Read Kangri प्रेरितां दे कम्म 4 Bible Online

प्रेरितां दे कम्म 4 - Kangri bible

प्रेरितां दे कम्म 4

¹जाह़लू पतरस कने यूहन्ना लोकां नैं एह़ ग्ला दे थे, तां याजक कने मंदरे दे अधिकारी कने सदूकी माणु तिन्हां अल्ल आये।

²सैह़ बड़े भरी गुस्से होई गै क्जोकि पतरस कने यूहन्ना लोकां जो सखांदे थे कि परमात्मा तिन्हां लोकां जो जेह्ड़े मरी गै हन तिन्हां जो मरेयां ते दुवारी भिरी जिन्दा करगा, ठीक तिंआं ई जिंआं तिन्हीं यीशुये जो मरेयां ते जिन्दा कित्या था।

³इसा गल्ला पर तिन्हां पतरस कने यूहन्ने जो पकड़ी करी दूये दिने तिकर जेला च रखेया, क्जोकि संझ होई गियो थी।

⁴अपर वचनां सुणने आल़ेआं लोकां च मतेआं यीशु पर बसुआस कित्ता, कने तिन्हां दी गिणती पंज हज़ार मर्दां दे करीब होई गेई।

⁵दूये दिने भी इआं ई होएया कि तिन्हां दे अधिकारी, स्याणे कने सास्त्री माणु

⁶कने महायाजक हन्ना, काइफा, यूहन्ना, सिकन्दर कने जितणे भी महायाजके दे घराने दे थे, सारे यरूशलेम सैहरे च किठ्ठे होये।

⁷सैह़ तिन्हां जो गब्बैं खरेड़ी करी पुछणा लग्गे, कि “तुहां एह़ कम्म कुसा सामर्थी नैं कने कुस नांऐ ते कित्ता ऐ?”

⁸ताह़लू पतरस पवित्र आत्मा नैं भरोई करी तिन्हां नैं ग्लाणा लग्गा,

⁹“हे लोकां दे अधिकारियो कने स्याणेयो, इस कमजोर माणुये सौगी जेह्ड़ी भलाई कित्ती गेई ऐ, जे अज्ज अहां ते तिसदे बारे च पुछ-ताछ कित्ती जांदी ऐ, कि सैह़ किंआं खरा होएया।

¹⁰तां तुहां सारे कने इस्राएली लोक जाणी लैन कि यीशु मसीह नासरी दे नांऐ ते खरा कित्ता ऐ। जिस यीशुये जो तुहां सूल़िया पर चढ़ाई दित्या था, कने परमात्मैं तिसियो मरेयां ते दुवारी जिन्दा कित्ता, एह़ माणु तिस नांऐ दे जरिये तुहां दे सामणै भला चंगा खड़ोत्या ऐ।

¹¹यीशु मसीह सैई पत्थर ऐ जिसियो तुहां राजमिस्त्रियां कुसी कम्मे दा नीं समझेया, कने सैई कुणे दे सिरे दा पत्थर बणी गेआ।

¹²सिर्फ यीशु ते ई उद्धार होई सकदा; क्जोकि सुअर्गे थल्लैं इस पूरे संसारे च होर कोई दूआ नां नीं दित्ता गेआ, जिसदे जरिये अहां उद्धार पाई सकन।”

¹³जाह़लू तिन्हां पतरसे कने यूहन्ने दी हिम्मत दिक्खी, कने एह़ जाणेया कि एह़ अणपढ़ कने मामूली माणु हन, तां हरान होये; भिरी तिन्हां जो पणछैणी लेआ कि एह़ तां यीशु सौगी रेहयो हन।

¹⁴तिस माणुये जो जेह्ड़ा खरा कित्या था, पतरस कने यूहन्ने सौगी खड़ोत्या दिक्खी करी, यहूदी अगुऐ तिन्हां दे खलाफ कुच्छ भी नीं ग्लाई सके।

¹⁵अपर तिन्हां जो सभा ते बाहर जाणे दा हुक्म देई करी, सैह़ अप्पु च सलाह करणा लग्गे,

¹⁶“अहां इन्हां माणुआं सौगी क्या करन, क्जोकि यरूशलेम सैहरे दे सारे रैहणे आल़े लोक जाणदे हन, कि इन्हां इक्क चमत्कार दस्सेया ऐ; कने अहां इस सच्च जो नकारी नीं सकदे।

¹⁷अपर अहां इन्हां जो चतौणी दैन कि सैह़ यीशु नांऐ दी चर्चा कुसी होर माणुये नैं ना करन, तांजे लोकां च इसा गल्ला जो होर जादा फैलणे ते रोकेया जाई सकैं। ”

¹⁸ताह़लू तिन्हां जो सद्देया कने चतौणी देई करी एह़ ग्लाया, “यीशुये दे नांऐ ते कुच्छ भी नीं ग्लाणा कने ना सखाणा।”

