Read Kangri प्रेरितां दे कम्म 7 Bible Online

प्रेरितां दे कम्म 7 - Kangri bible

प्रेरितां दे कम्म 7

¹ताह़लू महायाजकैं पुछया, “क्या एह़ दोस सच्च हन।”

²सित्फनुस जवाब दित्ता, “हे भाऊओ, कने स्याणेयो मेरी गल्ल सुणा। हारान सैहरे च बसणे ते पैहल्लैं अहां दा पूर्वज अब्राहम जाह़लू मेसोपोटामिया प्रदेसे च था; ताह़लू सामर्थी परमात्मैं तिस जो दर्शन दित्ता,

³कने तिस नैं ग्लाया, ‘तू अपणे देसे च कने अपणे रिस्तेदारां जो छड्डी करी तिस देसे जो चली जा, जिसियो मैं तिज्जो दस्सगा।’

⁴“ताह़लू सैह़ कसदियां दे देसे ते निकल़ी करी हारान सैहरे च जाई बसेया। तिसदे बुढ़े दी मौत्ती दे बाद परमात्मैं तिसियो तित्थु ते इस देसे च अंणी करी बसाया जिस च हुण अहां बसेयो हन,

⁵अपर तिस बग्त परमात्मैं तिसियो कुच्छ भी जायदात मतलब पैर रखणे दी भी जगाह नीं दित्ती, हलांकि तिस बग्त तिसदा कोई भी पुत्तर नीं था। भिरी भी परमात्मैं तिस नैं वादा कित्ता, कि ‘मैं एह़ देस तेरे कने तेरे बाद तेरे वंशे दे हत्थे च करी दिंगा।’

⁶“कने परमात्मैं एह़ भी ग्लाया, ‘तेरिया औलादी दे लोक पराये देसे च परदेसी हुंगे, कने तिन्हां जो सैह़ दास बणांगे कने चार सौ साल्लां तिकर दुख दिंगे।’

⁷भिरी परमात्मैं ग्लाया, ‘जिसा जाति दे लोकां दे सैह़ दास हुंगे, तिन्हां जो मैं सज़ा दिंगा, कने तिसते बाद सैह़ तिस देसे निकल़ी करी इस देसे च आई करी मेरी अराधना करगे।’

⁸कने परमात्मे अब्राहमे सौगी खतणा करणे दा वादा कित्ता; कने इसा हालता च जाह़लू अब्राहमे दे पुत्तर इसहाके दा जन्म होएया; तां अठमैं दिने तिसदा खतणा कित्ता; कने इसहाके ते याकूब कने याकूबे ते बाराह कुलपति पैदा होये।

⁹“कने यूसुफे दे भाऊआं तिस नैं बैर रखी करी तिसियो मिस्र देस जो जाणे आल़ेआं लोकां जो गुलामे साइआं बेची दित्ता। अपर परमात्मा तिस सौगी था,

¹⁰कने परमात्मे यूसुफे जो सारे दुखां ते छड्डाई करी मिस्र दे राजा फिरौन राजे दिया नजरा च अनुग्रह कने अक्ल प्रदान कित्ती, कने फिरौन राजैं यूसुफे जो पूरे मिस्र देसे पर कने अपणे घराने दा हाकम बणाई दित्ता।

¹¹“जाह़लू यूसुफ हाकम था, तां मिस्र कने कनान दे सारे देसे च अकाल पेआ; जिसते लोक बड़े भारी दुखी होये, कने अहां दे पूर्वजां जो खाणा नीं मिलदा था।

¹²अपर याकूबे एह़ सुणी करी मिस्र देसे च अनाज ऐ, अहां दे पूर्वजां जो पैहल्ली बरी तित्थु ते अनाज खरीदणे तांई घल्लेया, अपर तिन्हां यूसुफे जो नीं पणछैणया।

¹³जाह़लू सैह़ दूई बरी अनाज खरीदणे तांई गै, तां यूसुफैं अप्पु ई अपणे भाऊ जो अपणे बारे च दस्सेया कने यूसुफ दिया जातिया दे बारे च फिरौन राजे जो पता लग्गी गेआ।

¹⁴ताह़लू यूसुफैं अपणे बुढ़े याकूबे कने अपणे सारे परवारे जो, जेह्ड़े पचत्तर माणु थे, मिस्र देसे च ओणे दा सादा घल्लेया।

¹⁵ताह़लू याकूब मिस्र देसे च गेआ; कुच्छ बग्त बाद तित्थु सैह़ कने अहां दे पूर्वज मरी गै।

