Read Kangri प्रेरितां दे कम्म 20 Bible Online

प्रेरितां दे कम्म 20 - Kangri bible

प्रेरितां दे कम्म 20

¹जेह्ड़ा लोकां सैहरे च खलल पाया था सैह़ रुकी गेआ तां पौलुसे चेलेयां जो सद्दी करी समझाया, कने तिन्हां ते विदा होई करी मकिदुनिया प्रदेसे दे पास्से चली पेआ।

²तिस सारे प्रदेसे ते होई करी कने चेलेयां जो हौंसला देई करी सैह़ यूनान प्रदेसे च आया।

³जाह़लू त्रै मीहने रेई करी सैह़ तित्थु ते समुंदरी जाह्जे च बेई करी सीरिया प्रदेसे जो जाणे आल़ा था, अपर तिन्हीं सुणेया कुच्छ यहूदी अगुऐ तिसियो रस्ते च मारने दी योजना बणांदे हन, इसतांई तिन्हीं एह़ फैसला कित्ता कि मकिदुनिया प्रदेसे च होई करी बापस चली जां।

⁴कने इसा यात्रा च बिरीया प्रदेसे दे रैहणे आल़े पुरूर्से दा पुत्तर सोपत्रुस कने थिस्सलुनीकियां दे सैहरे च अरिस्तर्खुस कने सिकुन्दुस, कने दिरबे सैहरे दा गयुस, कने लुस्त्रा सैहरे ते तीमुथियुस, कने आसिया प्रदेसे दा तुखिकुस कने त्रुफिमुस अहां सौगी यात्रा करा दे थे।

⁵एह़ साथी अहां दे गांह चली गै कने त्रोआस सैहरे च अहां दा इन्तजार करदे रैह्।

⁶कने अहां अखमीरी रोटिया दे त्योहारे दे दिनां ते बाद फिलिप्पी ते समुंदरी जाह्जे पर चढ़ी करी त्रोआस सैहरे च तिन्हां अल्ल पुज्जणे तांई पंज दिन लग्गी गै, कने सत दिन तित्थु ई रैह्।

⁷हफ्ते दे पैहल्ले दिन जाह़लू अहां रोटिया तोड़णे जो किठ्ठे होये, तां पौलुसे जेह्ड़ा दूँये दिने जाणे आल़ा था, तिन्हीं तिन्हां नैं गल्लां कित्तियां; कने अधिया राती तिकर गल्लां करदा रेह्आ।

⁸जिसा बोड़ी पर अहां किठ्ठे थे, तिसा च बड़े दीय्ये बल़ा करदे थे।

⁹कने यूतुखुस नांऐ दा इक्क जुआन मुँडू खिड़किया च बैठेया गुड़िया निंदरा नैं झुरा मारा दा था। जाह़लू पौलुस बड़ी देर तिकर गल्लां करदा रेह्आ तां सैह़ माणु निंदरा च त्रीआ बोड़ी ते पेई गेआ, कने तिसदी मौत्त होई गेई।

¹⁰अपर पौलुस थल्लैं जाई करी तिसियो गल़ें लाई करी ग्लाणा लग्गा, “डरा मत; क्जोकि एह़ अह्ल्ली भी जिन्दा ऐ।”

¹¹कने तिन्हीं दुवारी ऊपर जाई करी रोटी तोड़ी कने तिन्हां सबना खाई करी रात भर तिन्हां नैं गल्लां करदा रेह्आ कि भ्याग होई गेई। भिरी सैह़ चली गेआ।

¹²कने सैह़ तिस जुआन मुँडूये जो जिन्दे लेई आये, कने बड़े खुस होये।

¹³अहां पैहल्ले ई समुंदरी जाह्जे पर चढ़ी करी अस्सुस सैहरे जो एह़ सोची करी गांह चली गै कि तित्थु ते अहां पौलुसे जो सौगी लेई जान, क्जोकि तिसदी एह़ अपणी योजना थी, कि सैह़ पैदल चली नैं तित्थु पुज्जें।

¹⁴जाह़लू सैह़ अस्सुस सैहरे च अहां जो मिल्ला तां अहां तिसियो समुंदरी जाह्जे पर चढ़ाई करी मितुलेने सैहरे च आये।

¹⁵कने तित्थु ते समुंदरी जाह्जे लेई करी अहां दूये दिने खियुस टापूये दे बक्खे ते होई नैं सामुस टापूये च जाई रैह्; भिरी तिसते अगले दिने मीलेतुस सैहरे च आई रैह्।

¹⁶क्जोकि पौलुसैं इफिसुस सैहरे दे बक्खे ते होई करी जाणे दी सोचियो थी कि कुत्थी इआं ना होयैं कि तिसियो आसिया प्रदेसे च देर लग्गैं; क्जोकि सैह़ जल्दवाजिया च था कि जे होई सके तां सैह़ पिन्तेकुस्त त्योहारे दे दिन यरूशलेम सैहरे च रैंह्।

¹⁷जाह़लू अहां मीलेतुसे ते इफिसुस सैहरे पुज्जे, तां पौलुसैं इफिसुस सैहरे दे अगुआं जो इक्क संदेसा घल्लेया, कने कलीसिया देयां स्याणेयां जो सद्दी घल्लेया।

