Read Kangri रोमियो 10 Bible Online

रोमियो 10 - Kangri bible

रोमियो 10

¹हे प्यारे साथी बसुआसियो, मेरे मने दी इच्छा कने मेरे अपणे लोकां तांई परमात्मे नैं मेरी प्रार्थना ऐ कि सैह़ परमात्मे ते उद्धार पान।

²क्जोकि तिन्हां दे बारे च मैं एह़ गवाही दिंदा ऐ, कि सैह़ परमात्मे तांई बड़े जोसीले तां हन, अपर तिन्हां जो समझ नीं ऐ, कि तिसदी सेवा किंआं करणी ऐ।

³क्जोकि सैह़ परमात्मे दिया नजरा च धर्मी बणने तांई तिसते अणजाण होई नैं कने अपणे तरीके नैं धर्मी बणने दी कोसस करदे हन, अपर परमात्मे दिया धार्मिकता दे बसे च नीं होये।

⁴क्जोकि मसीयैं तिस मकसदे जो पूरा कित्या ऐ जिस तांई मूसा दी व्यबस्था दित्तियो थी, इसदा नतीजा एह़ ऐ, कि हुण जेह्ड़ा कोई मसीह पर बसुआस करदा ऐ, सैह़ परमात्मे दिया नजरा च धर्मी बणी जांदा ऐ।

⁵क्जोकि मूसा दिया व्यबस्था च एह़ लिख्या ऐ, कि “हर इक्क माणुये जो परमात्मे दिया नजरा च धर्मी बणने तांई हर इक्क हुक्मे दा पालण करणा हुंगा।”

⁶अपर परमात्मे दिया नजरा च धर्मी बणने तांई बसुआसे दा तरीका एह़ ऐ, कि “तू अपणे मने च एह़ मत ग्लांदा कि सुअर्गे पर कुण चढ़गा?” (मतलब मसीह जो लौआणे तांई,)

⁷कने एह़ भी नीं ग्लाणा, “अधोलोक च कुण जांगा?” (मतलब मसीह जो मरेयां ते जिन्दा करी नैं लेयोणे तांई!)

⁸अपर सैह़ क्या ग्लांदी ऐ? एह़ कि “तुहां इस वचने जो अपणे मुँऐ नैं मन्नी करी अपणे मने च ग्रहण करी सकदे हन।” एह़ सैई बसुआसे दा वचन ऐ, जेह्ड़ा अहां प्रचार करदे हन।

⁹जे तू अपणे मुँऐ नैं यीशुये जो प्रभु जाणी नैं अंगीकार करैं, कने अपणे मने च बसुआस करैं कि परमात्मैं तिसियो मरेयां ते जिन्दा कित्या, तां तू पक्का उद्धार पांगा।

¹⁰क्जोकि परमात्मे दिया नजरा च धर्मी बणने तांई मने ते बसुआस कित्ता जांदा ऐ, कने उद्धार तांई मुँऐ ते अंगीकार कित्ता जांदा ऐ।

¹¹क्जोकि पवित्रशास्त्र एह़ ग्लांदा ऐ, “जेह्ड़ा कोई तिस पर बसुआस करगा, सैह़ कदी सर्मिंदा नीं हुंगा।”

¹²यहूदी कने यूनानी लोकां च कोई फर्क नीं ऐ, इसतांई कि सैई सबना दा प्रभु ऐ; कने सैह़ अपणे सारे नां लैणे आल़ेआं दा उद्धार करदा ऐ।

¹³क्जोकि, “जेह्ड़ा कोई प्रभु दा नां लैंगा, सैह़ उद्धार पांगा।”

¹⁴अपर मसीह, जिस पर तिन्हां बसुआस नीं कित्ता, सैह़ तिसदा नां किंआं लैन? कने जिसदे बारे सुणेया नीं, तिस पर किंआं बसुआस करन? कने प्रचारके बगैर किंआं सुणन?

¹⁵कने जे घल्ले नीं जान, तां किंआं प्रचार करन? जिंआं पवित्रशास्त्रे च लिख्या ऐ, “कितणे छैल़ हन तिन्हां लोकां दे पैर जेह्ड़े खरियां गल्लां दा सुसमाचार लेई नैं ओंदे हन।”

¹⁶अपर सबना तिस सुसमाचारे पर बसुआस नीं कित्ता। यशायाह भविष्यवक्ता ग्लांदा ऐ, “हे प्रभु, अहां दे सुसमाचारे पर कुणी बसुआस कित्ता ऐ?”

¹⁷इसतांई बसुआस ताह़लू हुंदा ऐ जाह़लू तुहां सुसमाचारे जो सुणदे हन, कने एह़ सुसमाचार मसीह दा वचन ऐ।

¹⁸अपर मैं पुछदा ऐ, “क्या यहूदी लोकां मसीह दा वचन सुणेया?” हाँ जरूर सुणेया ऐ, क्जोकि पवित्रशास्त्रे च लिख्या ऐ: “तिन्हां दे बोल सारिया धरतिया पर, कने तिन्हां दे वचन सारे संसारे च पुज्जी गै हन।”

¹⁹मैं भिरी ग्लांदा ऐ, इस्राएली लोक मसीह दे वचनां जो जाणदे थे। पैहल्ले तां परमात्मे मूसा भविष्यवक्ता दे जरिये ग्लाया ऐ: “मैं तुहां यहूदी लोकां दे मनां च जल़ण पैदा करगा; जाह़लू तुहां होरनी जातिआं दे लोकां तांई मेरा प्यार दिक्खगे। तिन्हां मूर्ख जातिआं दे लोकां दे जरिये मैं तुहां दे मनां च गुस्सा पैदा करगा।”

²⁰भिरी यशायाह भविष्यवक्तैं बड़ी हिम्मत रखी नैं ग्लाया कि परमात्मा एह़ ग्लांदा ऐ: “जेह्ड़े मिन्जो नीं तोपदे थे, तिन्हां मिन्जो पाई लेआ; कने जेह्ड़े पुछदे भी नीं थे, तिन्हां पर मैं प्रगट होई गेआ।”

²¹अपर इस्राएल देसे दे लोकां दे बारे च परमात्मे यशायाह भविष्यवक्ता दे जरिये एह़ ग्लाया: “मैं पूरा दिन अपणे हत्थ इक्क हुक्म नीं मन्नणे आल़ी कने बैंह्सबाजी करणे आल़ी प्रजा दे पास्से फैलांदा रेह्आ।”