Read Kangri यूहन्ना 8 Bible Online

यूहन्ना 8 - Kangri bible

यूहन्ना 8

¹यीशु अपणे चेलेयां सौगी जैतून दे प्हाड़े जो गेआ।

²कने भ्यागा सैह़ भिरी मंदरे जो गेआ, तित्थु मते लोक तिस अल्ल आये; कने सैह़ मंदरे दे अँगणे च बेई नैं तिन्हां जो सिक्षा दैणा लग्गा।

³जाह़लू सैह़ एह़ ग्लादा था, ताह़लू सास्त्री कने फरीसी माणु इक्की जणासा जो पकड़ी करी लेई आये जेह्ड़ी ब्यभिचार करदे पकड़ियो थी। कने तिसा जो सबना ते गांह खरेड़ी करी यीशुये नैं ग्लाणा लग्गे।

⁴“हे गुरू एह़ जणांस ब्यभिचार करदी पकड़ियो ऐ।

⁵मूसैं व्यबस्था च अहां जो हुक्म दित्या ऐ कि ऐदिआं जणासा जो पत्थर मारी करी मकाई देआ। तां तू इसा जणासा दे बारे च क्या ग्लांदा ऐ?”

⁶तिन्हां तिसियो परखणे तांई एह़ गल्ल ग्लाई तांजे तिस पर इल्जाम लगाणे तांई कोई गल्ल मिल्ली जां। अपर यीशु निठ्ठा होई करी उंगलिया नैं धरतिया पर लिखणा लग्गा।

⁷जाह़लू सैह़ यीशु ते पुछा दे थे, तां तिन्हीं सिध्धे होई नैं तिन्हां जो जवाब दित्ता, “तुहां च जिन्हीं पाप नीं कित्या, पैहल्ले सैई इसा जो पत्थर मारें।”

⁸कने सैह़ भिरी निठ्ठा होई नैं उंगलिया नैं धरती पर लिखणा लग्गा।

⁹अपर सैह़ इसा गल्ला सुणी करी बड्डेयां ते लेई नैं लोकेयां तिकर, इक्क-इक्क करी नैं तित्थु ते चली गै, कने यीशु किल्ला रेई गेआ, कने जणांस भी तित्थु गांह खड़ोतियो रेई गेई।

¹⁰यीशुयैं सिध्धे होई नैं तिसाते पुछया, “हे नारी, सैह़ कतांह गै? क्या कुणी भी तिज्जो सज़ा दा हुक्म नीं दित्ता?”

¹¹तिन्नै ग्लाया, “हे प्रभु कुणी भी नीं।” यीशुयैं ग्लाया, “मैं भी तिज्जो सज़ा दा हुक्म नीं दिंदा; अपणे घरेयो जा कने भिरी पाप मत करदी।”

¹²यीशुयैं भिरी लोकां नैं ग्लाया, “संसारे दी जोत्ती मैं ऐ; जेह्ड़ा मिन्जो पचांह़ चलदा ऐ, सैह़ नेहरे च नीं चलदा, अपर सैह़ जोत्ती पांदा ऐ, जेह्ड़ी ज़िन्दगी दिंदी ऐ।”

¹³फरीसी माणुआं तिस नैं ग्लाया, “तू अपणी गवाही अप्पु दिंदा ऐ, तेरी गवाही सच्ची नीं ऐ।”

¹⁴यीशुयैं तिन्हां जो जवाब दित्ता, “भले ई मैं अपणी गवाही अप्पु दिंदा ऐ, भिरी भी मेरी गवाही ठीक ऐ, क्जोकि मैं जाणदा कि मैं कतांह ते आया। कने कतांह जाणा? अपर तुहां नीं जाणदे कि मैं कतांह ते आया ऐ या कतांह जो जाणा ऐ।

