Read Kangri प्रेरितां दे कम्म 28 Bible Online

प्रेरितां दे कम्म 28 - Kangri bible

प्रेरितां दे कम्म 28

¹जाह़लू अहां सारे बची करी कनारे पर पुज्जे, ताह़लू अहां जो पता लगा कि एह़ टापू माल्टा नांऐ ते जाणेया जांदा ऐ।

²कने तित्थु रैहणे आल़े लोक बड़े दयालू हन; क्जोकि बरखा होणे दिया बज़ाह ते जादा ठंड थी, इसतांई तिन्हां अग्ग बाल़ी करी अहां दी आदर खातर कित्ती।

³जाह़लू पौलुसैं लकड़ियां दी उंदल़ बटोल़ी करी अग्गी पर रखी, तां इक्क सर्प डोल करी निकल़ेया कने तिसदे हत्थे नैं लटकी गेआ।

⁴जाह़लू तित्थु रैहणे आल़े लोकां सर्पे जो तिसदे हत्थे च लिपटेया दिख्या, तां अप्पु च ग्लाणा लग्गे, “सच्ची ते एह़ माणु हत्यारा ऐ कि जे समुंदरे ते बची गेआ, अपर न्याय-देवी नीं चांह़दी कि एह़ जिन्दा नीं रैंह्।”

⁵ताह़लू तिन्हीं सर्पे जो अग्गी च झाड़ी दित्ता, कने तिसियो कुच्छ नीं होएया।

⁶अपर सैह़ लोक एह़ दिक्खा करदे थे कि काह़लू एह़ सूज्जी जांगा या इक्कदम थल्लैं पेई करी मरी जांगा, अपर जाह़लू सैह़ बड़ी देर तिकर दिक्खदे रैह् कने दिख्या कि तिसियो कुच्छ भी नीं होएया, तां अपणी सोच बदली करी ग्लाणा लग्गे, “एह़ तां कोई देवता ऐ।”

⁷तिसा जगाह दे अक्खे-बक्खे दी जमीन टापूये दे प्रधान पुबलियुसे दी थी। तिन्हीं अहां जो अपणे घरैं अंणी करी त्रै दिन अहां दी आदर खातर कित्ती।

⁸पुबलियुसे दा बुढ़ा बुखार कने आँव लहू दा रोगी था। अपर पौलुसैं तिसदे कमरे च जाई करी प्रार्थना कित्ती कने तिस पर हत्थ रखी करी तिसियो खरा कित्ता।

⁹जाह़लू इआं होएया तां तिस टापूये दे होर बमार माणु पौलुसे अल्ल आये कने खरे कित्ते।

¹⁰तिन्हां अहां दा बड़ी आदर खातर कित्ती, कने जाह़लू अहां चलणा लग्गे, तां तिन्हां जेह्ड़ा कुच्छ अहां तांई जरूरी था, समुंदरी जाह्जे पर रखी दित्ता।

¹¹त्रीं मीहनेयां बाद अहां सिकन्दरिया दे इक्की समुंदरी जाह्जे पर चली पै, जेह्ड़ा तिस टापूये च ठंडी दिया बज़ाह ते रुकेया था, समुंदरी जाह्जे दे गांह आल़े हिस्से पर दियुसकूरी दा नसाण था।

¹²सुरकुसा सैहरे च तम्बू पाई करी अहां त्रै दिन रुकी रैह्।

¹³तित्थु ते अहां घूमी करी रेगियुम सैहरे च पुज्जे; तां अगले दिने दक्षिणी हौआ चली पेई, ताह़लू अहां दूये दिने पुतियुली सैहरे च आये।

¹⁴तित्थु अहां जो बसुआसी भाऊ मिल्ले, कने तिन्हां दे ग्लाणे पर अहां तिन्हां अल्ल सत दिन रैह्; कने इस तरीके नैं आखर कार अहां रोम सैहरे पुज्जी गै।

¹⁵कने तित्थु पुज्जणे दी खबर सुणी करी अहां दे बसुआसी भाऊ त्रै कोस दूर अहां सौगी अप्पियुस दे बजारे च मिलणा चली आये, जिन्हां जो दिक्खी करी पौलुसैं परमात्मे दा धन्यावाद कित्ता, कने हौंसला दित्ता।

¹⁶जाह़लू अहां रोम सैहरे च पुज्जे, तां पौलुसैं जो इक्की सपाईये सौगी जेह्ड़ा तिसदी रखवाल़ी करदा था, किल्ले रैहणे दा हुक्म मिल्ली गेआ।

