Read Kangri प्रेरितां दे कम्म 26 Bible Online

प्रेरितां दे कम्म 26 - Kangri bible

प्रेरितां दे कम्म 26

¹राजा अग्रिप्पा पौलुसे नैं ग्लाणा लग्गा, “तिज्जो अपणे बारे च कुच्छ ग्लाणे दा मौका ऐ।” ताह़लू पौलुस तिन्हां दा ध्यान अपणे पास्से करणे तांई अपणा हत्थ गांह करी नैं जवाब दैणा लग्गा,

²“हे राजा अग्रिप्पा, जितणियां गल्लां दा यहूदी अगुऐ मिन्जो पर दोस लगांदे हन, अज्ज तिज्जो सामणै तिन्हां दा जवाब दैणे तांई मैं अपणे जो धन समझदा ऐ,

³खास करी नैं इसतांई कि तू यहूदियां दे सारे रीति रिवाजां कने झगड़ेयां जो जाणदा ऐ। इसतांई मैं विणती करदा ऐ, कि तसल्लिया नैं मेरी गल्ल सुण।

⁴“मेरा चाल-चलण जुआनिया ते ई मेरे लोकां च कने यरूशलेम सैहरे च जदेया था, एह़ सारे यहूदी जाणदे हन।

⁵जे सैह़ गवाही दैणा चां, तां जुआनिया ते ई मिन्जो पणछैणदे हन, कि मैं फरीसी होई करी अपणिया धार्मिकता दे सबते कट्टर धर्मे दे मताबक चलेया।

⁶अज्ज मैं परमात्मे दे जरिये अहां दे पूर्वजां जो दित्यो वादे दी आसा दिया बज़ाह ते ऐत्थु दोसी बणी करी खड़ोत्या ऐ।

⁷तिस वादे दे पूरे होणे दी आस लगायो, अहां दे बारांह गोत्र अपणे सारे मने नैं रात दिन परमात्मे दी अराधना करदे आये हन। हे राजा, इसा ई आसा दे बारे च यहूदी मिन्जो पर दोस लगांदे हन।

⁸ताह़लू पौलुसैं राजे कने भीड़ा च सारे यहूदियां जो ग्लाया, क्या तुहां सच्ची च बसुआस करदे हन, कि परमात्मा मरेयां जो जिन्दा नीं करी सकदा ऐ।

⁹“मैं भी सुणेया था कि यीशु नासरिये दे नांऐ दे बरोध च मिन्जो बड़ा कुच्छ करणा चाइदा।

¹⁰कने मैं यरूशलेम सैहरे च ऐई कित्ता; कने प्रधान याजकां ते हक्क पाई करी मतेआं पवित्र लोकां जो जेला च पाया, कने जाह़लू सैह़ मारी दित्ते जांदे थे तां मैं भी तिन्हां दे बरोधे च अपणी सलाह दिंदा था।

¹¹हर आराधनालय च मैं तिन्हां जो ताड़णा देई-देई करी यीशुये दी निंदा करवांदा था, ऐत्थु तिकर कि गुस्से दिया बज़ाह ते इतणा पागल होई गेआ कि दूयेयां सैहरां च जाई करी भी तिन्हां जो सतांदा था।

¹²“इस सफरे च जाह़लू मैं प्रधान याजकां ते आदेस पत्र लेई करी दमिश्क सैहरे जो जा दा था;

¹³तां हे राजा, रस्ते च दोपैरा दे बग्त मैं अम्बरे ते सूरजे दिया रोशनी ते भी तेज इक्क जोत्ती, अपणे सौगी चलणे आल़ेआं दे चौंन्नी पास्से चमकदी दिक्खी।

¹⁴जाह़लू अहां सारे धरतिया पर पेई गै, तां मैं इब्रानी भासा च, मिन्जो नैं एह़ ग्लांदे होये एह़ उआज़ सुणी, ‘हे शाऊल, हे शाऊल, तू मिन्जो क्जो सतांदा ऐ, कने पैनी चीज्जा पर पैर मारणा तिज्जो तांई बड़ा औखा ऐ।’

¹⁵मैं ग्लाया, ‘हे प्रभु, तू कुण ऐ?’ प्रभुयैं ग्लाया, ‘मैं यीशु ऐ, जिसियो तू सतांदा ऐ।

¹⁶अपर तू उठ, अपणेयां पैरां पर खड़ोई जा; क्जोकि मैं तिज्जो इसतांई दर्शन दित्ता ऐ कि तिज्जो तिन्हां गल्लां दा भी सेवक कने गवाह ठैहरान, जेह्ड़ियां ते दिक्खियां हन, कने तिन्हां दा भी जिन्हां तांई मैं तिज्जो दर्शन दैणा।

