Read Kangri प्रेरितां दे कम्म 27 Bible Online

प्रेरितां दे कम्म 27 - Kangri bible

प्रेरितां दे कम्म 27

¹जाह़लू फेस्तुस हाकमे दे जरिये एह़ पक्का होई गेआ कि अहां समुंदरी जाह्जे च इटली प्रदेसे जो जान, तां तिन्हीं पौलुस कने कुच्छ होरनी कैदियां जो भी युलियुस नांऐ दे औगस्तुसे महाराजे दे सपाईयां दे इक्की सूबेदारे दे हुआलैं करी दित्ता।

²अद्रमुतियुम सैहरे दे इक्क समुंदरी जाह्जे पर जेह्ड़ा आसिया प्रदेसे दियां लगदियां जगाह च जाणे आल़ा था, तां अहां तिस जाह्जे पर बेई करी यात्रा तांई चली पै, कने तिसा यात्रा च अरिस्तर्खुस नांऐ दा इक्क माणु अहां सौगी था, जेह्ड़ा मकिदुनिया प्रदेसे दे थिस्सलुनीके सैहरे दा रैहणे आल़ा था।

³दूये दिने अहां सैदा सैहरे च पुज्जे, कने युलियुस पौलुसे पर दया करी नैं तिसियो तिसदे साथियां अल्ल जाणा दित्ता कि तिन्हां ते कुच्छ जरूरी चीज्जां लेई ओन।

⁴तित्थु ते अहां दुवारी यात्रा सुरू कित्ती, हौआ उल्टी दिसा ते चलणे दिया बज़ाह ते अहां साइप्रस टापूये दिया आड़ा च होई करी चली गै;

⁵कने किलिकिया कने पन्फूलिया सैहरे अल्ल समुंदरे च होई करी लूसिया प्रदेसे दे मूरा सैहरे च पुज्जे।

⁶तित्थु सूबेदारे जो सिकन्दरिया सैहरे दा इक्क जाह्ज इटली प्रदेसे जो जांदा मिल्ला, कने तिन्हीं अहां जो तिस जाह्जे पर बठाल़ी दित्ता।

⁷जाह़लू अहां मतेआं दिनां तिकर होल़े -होल़े चली करी मुस्कला नैं कनिदुस सैहरे सामणै पुज्जे, तां इसतांई कि हौआ अहां जो गांह नीं जाणा दै दी थी, तां अहां सलमोने सामणै ते होई करी क्रेते टापूये दिया आड़ा च चल्ले;

⁸कने तिस कनारे-कनारे मुस्कला नैं चली करी शुभलंगरबारी नांऐ दिया इक्की जगाह पुज्जे, जित्थु ते लसया सैहर बक्खे था।

⁹जाह़लू मते दिन होई गै कने जलयात्रा च जोखिम इसतांई हुंदा था कि ब्रते दे दिन होई गियो थे। अपर पौलुसैं तिन्हां सारेयां जो एह़ ग्लाई करी चतौणी दित्ती,

¹⁰“हे सज्जणो, मिन्जो इआं लगदा ऐ कि इसा यात्रा च मुसीबत कने बड़ा नकसान, ना सिर्फ माले कने समुंदरी जाह्जे दा अपर अहां देयां प्राणा दा भी होणे आल़ा ऐ।”

¹¹अपर सूबेदारैं पौलुसे दियां गल्लां जो कप्तान कने समुंदरी जाह्जे दे मालके दियां गल्लां जो बधी करी मन्नेया।

¹²शुभलंगरबारी नांऐ दी बंदरगाह स्याल़े दे मौसमे कटणे तांई ठीक नीं थी, इसतांई मतेआं दा बचार था कि समुंदरी जाह्जे जो तित्थु ते चलाई करी जे कुस भी तरीके नैं होई सकैं तां फिनिक्स बंदरगाह च पुज्जी करी स्याल़े कटन। एह़ तां क्रेते दे टापूये दी इक्क बन्दरगाह ऐ जेह्ड़ी दक्षिण-पशिचम कने उत्तर-पशिचम दी दिसा ऐ।

