Read Kangri रोमियो 2 Bible Online

रोमियो 2 - Kangri bible

रोमियो 2

¹इसतांई हे दोस लगाणे आल़े, तू सोचदा ऐ कि तू ऐदेय लोकां पर दोस लगाई सकदा ऐ, अपर इसा गल्ला च अपणे बचाब च तिज्जो अल्ल कोई भाना नीं ऐ। क्जोकि जिसा गल्ला च तू दूयेयां पर दोस लगांदा ऐ, तिसा गल्ला च अपणे आप्पे जो भी दोसी बणांदा ऐ, इसतांई कि तू जेह्ड़ा दोस लगांदा ऐ, अप्पु ई सैई कम्म करदा ऐ।

²कने अहां जो एह़ पता ऐ, कि परमात्मा तिन्हां जो ठीक-ठीक सज़ा दिंगा, जेह्ड़े इन्हां बुरे कम्मां जो करदे हन।

³कने हे माणु, तू जेह्ड़ा बुरे कम्म करणे आल़ेआं पर दोस लगांदा ऐ, कने अप्पु सैई कम्म करदा ऐ। क्या एह़ समझदा ऐ कि तू परमात्मे दिया सज़ा ते बची जांगा?

⁴क्या तू परमात्मे दी भलाई, कने सबर, कने दया जो तुच्छ जाणदा ऐ? क्या एह़ नीं समझदा कि परमात्मे दी भलाई तिज्जो पापां ते मन बदलणे दे बारे च सखांदी ऐ?

⁵अपर तू ढीठ मने दा ऐ कने अपणे मने जो पापां ते बदलणे तांई मना करदा ऐ। जधैड़ी परमात्मा अपणा गुस्सा दस्सगा जिस च परमात्मे दा सच्चा न्याय प्रगट हुंगा। तधैड़ी परमात्मा तिज्जो बड़ी सक्त सज़ा दिंगा।

⁶सैह़ हर इक्की जो तिसदे कम्मां दे मताबक प्रतिफल़ दिंगा।

⁷जेह्ड़े लोक खरे कम्मां च मजबूत रेई नैं महिमा, कने आदर, कने सदा दी ज़िन्दगिया दिया तोपा च हन, तिन्हां जो परमात्मा सदा दी ज़िन्दगी दिंगा;

⁸अपर जेह्ड़े लोक सुवार्थी हन कने सच्च जो नीं मनदे अपर बुरे कम्मां जो करदे हन, तिन्हां पर परमात्मा अपणा गुस्सा कने कोप दस्सगा।

⁹कने हर इक्की माणुये पर मुसीबत कने खतरे ओंगे, जेह्ड़े बुरे कम्म करदे हन, परमात्मा सबना ते पैहल्ले यहूदी लोकां दा न्याय करगा, तिसते बाद तिन्हां लोकां दा जेह्ड़े यूनानी हन;

¹⁰अपर हर इक्क खरे कम्म करणे आल़े जो महिमा, आदर कने सांति मिलगी। परमात्मा सबना ते पैहल्ले यहूदी लोकां जो तिसते बाद यूनानी लोकां जो दिंगा।

¹¹क्जोकि परमात्मा कुसी दा पक्षपात नीं करदा।

¹²इसतांई सैह़ सारे जिन्हां मूसा दिया व्यबस्था जो बगैर जाणे पाप कित्ता ऐ, व्यबस्था जो बगैर जाणे नास भी हुंगे; अपर जिन्हां व्यबस्था जो जाणी करी पाप कित्ता ऐ, तिन्हां दा न्याय भी मूसा दिया व्यबस्था दे मताबक ई कित्ता जांगा।

¹³परमात्मे दिया नजरा च धर्मी सैह़ नीं, जेह्ड़े व्यबस्था जो सुणने आल़े हन अपर धर्मी सैह़ हन, जेह्ड़े मूसा दिया व्यबस्था पर चलदे हन।

¹⁴भिरी जाह़लू होरनी जाति दे लोक जिन्हां अल्ल मूसा दी व्यबस्था नीं ऐ, सैह़ अपणिया समझा ते ई ऐदेय कम्म करदे हन, जेह्ड़े मूसा दिया व्यबस्था च लिख्यो हन, तां मूसा दी व्यबस्था तिन्हां अल्ल ना होणे पर भी सैह़ एह़ साबित करदे हन कि व्यबस्था तिन्हां दे मनां च ऐ।