¹⁷त्रीं दिनां बाद तिन्हीं यहूदी माणुआं देयां खास लोकां जो सद्देया, कने जाह़लू सैह़ किठ्ठे होये तां तिन्हां नैं ग्लाणा लग्गा, “हे भाऊओ, मैं अपणेयां लोकां दे या पूर्वजां दे बर्ताब दे बरोध च कुच्छ भी नीं कित्ता, तमी कैदी बणाई करी यरूशलेम सैहरे ते रोमी माणुआं दिया सरकारा दे हुआलैं करी दित्ता गेआ।

¹⁸तिन्हां मिन्जो परखी करी छड्डी दैणा चाया, क्जोकि मिन्जो मारने आल़ा कोई दोस नीं था।

¹⁹अपर जाह़लू यहूदी अगुऐ इस बरोध च ग्लाणा लग्गे, तां मिन्जो कैसर राजे दी दुहाई दैणा पेई; एह़ नीं कि मिन्जो अपणेयां लोकां पर कोई दोस लगाणा था।

²⁰ऐई बज़ाह ऐ जिसाते मैं तुहां नैं मिलणा कने गल्लबात करणा चांह़दा था, क्जोकि मसीह इस्राएल दे लोकां दा सैह़ बसुआस ऐ, जिसदिया बज़ाह ते मैं संगल़ां नैं जकड़ेया ऐ।”

²¹यहूदी अगुआं तिस नैं ग्लाया, “ना अहां जो तेरे बारे च यहूदिया प्रदेसे ते चिठ्ठियां मिलियां, कने ना बसुआसी भाऊआं च कुणी आई करी तेरे बारे च कुच्छ दस्सेया कने ना बुरा ग्लाया।

²²अपर तेरी सोच क्या ऐ, सैई अहां तिज्जो ते सुणना चांह़दे हन, क्जोकि अहां जाणदे हन कि हर जगाह इस बचारे दे बरोधे च लोक गल्लां करदे हन।”

²³ताह़लू यहूदियां पौलुसे तांई इक्क दिन रखेया, कने बड़े भारी लोक तिस अल्ल किठ्ठे होये, कने सैह़ परमात्मे दे राज्जे दी गवाही दिंदा, कने मूसा दी व्यबस्था कने भविष्यवक्तां दियां कताबां ते यीशुये दे बारे च समझाई-समझाई करी भ्यागा ते लेई करी संझा तिकर सणांदा रेह्आ।

²⁴ताह़लू कुच्छ लोकां तिसदिया गल्लां पर बसुआस करी लेआ, कने कुच्छ लोकां बसुआस नीं कित्ता।

²⁵जाह़लू सैह़ अप्पु च सेहमत नीं होये, तां पौलुसे दिया इसा गल्ला ग्लाणे पर चली गै, “पवित्र आत्मा यशायाह भविष्यवक्तां दे जरिये तुहां दे पूर्वजां नैं ठीक ई ग्लाया,

²⁶‘जाई करी इन्हां लोकां नैं ग्ला, सैह़ दिक्खदे तां हन, अपर तिन्हां कुच्छ दुस्सदा नीं, सैह़ सुणदे तां हन अपर समझी नीं पांदे;

²⁷क्जोकि इन्हां लोकां दा मन मोटा, कने तिन्हां दे कंन्न बोल़े होई गियो हन, कने तिन्हां अपणियां अखीं बंद करी लियां हन, एह़ नीं होयैं कि सैह़ कदी अखीं नैं दिक्खन, कने कन्नां नैं सुणन, कने मने नैं समझन, कने मन बदलन, कने मैं तिन्हां जो खरा करैं।’

²⁸इसतांई तुहां जो जाणी लैणां चाइदा, कि परमात्मे एह़ उद्धार होरनी जाति दे लोकां अल्ल घल्ली दित्ता गेआ ऐ, कने सैह़ भी उद्धार पांगे।”

²⁹जाह़लू तिन्हीं एह़ ग्लाया तां यहूदी अप्पु च बड़ी बैंह्स करणा लग्गे कने तित्थु ते चली गै।

³⁰सैह़ पूरे दो साल अपणे किराये दे घरे च रेह्आ,

³¹कने जेह्ड़े तिस अल्ल ओंदे थे, तिन्हां सबना नैं मिलदा रेह्आ कने बिना रोक-टोक ते कने बड़ी हिम्मत रखी करी परमात्मे दे राज्जे दा प्रचार करदा कने प्रभु यीशु मसीह दियां गल्लां सखांदा रेह्आ।