¹³जाह़लू थोड़ी-थोड़ी दक्षिणी हौआ चलणा लग्गी, तां एह़ सोचेया कि अहां दा मकसद पूरा होई गेआ, तम्बू चुकेया कने क्रेते टापूये दे कनारे-कनारे पर समुंदरी जाह्जे चलाणा लग्गे।

¹⁴अपर थोड़िया देरा बाद जमीना दे पास्से ते इक्क बड्डा तफान चलेया, जेह्ड़ा युरकुलिन, नांऐ ते जाणेयां जांदा ऐ।

¹⁵जाह़लू तफान समुंदरी जाह्जे नैं टकराया, ताह़लू जाह्ज सामणै टिकी नीं सकेया, अपर अहां तिसियो रुड़णा दित्ता कने इआं ई रुड़दे चली गै।

¹⁶ताह़लू कौदा नांऐ दे इक्की छोटे दे टापूये दिया आड़ा च रुड़दे-रुड़दे अहां बड़िया मुस्कला नैं लोक्की किस्तिया जो बसे च करी सके।

¹⁷भिरी मल्लाहां किस्तियां चुकणे दे बाद तरीका लगाई नैं समुंदरी जाह्जे जो थल्लै ते लेई करी ऊपरे तिकर रस्सेयां नैं कसी करी बन्नी दित्ता, कने सुरतिस खाड़ी दे दलदले दे पांणिये च फंसी जाणे दे डरे मारे तिन्हां लंगर जो थोड़ा थल्लै लौआई करी जाह्जे जो हौआ दे तेज बहावे सौगी-सौगी रुड़णा छड्डी दित्ता।

¹⁸जाह़लू अहां तफाने नैं बड़े पल़सेटे कने धक्के खांदे, तां दूये दिने सैह़ समुंदरी जाह्जे दे माले सट्टणा लग्गे;

¹⁹कने त्रीयें दिने तिन्हां अपणेयां हत्थां नैं समुंदरी जाह्जे दा सारा माल सट्टी दित्ता।

²⁰जाह़लू मतेआं दिनां तिकर ना सूरज, ना तारे दुस्से कने बड़ा तफान चलदा रेह्आ, तां अन्त च अहां दे बचणे दी सारी आस खत्म होई गेई।

²¹जाह़लू सैह़ मते दिन तिकर भुखे रैह् तां पौलुस तिन्हां बिच्च खड़ोई नैं ग्लाणा लग्गा, “हे लोको, तुहां जो चाइदा था कि तुहां मेरी गल्ल मन्नी करी क्रेते टापू ते गांह ते नीं बधदे थे, ना एह़ मुसीबत ओंदी, ना ई एह़ नकसान हुंदा।

²²अपर हुण मैं तुहां जो समझांदा ऐ कि हौंसला रखा, क्जोकि तुहां च कुसी दिया जान्नी जो नकसान नीं होणा अपर नकसान तां समुंदरी जाह्जे दा।

²³क्जोकि परमात्मा जिसदा मैं ऐ, कने जिसदी अराधना करदा ऐ तिसदे सुअर्गदूतैं पीछली रात मिन्जो नैं आई करी ग्लाया,

²⁴“हे पौलुस, ‘मत डर। तिज्जो कैसरे राजे सामणै खड़ोणा जरूरी ऐ। परमात्मैं सबना जो जेह्ड़े तिज्जो सौगी सफर करा दे हन, तिन्हां जो ज़िन्दगी दान दित्तियो ऐ।’

²⁵इसतांई, हे सज्जणो, हौंसला रखा; क्जोकि मैं परमात्मे पर बसुआस करदा ऐ, कि जिंआं मिन्जो नैं ग्लाया ऐ, तिंआं ई होणा।

²⁶अपर अहां जो कुसी टापूये पर जाई करी रुकणा पोणा।”

²⁷जाह़लू चौदमी रात आई, कने अहां अद्रिया समुंदरे च भटकदे फिरा करदे थे, तां अधिया राती दे समुंदरी जाह्जे दे मल्लाहें साभ लगाया कि अहां कुसी देसे च पुज्जणे आल़े हन।

