Read Kangri प्रेरितां दे कम्म 5 Bible Online

प्रेरितां दे कम्म 5 - Kangri bible

प्रेरितां दे कम्म 5

¹हनन्याह नांऐ दा इक्क माणु था कने तिसदिया लाड़िया दा नां सफीरा था, तिन्हां अपणी जमीना दा कुच्छ हिस्सा बेचया।

²कने तिन्हां पैसेयां च कुच्छ पैसे अप्पु तांई रखी लै; कने एह़ गल्ल तिसदी लाड़ी भी जाणदी थी, कने तिसदा इक्क हिस्सा लेई करी प्रेरितां जो देई दित्ता।

³ताह़लू पतरसैं ग्लाया, “हे हनन्याह। सैताने तेरे मने च एह़ गल्ल क्जो पाई कि तू पवित्र आत्मा नैं झूठ ग्लां, कने जमीना दे पैसेयां च कुच्छ अप्पु तांई रखी लै?

⁴क्या बेचणे ते पैहल्ले सैह़ जमीन तेरी नीं थी? कने जाह़लू बिकी गेई तां क्या तेरे हक्के च नीं थी? तेरे मने च इस बुरे कम्मे दा बचार किंआं आया? तू माणुआं नैं नीं, अपर परमात्मे नैं झूठ ग्लाया ऐ।”

⁵एह़ गल्लां सुणदे ई हनन्याह प्राण छड्डी दित्ते, कने थल्लैं पेई गेआ; कने सारे सुणने आल़ेआं लोक बड़े भरी डरी गै।

⁶भिरी जुआन माणुआं आई करी तिसदी अर्थी बणाई कने बाहर लेई जाई करी दब्बी दित्ता।

⁷घट ते घट त्रीं घंटेयां बाद तिसदी लाड़ी जेह्ड़ा कुच्छ होएया था नीं जाणदी थी अंदरेयो आई।

⁸ताह़लू पतरसैं तिसा नैं ग्लाया, “मिन्जो दस्स क्या तुहां दून्नी सैह़ जमीन इतणे च बेचियो थी?” तिन्नै ग्लाया, “हाँ इतणे च ई।”

⁹पतरसे तिसा नैं ग्लाया, “एह़ क्या गल्ल ऐ कि तुहां दून्नी ई प्रभु दी आत्मा दी परीक्षा लैणे तांई राजी क्जो होये, दिक्ख, तेरे लाड़े जो दब्बणे आल़े अह्ल्ली तिकर दरवाजे पर ई खड़ोत्यो हन, कने तिज्जो भी बाहर लेई जांगे।”

¹⁰इसा गल्ला सुणदे ई तिन्नै भी प्राण छड्डी दित्ते; कने तिसदेयां पैरां पर पेई गेई, कने जुआन माणुआं अंदर आई करी तिसा जो भी मरेया दिख्या, कने बाहरेयो लंदी कने लाड़े बक्खे दब्बी दित्ती।

¹¹यरूशलेम सैहरे दी पूरी कलीसिया पर कने इन्हां गल्लां जो सुणने आल़े सारे लोक बड़े भरी डरी गै।

¹²प्रेरितां देयां हत्थां ते बड़े चमत्कार कने अनोखे कम्म लोकां बिच्च होणा लग्गे, कने मसीह दे सारे बसुआसी इक्क मन होई करी सुलेमाने दे बरांडे च किठ्ठे हुंदे थे।

¹³अपर जिन्हां अह्ल्ली तिकर यीशु पर बसुआस नीं कित्या था, तिन्हां च कुसियो भी एह़ हिम्मत नीं हुंदी थी कि तिन्हां बसुआसी लोकां नैं जाई करी मिलन; भिरी भी लोक तिन्हां दी तारीफ करदे थे।

¹⁴प्रभु च बसुआस करणे आल़ेआं दी गिणती बधदी गेई, कने जणासा कने मर्दां दा इक्क बड़ा बड्डा झुंड बणी गेआ।

