Read Kangri प्रेरितां दे कम्म 13 Bible Online

प्रेरितां दे कम्म 13 - Kangri bible

प्रेरितां दे कम्म 13

¹अन्ताकिया सैहरे दी कलीसिया च मते भविष्यवक्ता कने सिक्षा दैणे आल़े थे; मतलब बरनबास कने शमौन जिसियो नीगर भी ग्लांदे थे। कने लूकियुस कुरेनी, कने देसे दे चौथाई हिस्से दे राजा हेरोदेसे दा दूदभाऊ मनाहेम, कने शाऊल।

²जाह़लू सैह़ ब्रत रखी करी परमात्मे दी अराधना करा दे थे, तां पवित्र आत्मा ग्लाया, “मिन्जो तांई बरनबासे कने शाऊले जो तिसा सेवा तांई लग्ग करा जिस तांई मैं तिन्हां जो सद्देया ऐ।”

³ताह़लू तिन्हां ब्रत रखी करी प्रार्थना कित्ती कने तिन्हां पर हत्थ रखी नैं तिन्हां जो परमात्मे दे कम्म करणे तांई घल्ली दित्ता।

⁴शाऊल कने बरनबास पवित्र आत्मा दे घल्लेयो अन्ताकिया सैहरे ते सिलूकिया सैहरे जो चली गै; कने तित्थु ते समुंदरी जाह्जे पर चढ़ी करी साइप्रस टापू जो चली पै;

⁵कने सलमिस सैहरे च पुज्जी करी, परमात्मे दा वचन यहूदियां दे आराधनालयां च सणाया। यूहन्ना मरकुस तिन्हां दा सेवक था।

⁶सैह़ सारे तिस टापूये ते यात्रा करदे-करदे पाफुस सैहरे तिकर पुज्जे। तित्थु तिन्हां जो बारयीशु नांऐ दा इक्क यहूदी जादूगर कने झूठा भविष्यवक्ता मिल्ला।

⁷सैह़ हाकम सिरगियुस पौलुसे सौगी था, जेह्ड़ा अक्लमंद माणु था। तिन्हीं हाकमे बरनबासे कने शाऊले जो अपणे अल्ल सद्दी नैं परमात्मे दा वचन सुणना चाया।

⁸अपर इलीमास जादूगरें, (क्जोकि ऐई तिसदे नांऐ दा मतलब ऐ) तिन्हां दा बरोध करी नैं हाकमे जो प्रभु यीशु पर बसुआस करणे ते रोकणा चाया।

⁹ताह़लू शाऊलें जिसदा नां पौलुस भी ऐ, पवित्र आत्मा नैं भरोई करी जादूगरे बक्खे टक लगाई करी दिख्या कने ग्लाणा लग्गा,

¹⁰“हे सारे कपट नैं कने चतुराईया नैं भरेयो सैताने दी औलाद, संकल कने धार्मिकता दे बैरी, क्या तू प्रभु दे सिध्धेयां रस्तेयां जो टेड़ा करणा नीं छड्डणा।”

¹¹हुण दिक्ख, “प्रभु दी सज़ा तिज्जो मिलगी; कने तू थोड़े बग्त तिकर अन्ना रैंह्गा कने सूरजे जो नीं दिक्खगा” ताह़लू इकदम धुंधलापन कने नेहरा छाई गेआ, कने सैह़ तां-तुंह टटोलना लग्गा तांजे कोई तिसदा हत्थ पकड़ी करी चलणे तांई तिसदी मदत करैं।

¹²ताह़लू हाकमे जेह्ड़ा होएया था तिसियो दिक्खी करी कने प्रभु दी सिक्षा ते हरान होई करी प्रभु यीशु पर बसुआस कित्ता।

¹³पौलुस कने तिसदे साथी पाफुस सैहरे ते समुंदरी जाह्जे च बेई करी पन्फूलिया प्रदेसे दे पीरगे सैहरे च आये; कने यूहन्ना मरकुस तिन्हां जो छड्डी करी यरूशलेम सैहरे जो बापस आई गेआ।

¹⁴पीरगे सैहरे ते गांह जाई करी पिसिदिया सैहरे ते दे अन्ताकिया सैहरे च पुज्जे; कने बिस्रामे आल़े दिन आराधनालय च जाई करी बेई गै।

¹⁵मूसा दी व्यबस्था कने भविष्यवक्ता दी कताब पढ़णे ते बाद आराधनालय देयां अधिकारियां तिन्हां जो संदेसा घल्लेया, “हे भाऊओ, जे लोकां दियां सिक्षा तांई तुहां दे मने च कोई गल्ल ऐ तां दस्सा।”

¹⁶ताह़लू पौलुसैं खड़े होई करी कने हत्थे नैं सणक लगाई करी तिन्हां जो सांत करी नैं ग्लाया, “हे इस्राएली लोको, परमात्मे ते डरणे आल़ेयो सुणा,

