छुपी करी एह़ गल्लां करदे सुणेया; कने प्रधान याजकां कने फरीसियां तिसियो पकड़णे जो सपाई घल्ले।

³³इस गल्ला पर यीशुयैं ग्लाया, “मैं थोड़ी देर तिकर होर तुहां सौगी ऐ, तिसते बाद मैं अपणे घल्लणे आल़े अल्ल चली जाणा।

³⁴तुहां मिन्जो तोपणा, अपर नीं मिलणा; कने जित्थु मैं होणा, तित्थु तुहां नीं आई सकदे।”

³⁵इसा गल्ला सुणी नैं यहूदी अगुऐ अप्पु च ग्लाणा लग्गे, “एह़ कुत्थू जांगा कि अहां जो दुवारी नीं मिलगा? क्या सैह़ तिन्हां लोकां अल्ल जांगा जेह्ड़े ऐत्थु ते तितर-बितर होई करी यूनानी लोकां सौगी रैंह्दे हन, कने तिन्हां जो भी सिक्षा दिंगा?

³⁶एह़ क्या गल्ल ऐ जेह्ड़ी तिन्हीं ग्लाई, कि ‘तुहां मिन्जो तोपगे, अपर मैं तुहां जो नीं मिलगा; कने जित्थु मैं होणा तित्थु तुहां नीं आई सकदे’?”

³⁷त्योहारे दे मुकदे दिन, जेह्ड़ा खास दिन था, तिस दिने यीशु खड़ोई करी जोरे नैं ग्लाणा लग्गा, “जे कोई प्यासा होयैं तां मिन्जो अल्ल औयें कने पीयैं।

³⁸जेह्ड़ा मिन्जो पर बसुआस करगा, जिंआं पवित्रशास्त्र च लिख्या ऐ, ‘तिसदे दिले ते ज़िन्दगी दैणे आल़े पांणिये दियां नदियां बगणा लग्गी पोंगियां।’ ”

³⁹तिन्हीं एह़ वचन पवित्र आत्मा दे बारे च ग्लाया, जेह्ड़ा बसुआस करणे आल़े जो मिलणे आल़ा था; पवित्र आत्मा अह्ल्ली तिकर नीं लुत्थेया था, क्जोकि अह्ल्ली तिकर परमात्मे यीशु दी महिमा जो प्रगट नीं कित्या था।

⁴⁰ताह़लू भीड़ा ते कुच्छ लोकां एह़ गल्लां सुणी नैं ग्लाया, “सच्च बिच्च एह़ सैई भविष्यवक्ता ऐ जिसदी अहां उम्मीद करा दे हन।”

⁴¹होर लोक ग्लाणा लग्गे, “एह़ मसीह ऐ।” अपर कुच्छ लोकां ग्लाया, “क्जो? क्या मसीह गलील प्रदेसे ते ओंगा?

⁴²क्या पवित्रशास्त्रे च एह़ नीं लिख्या कि मसीह दाऊदे दे वंशे ते कने बैतलहम ग्रांऐ ते ओंगा, जित्थु दाऊद रैंह्दा था?”

⁴³तां तिसदिया बज़ाह ते लोकां च बैर पेआ।

⁴⁴तिन्हां च कुच्छ तिसियो पकड़णा चांह़दे थे, अपर कुसियो भी तिसियो हत्थ लगाणे दी हिम्मत नीं पेई।

⁴⁵ताह़लू मंदरे दे पैहरेदार प्रधान याजकां कने फरीसी माणुआं अल्ल बापस आये; तां तिन्हां पैहरेदारां ते पुछया, “तुहां तिसियो क्जो नीं लेई करी आये?”

⁴⁶तिन्हां जवाब दित्ता, “कुणी भी माणुये कदी भी ऐदिआं गल्लां नीं कित्तियां।”

⁴⁷फरीसी माणुआं तिन्हां जो जवाब दित्ता, “क्या तुहां भी भकाइते हन।

⁴⁸क्या यहूदी अगुआं च या फरीसी माणुआं च कुणी भी तिस पर बसुआस कित्ता ऐ।

⁴⁹अपर एह़ माणु जेह्ड़े मूसा दिया व्यबस्था जो नीं जाणदे, परमात्मे दे जरिये श्रापित हन।”

⁵⁰नीकुदेमुसें, जेह्ड़ा यीशु अल्ल पैहल्ले आया था कने तिन्हां च इक्क था, तिन्हां नैं ग्लाणा लग्गा,

⁵¹“क्या अहां दे नियम कुसी माणुये जो, जाह़लू तिकर पैहल्ले तिसदी सुणी नैं जाणी नीं लैन कि सैह़ क्या करदा ऐ, दोसी ठैहरांदी ऐ?”

⁵²तिन्हां तिसियो जवाब दित्ता, “क्या तू भी गलील प्रदेसे दा ऐ? पवित्रशास्त्रे च तोप कने दिक्ख, कि गलील प्रदेसे च कोई भविष्यवक्ता प्रगट नीं होणा।”

⁵³ताह़लू सैह़ अपणे-अपणे घरेयो चली गै।