Read Kangri रोमियो 16 Bible Online

रोमियो 16 - Kangri bible

रोमियो 16

¹मैं चांह़दा ऐ कि तुहां फीबे दी इज्जत करन, जेह्ड़ी अहां दी साथी बसुआसी बैहण कने किंख्रिया सैहरे दी कलीसिया दी दासी ऐ,

²कने तुहां बसुआसी लोकां जो चाइदा, कि तिसादा प्रभु च सुआगत करा; कने जिसा कुसी गल्ला च तिसा जो तुहां ते जरूरत ऐ, तिसा दी मदत करा। क्जोकि तिन्नै मतेआं दी कने मेरी भी बड़ी मदत कित्तियो ऐ।

³बैहण प्रिसका कने अक्विला भाऊये जो जेह्ड़े यीशु मसीह च मिन्जो सौगी कम्म करदे हन, तिन्हां जो मेरा नमस्कार।

⁴तिन्हां मिन्जो तांई अपणी ज़िन्दगी खतरे च पाई दित्तियो थी; कने सिर्फ मैंई नीं, अपर होरनी जातिआं दे सारी कलीसियां दे लोक भी तिन्हां दा धन्यावाद करदे हन।

⁵तिसा कलीसिया दे लोकां जो भी मेरा नमस्कार जेह्ड़ी तिन्हां दे घरे किठ्ठे हुंदे हन। मेरे प्यारे इपैनितुस जो, जेह्ड़ा आसिया प्रदेसे दा मसीह पर बसुआस करणे आल़ा दा पैहल्ला माणु ऐ, तिसियो भी मेरा नमस्कार।

⁶मरियमा जो, जिन्नै तुहां तांई बड़ी मेहनत कित्ती, तिसा जो भी मेरा नमस्कार।

⁷भाऊ अन्द्रुनीकुस कने यूनियासे बैह्णी जो जेह्ड़े मेरे जाति दे लोक हन, कने मिन्जो सौगी जेला च थे तिन्हां जो भी मेरा नमस्कार। एह़ लोक प्रेरितां च मनेयो-तनेयो कने मिन्जो ते पैहल्ले मसीह दे चेले बणी गियो थे।

⁸अम्पलियातुसे जो, जेह्ड़ा प्रभु च मेरा प्यारा ऐ, तिसियो भी मेरा नमस्कार।

⁹उरबानुसे जो, जेह्ड़ा मसीह च अहां सौगी कम्म करदा ऐ, कने मेरे प्यारे इस्तखुस जो भी मेरा नमस्कार।

¹⁰अपिल्लेसे जो भी जिसदा बसुआस परखे जाणे ते बाद भी मसीह च लगातार बधदा गेआ, मेरा नमस्कार। अरिस्तुबुलुस दे परवारे जो भी मेरा नमस्कार।

¹¹मेरी जाति दे भाऊ हेरोदियोन जो भी मेरा नमस्कार। नरकिस्सुस दे परवारे जो जेह्ड़े लोक प्रभु च बसुआस करदे हन, मेरा नमस्कार।

¹²त्रूफेना कने त्रूफोसा बैह्णी जो जेह्ड़ियां प्रभु च मेहनत करदियां हन, मेरा नमस्कार। प्यारी पिरसिस बैह्णी जो, जिन्नै प्रभु च बड़ी मेहनत कित्तियो, तिसा जो मेरा नमस्कार।

¹³रूफुस जिस जो परमात्मे खास कम्मे तांई चुणेया ऐ कने तिसदिया माँऊ जो, जेह्ड़ी मेरिया माँऊ साइआं ऐ, दून्नी जो मेरा नमस्कार।

¹⁴असुंक्रितुस कने फिलगोन कने हिर्मेसे, पत्रुबास कने हिर्मास कने तिन्हां सौगी बसुआसी भाऊआं जो मेरा नमस्कार।

¹⁵फिलुलुगुस कने यूलिया कने नेर्युस कने तिसदी बैहण, कने उलुम्पास कने तिन्हां सौगी दे सारे बसुआसियां जो मेरा नमस्कार।

¹⁶इक्की दूये सौगी प्यारे नैं गल़े मिल्ली करी नमस्कार करा। तुहां जो मसीह दी सारी कलीसियां दे पास्से ते नमस्कार।

¹⁷हुण हे प्यारे साथी बसुआसियो, मैं तुहां नैं विणती करदा ऐ, कि तुहां तिन्हां लोकां ते चौकन्ने कने दूर रेह्आ, जेह्ड़े तिसा सिक्षा दे खलाफ हन जेह्ड़ी तुहां जो मिलियो ऐ कने जेह्ड़े दूयेयां लोकां दे बसुआसे च कमजोर होणे दी कने झगड़े दी बज़ाह बणदे हन।

¹⁸क्जोकि ऐदेय लोक अहां दे प्रभु मसीह दी नीं, अपर अपणे फायदे तांई सेवा करदे हन। एह़ लोक मिठ्ठियां-मिठ्ठियां गल्लां करी नैं सिध्धे सादे लोकां जो भकाई दिंदे हन।

¹⁹तुहां दे हुक्म मन्नणे दी चर्चा सारेयां लोकां च फैली गेई ऐ, इसतांई मैं तुहां दे बारे च खुसी मनांदा ऐ। अपर मैं एह़ चांह़दा ऐ, कि तुहां भलाईया तांई अक्लमंद पर बुराईया तांई भोल़े बणी रेह्आ।

²⁰परमात्मा जेह्ड़ा सांति दा दाता ऐ, तुहां दे पैरां थल्लैं सैताने जो तौल़ी नास करवाई दिंगा। मैं प्रार्थना करदा ऐ, कि अहां दे प्रभु यीशु मसीह दा अनुग्रह तुहां पर हुंदा रैंह्।

²¹मिन्जो सौगी कम्म करणे आल़े तीमुथियुसे दा, कने मेरे जाति दे लोक लूकियुसे कने यासोने कने सोसिपत्रुसे दा तुहां जो नमस्कार।

²²मिन्जो तांई चिठ्ठी लिखणे आल़े तिरतियुसे दा प्रभु च तुहां जो नमस्कार।

²³गयुस जेह्ड़ा मेरी कने कलीसिया दी आदर खातर करणे आल़ा ऐ, तिसदा तुहां जो नमस्कार। इरास्तुस जेह्ड़ा सैहरे दा खजांची ऐ, कने भाऊ क्वारतुसे दा तुहां जो नमस्कार।

²⁴मैं प्रार्थना करदा ऐ, कि अहां दे प्रभु यीशु मसीह दा अनुग्रह हमेसा तुहां सारेयां लोकां पर हुंदा रैंह्।

²⁵हुण तुहां जो मेरा सुसमाचार जेह्ड़ा यीशु मसीह दे बारे च ऐ, तुहां जो प्रचार करी नैं बसुआसे च मजबूत करी सकदा ऐ। क्जोकि एह़ सुसमाचार सदियां ते छुपाई करी रखेया था।

²⁶अपर हुण परमात्मे दे हुक्मे दे मताबक भविष्यवक्तां दियां कताबां दे जरिये सारी जातिआं दे लोकां जो दस्सेया ऐ, कि बसुआसे नैं हुक्म मन्नणे आल़े होई जान।

²⁷यीशु मसीह दे जरिये तिस इकमात्र अक्लमंद परमात्मे दी महिमा जुगा-जुग हुंदी रैंह्। आमीन।