¹⁷इन्हां इस्राएली लोकां दे परमात्मैं तुहां जो चुणी लेआ, कने जाह़लू एह़ माणु मिस्र देसे च परदेसी होई करी रैंह्दे थे, तां तिन्हां दी तरक्की कित्ती; कने बड़िया सामर्थी नैं कड्डी अंदा।

¹⁸सैह़ कोई चाल़ी साल तिकर सुनसाण जगाह च तिन्हां जो सम्भालदा रेह्आ,

¹⁹कने कनान देसे च सतां जातिआं दा नास करी नैं तिन्हां दा देस अपणे लोकां जो विरासत च देई दित्ता।

²⁰इस सारे कम्मे जो करणे तांई तकरीबन साढे चार सौ साल लग्गे, कने इसते बाद तिन्हीं शमूएल भविष्यवक्ता तिकर तिन्हां च न्यायी ठैहराये।

²¹जाह़लू शमूएल अह्ल्ली तिकर भी तिन्हां दा अगुआ था, ताह़लू तिन्हां इक्क राजे दी मांग कित्ती, तां परमात्मैं बिन्यामीन दे गोत्रे च इक्क माणु, मतलब कुसी दे पुत्तर शाऊले जो तिन्हां दा राजा बणाया, कने तिन्हीं इस्राएली लोकां पर चाल़ी साल राज्ज कित्ता।

²²भिरी परमात्मे शाऊले जो राजे दी पदविया ते हटाई करी दाऊदे जो तिन्हां दा राजा बणाया; जिसदे बारे च तिन्हीं गवाही दित्ती, ‘मिन्जो इक्क माणु, यिशै दा पुत्तर दाऊद, मेरे मने मताबक मिल्ली गेआ ऐ; सैह़ ई मेरी सारी इच्छा पूरी करगा।’

²³“इसदे वंश च परमात्मे अपणे वादे मताबक इस्राएल देसे दे लोकां अल्ल इक्क उद्धार करणे आल़े, मतलब यीशुये जो घल्लगा।

²⁴जिसदे ओणे ते पैहल्ले यूहन्ने सारेयां इस्राएली लोकां च मन बदलणे दे बपतिस्में दा प्रचार कित्ता।

²⁵जाह़लू यूहन्ना अपणी सेवा पूरी करणे पर था, तां तिन्हीं ग्लाया, ‘तुहां मिन्जो क्या समझदे हन, मैं सैह़ मसीह नीं। अपर दिक्ख, मेरे बाद इक्क ओआ दा ऐ, सैह़ मिन्जो ते बड़ा म्हान ऐ, जिसदेयां पैरां दे मैं जूत्तेयां दे तस्मेआं दियां गठ्ठी भी मैं खोलणे जोग्गा नीं।’

²⁶“हे भाऊओ, तुहां जेह्ड़े अब्राहमे दी औलाद हन; कने तुहां लोक जेह्ड़े परमात्मे ते डरदे हन, तुहां अल्ल परमात्मे यीशु मसीह दे बारे च एह़ संदेस घल्लेया ऐ, जेह्ड़ा लोकां जो पापां ते छुटकारा दिंदा ऐ।

²⁷यरूशलेम सैहरे च रैहणे आल़ेआं कने तिन्हां देयां अधिकारियां, ना यीशु मसीह जो पणछैणया कने ना ई भविष्यवक्तां दी गल्लां समझियां, जेह्ड़ियां हर बिस्रामे आल़े दिन पढ़ियां जांदियां हन, इसतांई तिसियो दोसी मन्नी करी तिन्हां गल्लां जो पूरा कित्ता।

²⁸तिन्हां मारने जोग्गा कोई दोस तिस च नीं पाया, तमी पिलातुस हाकमे नैं विणती कित्ती, कि सैह़ मारी दित्ता जां।

²⁹जाह़लू तिन्हां तिसदे बारे च पवित्रशास्त्रे च लिखियां सारियां गल्लां पूरियां कित्तियां, तां तिसियो सूल़िया ते लौआई करी कब्रा च रखेया।

³⁰अपर परमात्मैं तिसियो मरेयां च जिन्दा कित्ता,

³¹कने सैह़ तिन्हां जो जेह्ड़े तिस सौगी गलील प्रदेसे ते यरूशलेम सैहरे च आएयो थे, मतेआं दिनां तिकर चेलेयां जो दुस्सदा रेह्आ; लोकां सामणै हुण सैई जिन्हां तिसियो दिख्या ऐ गवाह हन।

³²“कने अहां तिज्जो तिस वादे जो जेह्ड़ा पूर्वजां नैं कित्या था, एह़ सुसमाचार सणांदे हन,

³³कि परमात्मैं यीशुये जो मरेयां ते जिन्दा करी नैं, सैई वादा अहां दिया औलादी तांई पूरी कित्ता; जिंआं भजन संहिता दे दूये भजने च परमात्मे मसीह दे बारे च ग्लाया ऐ; ‘तू मेरा पुत्तर ऐ; कने अज्ज मैं तेरा पिता बणी गेआ ऐ।