¹⁵तुहां सरीरे दे मताबक न्याय करदे हन; मैं कुसी दा न्याय नीं करदा।

¹⁶कने जे मैं न्याय करैं भी, तां मेरा न्याय सच्चा ऐ; क्जोकि मैं किल्ला नीं ऐ, अपर मैं ऐ, कने मेरा पिता मिन्जो सौगी ऐ जिन्हीं मिन्जो घल्लेया।

¹⁷कने मूसा दिया व्यबस्था च भी लिख्या ऐ; कि दूँ जणेयां दी गवाही मिल्ली नैं ठीक हुंदी ऐ।

¹⁸इक्क तां मैं अप्पु अपणी गवाही दिंदा, कने दूआ पिता मेरी गवाही दिंदा ऐ जिन्हीं मिन्जो घल्लेया।”

¹⁹तिन्हां तिस नैं ग्लाया, “तेरा पिता कुत्थू ऐ?” यीशुयैं जवाब दित्ता, “ना तुहां मिन्जो जाणदे हन, ना मेरे पिता जो, जे मिन्जो जाणदे, तां मेरे पिता जो भी जाणदे। ”

²⁰एह़ गल्लां तिन्हीं मंदरे दे अँगणे च सिक्षा दिंदे भण्डार घरे च ग्लाईयां, कने कुणी भी तिसियो नीं पकड़ेया, क्जोकि तिसदे मरने दा बग्त अह्ल्ली तिकर नीं आया था।

²¹यीशुयैं भिरी तिन्हां नैं ग्लाया, “मैं चली पेआ, कने तुहां मिन्जो तोपगे कने अपणे पापे च मरगे; जित्थु मैं चलेया तित्थु तुहां नीं आई सकदे।”

²²इसा गल्ला सुणी करी यहूदी अगुऐ ग्लाणा लग्गे, “क्या एह़ अपणे आप्पे जो मारी दिंगा, जेह्ड़ा एह़ ग्ला दा ऐ, ‘जित्थु मैं चलेया तित्थु तुहां नीं आई सकदे’?”

²³यीशुयैं तिन्हां नैं ग्लाया, “तुहां इस संसारे च जन्म लेआ, अपर मैं सुअर्गे ते आया ऐ, तुहां संसारे दे हन, मैं संसार दा नीं ऐ।

²⁴इसतांई मैं तुहां नैं ग्लाया, कि तुहां अपणे पापां च मरगे, क्जोकि जे तुहां बसुआस नीं करगे कि मैं सैई ऐ, तां तुहां अपणे पापां च मरगे।”

²⁵यहूदी अगुऐ तिस नैं ग्लाणा लग्गे, “तू कुण ऐ?” यीशुयैं तिन्हां नैं ग्लाया, “मैं सैई ऐ जेह्ड़ा सुरू ते तुहां नैं ग्लांदा आया ऐ।

²⁶तुहां दे बारे च मिन्जो बड़ा कुच्छ ग्लाणा कने फैसला करणा ऐ; अपर मिन्जो घल्लणे आल़ा सच्चा ऐ, कने जेह्ड़ा मैं तिसते सुणेया ऐ सैई संसारे दे लोकां नैं ग्लांदा ऐ।”

²⁷सैह़ एह़ नीं समझे कि अहां नैं अपणे पिता परमात्मे दे बारे च ग्लांदा ऐ।

²⁸ताह़लू यीशुयैं ग्लाया, “जाह़लू तुहां माणु दे पुत्तरे जो ऊचा उठाई लैंगे, ताह़लू तुहां जाणगे कि मैं सैई ऐ; मैं अप्पु ते कुच्छ नीं करदा, अपर जिंआं मेरे पितैं मिन्जो सखाया, तिंआं ई एह़ गल्लां ग्लांदा ऐ।

²⁹मिन्जो घल्लणे आल़ा मेरे सौगी ऐ; तिन्हीं मिन्जो किल्ला नीं छड्डेया क्जोकि मैं हमेसा सैई कम्म करदा जिसते सैह़ खुस हुंदा ऐ।”