¹⁵ऐत्थु तिकर कि लोक बमारां जो सड़कां च अंणी करी, मंजोल़ूयां कने बिस्तरेयां पर लैटाई दिंदे थे, कि जाह़लू पतरस ओंगा, तां तिसदा डोह तिन्हां च कुसी पर पेई जां।

¹⁶यरूशलेम सैहरे दे अक्खे-बक्खे देयां सैहरां ते भी मते भरी लोक बमारां कने दुष्टआत्मां दे सतायां जो अंणी-अंणी करी, प्रेरितां अल्ल किठ्ठे हुंदे थे, कने सैह़ सारे खरे कित्ते जांदे थे।

¹⁷ताह़लू महायाजक कने तिसदे सारे साथी जेह्ड़े सदूकी माणुआं दिया टोलिया दे थे, तिन्हां दे खलाफ होई गै, सैह़ बड़े भरी जल़णा लग्गे।

¹⁸कने प्रेरितां जो पकड़ी करी जेला च बंद करी दित्ता।

¹⁹अपर रातियो प्रभु दे इक्की सुअर्गदूतैं जेला दे दरवाजे खोली करी तिन्हां बाहर अंणी करी ग्लाणा लग्गा,

²⁰“जा, मंदरे च खड़ोई करी सदा दी ज़िन्दगिया दियां सारियां गल्लां लोकां जो सणा।”

²¹प्रेरित एह़ सुणी करी भ्याग हुंदे ई मंदरे च आई करी सिक्षा दैणा लग्गे। ताह़लू महायाजक कने तिसदे साथियां आई करी महासभा जो कने इस्राएली लोकां दे सारे स्याणेयां जो किठ्ठा कित्ता, कने जेला च संदेसा घल्लेया कि तिन्हां जो लेई ओआ।

²²अपर जाह़लू मंदरे दे पैहरेदार जेला च पुज्जे तां तित्थु तिन्हां जो प्रेरित नीं मिल्ले, कने बापस आई करी इसदी खबर दित्ती,

²³“अहां जेला जो बड़िया सावधानियां नैं बंद कित्या था, कने पैहरेदार बाहर दुआरे पर खड़ोत्यो थे; अपर जाह़लू दुआर खोलेया, तां अंदर कोई नीं मिल्ला।”

²⁴जाह़लू मंदरे दे पैहरेदारां दे मुखियें कने प्रधान याजकां एह़ खबर सुणी, तां तिन्हां दे बारे च बड़िया फिकर च पेई गै कने सोचणा लग्गे, कि हुण क्या हुंगा।

²⁵इतणे च कुणकी आई नैं तिन्हां जो दस्सेया, “दिक्खा, जिन्हां जो तुहां जेला च बंद करी नैं रखेया था, सैह़ माणु मंदरे च खड़ोई करी लोकां जो सिक्षा देआ करदे हन।”

²⁶जाह़लू तिन्हां एह़ सुणेया, तां मंदरे दे पैहरेदारां दा मुखिया सपाईयां सौगी जाई करी तिन्हां प्रेरितां जो महासभा दे सामणै लेई आया, अपर जोर जबरदस्ती करी नैं नीं, क्जोकि तिन्हां जो डर था, कि लोक अहां जो पत्थरां नैं मारी नीं दैन।

²⁷तिन्हां प्रेरितां जो अंणी करी महासभा दे सामणै खरेड़ी दित्ता; ताह़लू महायाजकैं तिन्हां ते पुछया,

²⁸“क्या अहां तुहां जो धमकी देई करी नीं ग्लाया था कि तुहां यीशुये दे नांऐ ते सिक्षा मत दिंदे, तमी दिक्खा, तुहां सारे यरूशलेम सैहरे दे लोकां जो अपणिया सिक्षा नैं भरी दित्या ऐ कने तिस माणुये दा खून अहां दे सिरे पर पाणा चांह़दे हन।”

