Read Kangri प्रेरितां दे कम्म 11 Bible Online

प्रेरितां दे कम्म 11 - Kangri bible

प्रेरितां दे कम्म 11

¹भिरी प्रेरितां कने बसुआसी भाऊआं जेह्ड़ा यहूदिया प्रदेसे च थे तिन्हां सुणेया, कि होरनी जातिआं दे लोकां भी परमात्मे दा वचन मन्नी लेआ ऐ।

²कने जाह़लू पतरस यरूशलेम सैहरे च आया, तां खतणा कित्यो यहूदी बसुआसी तिस नैं बैंह्सणा लग्गे,

³“तैं होरनी जातिआं दे लोकां दे घरे जाई करी तिन्हां सौगी खाणा भी खादा।”

⁴ताह़लू पतरसैं जेह्ड़ा कुरनेलियुसे दे घरैं होएया था तिन्हां जो सुरू ते लेई करी इक्क-इक्क करी नैं ग्लाई दित्ता;

⁵“मैं याफा सैहरे च प्रार्थना करा दा था, कने बेहोसी दिया हालता च होई करी इक्क दर्शन दिख्या, कि इक्क बड़ी चादर थाल़े साइआं चौंन्नी कुणेयां ते लटकदी होई, अम्बरे ते लौई करी मिन्जो अल्ल आई।

⁶जाह़लू मैं तिस पर ध्यान दित्ता, तां तिस च धरतिया दी चिड़ियां कने जंगली जानवर कने रैंगणे आल़े जानवर कने अम्बरे दे पंछी दिक्खे;

⁷कने एह़ उआज़ सुणी, ‘हे पतरस उठ, मार कने खा।’

⁸मैं ग्लाया, ‘नीं प्रभु, नीं, क्जोकि कोई अपवित्र या बुरी चीज्ज मेरे मुँऐ च कदी नीं गेई।’

⁹इस जवाबे च अम्बरे ते दूई बरी उआज़ आई, ‘जेह्ड़ा कुच्छ परमात्मैं सुद्ध करी दित्या ऐ, तिसियो असुद्ध मत ग्ला।’

¹⁰त्री बरी भिरी इआं ई होएया; ताह़लू सब कुच्छ भिरी अम्बरे च खींजी लेआ।

¹¹“कने दिक्खा, झट त्रै माणु जेह्ड़े कैसरिया सैहरे ते कुरनेलियुसे मिन्जो अल्ल घल्लेयो थे, तिस घरैं जिस च अहां थे, आई रैह्।

¹²ताह़लू पवित्र आत्मा मिन्जो तिन्हां सौगी बेझिझक होई नैं जाणे जो ग्लाया, कने एह़ छे भाऊ भी मिन्जो सौगी चली पै; कने अहां तिस माणुये दे घरैं गै।

¹³तिन्हीं अहां जो ग्लाया, कि तिन्हीं इक्की सुअर्गदूते जो अपणे घरैं खड़ोत्या दिख्या, जिन्हीं तिस नैं ग्लाया, ‘याफा सैहरे च माणु घल्ली करी शमौने जो जेह्ड़ा पतरस नांऐ ते जाणेयां जांदा ऐ, सद्दी लै।

¹⁴सैह़ तिज्जो नैं ऐदिआं गल्लां ग्लांगा, जिन्हां दिया बज़ाह ते तू कने तेरा सारा घराना उद्धार पांगा।’

¹⁵“जाह़लू मैं गल्लां करणा लग्गा, तां पवित्र आत्मा तिन्हां पर तिस तरीके नैं लुत्थेया जिस तरीके नैं सुरू च अहां ऊपर लुत्थेया था

¹⁶ताह़लू मिन्जो परमात्मे दा सैह़ वचन याद आया; जेह्ड़ा तिन्हीं ग्लाया था, ‘यूहन्ने तां पांणिये च बपतिस्मा दित्ता, अपर तुहां पवित्र आत्मा नैं बपतिस्मा पाणा।’