³⁴कने तिसदे इस तरीके नैं मरेयां ते जिन्दे होणे दे बारे च भी कि सैह़ कदी नीं सड़े, परमात्मैं एह़ ग्लाया ऐ, जिंआं मैं दाऊद राजे पर कित्तियो पवित्र कने अटल आसीष तिज्जो पर भी दिंगा।

³⁵इसतांई दाऊदैं इक्क होर अपणे भजने च भी ग्लाया ऐ, तू अपणे पवित्र माणुआं जो सड़नां नीं दिंगा।’

³⁶“क्जोकि दाऊद तां परमात्मे दिया इच्छा मताबक अपणे बग्ते च सेवा करी नैं मरी गेआ, कने अपणे पूर्वजां च जाई मिल्ला, कने सड़ी भी गेआ।

³⁷दाऊद अपणे बारे च नीं अपर यीशुये दे बारे च ग्लादा था, जिसियो परमात्मैं मरेयां ते जिन्दा कित्ता, सैह़ सड़ी भी नीं सकेया।

³⁸“इसतांई, हे भाऊओ, तुहां जाणी लेआ कि इसदिया बज़ाह ते ई पापां दी माफी दा समाचार तुहां जो दित्या जांदा ऐ;

³⁹कने जिन्हां गल्लां च तुहां मूसा दिया व्यबस्था दिया बज़ाह ते बेकसूर नीं ठेरी सकदे थे, तिन्हां सारेयां च हर इक्क बसुआस करणे आल़ा यीशु मसीह दे जरिये बेकसूर ठैहरदा ऐ।”

⁴⁰इसतांई चौकन्ने रेह्आ, इआं ना होयैं कि जेह्ड़ा भविष्यवक्ता दियां कताबा च आया ऐ, तुहां पर भी आई पोयैं।

⁴¹“‘हे निंदा करणे आल़ेयो, दिक्खा कने हरान होई करी मरी जा; क्जोकि मैं तुहां दे दिनां च इक्क कम्म करदा ऐ, एह़ कम्म कि जे कोई तुहां नैं तिसदी निंदा करैं, तां तुहां कदी बसुआस नीं करगे।’”

⁴²जाह़लू पौलुस कने बरनबास आराधनालय ते बाहर निकल़ा दे थे, ताह़लू लोक तिन्हां नैं विणती करणा लग्गे, कि अगले बिस्रामे आल़े दिनैं अहां जो एह़ गल्लां भिरी सणाईयां जान।

⁴³जाह़लू आराधनालय दे लोक दी सभा उठी गेई तां यहूदी माणुआं कने यहूदी मत आल़े मते सारे भक्त पौलुसे दे कने बरनबासे पचांह़ चली पै; कने तिन्हां तित्थु माणुआं नैं गल्लां करी नैं समझाया कि परमात्मे दे अनुग्रह च बणी रेह्आ।

⁴⁴दूये बिस्रामे आल़े दिन सैहरे दे सारे लोक परमात्मे दे वचन सुणने जो किठ्ठे होई गै।

⁴⁵अपर यहूदी अगुऐ अपणे यहूदी लोकां दियां भीड़ा जो दिक्खी करी गुस्से नैं भरोई गै, कने निंदा करदे-करदे पौलुसे दियां गल्लां दा बरोध च ग्लाणा लग्गे।

⁴⁶ताह़लू पौलुस कने बरनबास निडर होई करी ग्लाणा लग्गे, “जरूरी था कि परमात्मे दा वचन पैहल्ले तुहां जो सणाया जांदा; अपर जाह़लू तुहां तिसियो नकारी दित्ता, कने अपणे जो सदा दी ज़िन्दगिया जोग्गा ठैहरांदे, तां दिक्खा, अहां होरनी जातिआं दे लोकां अल्ल जांदे हन।

⁴⁷क्जोकि प्रभुयैं अहां जो एह़ हुक्म दित्या ऐ, मैं तिज्जो होरनी जातिआं तांई जोत्ती ठैहराया ऐ, कने तुहां दे जरिये सारे संसारे पर उद्धार होयैं, तांजे तुहां पूरे संसारे दे लोकां जो उद्धारे दा रस्ता दस्सी सकन।”

⁴⁸एह़ सुणी करी होर जातिआं खुस होईयां, कने परमात्मे दे वचन दी महिमा करणा लग्गे; कने जितणे भी सदा दी ज़िन्दगिया तांई ठैहराये गियो थे, तिन्हां बसुआस कित्ता।

⁴⁹ताह़लू प्रभु दा वचन तिस सारे देसे च फैलणा लगा।

⁵⁰अपर यहूदी अगुआं ऊचे कुल दियां भक्त जणासां जो कने सैहरे दे खास लोकां जो भड़काया, कने पौलुस कने बरनबास दे खलाफ जुल्म करवाई करी तिन्हां जो अपणे लाक्के ते कड्डी दित्ता।

⁵¹ताह़लू पौलुस कने बरनबास तिन्हां सामणै अपणे पैरां दिया धूड़ी झाड़ी करी इकुनियुम सैहरे जो चली गै।

⁵²कने अन्ताकिया सैहरे च चेले खुसिया नैं कने पवित्र आत्मा नैं भरोई गै।