¹⁶तिन्हां याकूब कने तिसदे जागतां दियां लाह्सां शकेम सैहरे च अंणी करी तिसा कब्रा च रखियां, जिसा जो अब्राहमे चाँदी देई करी शकेम सैहरे च हमोर दिया औलादी ते खरीदी लियो थी।

¹⁷“अपर जाह़लू तिस वादे दा पूरा होणे दा बग्त आया, जेह्ड़ी परमात्मैं अब्राहमे सौगी कित्तियो थी, तां मिस्र देसे च सैह़ माणु बधी गै कने मते भरी होई गै।

¹⁸ताह़लू मिस्र च दूआ राजा होएया करदा था जेह्ड़ा यूसुफ जो नीं जाणदा था।

¹⁹“तिन्हीं अहां दियां जातिया नैं चलाकी करी नैं अहां दे पूर्वजां सौगी बड़ा बुरा बर्ताब कित्ता, कने लोक्के बच्चेयां जो खत्म करणे तांई मजबूर कित्ता तांजे सैह़ जिन्दे ना रैह़न।

²⁰तिस बग्त मूसा पैदा होएया। सैह़ परमात्मे दिया नजरा च बड़ा ई छैल़ था। तिसदे माँऊ-बुढ़े अपणे घरे च तिसियो त्रै मीहने चोरी-छुपे पाल़ेया।

²¹जाह़लू सैह़ तिसियो होर जादा छुपाई नीं सके, तां तिन्हां घरे बाहर रखी दित्ता, तां फिरौन राजे दिया कुड़िया तिसियो चुक्की लेआ, कने अपणा जागत समझी करी पाल़ेया।

²²मूसे जो मिस्री लोकां दी सारी पढ़ाई कराई गेई, कने सैह़ गल्लबात कने कम्मां च ताकतवर था।

²³“जाह़लू मूसा चाल़ियां साल्लां दा होएया, तां तिसदे मने च बचार आया कि मैं अपणे इस्राएली भाऊआं सौगी मुलाकात करैं।

²⁴तित्थु तिन्हीं इक्क इस्राएली माणुये पर अन्याय हुंदे दिक्खी करी तिसियो बचाया, कने मिस्री माणुये जो मारी करी तिस इस्राएली माणुये दा बदला लेआ।

²⁵तिन्हीं सोचेया कि तिसदे भाऊ समझगे कि परमात्मा तिसदे हत्थां ते तिन्हां जो गुलामी ते छड्डांगा, अपर सैह़ नीं समझे।

²⁶दूये दिने जाह़लू सैह़ अप्पु च लड़ा दे थे, तां सैह़ तित्थु आई रेह्आ; कने एह़ ग्लाई करी तिन्हां दा मेल करवाणा लग्गा, ‘हे माणुओ, तुहां तां भाऊ-भाऊ हन, इक्की-दूये पर क्जो अन्याय करदे हन?’

²⁷अपर जेह्ड़ा अपणे प्ड़ेसिये पर अन्याय करा करदा था, तिन्हीं एह़ ग्लाई करी हटाई दित्ता, ‘तिज्जो कुणी अहां पर हाकम कने न्याय करणे आल़ा बणाया ऐ।

²⁸क्या जिस तरीके नैं तैं कल मिस्री माणुये जो मारी दित्या तिंआं ई मिन्जो भी मारी दैणा चांह़दा ऐ।’

²⁹एह़ गल्ल सुणी करी मूसा डरी करी मिस्र देसे ते नठ्ठी गेआ, कने मिघान देसे च परदेसी बणी करी रैहणा लग्गा, कने तित्थु तिसदे दो जागत पैदा होये।

³⁰“जाह़लू पूरे चाल़ी साल होई गै, ताह़लू परमात्मे सुअर्गदूत दे रूपे च सीनै प्हाड़े दिया सुनसाण जगाह च मूसे जो बल़दे झुड़ेयां दिया अग्गी च दर्शन दित्ता।

³¹मूसे जो तिस दर्शने जो दिक्खी करी हरानी होई कने जाह़लू दिक्खणे तांई सैह़ गांह गेआ, तां प्रभु दी एह़ उआज़ आई,

³²‘मैं तेरे पूर्वज, अब्राहमे दा, इसहाके दा कने याकूबे दा परमात्मा ऐ।’ ताह़लू तां मूसा डरे दे मारे कम्बी पेआ, ऐत्थु तिकर कि तिसियो दिक्खणे दी हिम्मत नीं पेई।