¹⁸जाह़लू सैह़ तिस अल्ल आये, तां तिन्हां ग्लाया, “तुहां जाणदे हन कि पैहल्ले ई दिने ते जाह़लू मैं आसिया प्रदेसे च पुज्जा, मैं अज्जे तिकर हर बग्त तुहां सौगी किंआं रेह्आ -

¹⁹मतलब बड़िया दीन होई नैं, कने टेपल़े चढ़ाई-चढ़ाई करी, कने तिन्हां परीक्षां च जेह्ड़ियां यहूदी माणुआं दिया बज़ाह ते मिन्जो पर आई पेई, मैं प्रभु दी सेवा करदा रेह्आ;

²⁰कने जेह्ड़ियां-जेह्ड़ियां गल्लां तुहां दे फायदे दियां थियां, तिन्हां जो दस्सणे कने लोकां सामणै कने घर-घर सखाणे ते कदी नीं झिझकेया,

²¹अपर यहूदी कने यूनानी माणुआं सामणै गवाही दिंदा रेह्आ कि परमात्मे दे पास्से मन बदला, कने अहां दे प्रभु यीशु मसीह पर बसुआस करा।

²²हुण दिक्खा, मैं पवित्र आत्मा दे मजबूर करणे दिया बज़ाह ते यरूशलेम सैहरे जो जा दा ऐ, कने मैं नीं जाणदा कि तित्थु मिन्जो पर क्या-क्या बितगा;

²³सिर्फ एह़ कि पवित्र आत्मा हर सैहरे च गवाही देई-देई करी मिन्जो नैं ग्लांदा ऐ कि बन्धन कने दुख तिज्जो तांई त्यार हन।

²⁴अपर मैं अपणेयां प्राणा जो कुच्छ नीं समझदा कि तिन्हां जो प्यारा जाणे, अपर एह़ कि मैं अपणिया दौड़ा जो कने सेवा जो पूरिया करैं, जेह्ड़ी मैं परमात्मे दे अनुग्रह दे सुसमाचार पर गवाही दैणे तांई प्रभु यीशु मसीह ते पाई ऐ।

²⁵हुण दिक्खा, मैं जाणदा ऐ कि तुहां सारे जिन्हां च मैं परमात्मे दे राज्जे दा प्रचार करदा रेह्आ, तुहां मिन्जो दुवारी भिरी नीं दिक्खगे।

²⁶जे तुहां च कोई भी यीशु मसीह पर बसुआस कित्ते बगैर मरी जां, तां मेरी कोई गलती नीं ऐ।

²⁷क्जोकि मैं परमात्मे दे सारे मकसद तुहां जो खुली नैं कने पूरे तरीके नैं दस्सी दित्ते।

²⁸इसतांई अपणी कने अपणे पूरे झुंडे दी चौकसी रखा जिस च पवित्र आत्मा तुहां जो अधिकारी बणाया ऐ, कि तुहां परमात्मे दिया कलीसिया दी रखवाल़ी करन, जिसियो तिन्हीं अपणे खूने नैं खरीदी लेआ ऐ।

²⁹मैं जाणदा ऐ कि मेरे जाणे ते बाद फाड़णे आल़े भेड़िये तुहां च ओंगे जिन्हां झुंडे जो नीं छड्डणा।

³⁰ऐत्थु तिकर तुहां च भी ऐदेय-ऐदेय माणु उठी खड़ोंगे, जेह्ड़े चेलेयां जो अपणे पचांह़ लगाणे तांई तिन्हां जो गलत सिक्षा दिंगे।

³¹इसतांई जागदे रेह्आ, कने याद रखा कि मैं त्रै साल तिकर रात-दिन रौई-रौई करी हर इक्की जो चतौणी दैणा नीं छड्डेया।

³²हुण मैं तुहां जो परमात्मे कने तिसदे अनुग्रह दे वचन दी देखभाल च हुआले करा दा ऐ, जिस च तुहां दी तरक्की कने तुहां जो तिन्हां सबना सौगी विरासत देई सकदा ऐ, जेह्ड़े प्रभु तांई अलग कित्यो हन।

³³मैं कुसी दे सोन्ने चाँदी, कने कपड़ेयां दा लालच नीं कित्ता।

³⁴तुहां अप्पु ई जाणदे हन कि इन्हां हत्थां ई मेरी कने मेरे साथियां दियां जरूरतां पूरियां कित्तियां हन।

³⁵मैं तुहां जो सब कुच्छ करी नैं दस्सेया कि इस तरीके नैं मेहनत करदे-करदे कमजोरेयां जो सम्भाल़णा कने प्रभु यीशुये दे वचन याद रखणा जरूरी ऐ, जेह्ड़ा तिन्हीं अप्पु ई ग्लाया ऐ, ‘लैणे ते दैणा खरा ऐ’।”

³⁶एह़ ग्लाई करी तिन्हीं गोड्डे टेके कने तिन्हां सबना सौगी प्रार्थना कित्ती।

³⁷ताह़लू सैह़ सारे बड़े रौये कने पौलुसे दे गल़ें लग्गी करी तिसियो चूम्मणा लग्गे।

³⁸सैह़ खास कर इसा गल्ला ते दुखी थे जेह्ड़ी तिन्हीं ग्लाई थी कि तुहां मिन्जो दुवारी भिरी नीं दिक्खगे। ताह़लू तिन्हां तिसियो समुंदरी जाह्जे तिकर छड्डेया।