Read Kangri रोमियो 14 Bible Online

रोमियो 14 - Kangri bible

रोमियो 14

¹जे कोई बसुआसे च कमजोर ऐ, तां तिसियो अपणिया संगतिया च लेई लेआ, अपर तिसदे कम्मां दे बारे च तिसदी नुक्ता-चीनी मत करा।

²क्जोकि कुच्छ लोकां जो बसुआस ऐ, कि सब कुच्छ खाणा ठीक ऐ, अपर जेह्ड़ा बसुआसे च कमजोर ऐ, सैह़ साग पात ई खांदा ऐ।

³कने मांस खाणे आल़ा, जेह्ड़ा मांस नीं खांदा तिसियो नीच ना समझैं, कने जेह्ड़ा मांस नीं खांदा, सैह़ मांस खाणे आल़े पर दोस ना लगान, क्जोकि परमात्मैं दून्नी जो अपनाया ऐ।

⁴अपर तुहां जो कुसी दे सेवके पर दोस नीं लगाणा चाइदा। चाहे सैह़ खरा करैं या बुरा करैं, एह़ तिसदे मालके दी जिम्मेवारी ऐ। अपर सैह़ खरा ई करगा, क्जोकि प्रभु खरा करणे च तिसदी मदत करदा ऐ।

⁵इसी तरीके नैं कोई तां इक्की दिने जो दूये ते बधी करी मनदा ऐ, कने कोई सारे दिनां जो इक्क साइआं मनदा ऐ। हर इक्क अपणे मने च मन्नी लैं, कि जेह्ड़ा सैह़ सोचदा ऐ, सैह़ ठीक ऐ।

⁶जेह्ड़ा कुसी दिने जो मनदा ऐ, सैह़ प्रभु जो इज्जत दैणे तांई मनदा ऐ। जेह्ड़ा मांस खांदा ऐ, सैह़ प्रभु तांई खांदा ऐ। क्जोकि सैह़ परमात्मे दा धन्यावाद करदा ऐ, कने जेह्ड़ा मांस नीं खांदा, सैह़ प्रभु तांई नीं खांदा ऐ, कने सैह़ परमात्मे दा धन्यावाद करदा ऐ।

⁷क्जोकि अहां ते ना तां कोई अप्पु तांई जींदा ऐ, कने ना कोई अप्पु तांई मरदा ऐ।

⁸जे अहां जिन्दे हन, तां प्रभु तांई जिन्दे हन; कने जे मरदे हन, तां प्रभु तांई मरदे हन; जे अहां जीन या मरन, अहां प्रभु दे ई हन।

⁹क्जोकि मसीह इसतांई मरेया कने जिन्दा भी होई गेआ कि सैह़ मरेयां कने जिन्देया दून्नी दा प्रभु होयैं।

¹⁰तां तुहां क्जो अपणे बसुआसी भाऊये पर दोस लगांदे हन? या तुहां भिरी क्जो अपणे बसुआसी भाऊये जो तुच्छ जाणदे हन? अहां सारे दे सारे परमात्मे दे न्याय सिंहासणे दे सामणै खड़ोंगे।

¹¹क्जोकि पवित्रशास्त्रे च लिख्या ऐ, “प्रभु ग्लांदा ऐ, मैं अपणिया ज़िन्दगिया दी कसम खांदा ऐ, कि हर इक्क माणु मेरे सामणै गोड्डे टेकगा, कने हर इक्क माणु परमात्मे दा अंगीकार करगा।”

¹²इसतांई अहां च हर इक्क अपणे-अपणे कम्मां दा लेखा जोखा परमात्मे जो दिंगा।

¹³इसतांई अज्जे ते बाद अहां इक्की दूये पर दोस ना लगान, अपर तुहां एह़ ठाणी लेआ कि कोई भी बसुआसी भाऊ अहां दिया बज़ाह ते पापे दे जाल़े च ना फंसी जां।

¹⁴मैं जाणदा ऐ, कने प्रभु यीशु मसीह दे जरिये मिन्जो बसुआस ऐ, कि सारियां चीज्जां अप्पु च सुद्ध हन। अपर जेह्ड़ा तिन्हां जो असुद्ध समझदा ऐ सैह़ तिस तांई असुद्ध ऐ।

¹⁵जे तेरा बसुआसी भाऊ तेरे खाणे दिया बज़ाह ते उदास हुंदा ऐ, तां भिरी तेरा सभाव प्यारे मताबक नीं रेह्आ। जे तुहां दे खाणे ते तुहां दा भाऊ परमात्मे पर बसुआस करणा छड्डी दैं, तां तिस खाणे जो मत खा। क्जोकि मसीह तुहां दे तिस बसुआसी भाऊये तांई भी मरेया ऐ।

¹⁶इसतांई जेह्ड़ा कुच्छ तुहां करदे हन सैह़ खरा ऐ, अपर जे कोई तिसियो बुरा समझैं तां तिसियो करणा छड्डी देआ।

¹⁷क्जोकि परमात्मे दा राज्ज च खाणा-पीणा इतणी जरूरी गल्ल नीं ऐ, अपर जरूरी गल्ल एह़ ऐ, कि परमात्मे सौगी धर्मी ज़िन्दगी जीणा, सांति कने खुसी ऐ, जेह्ड़ी पवित्र आत्मा दे जरिये मिलदी ऐ।

¹⁸जेह्ड़ा कोई इस तरीके नैं मसीह दी सेवा करदा ऐ, परमात्मा तिसते खुस हुंदा ऐ, कने लोक तिसदे बारे च खरियां गल्लां करी नैं तिसदा आदर करदे हन।

¹⁹इसतांई अहां तिन्हां गल्लां दी कोसस करदे रैह़न जिन्हां ते लोक अप्पु च मिल्ली जुली नैं रैह़न, कने इक्की दूये जो बसुआसे च मजबूत करन।

²⁰जेह्ड़ा तुहां खांदे हन, तिसदिया बज़ाह ते परमात्मे दे कम्म नीं बिगड़ण। याद रखा सारियां खाणे दियां चीज्जां सुद्ध हन, जे कोई माणु तुहां दे खाणे ते पापे च पोंदा ऐ, तां एह़ गलत ऐ।

²¹खरा तां एह़ ऐ, कि तू ना मांस खा कने ना अंगूरा दा रस पी, ना कुच्छ ऐदेया कर जिसते तेरा भाऊ बसुआसे ते भटकी करी पापे च पेई जां।

²²जेह्ड़ा तेरा बसुआस ऐ, तिसियो परमात्मे सामणै अपणे ई मने च रख। धन ऐ सैह़, जेह्ड़ा तिसा गल्ला च, जिसायो सैह़ ठीक समझदा ऐ, अपणे आप्पे जो दोसी नीं बणांदा।

²³अपर जेह्ड़ा खाणे दे बारे शक करदा ऐ, कने भिरी भी खांदा ऐ, सैह़ सज़ा दा हक्कदार हुंदा ऐ। क्जोकि तिसदा खाणा पीणा बसुआसे मताबक नीं। कने जेह्ड़ा खाणा पीणा बसुआसे मताबक नीं ऐ, सैह़ पाप ऐ।