³⁰सैह़ एह़ गल्लां ग्ला दा ई था, कि मते लोकां तिस पर बसुआस कित्ता।

³¹ताह़लू यीशुयैं तिन्हां यहूदियां नैं जिन्हां तिस पर बसुआस कित्या था, ग्लाया, “जे तुहां मेरे वचनां मताबक चलगे, तां सच्च बिच्च तुहां मेरे चेले बणगे।

³²तुहां सच्च जो जाणना, कने सच्च तुहां जो अजाद करगा।”

³³तिन्हां तिस जो जवाब दित्ता, “अहां तां अब्राहमे दे वंशे ते हन, कने कदी कुसी दे गुलाम नीं बणैं। भिरी तू किंआं अहां जो ग्लांदा ऐ कि तुहां अजाद होई जांगे?”

³⁴यीशुयैं तिन्हां जो जवाब दित्ता, “मैं तुहां नैं सच्च-सच्च ग्लांदा ऐ, कि जेह्ड़ा कोई पाप करदा ऐ सैह़ पापे दा गुलाम ऐ।

³⁵गुलाम हमेसा घरैं नीं रैंह्दा; पुत्तर हमेसा रैंह्दा ऐ।

³⁶इसतांई जे पुत्तर तुहां जो अजाद करगा, तां सच्च बिच्च तुहां अजाद होई जाणा।

³⁷मैं जाणदा ऐ, कि तुहां अब्राहमे दे वंशे ते हन; तमी मेरे वचनां जो तुहां नीं अपनांदे हन, इसतांई तुहां मिन्जो मकाणा चांह़दे हन।

³⁸मैं सैई गल्लां ग्ला दा ऐ, जेह्ड़ियां मैं दिक्खियां जाह़लू मैं अपणे पिता सौगी था; कने तुहां सैई करदे हन जेह्ड़ा तुहां अपणे पिता ते सुणेया ऐ।”

³⁹तिन्हां तिसियो जवाब दित्ता, “अहां दा पूर्वज तां अब्राहम ऐ।” यीशुयैं तिन्हां नैं ग्लाया, “जे तुहां अब्राहमे दी औलाद हुंदे तां अब्राहमे साइआं कम्म करदे।

⁴⁰अपर हुण तुहां मिन्जो ऐदेय माणुये जो मकाणा चांह़दे हन, क्जोकि मैं तुहां जो सच्चाईया दे वचन सणाये जेह्ड़े परमात्मे ते सुणेयो थे, ऐदिआं गल्लां तां अब्राहमे भी नीं कित्तियां थियां।

⁴¹तुहां अपणे बुढ़े साइआं कम्म करदे हन।” तिन्हां तिस नैं ग्लाया, “अहां ब्यभिचारे ते नीं जम्मेयो, अहां दा इक्को ई पिता ऐ, मतलब परमात्मा।”

⁴²यीशुयैं तिन्हां नैं ग्लाया, “जे परमात्मा तुहां दा पिता हुंदा, तां तुहां मिन्जो नैं प्यार रखदे; क्जोकि मैं परमात्मे दे पास्से ते आया। मैं अप्पु ते नीं आया, अपर तिन्हीं मिन्जो घल्लेया।

⁴³तुहां मेरी गल्ल क्जो नीं समझदे? इसतांई कि तुहां मेरे वचनां जो अपनाणा नीं चांह़दे।

⁴⁴तुहां अपणे बुढ़े सैताने ते हन, कने अपणे बुढ़े दी इच्छां जो पूरा करणा चांह़दे हन। सैह़ तां सुरू ते ई हत्यारा ऐ कने सच्च नीं ग्लांदा, क्जोकि सच्च तिस च ऐ ई नीं। कने जाह़लू सैह़ झूठ ग्लांदा ऐ, तां सभावे ते ई ग्लांदा ऐ, कने सैह़ झूठा ई नीं अपर झूठ दा भी बुढ़ा ऐ।

⁴⁵मैं जेह्ड़ा सच्च ग्लांदा इसतांई तुहां मेरा बसुआस नीं करदे।

⁴⁶तुहां च कुण मिन्जो पापी ठैहरांदा ऐ? जे मैं सच्च ग्लांदा ऐ, तां तुहां मेरा बसुआस क्जो नीं करदे?

