Read Kangri यूहन्ना 9 Bible Online

यूहन्ना 9 - Kangri bible

यूहन्ना 9

¹जाह़लू यीशु अपणे चेलेयां सौगी जा दा था, तां जांदे बग्त तिन्हीं इक्की माणुये जो दिख्या, जेह्ड़ा जन्म ते अन्ना था।

²तिसदेयां चेलेयां तिसते पुछया, “हे गुरू कुणी पाप कित्या था कि एह़ अन्ना जम्मेया, इस माणुयैं या इसदे माँ-बुढ़ैं?”

³यीशुयैं जवाब दित्ता, ना तां इन्हीं पाप कित्या था, ना इसदे माँऊ बुढ़े; एह़ इसतांई अन्ना पैदा होएया, तांजे परमात्मे दिया सामर्थी दे कम्म तिस च प्रगट होन।

⁴जिन्हीं मिन्जो घल्लेया ऐ, अहां जो तिसदे कम्म दिनैं ई करणा जरूरी हन; सैह़ रात ओणे आल़ी ऐ जिस च कोई कम्म नीं करी सकदा।

⁵जाह़लू तिकर मैं संसारे च ऐ, ताह़लू तिकर संसारे दी जोत्ती ऐ।

⁶एह़ ग्लाई नैं तिन्हीं धरती पर थुकया, कने तिस थूके नैं चिक्क सेड़ी, कने सैह़ चिक्क अन्ने दियां अखीं पर मल़ी नैं

⁷तिसियो ग्लाया “जा, शीलोह दे कुंडे च अपणा मुँ धोई लै” (शीलोह दा मतलब घल्लेया होएया ऐ)। तिन्हीं जाई नैं मुँ धोत्ता, कने दिक्खदा-दिक्खदा बापस आई गेआ।

⁸ताह़लू तिसदे प्ड़ेसी कने जिन्हां तिसियो पैहल्ले भिख मंगदे दिख्या था, अप्पु च ग्लाणा लग्गे, “क्या एह़ सैई नीं, जेह्ड़ा बेई नैं भिख मंगदा था।”

⁹कुच्छ लोक ग्लाणा लग्गे, “एह़ सैई ऐ, होर ग्लाणा लग्गे, नीं अपर तिस साइआं ऐ, तिन्हीं ग्लाया, मैं सैई ऐ।”

¹⁰ताह़लू सैह़ तिसते पुछणा लग्गे, “तेरियां अखीं किंआं खरी होई गियां?”

¹¹तिन्हीं जवाब दित्ता, “यीशु नांऐ दे इक्की माणुयैं चिक्क सेड़ी, कने मेरियां अखीं पर मल़ी नैं मिन्जो ग्लाया, ‘शीलोह च जाई नैं अपणे मुँऐ धोई लै,’ कने मैं गेआ, कने मुँ धोत्ता कने दिक्खणा लग्गी पेआ।”

¹²तिन्हां तिसते पुछया, “सैह़ माणु कुत्थू ऐ?” तिन्हीं ग्लाया, “मैं नीं जाणदा।”

¹³लोक तिसियो जेह्ड़ा सुरू ते अन्ना था फरीसी माणुआं अल्ल लेई गै।

¹⁴जधैड़ी यीशुयैं चिक्क सेड़ी नैं तिसदियां अखीं खरी करी दित्तियां थियां, सैह़ बिस्रामे आल़ा दिन था।

¹⁵भिरी फरीसी माणुआं भी तिसते पुछया कि तेरियां अखीं किंआं खरियां होईयां। तिन्हीं तिन्हां नैं ग्लाया, तिन्हीं माणुयैं मेरियां अखीं पर चिक्क लगाई भिरी मैं मुँ धोई लेआ, कने हुण दिक्खणा लग्गी पेआ ऐ।

¹⁶इस गल्ला पर कुच्छ फरीसी माणु ग्लाणा लग्गे, “एह़ माणु परमात्मे दे पास्से ते नीं, क्जोकि सैह़ बिस्रामे आल़े दिने नीं मनदा।” दूयेयां माणुआं ग्लाया, “पापी माणु देहय् चमत्कार किंआं दस्सी सकदा ऐ?” तां तिन्हां च बैर पेई गेआ।

¹⁷तिन्हां तिस अन्ने नैं भिरी ग्लाया, “तिन्हीं तेरियां अखीं खोलियां हन। तू तिसदे बारे च क्या ग्लांदा ऐ?” तिन्हीं ग्लाया, “एह़ भविष्यवक्ता ऐ।”

¹⁸अपर यहूदी अगुआं जो बसुआस नीं होएया कि सैह़ अन्ना था कने हुण दिक्खणा लग्गी पेआ ऐ, तां तिन्हां तिसदे माँऊ बुढ़े जो सद्दी नैं

¹⁹तिन्हां ते पुछया, “क्या एह़ तुहां दा जागत ऐ, जिसियो तुहां ग्लांदे हन कि अन्ना पैदा होएया था? भिरी हुण सैह़ किंआं दिक्खणा लग्गी पेआ ऐ?”