²⁸ताह़लू समुंदरे दी गेहराई लैणे तांई तिन्हां सैंती मीटर डुगा पाया, कने जरा होर गांह जाई करी भिरी गेहराई नापी तां समुंदर सताई मीटर डुगा पाया।

²⁹ताह़लू तिन्हां पथरीलिया जगाह च टकराणे दे डरे ते तिन्हां समुंदरी जाह्जे दे पचांह़ आल़े हिस्से चार तम्बू पाये, कने भ्याग होणे दी कामना करदे रैह्।

³⁰अपर जाह़लू मल्लाह समुंदरी जाह्जे ते नठणा चांह़दे थे, कने तिन्हां जाह्जे दे गांह हिस्से च लंगर पाणे दे भाने लोक्की किस्ती समुंदरे च लौआई दित्ती;

³¹तां पौलुस सूबेदारे नैं कने सपाईयां नैं ग्लाणा लग्गा, “जे एह़ समुंदरी जाह्जे पर नीं रैह़न, तां तुहां भी नीं बची सकदे।”

³²ताह़लू सपाईयां रस्से कटी करी किस्ती सट्टी दित्ती।

³³जाह़लू भ्याग होणे आल़ी थी, ताह़लू पौलुसैं एह़ ग्लाई करी, सारेयां जो खाणा-खाणे तांई तिन्हां नैं विणती कित्ती, “अज्ज चौदा दिन होये कि तुहां फिकर करदे-करदे भुखे रैह् हन, कने कुच्छ नीं खादा।

³⁴इसतांई तुहां जो समझांदा ऐ कि थोड़ा खाई लेआ, जिसते तुहां दा बचाब होयैं; क्जोकि तुहां च कुसी दे सिरे दा बाल़ भी बांका नीं हुंगा।”

³⁵एह़ ग्लाई करी रोटी लेई कने तिन्हीं परमात्मे दा धन्यावाद कित्ता कने तोड़ी करी खाणा लग्गे।

³⁶ताह़लू सैह़ सारे हौंसला रखी नैं खाणा-खाणा लग्गे।

³⁷अहां सबना जो मिल्लाई करी समुंदरी जाह्जे च दो सौ छियत्र माणु थे।

³⁸जाह़लू सैह़ खाणा खाई करी रज्जी गै, तां कणकां जो समुंदरे च सट्टी करी समुंदरी जाह्जे जो हल्का करणा लग्गे।

³⁹जाह़लू भ्याग होई तां तिन्हां तिस देसे जो नीं पणछैणया, अपर इक्क खाड़ी दिक्खी जिसा दा कनारा चौरस था, कने सोचेया कि जे होई सके तां इसा पर ई समुंदरी जाह्जे जो रोकन।

⁴⁰ताह़लू तिन्हां तम्बुआं जो खोली करी समुंदरे च छड्डी दित्ता कने तिस ई बग्त पाल दे सारे रस्से ढिले करी दित्ते, कने हौआ दे सामणै अगला पाल चढ़ाई करी कनारे पर चली गै।

⁴¹अपर दूँ समुंदरा दे मिलणे दी जगाह पकड़ी करी तिन्हां समुंदरी जाह्जे जो रोकेया, कने तिसदा गांह दा हिस्सा जमी गेआ था, कने चली नीं सकेया; अपर पचांह़ दा हिस्सा जोरदार लैहरां नैं टूटणा लग्गी पेआ।

⁴²ताह़लू सपाईयां दा एह़ बचार होएया कि कैदियां जो मारी दैन, एह़ ना होयैं कि कोई तैरी करी नठ्ठी नीं जां।

⁴³अपर सूबेदारैं पौलुसे जो बचाणे दिया इच्छा नैं तिन्हां जो ऐदेया करणे ते रोकेया कने एह़ ग्लाया, कि जेह्ड़े तैरी सकदे हन, पैहल्ले कूदी करी कनारे पर चली जान;

⁴⁴कने बाक्कि कोई फटेयां पर, कने कोई समुंदरी जाह्जे दियां होरनी चीज्जां दा साहरा लेई करी निकल़ी जान। इस तरीके नैं सारे सही-सलामत किस्तिया ते बची करी कनारे पर पुज्जी गै।