⁴⁷जेह्ड़ा परमात्मे दे पास्से ते हुंदा ऐ, सैह़ परमात्मे दियां गल्लां सुणदा ऐ, कने तुहां इसतांई नीं सुणदे कि परमात्मे दे पास्से ते नीं हन।”

⁴⁸एह़ सुणी नैं यहूदी अगुआं तिस नैं ग्लाया, “क्या अहां ठीक नीं ग्लांदे कि तू सामरी ऐ, कने तिज्जो च दुष्टआत्मा ऐ?”

⁴⁹यीशुयैं जवाब दित्ता, “मिन्जो च दुष्टआत्मा नीं; अपर मैं अपणे पिता दा आदर करदा, कने तुहां मेरा अपमान करदे हन।

⁵⁰अपर मैं अपणी महिमा करवाणा नीं चांह़दा, हाँ इक्क ऐ जेह्ड़ा चांह़दा मेरी महिमा होयैं, कने इसदा न्याय करदा ऐ।

⁵¹मैं तुहां नैं सच्च-सच्च ग्लांदा ऐ, कि जे कोई माणु मेरे वचनां पर चलदा, तां सैह़ सदा काल तिकर नीं मरगा।”

⁵²यहूदियां तिस नैं ग्लाया, “हुण अहां जो पता लग्गी गेआ कि तिज्जो च दुष्टआत्मा ऐ। अब्राहम मरी गेआ, कने भविष्यवाणी करणे आल़े भी मरी गै; कने तू ग्लांदा ऐ, ‘जे कोई मेरे वचनां पर चलगा तां तिस पर सदा काल तिकर मौत्त नीं ओंगी।’

⁵³अहां दा पूर्वज अब्राहम तां मरी गेआ। क्या तू तिसते बड्डा ऐ? कने भविष्यवाणी करणे आल़े भी मरी गै। तू अपणे आप्पे जो क्या समझदा ऐ कि तू कुण ऐ?”

⁵⁴यीशुयैं जवाब दित्ता, “जे मैं अपणी महिमा अप्पु ई करैं, तां मेरी महिमा कुच्छ नीं ऐ; अपर मेरी महिमा करणे आल़ा मेरा पिता ऐ, जिसियो तुहां ग्लांदे हन, कि सैह़ अहां दा परमात्मा ऐ।

⁵⁵तुहां तां तिसियो नीं जाणेया अपर मैं तिसियो जाणदा ऐ। जे मैं ग्लां कि मैं तिसियो नीं जाणदा तां मैं तुहां साइआं झूठा ठैहरगा; अपर मैं तिसियो जाणदा कने तिसदेयां वचनां पर चलदा ऐ।

⁵⁶तुहां दा पूर्वज अब्राहम मेरा दिन दिक्खणे दी आसा ते बड़ा मग्न था; कने तिन्हीं दिख्या कने खुसी मनाई।”

⁵⁷यहूदियां तिस नैं ग्लाया, “अह्ल्ली तिकर तू पजांह़ साल्लां दा भी नीं ऐ, भिरी भी तैं अब्राहमे जो दिख्या ऐ?”

⁵⁸यीशुयैं तिन्हां नैं ग्लाया, “मैं तुहां नैं सच्च-सच्च ग्लांदा ऐ, कि पैहल्ले इसते कि अब्राहम पैदा हुंदा, मैं ऐ।”

⁵⁹ताह़लू तिन्हां तिसियो मारने तांई पत्थर चुके, अपर यीशु पड़दे नैं मंदरे ते निकल़ी गेआ।