Read Kangri प्रेरितां दे कम्म 12 Bible Online

प्रेरितां दे कम्म 12 - Kangri bible

प्रेरितां दे कम्म 12

¹तिस बग्त हेरोदेस राजैं कलीसिया दे कुच्छ लोकां जो सताणे तांई तिन्हां जो पकड़ी करी कैदी बणाई लेआ।

²तिन्हीं प्रेरित यूहन्ने दे भाऊये याकूबे जो तलवारा नैं मरवाई दित्ता।

³जाह़लू तिन्हां दिख्या, कि यहूदी माणु इसते खुस हुंदे हन, तां तिन्हीं पतरसे जो भी पकड़ी लेआ। सैह़ दिन अखमीरी रोटिया दे त्योहारे दे दिन थे।

⁴हेरोदेस राजैं पतरसे जो पकड़ी करी जेला च पाई दित्ता, कने चौं-चौं सपाईयां दे पैहरे च रखेया; एह़ सोची नैं कि फसह दे त्योहारे बाद तिस पर दोस लगाणे तांई लोकां सामणै लेई करी औयें।

⁵मते दिनां तांई पतरस जेला च बंद था; अपर कलीसिया तिस तांई लौ लगाई करी परमात्मे नैं प्रार्थना करा दी थी।

⁶जाह़लू हेरोदेस तिसियो लोकां सामणै लेयोणे आल़ा ई था, तिसा राती पतरस दूँ संगल़ां नैं बन्नेया, कने दूँ सपाईयां दे गब्बैं सुतेया था; कने पैहरेदार दरवाजे पर जेला दी रखवाल़ी करा दे थे।

⁷तां दिक्खा चाणचक, प्रभु दा इक्क सुअर्गदूत पतरसे अल्ल आई खड़ोता कने तिसा जेला च लौ चमकी कने तिन्हीं पतरसे दिया पसलिया पर हत्थ मारी करी तिसियो जगाया कने ग्लाया। “उठ, तौल़ी कर।” कने तिसदेयां हत्थां ते संगल़ खुली करी थल्लैं पेई गै।

⁸ताह़लू सुअर्गदूत तिस नैं ग्लाणा लग्गा, “त्यार हो, कने अपणे जूत्तेयां पाई लै।” तिन्हीं सैई कित्ता। भिरी तिन्हीं तिस नैं ग्लाया, “अपणे बाहरे आल़े कपड़े लगाई करी मिन्जो पचांह़ चली पौ।”

⁹सैह़ निकल़ी करी तिसदे पचांह़ चली पेआ; अपर एह़ नीं जाणदा कि जेह्ड़ा कुच्छ सुअर्गदूत करा दा सैह़ सच्च ऐ, अपर एह़ समझेया कि मैं दर्शन दिक्खा दा ऐ।

¹⁰ताह़लू सैह़ पैहल्ले कने दूये पैहरे ते निकल़ी करी तिस लोहे दे फाटके अल्ल पुज्जे, जेह्ड़ा फाटक सैहरे दे पास्सेयो लेई जांदा ऐ। सैह़ तिन्हां तांई अप्पु ई खुली गेआ, कने सैह़ निकल़ी करी गल़िया च होई करी गै, कने इतणे च सुअर्गदूत तिसियो छड्डी करी चली गेआ।

¹¹ताह़लू पतरसैं चौकन्ने होई करी ग्लाया, “हुण मैं सच्च जाणी लेआ ऐ प्रभुयैं अपणा सुअर्गदूत घल्ली करी मिन्जो हेरोदेस दे हत्थां ते छड़वाई लेआ, कने यहूदी अगुआं दी सारी उम्मीदा पर पाणी फेरी दित्ता।”