¹⁷कने मैं तिज्जो यहूदी लोकां कने होरनी जातिआं दे लोकां बिच्च घल्लदा ऐ, मैं तुहां दी रक्षा करगा।

¹⁸कि तिन्हां दी अखीं खोलणे, कने नेहरे ते कड्डी करी जोतिया च कने सैताने दे हक्के ते परमात्मे दे राज्जे च लेई ओन। कि सैह़ पापां ते माफी पाई सकन, कने तिन्हां सामणै आई जान, जेह्ड़े मिन्जो च बसुआस दे जरिये परमात्मे तांई लग्ग कित्यो हन।’

¹⁹“इसतांई हे राजा अग्रिप्पा, मैं तिस सुअर्गीय दर्शने दी गल्ल नीं टाल़ी,

²⁰अपर पैहल्लैं दमिश्क सैहरे दे, भिरी यरूशलेम सैहरे दे, कने ताह़लू यहूदिया दे सारे देसां दे रैहणे आल़ेआं जो, कने होरनी जाति दे लोकां च प्रचार करदा रेह्आ, कि मने बदला कने परमात्मे पास्से फिरी करी खरे कम्म करी नैं सबूत देआ कि तुहां सच्च बिच्च अपणा मन पापां ते बदली लेआ ऐ।

²¹इन्हां गल्लां दिया बज़ाह ते यहूदी मिन्जो पकड़ी नैं मंदरे च मारने चक्करे च थे।

²²अपर परमात्मे दिया बज़ाह ते मैं अज्जे तिकर जिन्दा ऐ कने छोटे बड्डेयां सबना सामणै गवाही दिंदा ऐ, कने तिन्हां गल्लां जो छड्डी करी होर कुच्छ नीं ग्लांदा जेह्ड़ियां भविष्यवक्तां कने मूसे भी ग्लाईयां कि होणे आल़िआं हन,

²³कि मसीह जो दुख झेलणा कने सैह़ सबना ते पैहल्ले मरेयां ते दुवारी जिन्दा होई करी, अहां देयां लोकां कने होरनी जाति दे लोकां च जोतिया दा प्रचार करगा।”

²⁴जाह़लू पौलुस इस तरीके नैं जवाब दे दा था, तां फेस्तुस हाकम जोरे नैं ग्लाणा लग्गा, “हे पौलुस, तू पागल ऐ। मते ज्ञाने तिज्जो पागल करी दित्या ऐ।”

²⁵अपर पौलुस ग्लाणा लग्गा, “हे महामहिम फेस्तुस, मैं पागल नीं, अपर सच्चाईया कने अक्ला दियां गल्लां ग्ला दा ऐ।

²⁶राजा भी जिसदे सामणै मैं निडर होई करी ग्ला दा ऐ, एह़ गल्लां जाणदा ऐ; कने मिन्जो बसुआस ऐ जे इन्हां गल्लां च कोई तिसते छुपियो नीं, क्जोकि इसा घटनां दे बारे च सारे लोकां जो पता ऐ।

²⁷हे राजा अग्रिप्पा, क्या तू भविष्यवक्तां दा बसुआस करदा ऐ, हाँ, मैं जाणदा ऐ कि तू बसुआस करदा ऐ।”

²⁸ताह़लू राजा अग्रिप्पा पौलुसे नैं ग्लाणा लग्गा, “तू थोड़ा ई समझाणे ते मिन्जो मसीह बणाणा चांह़दा ऐ।”

²⁹पौलुस ग्लाणा लग्गा, “परमात्मे नैं मेरी प्रार्थना ऐ कि क्या थोड़े च क्या मते च, बस तू ई नीं जितणे लोक अज्ज मेरियां गल्लां सुणा दे हन, इन्हां बंधना जो छड्डी करी सैह़ मिन्जो साइआं मसीह बणी जान।”

³⁰इसा गल्ला सुणी करी राजा कने हाकम बिरनीके कने तिन्हां सौगी बैठणे आल़े उठी करी चली गै;

³¹जाह़लू सैह़ बाहर जा दे थे तां अप्पु च ग्लाणा लग्गे, “इन्हीं माणु मौत्ती दी सज़ा या जेला च पाणे जोग्गा कोई अपराध नीं कित्या।”

³²राजा अग्रिप्पा फेस्तुस हाकम नैं ग्लाणा लग्गा, “जे एह़ माणु कैसर राजे दी दुहाई नीं दिंदा, तां छुटी सकदा था।”