¹⁵सैह़ एह़ दस्सदे हन कि मूसा दी व्यबस्था तिन्हां दे मनां च लिखियो ऐ, कने तिन्हां दा जमीर भी गवाही दिंदा ऐ, कने तिन्हां दे बचार कदी दोसी, तां कदी बेकसूर ठैहरांदे हन।

¹⁶एह़ सब तिस बग्त साफ होई जांगा, जाह़लू परमात्मा मेरे जरिये सणायो सुसमाचार दे मताबक यीशु मसीह दे जरिये माणुआं दियां गुप्त गल्लां दा न्याय करगा।

¹⁷अपणे बारे च सोच जेह्ड़ा तू हुण अप्पु जो यहूदी ग्लांदा ऐ, कने व्यबस्था पर भरोसा रखदा ऐ, कने एह़ घमंड करदा ऐ कि तू परमात्मे दा खास माणु ऐ।

¹⁸तू परमात्मे दी इच्छा जो जाणदा ऐ, कने व्यबस्था दी सिक्षा पाई नैं खरियां-खरियां गल्लां जो अपनांदा ऐ।

¹⁹तू एह़ मनदा ऐ, कि “मैं अन्नेयां दा अगुआ, कने नेहरे च रैहणे आल़ेआं तांई जोत्ती,

²⁰कने वेअक्लेयां जो सखाणे आल़ा, कने तिन्हां लोकां दा जेह्ड़े परमात्मे च अह्ल्ली तिकर बच्चे हन गुरू ऐ।” तैं मूसा दिया व्यबस्था च तिस ज्ञाने कने सच्चाईया जो जाणी लेआ ऐ।

²¹अपर तू जेह्ड़ा दूयेयां जो सिक्षा दिंदा ऐ, अपणे आप्पे जो सिक्षा क्जो नीं दिंदा? कने तू जेह्ड़ी चोरी नीं करणे दी सिक्षा दिंदा ऐ, क्या तू अप्पु चोरी नीं करदा?

²²तू जेह्ड़ा ग्लांदा ऐ, “ब्यभिचार नीं करणा,” तां अप्पु ई ब्यभिचार क्जो करदा ऐ? तू जेह्ड़ा मूर्तियां ते नफरत करदा ऐ, तां अप्पु ई मंदरा जो क्जो लूटदा ऐ?

²³तू जेह्ड़ा व्यबस्था दे बारे च घमंड करदा ऐ, क्या व्यबस्था जो नीं मन्नी करी परमात्मे दी निंदा करदा ऐ?

²⁴इसतांई जिंआं पवित्रशास्त्रे च भी लिख्या ऐ, “कि तुहां दिया बज़ाह ते होरनी जातिआं दे लोकां च परमात्मे दे नांऐ दी निंदा होआ दी ऐ।”

²⁵जे तू मूसा दिया व्यबस्था पर चल्लैं तां खतणा करवाणे ते फायदा ऐ, अपर जे तू व्यबस्था जो नीं मन्नैं, तां तेरा खतणा करवाणा बगैर खतणा कित्यो बराबर ई ऐ।

²⁶इसतांई जे कोई माणु सरीरे दा खतणा कराये बगैर व्यबस्था दे नियमां जो मन्नैं, तां क्या तिसदी बगैर खतणे दी हालत खतणे दे बराबर नीं गिणी जांगी?

²⁷जेह्ड़ा माणु सरीरे दा खतणा कराये बगैर व्यबस्था जो मनदा ऐ, सैह़ तुहां जो दोसी ठैहरांगा, जिन्हां अल्ल मूसा दी व्यबस्था ऐ कने जिन्हां दा खतणा होएया ऐ।

²⁸क्जोकि ऐदेया नीं कि तू जन्म ते यहूदी ऐ, कने बाहरे ते यहूदी लगदा ऐ; कने ना ई सैह़ खतणा ऐ जेह्ड़ा प्रगट च ऐ कने सरीरे च ऐ।

²⁹अपर सच्चा यहूदी सैई ऐ जिसदा मन परमात्मे च ऐ। कने सच्चा खतणा सिर्फ मूसा दी व्यबस्था मन्नणे ते नीं, अपर परमात्मे दिया आत्मा दे कम्मे दे जरिये मन बदलणा ऐ। ऐदेय लोकां दी बड़ेयाई माणुआं ते नीं अपर परमात्मे दे पास्से ते हुंदी ऐ।