²⁹ताह़लू पतरसैं कने होरनी प्रेरितां जवाब दित्ता, “माणुआं दे हुक्मे ते बधी करी परमात्मे दे हुक्मे दा पालण करणा ई अहां दा फर्ज ऐ।

³⁰अहां दे पूर्वजां दे परमात्मैं यीशुये जो मरेयां ते जिन्दा करी दित्या, जिसियो तुहां सूल़िया पर टुंगी करी मारी दित्या था।

³¹तिसियो परमात्मैं प्रभु कने उद्धार करणे आल़ा ठैहराई नैं, अपणे सज्जे पास्से बड़ी ऊची पदवी दित्तियो ऐ, कि सैह़ इस्राएली लोकां जो मन बदलणे कने पापां दी माफी देई सकैं।

³²अहां इन्हां गल्लां दे गवाह हन, कने तिंआं ई पवित्र आत्मा भी, जिसियो परमात्मैं तिन्हां जो दित्या ऐ, जेह्ड़े तिसदेयां हुक्मां मनदे हन।”

³³एह़ सुणी करी सैह़ जली गै कने तिन्हां प्रेरितां जो मारणा चाया।

³⁴अपर गमलीएल नांऐ दा इक्क फरीसी माणु जेह्ड़ा व्यवस्थापक कने सारेयां लोकां च खास था, न्यायलय च खड़ोई करी चेलेयां जो थोड़े बग्त तांई बाहर घल्लणे दा हुक्म दित्ता।

³⁵कने ताह़लू तिन्हीं ग्लाया, “हे इस्राएली लोको, जेह्ड़ा कुच्छ तुहां इन्हां माणुआं नैं करणा चांह़दे हन, सोची समझी करी करनेयो।

³⁶क्जोकि इन्हां दिनां दे पैहल्ले थियूदास एह़ दावा करदा आया कि मैं भी कुच्छ ऐ; कने लगभग कोई चार सौ तिस माणुये पचांह़ चली पैयो थे, अपर सैह़ मारेया गेआ, कने जितणे लोक तिसियो मनदे थे, सैह़ सारे तितर-बितर होई नैं मुक्की गै।

³⁷तिसते बाद जनगणना दे बग्त गलील वासी आया, कने कुच्छ लोक तिन्हीं अपणे पास्से करी लै; सैह़ भी मारेया गेआ, कने जितणे लोक तिसियो मनदे थे, सैह़ सारे तितर-बितर होई गै।

³⁸इसतांई हुण मैं तुहां नैं सच्च ग्लांदा ऐ, इन्हां माणुआं ते दूर ई रेह्आ कने इन्हां नैं कोई मतलब मत रखा; क्जोकि जे तिन्हां दे कम्म कने मकसद माणुआं दे पास्से ते हन, तां सब कुच्छ खत्म होई जांगा;

³⁹अपर जे परमात्मे दे पास्से ते ऐ, तां तुहां इसियो कदी भी मिटाई नीं सकदे। कुत्थी इआं ना होयैं कि तुहां परमात्मे नैं भी लड़णे आल़े ठैह़रन।”

⁴⁰ताह़लू तिन्हां तिसदी गल्ल मन्नी लेई; कने प्रेरितां जो सद्दी करी कुटवाया; कने एह़ हुक्म देई करी छड्डी दित्ता कि यीशुये दे नांऐ दी भिरी कोई गल्ल मत करदे।

⁴¹प्रेरित इसा गल्ला ते खुस होई करी महासभा दे सामणै ते चली गै, कि अहां यीशुये दे नांऐ तांई बेइज्जत होणे जोग्गे तां ठेहरै हन।

⁴²सैह़ हर रोज मंदरे च कने घर-घर जाई नैं सिक्षा दैणा लग्गे, कने प्रेरित इसा गल्ला दा सुसमाचार सणाणे ते नीं रुके कि यीशु ई मसीह ऐ।