Read Kangri रोमियो 13 Bible Online

रोमियो 13 - Kangri bible

रोमियो 13

¹हर इक्क माणु प्रधान अधिकारियां दे अधीन रैंह्, क्जोकि कोई अधिकार ऐदेया नीं ऐ, जेह्ड़ा परमात्मे दे पास्से ते नीं ऐ; कने जेह्ड़े अधिकार हन, सैह़ परमात्मे दे जरिये ई दित्ते गै हन।

²इसतांई जेह्ड़ा कोई माणु अधिकार दा बरोध करदा ऐ, सैह़ परमात्मे दी विधिया दा बरोध करदा ऐ, कने बरोध करणे आल़ा सज़ा पांगा।

³क्जोकि जे कोई खरे कम्म करा दा ऐ, तां तिसियो अधिकारियां ते डरणे दी जरूरत नीं ऐ। अपर बुरे कम्म करा दा ऐ, ताह़लू तिसियो डरणा चाइदा ऐ, क्या तू अधिकारी ते निडर रैहणा चांह़दा ऐ? तां खरे कम्म कर, कने तिसदे पास्से ते तेरी तारीफ हुंगी;

⁴क्जोकि सैह़ तेरिया भलाईया तांई परमात्मे दे सेवक हन। अपर जे तू बुराई करैं, तां डर; क्जोकि तिन्हां अल्ल अधिकार ऐ कि तुहां जो सज़ा दैन; कने सैह़ परमात्मे दे सेवक हन कि तिन्हां दे गुस्से दे मताबक बुरे कम्म करणे आल़ेआं जो सज़ा दैन।

⁵इसतांई अधीन रैहणा ना सिर्फ तिस गुस्से दे डर ते जरूरी ऐ, अपर जमीर भी ऐई गवाही दिंदा ऐ।

⁶इसतांई सरकारा जो चुंगी भी देआ, क्जोकि अधिकार रखणे आल़े परमात्मे दे सेवक हन, कने सदा अपणा फर्ज पूरा करणे तांई कम्मे च लग्गी रैंह्दे हन।

⁷इसतांई हर इक्क दा हक्क देआ करा; जिसियो चुंगी चाइदी, तिसियो चुंगी देआ; जिसदा कर्जा चुकाणा ऐ, तिसदा कर्जा चुकाई देआ; कने जिस अधिकारी दी इज्जत करणी तिसदी करा, कने जेह्ड़े तारीफ करणे जोग्गे हन, तिन्हां दी तारीफ करा।

⁸आपसी प्यारे जो छड्डी नैं होर कुसा गल्ला च कुसी दे कर्जदार मत बणा; क्जोकि जेह्ड़ा दूये नैं प्यार रखदा ऐ, सैई व्यबस्था जो पूरा करदा ऐ।

⁹क्जोकि मूसा दिया व्यबस्था च मते सारे हुक्म थे, जिंआं कि “ब्यभिचार नीं करणा, खून नीं करणा, चोरी नीं करणा, लालच नीं करणा,” कने इन्हां जो छड्डी नैं कोई होर हुक्म ऐ, तां सारियां गल्लां दा नचौड़ इस हुक्मे च मिलदा ऐ, कि “अपणे प्ड़ेसिये नैं अप्पु साइआं प्यार रख।”

¹⁰प्यार प्ड़ेसिये नैं कुच्छ भी बुराई नीं करदा, जेह्ड़ा प्यार करदा ऐ, सैई व्यबस्था जो पूरा करदा ऐ।

¹¹जरूरी ऐ कि तुहां बग्ते जो पणछैणी नैं ऐदेया ई करा, इसतांई कि हुण तुहां तांई निदरां ते जागणे दा बग्त आई रेह्आ ऐ। क्जोकि जिस बग्त अहां बसुआस कित्ता था, तिस बग्ते दे बचारां ते हुण अहां दा उद्धार नेड़े ऐ।

¹²रात बड़ी होई गियो ऐ, कने दिन निकल़णे आल़ा ऐ, इसतांई अहां नेहरे दे कम्मां जो छड्डी नैं अहां जो तिन्हां हत्थयारां जो लैणां चाइदा, जिन्हां दा इस्तेमाल परगड़े च हुंदा ऐ।

¹³अहां दा सभाव बग्ते दे मताबक कने दिने साइआं खरा होणा चाइदा, ना कि लीला क्रीड़ा, पियक्कड़पण च, ना ब्यभिचार च, कने ना लुचपण च, कने ना झगड़े कने ना जल़निया च।

¹⁴अपर प्रभु यीशु मसीह तुहां दा कवच बणी जां, जिसदे जरिये तुहां दी रखवाल़ी होई सकैं, कने पापी सभावे दियां इच्छां जो पूरा करणे दी कोसस मत करा।