³³ताह़लू परमात्मे तिस नैं ग्लाया, ‘अपणेयां पैरां ते जूत्तेयां खोली लै, क्जोकि जिसा जगाह च तू खड़ोत्या ऐ, सैह़ पवित्र जगाह ऐ।

³⁴मैं तां हकीकत च अपणे माणुआं दी जेह्ड़े मिस्र देसे च हन, हालता जो दिख्या ऐ; कने तिन्हां दा दुख कने तिन्हां दा रोणा सुणेया ऐ; इसतांई तिन्हां जो छड्डाणे तांई लुत्थेया ऐ हुण आ, मैं तिज्जो मिस्र देसे च घल्लगा।’

³⁵“एह़ सैई मूसा ऐ, जिसियो इस्राएली लोकां एह़ ग्लाई करी नकारी दित्या था, ‘तिज्जो कुणी अहां पर हाकम कने न्याय करणे आल़ा बणाया ऐ?’ तिसियो ई परमात्मैं हाकम कने छड्डाणे आल़ा बणाई करी, तिस सुअर्गदूते दिया बज़ाह ते जिन्हीं तिसियो झुड़ेयां च दर्शन दित्या था, घल्लेया।

³⁶एह़ माणु मिस्र देस कने लाल समुंदर कने सुनसाण जगाह च चाल़ियां साल्लां तिकर हरानी आल़े कम्म कने चमत्कार दस्सी-दस्सी करी तिन्हां जो कड्डी लेई आया।

³⁷एह़ सैई मूसा ऐ, जिन्हीं इस्राएली लोकां नैं ग्लाया, ‘परमात्मा तुहां दे भाऊआं च तुहां तांई मिन्जो साइआं इक्क भविष्यवक्ता खड़ा करगा।’

³⁸“एह़ सैई मूसा ऐ, जिन्हीं सुनसाण जगाह च लोकां दिया मंडल़िया बिच्च तिस परमात्मे दे सुअर्गदूते सौगी सीनै प्हाड़े पर तिस नैं गल्लां कित्तियां, कने अहां देयां पूर्वजां सौगी था, परमात्मे दे जरिये ज़िन्दगी दैणे आल़े वचन मिल्ले, कि अहां तिकर पज्जां।

³⁹अहां देयां पूर्वजां तिसदे हुक्मां दा पालण नीं कित्ता, अपर मिस्र देसे जो बापस जाणे दे बारे च सोचा दे थे,

⁴⁰कने तिसदे भाऊ हारूने नैं ग्लाया, ‘अहां तांई इक्क देवता बणा, जेह्ड़ा अहां जो मिस्र देस बापस लेई जाणे तांई अहां दे गांह-गांह चल्लैं, क्जोकि एह़ मूसा जेह्ड़ा अहां जो मिस्र देसे ते कड्डी लेई आया, अहां नीं जाणदे कि तिसियो क्या होएया।

⁴¹तिन्हां दिनां च तिन्हां इक्क बछड़े दी मूर्ति बणाई करी तिसदे गांह बल़ि चढ़ाई, कने अपणे हत्थे दे कम्मां नैं मग्न होणा लग्गे।

⁴²इसा बज़ाह ते परमात्मैं मुँऐ मोड़ी करी तिन्हां जो छड्डी दित्ता, कि अम्बरे च जेह्ड़ा कुच्छ ऐ, तिसदी अराधना करन, जिंआं भविष्यवक्ता दिया कताबा च परमात्मे ग्लाया ऐ, “‘हे इस्राएल दे लोको, क्या तुहां सुनसाण जगाह चाल़ी साल्लां तिकर पशु बल़ि कने अन्नबलि मिन्जो ई चढ़ांदे रैह्?

⁴³तुहां मोलेक देवते दे तम्बू कने रिफान देवते दे तारे जो लेई करी फिरदे थे, मतलब तिन्हां मूर्तियां जो जिन्हां जो तुहां अराधना करणे तांई बणाया था, इसा बज़ाह ते मैं तुहां जो बेबीलोन देसे दे परे लेई जाई करी बसांगा।’

⁴⁴“गवाही दा तम्बू सुनसाण जगाह च अहां दे पूर्वजां बिच्च था, जिंआं परमात्मे ठैहराया, जिन्हीं मूसे नैं ग्लाया, ‘जेह्ड़ा ढाँचा तैं दिख्या ऐ, तिसदे मताबक इसियो बणा।’

