Read Kangri प्रेरितां दे कम्म 6 Bible Online

प्रेरितां दे कम्म 6 - Kangri bible

प्रेरितां दे कम्म 6

¹तिन्हां दिनां च जाह़लू चेलेयां दी गिणती जादा बधणा लग्गी, ताह़लू यूनानी भासा ग्लाणे आल़े यहूदी चेले इब्रानी बोली ग्लाणे आल़े यहूदी चेलेयां पर बुड़बुड़ाणा लग्गे, कि हर रोज दे खाणे दियां चीज्जां कने पैसेयां च अहां दियां बिधवां दा ख्याल नीं रखेया जांदा।

²ताह़लू तिन्हां बारांह प्रेरितां बाक्कि चेलेयां दी मंडल़िया जो अप्पु अल्ल सद्दी नैं ग्लाया, “एह़ ठीक नीं कि अहां परमात्मे दा वचन छड्डी करी खुआणे पलाणे दी सेवा च रैह़न।

³इसतांई, हे भाऊओ, अपणे च सत खास मर्दां जो चुणी लेआ, जेह्ड़े पवित्र आत्मा च भरोयो कने अक्लमंद होन, कि अहां तिन्हां जो एह़ कम्म देई सकन।

⁴अपर अहां तां प्रार्थना च कने वचन दे प्रचार कने सिक्षा दैणे च लग्गी रैहणा।”

⁵एह़ गल्ल पूरी मंडल़िया जो खरी लग्गी, कने तिन्हां स्तिफनुस नांऐ दा इक्क माणु जेह्ड़ा बसुआस कने पवित्र आत्मा नैं भरोया था, कने फिलिप्पुस, कने प्रुखुरूस, कने निकानोर, कने तिमोन, कने परमिनास, कने अन्ताकिया सैहरे दा रैहणे आल़ा नीकुलाउस जेह्ड़ा यहूदी मत च आई गेआ था, चुणी लेआ।

⁶तिन्हां जो प्रेरितां दे सामणै खरेड़ी दित्ता कने तिन्हां प्रार्थना करी नैं तिन्हां पर हत्थ रखेया।

⁷कने परमात्मे दा वचन फैलदा गेआ कने यरूशलेम सैहरे च चेलेयां दी गिणती बड़ी बधदी गेई; कने यहूदी याजकां दा इक्क बड़ा बड्डा समाज यीशु मसीह दियां इन्हां सिक्षां जो अपनाणा लग्गा।

⁸सित्फनुस अनुग्रह कने सामर्थी नैं भरोई करी लोकां च बड़े-बड़े अनोखे कम्म कने चमत्कार दस्सणा लग्गा।

⁹ताह़लू तिस आराधनालय ते जेह्ड़ा गुलामी ते अजाद नांऐ ते जाणेयां जांदा ऐ, कने कुरेनी, सिकन्दरिया, किलिकिया कने आसिया प्रदेसे दे मते लोक आई नैं सित्फनुस नैं बैंह्सबाजी करणा लग्गे।

¹⁰कने तिस ज्ञाने दा कने तिस पवित्र आत्मा दा नैं भरोई करी गल्लां करदा था, सैह़ सामणा नीं करी सके।

¹¹इसा गल्ला पर तिन्हां कई लोकां जो भड़काया जेह्ड़े ग्लाणा लग्गे, “अहां तां इसियो मूसा कने परमात्मे दे बरोध च निंदा दी गल्लां ग्लांदे सुणेया ऐ।”

¹²तिन्हां सित्फनुस दे खलाफ लोकां कने स्याणे कने सास्त्री माणुआं जो भड़काई दित्ता कने तिन्हां आई नैं तिसियो पकड़ी करी महासभा दे सामणै लेई आये।

¹³कने तित्थु तिन्हां झूठे गवाह खरेड़ी दित्ते, जिन्हां सित्फनुस पर एह़ दोस लगाई करी ग्लाया, “एह़ माणु इसा पवित्र जगाह दी कने मूसा दिया व्यबस्था दी निंदा करणा नीं छड्डदा।

¹⁴क्जोकि अहां तिसियो एह़ ग्लांदे सुणेया एह़ कि ऐई यीशु नासरी इस मंदरे जो ढाई दिंगा, कने तिन्हां रीतियां जो बदली दिंगा जेह्ड़ियां मूसैं अहां जो सौंपियां हन।”

¹⁵ताह़लू सारेयां लोकां जेह्ड़े सभा च बैठेयो थे, तिस पर नजर लगाई तां तिसदा मुँ सुअर्गदूते साइआं दुस्सेया।