Read Kangri प्रेरितां दे कम्म 17 Bible Online

प्रेरितां दे कम्म 17 - Kangri bible

प्रेरितां दे कम्म 17

¹भिरी पौलुस कने सीलास अम्फिपुलिस कने अपुल्लिनिया सैहरे ते होई करी थिस्सलुनीक सैहरे च आये, जित्थु यहूदियां दा इक्क आराधनालय था।

²पौलुस अपणिया रीतिया मताबक तिन्हां अल्ल गेआ, कने त्रै बिस्रामे आल़े दिन तिकर तिन्हां सौगी पवित्रशास्त्रां पर गल्लबात कित्ती;

³कने तिन्हां दा मतलब खोली-खोली नैं समझांदा गेआ कि मसीह जो दुख झेलणा कने मरेयां ते जिन्दा होणा, जरूरी था; “कने ऐई यीशु जिसदे बारे च मैं तुहां जो समाचार सणा करदा ऐ, मसीह ऐ।”

⁴तिन्हां च कितणेयां यहूदियां, कने यूनानी भक्तां च मतेआं, कने मतिआं भरी अक्लमंद जणासा बसुआस करी लेआ, कने पौलुस कने सीलासे सौगी मिल्ली गै।

⁵अपर यहूदियां गुस्से नैं भरोई करी कुच्छ बाजारू माणुआं जो कने कुच्छ बुरे माणुआं जो अपणे सौगी लेआ, कने भीड़ कठ्ठेरी करी सैहरे च दंगा करणा लग्गे, कने यासोने दे घरैं हमला करी नैं पौलुस कने सीलासे जो लोकां सामणैं अणने दी कोसस कित्ती।

⁶सैह़ तिन्हां जो तित्थु नीं मिल्ले तां सैह़ बकदे-बकदे यासोने जो कने कुच्छ बसुआसी भाऊआं जो सैहरे देयां हाकमा सामणै घसीटी करी लेई आये, “एह़ लोक जिन्हां संसारे जो उल्टा पुलटा करी दित्या ऐ, सैह़ ऐत्थु भी आई गियो हन।

⁷यासोने तिन्हां जो अपणे घरैं रखेया ऐ। एह़ सारे दे सारे एह़ ग्लांदे हन कि यीशु राजा ऐ, कने कैसरे देयां हुक्मां दा बरोध करदे हन।”

⁸तिन्हां माणुआं जो कने सैहरे देयां हाकमा जो एह़ सणाई करी डराई दित्ता।

⁹इसतांई तिन्हां यासोने कने बाक्कि लोकां जो जमानत लेई करी तिन्हां जो छड्डी दित्ता।

¹⁰भिरी बसुआसी भाऊआं झट रातों-रात पौलुसे जो कने सीलासे जो बिरीया सैहरे जो घल्ली दित्ता; कने सैह़ तित्थु पुज्जी करी यहूदियां दे आराधनालय च गै।

¹¹एह़ माणु तां थिस्सलुनीक सैहरे दे यहूदी माणुआं ते जादा खरे थे कने इन्हां लोकां पूरा मन लगाई करी वचन ग्रहण कित्ता, कने हर रोज पवित्रशास्त्रां च तोपदे रैह् कि एह़ गल्लां इआं ई हन कि नीं।

¹²इसतांई तिन्हां च मतेआं, कने यूनानी अक्लमंद जणासां च कने मर्दां च मतेआं बसुआस कित्ता।

¹³अपर जाह़लू थिस्सलुनीक सैहरे दे यहूदी माणु जाणी गै कि पौलुस बिरीया सैहरे च भी परमात्मे दा वचन सणांदा ऐ, तां सैह़ तित्थु जाई करी भी दंगे करणा लग्गे।

¹⁴ताह़लू बसुआसी भाऊआं झट पौलुसे जो घल्ली दित्ता कि समुंदरे कनारे चली जां; अपर सीलास कने तीमुथियुस बिरीया सैहरे च रैह्।

¹⁵सैह़ लोक जेह्ड़े पौलुसे जो लेई करी जा दे थे, तिस सौगी एथेंस सैहरे तिकर गै; अपर सीलासे कने तीमुथियुसे तांई एह़ हुक्म दित्ता कि तिस अल्ल तौल़ी-तौल़ी ओन।

¹⁶जाह़लू पौलुस एथेंस सैहरे च तिन्हां दा इन्तजार करा दा था, तां पूरे सैहरे च मतिआं मूर्तियां जो दिक्खी करी तिसदा मन बड़ा उदास होई गेआ।

¹⁷इसतांई सैह़ आराधनालय च यहूदियां कने भक्तां नैं, कने चौके च जेह्ड़े लोक तिस नैं मिलदे थे तिन्हां नैं हर रोज बैंह्स बसाई करदा था।

¹⁸ताह़लू इपिकूरी कने स्तोईकी ज्ञानियां ते कुच्छ तिस नैं गल्लबात करणा लग्गे, कने कुच्छ ग्लाणा लग्गे, “एह़ बक-बक करणे आल़ा क्या ग्लाणा चांह़दा ऐ?” अपर दूयेयां ग्लाया, “सैह़ होरनी देवतेयां दा प्रचार करणे आल़ा लगदा ऐ,” क्जोकि सैह़ यीशुये दे जिन्दे होणे दा सुसमाचार सणांदा था।