¹⁷“इसतांई जाह़लू परमात्मे तिन्हां जो भी सैई दान दित्ता, जेह्ड़ा अहां जो परमात्मे यीशु मसीह पर बसुआस करणे ते दित्या था; तां मैं कुण था जेह्ड़ा परमात्मे जो रोकी सकदा था।”

¹⁸एह़ सुणी करी यहूदी बसुआसी चुप रैह्, कने परमात्मे दी तरीफ करणा लग्गे, “ताह़लू तां परमात्मैं होरनी जातिआं जो भी सदा दी ज़िन्दगी तांई पापां ते मन बदलणे दा कने यीशु मसीह पर बसुआस करणे दा दान दित्ता ऐ।”

¹⁹स्तिफनुसे दे मरने दे बाद मते बसुआसियां यरूशलेम सैहरे जो छड्डी दित्ता, कने तितर बितर होई नैं फिरदे-फिरदे फीनीके प्रदेसे कने साइप्रस लाक्के कने सीरिया प्रदेसे दे अन्ताकिया सैहरे च पुज्जे; अपर यहूदियां जो छड्डी करी होर कुसी जो परमात्मे दा वचन नीं सणांदे थे।

²⁰अपर तिन्हां च कुच्छ बसुआसी साइप्रस वासी कने कुरेनी थे, जेह्ड़े अन्ताकिया सैहरे च आई करी यूनानी लोकां च भी प्रभु यीशुये दा सुसमाचार सणाणा लग्गे।

²¹प्रभु दी सामर्थ तिन्हां पर थी, कने बड़े भरी होरनी जाति दे लोकां बसुआस करी नैं प्रभु यीशुये दे पास्से फिरे।

²²जाह़लू तिन्हां दी चर्चा यरूशलेम सैहरे दी कलीसिया च सुणने च आई, ताह़लू तिन्हां बरनबासे जो अन्ताकिया सैहरे जो घल्लेया।

²³सैह़ तित्थु पुज्जी करी, कने परमात्मे दे अनुग्रह जो दिक्खी करी खुस होएया, कने सबना जो सिक्षा दिंदा कि तन मन लगाई करी प्रभुये नैं लिपटी रेह्आ।

²⁴सैह़ इक्क भला माणु था, कने पवित्र आत्मा नैं कने बसुआसे नैं भरोया था; कने होर भी कई लोक प्रभु च आई मिल्ले।

²⁵ताह़लू बरनबासें अन्ताकिया सैहरे जो छड्डी दित्ता, कने शाऊले जो तोपणे तांई तरसुस सैहरे जो चली गेआ।

²⁶जाह़लू सैह़ तिस नैं मिल्ला तां तिसियो अन्ताकिया सैहरे जो लेई आया; कने इआं होएया कि शाऊल कने बरनबास इक्क साल तिकर कलीसिया सौगी मिलदे कने मते लोकां जो प्रभु यीशु दी सिक्षा दिंदे रैह्; कने चेले सबना ते पैहल्लैं अन्ताकिया च ई मसीह कैहलाये।

²⁷तिन्हां दिनां च कुच्छ बसुआसी लोक जेह्ड़े भविष्यवक्ता थे, सैह़ यरूशलेम सैहरे ते अन्ताकिया सैहरे आये।

²⁸तिन्हां च अगबुस नांऐ दा इक्क भविष्यवक्ता खड़ोई करी पवित्र आत्मा दिया प्रेरणा नैं एह़ दस्सणा लग्गा, कि सारे संसारे च बड़ा अकाल पोणा — सैह़ अकाल क्लौदियुस महाराजे दे बग्त पेआ।

²⁹ताह़लू चेलेयां एह़ फैसला कित्ता कि हर इक्क अपणिया-अपणिया दौलता मताबक यहूदिया प्रदेसे च रैहणे आल़ेआं बसुआसी भाऊआं दी मदता तांई कुच्छ घल्लन।

³⁰तिन्हां इआं ई कित्ता; कने बरनबास कने शाऊल दे हत्थ स्याणेयां अल्ल कुच्छ पैसे घल्ली दित्ते।