⁴⁵मते साल्लां बाद तिस तम्बुये जो अहां दे पूर्वजां पराणे बग्त च पाई करी यहोशू जो सौगी ऐत्थियो लेई आये; जिस बग्त कि तिन्हां होरनी जातिआं पर हक्क जताया, जिन्हां जो परमात्मैं अहां दे पूर्वजां दे सामणै कड्डी दित्ता, कने सैह़ तम्बू दाऊद राजे दे बग्त तिकर रेह्आ।

⁴⁶तिस पर परमात्मैं अनुग्रह कित्ता; कने तिन्हीं विणती कित्ती कि सैह़ याकूबे दे परमात्मे तांई रैहणे तांई डेरा बणा।

⁴⁷अपर दाऊदे दे जागतैं सुलेमाने तिस तांई मंदर बणाया।

⁴⁸“अपर परम प्रधान परमात्मा हत्थे दे बणायो मंदरा च नीं रैंह्दा, जिंआं कि यशायाह भविष्यवक्ता दिया कताबा च लिख्या ऐ,

⁴⁹“ ‘परमात्मा ग्लांदा ऐ, सुअर्ग मेरा सिंहासण कने धरती मेरे पैरां दी चौकी ऐ, मिन्जो तांई तुहां कुस तरीके दा मंदर बणांगे? कने मेरे अराम करणे दी कुण देई जगाह हुंगी?

⁵⁰क्या सुअर्गे कने धरतिया च सारी चीज्जां मैं नीं बणाईयां?’

⁵¹“हे ढीठ, कने परमात्मे दियां गल्लां जो नीं सुणने कने नीं मन्नणे आल़े लोको, तुहां हमेसा पवित्र आत्मा दा बरोध करदे हन। जिंआं तुहां दे पूर्वज करदे थे, तिंआं ई तुहां भी करदे हन।

⁵²क्या कदी भी कोई ऐदेया भविष्यवक्तां होएया ऐ, जिसियो तुहां दे पूर्वजां नीं सताया होयैं? ऐत्थु तिकर तिन्हां तां तिन्हां भविष्यवक्तां जो भी मारी दित्ता, जिन्हां तिस धर्मी जण दे ओणे दी पैहल्ले ते ई दस्सी दित्या था; कने हुण तुहां भी तिसियो पकड़ुआणे आल़े कने मारी दैणे आल़े बणी गै हन।

⁵³तुहां सुअर्गदूतां दिया बज़ाह ते बणायो नियम तां मिल्ले, अपर तिन्हां दा पालण नीं कित्ता।”

⁵⁴एह़ गल्लां सुणी करी यहूदी अगुऐ जल़ी गै कने स्तिफनुसे पर गुस्सा करणा लग्गे।

⁵⁵अपर तिन्हीं पवित्र आत्मा नैं भरोई करी सुअर्गे बक्खे दिख्या कने परमात्मे दी महिमा जो कने यीशुये जो परमात्मे दे सज्जे हत्थे दे पास्से खड़ोत्या दिक्खी करी ग्लाणा लग्गा,

⁵⁶“दिक्खा, मैं सुअर्गे जो खुलेया, कने माणुये दे पुत्तरे जो परमात्मे दे सज्जे हत्थे पास्से खड़ोत्या दिक्खा करदा ऐ।”

⁵⁷ताह़लू तिन्हां जोरे नैं ग्लाई करी कंन्न बंद करी लै, कने इक्क साथ तिस पर झपटी पै;

⁵⁸कने तिस यरूशलेम सैहरे दे बाहर निकल़ी करी तिसियो पत्थर मरी नैं मारी दित्ता, स्तिफनुसे पर जिन्हां लोकां दोस लगाया था, तिन्हां अपणे बाहरे आल़े कपड़े खोली करी शाऊल नांऐ दे इक्की जुआन माणुये दे पैरां अल्ल रखी दित्ते।

⁵⁹सैह़ सित्फनुस पर पत्थर मारदे रैह्, कने सैह़ एह़ ग्लाई करी प्रार्थना करदा रेह्आ, “हे प्रभु यीशु, मेरी आत्मा जो कबूल कर।”

⁶⁰भिरी गोड्डे दे भार बेई नैं जोरे नैं ग्लाणा लग्गा, “हे प्रभु, इस पापे तांई तिन्हां जो सज़ा मत दे।” कने एह़ ग्लाई करी तिन्हीं अपणे प्राण छड्डी दित्ते।