¹²कने एह़ जाणी नैं परमात्मे तिसियो बचाई लेआ ऐ, पतरस तिस यूहन्ने दिया माँऊ मरियमा दे घरे आया, जेह्ड़ा मरकुस नांऐ ते जाणेया जांदा ऐ। तित्थु मते बसुआसी लोक किठ्ठे होई करी प्रार्थना करा दे थे।

¹³जाह़लू तिन्हीं दरवाजे दी खिड़की ठोरी, तां रूदे नांऐ दी इक्क दासी दिक्खणा आई।

¹⁴पतरसे दी उआज़ पणछैणी करी तिन्नै दरवाजा नीं खोलेया, अपर दौड़ी करी अंदर गेई कने दस्सेया कि पतरस दरवाजे पर खड़ोत्या ऐ।

¹⁵ताह़लू तिन्हां तिसा नैं ग्लाया, “तू पागल ऐ।” अपर सैह़ बसुआसे नैं ग्लाणा लग्गी कि पतरस ई ऐ। ताह़लू तिन्हां ग्लाया, “तिसदा सुअर्गदूत होणा।”

¹⁶अपर पतरस दरवाजे ठोरदा ई रेह्आ, अपर तिन्हां खिड़की खोली, कने तिस जो दिक्खी करी हरान होई गै।

¹⁷ताह़लू तिन्हीं तिन्हां जो हत्थे नैं सणक लगाई कि चुप रेह्आ; कने तिन्हां जो ग्लाया कि प्रभु कुस तरीके नैं तिसियो जेला ते कड्डी करी लेई आया ऐ। भिरी ग्लाणा लग्गा, “याकूब कने भाऊआं जो एह़ गल्ल दस्सी दिनेयों।” ताह़लू निकल़ी करी दूईआ जगाह चली गेआ।

¹⁸भ्यागा जेला अंदर सपाईयां बिच्च बड़ी भगदड़ मची गेई कि पतरसे सौगी क्या होएया।

¹⁹जाह़लू हेरोदेस राजैं तिसियो तोपणे दा हुक्म दित्ता, कने सैह़ नीं मिल्ला, तां पैहरेदारां दी जांच करी नैं तिन्हां जो मारने दा हुक्म दित्ता; कने सैह़ यहूदिया प्रदेसे जो छड्डी करी कुच्छ बग्त तांई कैसरिया सैहरे च जाई करी रैहणा लग्गा।

²⁰हेरोदेस राजा सूर कने सैदा सैहरे दे लोकां ते बड़ा गुस्सा था। इसतांई सैह़ इक्क मन होई करी तिस अल्ल आये, कने बलास्तुसे जो जेह्ड़ा राजे दा इक्क कर्मचारी था, मनाई करी मेल-जोल करवाणा चांह़दे थे; क्जोकि राजे दे देसे ते तिन्हां दे देसे दा पालण-पोसण हुंदा था।

²¹हेरोदेस राजा ठैहरायो दिन राजे आल़े कपड़े पैहनी करी सिंहासणे पर बेई गेआ, कने तिन्हां जो भाषण दैणा लग्गा।

²²ताह़लू लोक ग्लाई उठे, “एह़ तां माणुये दा नीं परमात्मे दी उआज़ ऐ।”

²³तिस बग्त प्रभु दे इक्की सुअर्गदूतैं इकदम तिसियो बमार करी दित्ता, क्जोकि तिन्हीं परमात्मे दी महिमा नीं कित्ती; कने तिस च कीड़े पेई गै जेह्ड़े तिसियो खाणा लग्गे कने सैह़ मरी गेआ।

²⁴अपर परमात्मे दा वचन बधदा कने फैलदा गेआ।

²⁵जाह़लू बरनबास कने शाऊल अपणी सेवा पूरी करी बैठे तां यूहन्ने जो जेह्ड़ा मरकुस नांऐ ते जाणेया जांदा ऐ, सौगी लेई करी यरूशलेम सैहरे ते सीरिया प्रदेसे दे अन्ताकिया सैहरे च बापस आये।