¹⁹ताह़लू सैह़ तिसियो अपणे सौगी अरियुपगुस नांऐ दिया सभा जो लेई गै कने पुछया, “क्या अहां जाणी सकदे हन कि एह़ नौई गल्ल जेह्ड़ी तू सणांदा, क्या ऐ।

²⁰क्जोकि तू अनोखियां गल्लां अहां जो सणांदा ऐ, इसतांई अहां जाणना चांह़दे हन कि इन्हां दा क्या मतलब ऐ।”

²¹(इसतांई सारे एथेंसवासी कने परदेसी जेह्ड़े तित्थु रैंह्दे थे, नौईआं-नौईआं गल्लां करणा कने सुणने दे सिवाय होर कोई कम्म नीं करदे थे।)

²²ताह़लू पौलुस अरियुपगुस नांऐ दिया सभा बिच्च खड़ोई करी ग्लाणा लग्गा, “हे एथेंस देयो लोको, मैं दिक्खदा ऐ कि तुहां हर गल्ला च देवतेयां जो बड़े मन्नणे आल़े हन।

²³क्जोकि मैं घूमदा-घूमदा जाह़लू तुहां दियां पूजणे आल़िआं चीज्जां जो दिक्खदा था, तां इक्क ऐदई वेदी दिक्खी, जिसा पर लिख्या था, ‘अणजाण परमात्मे तांई।’ इसतांई जिसियो तुहां बगैर जाणे तिसदी अराधना करदे हन, मैं तुहां जो तिसदा समाचार सणांदा ऐ।

²⁴“जिन्हीं परमात्मैं धरतिया कने तिसदियां सारियां चीज्जां जो बणाया, सैह़ सुअर्ग कने धरती दा मालक होई करी, हत्थे दे बणाया मंदरा च नीं रैंह्दा;

²⁵ना कुसी चीज्जा दी जरूरता दिया बज़ाह ते माणुआं दे हत्थां दी सेवा लैंदा ऐ, क्जोकि सैह़ अप्पु ई सबना जो ज़िन्दगी कने सांस कने सब कुच्छ दिंदा ऐ।

²⁶इक्की ई माणुये ते तिन्हीं माणुआं दियां सारियां जातिआं पूरिया धरतिया पर रैहणे तांई बणाईयां हन; कने तिन्हां दे ठैहरायो बग्त कने रैहणे आल़ी जगाह दी सीमां इसतांई बन्नी दित्तियां हन

²⁷परमात्मे एह़ तां कित्ता कि लोक तिसियो तोपन, कने सायद होई सकदा ऐ कि तिन्हां जो तोपदे-तोपदे मिल्ली भी जां, क्जोकि सच्च बिच्च सैह़ अहां सबना दे नेड़े ऐ।

²⁸क्जोकि तिस च अहां दी ज़िन्दगी कने चलणा फिरणा मतलब अहां मजबूत बणी रैंह्दे हन; ठीक तिंआं ई जिंआं तुहां दे कई कवियां भी ग्लाया ऐ, ‘अहां तां तिसदे ई वंश भी हन।’

²⁹“इसतांई अहां परमात्मे दी औलाद होणे दिया बज़ाह ते अहां दी एह़ सोच गलत ऐ कि परमात्मे दा रूप सोन्ने चाँदी, पत्थरे दा, जेह्ड़े माणु दी कारीगिरिया नैं, कने माणुआं दिया सोचा मताबक बणाया ऐ ।

³⁰इसतांई परमात्मैं लोकां दिया मूर्खता पर ध्यान नीं दित्ता, अपर हुण हर जगाह सारे माणुआं जो मने बदलणे दा हुक्म दिंदा ऐ।

³¹क्जोकि तिन्हीं इक्क दिन ठैहराया ऐ, जिस च सैह़ तिस माणुये दे जरिये धार्मिकता दे संसारे दा न्याय करणा, जिसियो तिन्हीं बणाया, कने तिसियो मरेयां च जिन्दा करी नैं इसा गल्ला दा सबूत सारे लोकां जो देई दित्ता ऐ।”

³²मरेयां ते दुवारी जिन्दे होणे दे बारे च गल्ल सुणी करी कुच्छ तां मजाक करणा लग्गे, कने कुच्छ ग्लाणा लग्गे, “एह़ गल्ल अहां तिज्जो ते भिरी कधैड़की सुणगे।”

³³इसा गल्ला पर पौलुस तिन्हां दे बिच्चे ते निकल़ी गेआ।

³⁴अपर कुच्छ माणु तिस सौगी मिल्ली गै, कने प्रभु पर बसुआस कित्ता; जिन्हां च दियनुसियुस जेह्ड़ा अरियुपगुस सभा दा सदस्य था, कने दमरिस नांऐ दी इक्क जणांस थी, कने तिन्हां सौगी होर भी कुच्छ लोक थे।