Read Kangri रोमियो 15 Bible Online

रोमियो 15 - Kangri bible

रोमियो 15

¹जरूरी ऐ कि अहां, जेह्ड़े बसुआसे च मजबूत हन, कमजोर लोकां दी मदत करन, ना कि अपणे आप्पे जो खुस करन।

²अहां च हर इक्क अपणे साथी बसुआसिये जो तिसदिया भलाईया तांई खुस करन तांजे तिसदा बसुआस मजबूत होई जां।

³क्जोकि मसीह अपणे आप्पे जो खुस नीं कित्ता, अपर जिंआं पवित्रशास्त्रे च लिख्या ऐ, “तेरी निंदा करणे आल़ेआं मेरी निंदा कित्ती ऐ।”

⁴पवित्रशास्त्रे च जेह्ड़ा कुच्छ लिख्या था, सैह़ अहां जो सिक्षा दैणे तांई लिख्या गेआ था, तांजे अहां जो तिसा सिक्षा नैं सबर कने हौंसला मिलदा रैंह्, कने इस तरीके नैं अहां अपणी आसा बणाई रखन।

⁵मैं एह़ प्रार्थना करदा ऐ, कि परमात्मा तुहां जो सबर कने हौंसले दा वरदान दैं, तांजे यीशु मसीह दे जरिये अप्पु च मिल्ली जुली नैं रेह्आ।

⁶तांजे तुहां सारे मिल्ली जुली नैं इक्क उआज़ होई नैं अहां दे प्रभु यीशु मसीह दे पिता परमात्मे दी स्तुति करा।

⁷इसतांई, तुहां इक्की दूये जो अपनाई लेआ, जिंआं मसीयैं तुहां जो अपनाई लेआ। एह़ इसतांई करा तांजे लोक परमात्मे दी बड़ेयाई करन।

⁸इसतांई मैं ग्लांदा ऐ, मसीह यहूदियां दा दास एह़ दस्सणे तांई बणेया, कि परमात्मा वादेयां जो पूरा करणे च सच्चा ऐ, जेह्ड़े तिन्हां दे पूर्वजां नैं कित्यो थे,

⁹कने होरनी जातिआं दे लोक भी परमात्मे दिया दया दिया बज़ाह ते तिसदी स्तुति करन; जिंआं पवित्रशास्त्रे च लिख्या ऐ, “इसतांई मैं होरनी जातिआं दे लोकां च तेरा धन्यावाद करगा, कने तेरे नांऐ दे भजन गांगा।”

¹⁰भिरी पवित्रशास्त्रे च एह़ लिख्या ऐ, “हे होरनी जातिआं दे सारे लोको तिसदिया प्रजा सौगी खुसी मना।”

¹¹कने पवित्रशास्त्रे च एह़ भी लिख्या ऐ, “हे होरनी जातिआं दे सारे लोको, प्रभु दी स्तुति करा; कने हे राज्ज दे सारे लोको तिसदी तारीफ करा।”

¹²कने भिरी यशायाह भविष्यवक्तैं पवित्रशास्त्रे च लिख्या ऐ, “यिशै दा इक्क वंश प्रगट हुंगा, कने जेह्ड़ा होरनी जातिआं दे लोकां पर राज्ज करगा, तिस पर होरनी जातिआं दे लोकां उम्मीद रखणी ऐ।”

¹³मैं प्रार्थना करदा ऐ, कि परमात्मा जेह्ड़ा आसा दा दाता ऐ, तुहां जो बसुआस करणे च हर तरीके नैं खुसी कने सांतिया नैं भरैं, कि पवित्र आत्मा दिया सामर्थी ते तुहां दी उम्मीद बधदी जां।

¹⁴हे प्यारे साथी बसुआसियो, मैं अप्पु तुहां दे बारे च पक्का जाणदा ऐ, कि तुहां भी अप्पु ई भलाईया नैं भरोई जा, कने तुहां पूरे तरीके नैं जाणा, कि तुहां जो क्या करणा ऐ? कने इक्की दूये जो सखांदे रेह्आ।

¹⁵तमी मैं कुत्थी-कुत्थी तुहां जो याद दिलाणे तांई जेह्ड़ा बड़ी दया करी नैं लिख्या ऐ। एह़ तिस अनुग्रह दिया बज़ाह ते होएया, जेह्ड़ा परमात्मैं मिन्जो दित्ता ऐ,

¹⁶कि मैं होरनी जातिआं दे लोकां तांई यीशु मसीह दा सेवक बणी नैं इक्क याजकें साइआं परमात्मे दे सुसमाचारे दी सेवा करैं। तां होरनी जातिआं दे लोकां जो पवित्र आत्मा दे जरिये पवित्र कित्ते जाणे ते बाद, परमात्मे सौगी मिल्लांदा ऐ, जिसते सैह़ खुस हुंदा ऐ।