¹⁹अपर पतरसे कने यूहन्ने तिन्हां जो जवाब दित्ता, “तुहां ई न्याय करा; क्या एह़ परमात्मे सामणै एह़ ठीक हुंगा कि अहां परमात्मे दियां गल्लां नीं मनन कने तुहां दियां गल्लां मनन।

²⁰क्जोकि एह़ तां अहां ते होई नीं सकदा कि जेह्ड़ा अहां दिख्या कने सुणेयां ऐ, सैह़ नीं ग्लान।”

²¹ताह़लू तिन्हां पतरस कने यूहन्ने जो चतौणी देई करी छड्डी दित्ता, क्जोकि लोकां दिया बज़ाह ते तिन्हां जो सज़ा दैणे दी कोई भी गल्ल नीं मिल्ली, इसतांई जेह्ड़ी गल्ल होई थी तिसदिया बज़ाह ते सारे लोक परमात्मे दी महिमा करदे थे।

²²क्जोकि सैह़ माणु, जिस पर खरे होणे दा चमत्कार दस्सेया था, तिसदी चाल़ी साल ते भी जादा उम्र थी।

²³सैह़ छुटी करी अपणे साथियां अल्ल आये, कने जेह्ड़ा कुच्छ प्रधान याजकां कने स्याणेयां तिन्हां नैं ग्लाया था, तिन्हां जो सणाई दित्ता।

²⁴एह़ सुणी करी तिन्हां इक्क मन होई करी जोरे नैं ग्लाया, “हे परमात्मा, तू सैई प्रभु ऐ जिन्हीं सुअर्ग कने धरती कने समुंदर कने जेह्ड़ा कुच्छ तिन्हां च ऐ बणाया।

²⁵तैंईं पवित्र आत्मा दे जरिये अपणे सेवक अहां दे पूर्वज दाऊदे दे मुँऐ ते ग्लाया, ‘होरनी जातिआं च हुल्लड़ क्जो मचेया, कने देसे-देसे देयां लोकां क्जो बेकार गल्लां सोचियां?

²⁶प्रभु कने तिस मसीह दे खलाफ च धरती दे राजे खड़ोई गै, कने हाकम इक्क साथ किठ्ठे होई गै हन।’ ”

²⁷क्जोकि सच्च बिच्च तेरे सेवक यीशुये दे खलाफ च, जिन्हां दा तैं अभिषेक कित्ता, हेरोदेस कने पुन्तियुस पिलातुस भी होरनी जातिआं दे लोकां कने इस्राएली लोकां सौगी इस सैहरे च किठ्ठे होई गै हन,

²⁸कि जेह्ड़ा कुच्छ पैहल्ले ते तेरिया समर्था नैं कने इच्छा दे मताबक पक्का होई चुकेया था सैई होयैं।

²⁹हुण हे प्रभु, तिन्हां दियां धमकियां जो सुण; कने अपणेयां दासां जो एह़ वरदान दे कि तेरा वचन बड़िया हिम्मता सौगी सणान।

³⁰खरा करणे तांई तू अपणा हत्थ गांह कर कि चमत्कार कने अनोखे कम्म तेरे पवित्र सेवक यीशुये दे नांऐ ते कित्ते जान।

³¹जाह़लू सैह़ प्रार्थना करी बैठे, तां सैह़ जगाह जित्थु सैह़ कठ्ठरोयो थे हिल्ली गेई कने सैह़ सारे पवित्र आत्मा नैं भरोई गै, कने परमात्मे दा वचन हिम्मता सौगी सणांदे रैह्।

³²बसुआस करणे आल़ेआं दी मंडल़ी इक्क चित कने इक्क मन दी थी, ऐत्थु तिकर कि कोई भी अपणिया जायदाता जो अपणी नीं ग्लांदा था, अपर सारा कुच्छ साझी था।

³³प्रेरित बड़िया सामर्था नैं प्रभु यीशुये दे मरेयां ते दुवारी जिन्दे होणे दी गवाही दिंदे रैह् कने तिन्हां सारेयां पर बड़ा अनुग्रह था।

³⁴तिन्हां च कोई भी पाखंडी नीं था; क्जोकि जिन्हां अल्ल जगाह या घर थे, सैह़ तिन्हां जो बेची-बेची करी, बिकियां चीज्जां दे पैसे लेयोंदे थे, कने तिन्हां जो चेलेयां देयां पैरां च रखी दिंदे थे;

³⁵कने जिंआं जिसियो जरूरत हुंदी थी, तिसदे मताबक प्रेरितां जो बंडी दिंदे थे।

³⁶यूसुफ नांऐ दा, साइप्रस टापू च रैहणे आल़ा इक्क लेवी था जिसदा नां प्रेरितां बरनबास (मतलब सांति दा पुत्तर) रखेया था।

³⁷तिसदी कुच्छ जमीन थी, जिसा जो तिन्हीं बेची करी कने जेह्ड़े पैसे मिल्ले सैह़ प्रेरितां जो देई दित्ते।