Read Kangri रोमियो 12 Bible Online

रोमियो 12 - Kangri bible

रोमियो 12

¹इसतांई हे प्यारे साथी बसुआसियो, मैं तुहां नैं परमात्मे दी दया याद दिलाई नैं विणती करदा ऐ, कि अपणे आप्पे जो जिन्दा, कने पवित्र, कने परमात्मे जो खरा लगणे आल़ा बलिदान चढ़ा। परमात्मे दी भक्ति करणे दा ऐई सच्चा तरीका ऐ ।

²कने इस संसारे दे लोकां साइआं मत बणा; अपर तुहां दे मनां दे पूरे बदली जाणे ते तुहां दा चाल-चलण भी बदलदा जां, जिसते तुहां परमात्मे दी खरी, कने मने जो भाणे आल़ी, कने सिद्ध इच्छा दा तजरबा करी नैं जाणदे रेह्आ।

³क्जोकि मैं तिस अनुग्रह दिया बज़ाह ते जेह्ड़ा मिन्जो मिल्लेया ऐ, तुहां च हर इक्की नैं ग्लांदा ऐ, कि जिंआं समझणा चाइदा तिसते बधी नैं कोई भी अपणे आप्पे जो नीं समझैं; अपर जिंआं परमात्मैं हर इक्की जो बसुआसे दे नतीजे दे मताबक बंडी दित्ता ऐ, तिंआं ई समझदारिया सौगी अपणे आप्पे जो समझन।

⁴जिंआं अहां दे सरीरे च मते अंग हुंदे हन, कने सारे सरीरे दे अंगा दा कम्म इक्क नीं हुंदा,

⁵तिंआं ई अहां जेह्ड़े मते हन, मसीह च इक्क सरीर होई नैं अप्पु च इक्की दूये दे अंग हन।

⁶जाह़लू कि तिस अनुग्रह दे मताबक जेह्ड़ा अहां जो परमात्मे दित्या ऐ, अहां जो लग्ग-लग्ग वरदान मिल्लेयो हन। तां जिसियो भविष्यवाणी दा दान मिल्लेया ऐ, तिस जो सैई सब्द ग्लाणे चाइदे, जिस पर सैह़ बसुआस करैं कि परमात्मे ग्लाये हन।

⁷जे दूयेयां दी सेवा करणे दा दान मिल्लेया ऐ, तां तिंआं ई सेवा च लग्गी रैंह्; जे कोई सखाणे आल़ा ऐ, तां तिंआं ई सखाणे च लग्गी रैंह्;

⁸जिस जो हौंसला दैणे दा दान ऐ, सैह़ लोकां जो हौंसला दिंदा रैंह्; जे दान दैणे आल़ा ऐ तां दिल खोली नैं दान दैं; जेह्ड़ा अगुआई करैं, सैह़ लगना सौगी करैं, जेह्ड़ा दया करैं, सैह़ खुसिया नैं दया करैं।

⁹दूयेयां नैं प्यार करणे दा नाटक मत करा; बुराईया ते नफरत करा; मने सौगी खरे कम्म करणे च लग्गी रेह्आ।

¹⁰इक्की दूये नैं परवारे दे लोकां साइआं प्यार रखा; हर इक्क माणु दूयेयां जो अप्पु ते म्हान समझैं।

¹¹मेहनत करा कने आलसी मत बणा। अपणे पूरे दिले नैं प्रभु दी सेवा करदे रेह्आ।

¹²जेह्ड़ी आसा अहां अल्ल ऐ तिसा आसा दिया बज़ाह ते खुस रेह्आ; मुसीबता च सबर रखा; कने हर बग्त प्रार्थना करदे रेह्आ।

¹³परमात्मे दे लोकां जो जेह्ड़ा कुच्छ जरूरी ऐ, तिस च तिन्हां दी मदत करा; कने परोणेयां दी आदर खातर करदे रेह्आ।

¹⁴अपणे सताणे आल़ेआं जो आसीष देआ; आसीष देआ श्राप मत देआ।

¹⁵खुसी मनाणे आल़ेआं सौगी खुस रेह्आ, कने रोणे आल़ेआं सौगी रोआ।

¹⁶तुहां जिंआं अपणी परवाह करदे हन, तिंआं ई इक्की दूये दी परवाह करदे रेह्आ। घमंडी मत बणा, अपर जेह्ड़े गरीब हन, तिन्हां सौगी संगति रखणे तांई हमेसा त्यार रेह्आ। अपणे आप्पे जो अक्लमंद मत समझा।

¹⁷बुराईया दे बदले कुसी नैं बुराई मत करा; जेह्ड़ियां गल्लां सारेयां लोकां अल्ल खरियां हन, तिन्हां दी फिकर करदे रेह्आ।

¹⁸जित्थु तिकर होई सकैं, तुहां अप्पु ते सारेयां माणुआं सौगी मेल-जोल रखा।

¹⁹हे प्यारे साथी बसुआसियो, बदला मत लेआ, अपर परमात्मे जो तुहां तांई बदला लैणां देआ, क्जोकि पवित्रशास्त्रे च प्रभु ग्लांदा ऐ, “बदला लैणां मेरा कम्म ऐ, कने मैंई बदला लैंगा।”

²⁰अपर पवित्रशास्त्रे च एह़ भी लिख्या ऐ, “जे तुहां दा बैरी भुखा ऐ, तां तिसियो खाणा खुआ, जे प्यासा ऐ, तां तिसियो पाणी पिया; क्जोकि तुहां दे ऐदेया करणे ते तिसदा सिर सर्मा दे मारे झुकी जांगा।”

²¹बुराई करी नैं मत जीत्ता, अपर भलाई करी नैं बुराईया जो जीत्ती लेआ।