²⁰तिसदे माँऊ-बुढ़े जवाब दित्ता, “अहां तां जाणदे हन कि एह़ अहां दा जागत ऐ, कने अन्ना पैदा होएया था।

²¹अपर अहां एह़ नीं जाणदे हन कि एह़ हुण किंआं दिक्खणा लग्गी पेआ ऐ, कने ना एह़ जाणदे हन कि कुणी तिसदियां अखीं खरी करी दित्तियां हन। एह़ बड़ा समझदार ऐ, इसते पुछी लेआ; इन्हीं अपणे बारे च अप्पु दस्सी दैणा।”

²²एह़ गल्लां तिसदे माँऊ बुढ़े इसतांई ग्लाईयां क्जोकि सैह़ यहूदी अगुआं ते डरदे थे, क्जोकि यहूदी अगुऐ सब इक्क होई गियो थे कि जे कोई बसुआस करैं कि यीशु मसीह ऐ, तां सैह़ आराधनालय ते कड्डी दित्ता जां।

²³इसा बज़ाह ते तिसदे माँऊ बुढ़ैं ग्लाया, “एह़ बड़ा समझदार ऐ इसते पुछी लेआ।”

²⁴ताह़लू यहूदी अगुआं तिस माणुये जो जेह्ड़ा अन्ना था, दूई बरी भिरी सद्दी नैं तिसियो ग्लाया, “परमात्मे दी स्तुति कर। अहां तां जाणदे हन कि सैह़ माणु पापी ऐ।”

²⁵तिन्हीं जवाब दित्ता, “मैं नीं जाणदा कि सैह़ पापी ऐ या नीं; मैं इक्क गल्ल जाणदा कि मैं अन्ना था कने हुण दिक्खणा लग्गी पेआ ऐ।”

²⁶तिन्हां तिस नैं भिरी ग्लाया, “तिन्हीं तिज्जो नैं क्या कित्ता? कने किंआं तेरियां अखीं खरी होई गियां?”

²⁷तिन्हीं तिन्हां नैं ग्लाया, “मैं तां तुहां नैं ग्लाई बैठा, कने तुहां नीं सुणेया; हुण दूई बरी क्जो सुणना चांह़दे हन? क्या तुहां भी तिसदे चेले बणना चांह़दे हन?”

²⁸ताह़लू सैह़ तिसदी बुराई करी नैं ग्लाणा लग्गे, “तू ई तिसदा चेला ऐ, अहां तां मूसा दे चेले हन।

²⁹अहां जाणदे हन कि परमात्मैं मूसा नैं गल्लां कित्तियां; अपर तिस माणुये जो नीं जाणदे कि कुत्थू ते आया ऐ।”

³⁰तिन्हीं तिन्हां जो जवाब दित्ता, “एह़ तां हरानिया दी गल्ल ऐ कि तुहां नीं जाणदे कि सैह़ कुत्थू ते आया ऐ, तमी तिन्हीं मेरियां अखीं खरी करी दित्तियां।

³¹अहां जाणदे हन कि परमात्मा पापियां दा नीं सुणदा, अपर जे कोई परमात्मे दा भक्त होये कने तिसदिया इच्छा पर चलदा ऐ तां सैह़ तिसदी सुणदा ऐ।

³²संसारे दे सुरू होणे ते लेई करी अज्जे तिकर एह़ कदी सुणने च नीं आया कि कुणकी जन्मजात दे अन्ने दियां अखीं खरियां करी दित्तियां हन।

³³सिर्फ एह़ ई माणु जेह्ड़ा परमात्मे दे पास्से ते ऐ, सैई ऐदेय कम्म करी सकदा ऐ।”

³⁴तिन्हां तिसियो जवाब दित्ता, “तू बिलकुल पापां च जम्मेया ऐ, तू अहां जो क्या सखांदा ऐ?” ताह़लू तिन्हां तिस माणुये जो आराधनालय ते बाहर कड्डी दित्ता।

³⁵यीशुयैं जाह़लू एह़ सुणेया कि तिन्हां सैह़ माणु बाहर कड्डी दित्ता ऐ, कने जाह़लू तिस नैं मुलाकात होई तां ग्लाया, “क्या तू माणुये दे पुत्तरे पर बसुआस करदा ऐ?”

³⁶तिन्हीं जवाब दित्ता, “हे प्रभु मिन्जो दस्स सैह़ कुण ऐ, तांजे मैं तिस पर बसुआस करैं?”

³⁷यीशुयैं तिस नैं ग्लाया, “तैं तिसियो दिख्या भी ऐ, कने जेह्ड़ा तिज्जो सौगी गल्लां करदा ऐ सैई ऐ।”

³⁸तिन्हीं ग्लाया, “हे प्रभु, मैं तिज्जो पर बसुआस करदा ऐ।” कने तिन्हीं तिसियो प्रणांम कित्ता।

³⁹ताह़लू यीशुयैं ग्लाया, “मैं इस संसारे च न्याय करणे तांई आया, तांजे जेह्ड़े नीं दिक्खदे सैह़ दिक्खन, कने जेह्ड़े दिक्खदे हन सैह़ अन्ने होई जान।”

⁴⁰जेह्ड़े फरीसी माणु तिस सौगी थे तिन्हां एह़ गल्लां सुणी करी तिस नैं ग्लाया, “क्या अहां भी अन्ने हन?”

⁴¹यीशुयैं तिन्हां नैं ग्लाया, “जे तुहां अन्ने हुंदे तां पापी नीं हुंदे; अपर हुण ग्लांदे हन कि अहां दिक्खदे हन, इसतांई तुहां दा पाप बणी रैंह्दा ऐ।”