¹⁷इसतांई मैं यीशु मसीह दिया बज़ाह ते परमात्मे दिया सेवा पर गरूर करी सकदा ऐ।

¹⁸क्जोकि तिन्हां गल्लां जो छड्डी मिन्जो कुसी गल्ला दे बारे च ग्लाणे दी हिम्मत नीं हुंदी, जेह्ड़े यीशु मसीयैं होरनी जातिआं दे लोकां दी अधीनता तांई वचन, कने कम्म,

¹⁹कने चमत्कारां, कने अनोखे कम्मां दी सामर्थी ते, कने पवित्र आत्मा दिया सामर्थी सौगी मेरे जरिये कित्ते। ऐत्थु तिकर कि मैं यरूशलेम सैहरे ते लेई नैं चौंन्नी पास्सेयां इल्लुरिकुम सैहरे तिकर यीशु मसीह दे सुसमाचारे दा पूरा-पूरा प्रचार कित्ता।

²⁰मेरे मने दी इच्छा एह़ ऐ, कि यीशु मसीह दे सुसमाचारे दा प्रचार तिन्हां जगांह च होयैं, जित्थु मसीह दे बारे अह्ल्ली सुणेया नीं गेआ, इआं ना होयैं कि दूये दियां नीआं पर घर बणा।

²¹अपर पवित्रशास्त्रे दिया इसा गल्ला जो पूरा करणा चांह़दा था, “जिन्हां जो मसीह दे बारे च नीं दस्सेया, सैई दिक्खगे कने जिन्हां तिसदे बारे च नीं सुणेया, सैई सुणगे कने समझगे।”

²²क्जोकि मैं तिन्हां जगांह च मसीह दे सुसमाचारे दा प्रचार करा दा था, जित्थु लोकां तिसदे बारे च नीं सुणेया था, इसतांई मैं अपणे आप्पे जो तुहां अल्ल ओणे ते रोकेया।

²³अपर हुण इन्हां सैहरां च जिन्हां लोकां मसीह दे बारे च नीं सुणेया ऐ, तिन्हां सैहरां च सुसमाचार प्रचारे दा कम्म पूरा करी दित्या ऐ, मिन्जो मते साल्लां दे इन्तजारे दे बाद तुहां अल्ल ओणे दी इच्छा ऐ।

²⁴इसतांई जाह़लू मैं स्पेन देसे जो जांगा तां तुहां नैं मिल्ली करी जांगा, क्जोकि मिन्जो आसा ऐ कि तिसा यात्रा च तुहां नैं मिल्लैं, कने जाह़लू तुहां नैं संगति करी नैं मेरा जी भरी जां, तां मैं चांह़दा ऐ, कि तुहां मेरी स्पेन देसे जो जाणे दिया यात्रा च मदत करा।

²⁵अपर हुण तां मिन्जो यरूशलेम सैहरे दे बसुआसियां दी सेवा करणे तांई जाणा ऐ।

²⁶क्जोकि मकिदुनिया कने अखाया प्रदेसे दे लोकां जो एह़ करणा खरा लग्गा, कि यरूशलेम सैहरे दे बसुआसियां च गरीबां तांई कुच्छ दान दैन।

²⁷तिन्हां खुसिया नैं गरीबां जो दान दित्ता, अपर सैह़ यरूशलेम सैहरे दे रैहणे आल़े लोकां दे कर्जदार भी हन, क्जोकि जे होरनी जातिआं दे लोक तिन्हां दियां आत्मिक आसीषां च साझी होन, तां तिन्हां जो भी ठीक ऐ कि गरीबां जो दान देई नैं तिन्हां दी मदत करन।

²⁸इसतांई मैं एह़ कम्म पूरा करी नैं यरूशलेम सैहरे जो जांगा, कने जेह्ड़ा दान तिन्हां तांई किठ्ठा कित्या, तिसियो तिन्हां जो देई करी तुहां अल्ल हुंदा-हुंदा स्पेन देसे जो जांगा।

²⁹कने मैं जाणदा ऐ, कि जाह़लू मैं तुहां अल्ल ओंगा, तां मसीह दी कीमती आसीषां जो तुहां सौगी बंडगा।

³⁰हे प्यारे साथी बसुआसियो, मैं अहां दे प्रभु यीशु मसीह कने पवित्र आत्मा दे प्यार दी याद दिलाई नैं, तुहां नैं विणती करदा ऐ, कि मेरे तांई परमात्मे नैं प्रार्थना करणे च मिन्जो सौगी मिल्ली नैं लगातार बणी रेह्आ,

³¹कि मैं यहूदिया प्रदेसे दे बेबसुआसियां ते बची रैंह्, कने मेरी सैह़ सेवा जेह्ड़ी यरूशलेम सैहरे दे लोकां तांई ऐ, बसुआसी लोकां जो खरी लग्गैं;

³²कने मैं परमात्मे दिया इच्छा ते तुहां अल्ल खुसिया सौगी आई नैं तुहां सौगी अराम करैं।

³³मैं प्रार्थना करदा ऐ, परमात्मा जेह्ड़ा सांति दिंदा ऐ, तुहां सबना सौगी रैंह्। आमीन।