Read Kangri रोमियो 4 Bible Online

रोमियो 4 - Kangri bible

रोमियो 4

¹हुण अहां यहूदी होणे दे नाते अपणे पूर्वज अब्राहमे दे बारे च क्या ग्लान, कुसा बज़ाह ते सैह़ धर्मी गिणेयां गेआ?

²क्जोकि जे अब्राहम खरे कम्मां ते धर्मी गिणेयां जांदा, तां तिस अल्ल घमंड करणे दी बज़ाह हुंदी, अपर सैह़ परमात्मे सामणै अपणे खरे कम्मां दा घमंड नीं करी सकदा।

³पवित्रशास्त्र क्या ग्लांदा ऐ? एह़ कि “अब्राहमे परमात्मे पर बसुआस कित्ता, कने सैह़ परमात्मे दिया नजरा च धर्मी गिणेयां गेआ।”

⁴कम्म करणे आल़े जो दिहाड़ी दैणा दान नीं, अपर तिसदा हक्क समझेया जांदा ऐ।

⁵अपर जेह्ड़ा परमात्मे दियां खरियां गल्लां हासल करणे तांई मेहनत नीं करदा, अपर बुरे लोकां जो धर्मी बणाणे आल़े पर बसुआस करदा ऐ, तिसदा बसुआस तिस तांई धार्मिकता गिणेयां जांदा ऐ।

⁶जिसियो परमात्मा बगैर कम्मां दे धर्मी गिणदा ऐ, तिसियो दाऊद भी धन ग्लांदा ऐ,

⁷“धन सैह़ हन, जिन्हां दे बुरे कम्म परमात्मैं माफ कित्ते, कने जिन्हां दे पाप तिन्हीं भुल्लाई दित्ते गै।

⁸धन ऐ सैह़ माणु जिसदे पापां दा लेखा परमात्मा कदी नीं लैंगा।”

⁹तां एह़ खरे वचन, क्या खतणा कित्तेयां आल़ेआं तांई हन या जिन्हां दा खतणा नीं होएया तिन्हां तांई भी? अहां एह़ ग्लांदे हन, जेह्ड़ा पवित्रशास्त्रे च लिख्या ऐ, “अब्राहमे तांई तिसदा बसुआस परमात्मे दिया नजरा धर्मी गिणेयां गेआ।”

¹⁰तां एह़ काह़लू होएया? खतणे दिया हालता च नीं, अपर बगैर खतणे दिया हालता च? खतणे दिया हालता च नीं, अपर बगैर खतणे दिया हालता च।

¹¹बगैर खतणे दे बग्त तिसियो बसुआसे दे जरिये धर्मी गिणेयां था, तिस पर मोहरां साइआं खतणे दी छाप लगाई। इस तरीके नैं अब्राहम तिन्हां सबना दा भी पिता बणेया, जेह्ड़े खतणा कराये बगैर बसुआस करदे हन, जिसते तिसदा बसुआस भी तिन्हां तांई धर्मी गिणेयां जां।

¹²कने अब्राहम खतणा कित्तेयां आल़ेआं दा भी पिता बणेया, जेह्ड़े ना सिर्फ खतणे पर आस रखदे हन, अपर अहां दे पूर्वज अब्राहमे दे तिस बसुआसे दे रस्ते पर भी चलदे हन, जेह्ड़ा तिन्हीं खतणा करणे ते पैहल्ले कित्या था।

¹³परमात्मे अब्राहमे कने तिसदे वंशे नैं वादा कित्या कि सैह़ पूरे संसारे दे हक्कदार हुंगे। एह़ इसतांई नीं होएया कि अब्राहमे व्यबस्था दा पालण कित्ता, अपर इसतांई कि तिन्हीं बसुआस कित्ता कने सैह़ परमात्मे दिया नजरा च धर्मी गिणेयां गेआ।

¹⁴क्जोकि जे व्यबस्था दा पालण करणे आल़े ई हक्कदार हुंगे, तां बसुआस बेकार कने वादे बेअसर साबित होई गै हन।

¹⁵क्जोकि व्यबस्था दा नतीजा दा परमात्मे दा कोप ऐ, अपर जित्थु व्यबस्था ऐ ई नीं, औत्थू तिसा व्यबस्था दे नियमां जो तोड़णे दा सवाल ई पैदा नीं हुंदा।

¹⁶इसतांई वादा बसुआस दे जरिये हासल कित्ता जांदा ऐ, एह़ इक्क मुफ्ते च दित्या वरदान ऐ। जे अहां अल्ल अब्राहमे साइआं बसुआस ऐ। ताह़लू चाहे अहां मूसा दिया व्यबस्था दे मताबक जीन या नीं जीन, भिरी भी अहां इसियो जरूर हासल करी सकदे हन, क्जोकि अब्राहम सारे बसुआस करणे आल़ेआं दा पिता ऐ।

¹⁷जिंआं पवित्रशास्त्रे च लिख्या ऐ, “मैंई तिज्जो मतिआं जातिआं दा पिता बणाया ऐ।” परमात्मे दिया नजरा च अब्राहम अहां दा पूर्वज ऐ। तिन्हीं परमात्मे पर बसुआस कित्ता, कने जेह्ड़ा मरेयां जो जिन्दा करदा ऐ, कने जेह्ड़ियां गल्लां हन ई नीं, तिन्हां दा नां इआं लैंदा ऐ समझा कि सैह़ हन।

¹⁸तिन्हीं नरासा च भी आस रखी नैं बसुआस कित्ता, इसतांई कि तिस वचने दे मताबक कि “तेरा वंश देहया हुंगा,” सैह़ मतिआं जातिआं दा पिता होयैं।

¹⁹सैह़ जेह्ड़ा सौ साल्लां दा था, अपणे मरेयो देहय् सरीर ते कने सारा दे गर्भे दी मरियो देहई हालता जो जाणी नैं भी सैह़ अपणे बसुआसे च मजबूत बणी रेह्आ।

²⁰कने ना बेबसुआसी होई नैं परमात्मे दे वादे पर शक कित्ता, अपर बसुआसे च पक्के होई नैं परमात्मे दी महिमा कित्ती,

²¹कने खरे कित्ते जाणी लेआ कि जिसा गल्ला दा परमात्मे वादा कित्या ऐ, सैह़ तिसियो पूरा करणे च भी सामर्थी ऐ।

²²तिसदे बसुआसे दिया बज़ाह ते सैह़ तिस तांई परमात्मे दिया नजरा च धर्मी गिणेयां गेआ।

²³कने एह़ वचन, “बसुआस तिस तांई परमात्मे दिया नजरा च धर्मी गिणेयां गेआ,” ना सिर्फ तिस तांई लिख्या,

²⁴अपर अहां तांई भी। जे अहां परमात्मे च बसुआस करगे, जिन्हीं अहां दे प्रभु यीशुये जो मरेयां ते जिन्दा कित्या, तां अहां भी बसुआसे दिया बज़ाह ते धर्मी गिणे जांगे।

²⁵यीशु मसीह अहां दे अपराधां तांई पकड़ुआया गेआ, कने अहां जो धर्मी बणाणे तांई परमात्मे तिसियो मरेयां ते जिन्दा भी कित्ता।