Read Kangri रोमियो 5 Bible Online

रोमियो 5 - Kangri bible

रोमियो 5

¹इसतांई जाह़लू अहां बसुआसे ते धर्मी बणे, क्जोकि जेह्ड़ा प्रभु यीशु मसीयैं अहां तांई कित्या ऐ तिसदे जरिये अहां दा परमात्मे सौगी सांति आल़ा रिस्ता ऐ,

²क्जोकि अहां दे बसुआसे दिया बज़ाह ते तिस अनुग्रह तिकर जिस च अहां बणेयो हन, अहां दी पौंच भी होई ऐ, कने परमात्मे दी महिमा दिया आसा च खुसी मनाई ऐ।

³सिर्फ ऐई नीं, अपर अहां मुसीबतां च भी खुसी मनांदे हन, एह़ जाणी नैं कि मुसीबता ते सबर,

⁴कने सबरे ते खरा चाल-चलण कने खरे चाल-चलणे ते बसुआस पैदा हुंदा ऐ।

⁵कने बसुआसे ते सर्म नीं हुंदी, क्जोकि पवित्र आत्मा जेह्ड़ा परमात्मे अहां जो दित्या ऐ तिसदे जरिये परमात्मे दा प्यार अहां दे मने च पाया ऐ।

⁶क्जोकि जाह़लू अहां कमजोर थे, ताह़लू यीशु मसीह तिस बग्त जाह़लू लोक पापी थे, तिन्हां तांई मरेया।

⁷अपर सायद ई कोई धर्मी माणु तांई मरें, एह़ तां मुस्कल ऐ; अपर होई सकदा ऐ कि कोई अपणी मर्जिया ते खरे माणुये तांई मरें।

⁸अपर परमात्मे अहां पर अपणे प्यार दी भलाई इस तरीके नैं प्रगट करदा ऐ, कि जाह़लू अहां पापी थे ताह़लू मसीह अहां तांई मरेया।

⁹इसतांई जाह़लू कि अहां, हुण तिसदे खूने दिया बज़ाह ते धर्मी बणे, तां तिसदे जरिये परमात्मे दे कोप ते क्जो नीं बचगे?

¹⁰क्जोकि जाह़लू अहां परमात्मे दे बैरी होणे दिया हालता च थे, तां तिसदे पुत्तरे दे मरने दे जरिये अहां दा मेल-जोल परमात्मे सौगी होएया, तां भिरी मेल-जोल होई जाणे पर तिसदिया ज़िन्दगिया दिया बज़ाह ते अहां उद्धार क्जो नीं पांगे?

¹¹कने सिर्फ ऐई नीं, अपर हुण अहां दे प्रभु यीशु मसीह दे जरिये परमात्मे सौगी अहां दा मेल-जोल होई गेआ ऐ, इसतांई परमात्मे च खुस हुंदे हन।

¹²इसतांई जिंआं इक्की माणुये दे जरिये पाप इस संसारे च आया, आदम ई सैह़ पैहल्ला माणु ऐ जिसियो परमात्मे बणाया ऐ, कने आदमे दे पाप करणे दे जरिये मौत्त आई, कने इस तरीके नैं मौत्त सारे लोकां च आई, इसतांई कि सबना पाप कित्ता।

¹³परमात्मे दे जरिये मूसा जो व्यबस्था दैणे ते पैहल्ले पाप संसारे च था, अपर जित्थु व्यबस्था आई औत्थू पाप गिणेयां नीं जांदा।

¹⁴भिरी भी आदमे ते लेई नैं मूसा तिकर लोकां पाप कित्ता, कने सैह़ सारे मरी गै जिन्हीं आदम साइआं हुक्म नीं मन्नी करी पाप नीं कित्ता। आदम मसीह दा नसाण ऐ, जेह्ड़ा ओणे आल़ा था।

¹⁵अपर माणुये दे पाप कने परमात्मे दे अनुग्रह च बड़ा फर्क ऐ, क्जोकि जाह़लू इक्की माणुये दे पाप करणे दिया बज़ाह ते बड़े लोक मरे, तिंआं ई परमात्मे दे अनुग्रह कने धार्मिकता दा वरदान जेह्ड़ा तिन्हीं अहां जो यीशु मसीह दे जरिये दित्या ऐ, मते सारे लोकां दे पाप माफ करणे तांई बड़ा बड्डा वरदान ऐ।

¹⁶परमात्मे दा दित्या वरदान आदमे दे पापां साइआं नीं ऐ। क्जोकि इक्की अपराधे ते मौत्ती दी सज़ा आई, अपर चाहे अहां बड़े पाप कित्ते हन, भिरी भी परमात्मे इक्क वरदान देई नैं अहां दे पाप माफ कित्ते, कने अहां जो धर्मी बणाया।

¹⁷क्जोकि जाह़लू इक्की माणुये दे अपराधे दिया बज़ाह ते मौत्ती सारे लोकां पर राज्ज कित्ता, तां जेह्ड़े लोक अनुग्रह कने धार्मिकता साइआं मता सारा वरदान पांदे हन, सैह़ इक्की माणुये दे, मतलब यीशु मसीह दे जरिये पक्का सदा दी ज़िन्दगिया च राज्ज करगे।

¹⁸इसतांई जिंआं इक्क अपराध सारे लोकां तांई मौत्ती दी सज़ा दी बज़ाह बणेया, तिंआं ई इक्क धार्मिकता दा कम्म भी सारेयां लोकां तांई सदा दी ज़िन्दगिया दैणे तांई धर्मी बणाणे दी बज़ाह बणेया।

¹⁹क्जोकि जिंआं इक्की माणुये दे हुक्म ना मन्नणे ते मते सारे लोक पापी बणे, तिंआं ई इक्की माणुये दे हुक्म मन्नणे ते मते सारे लोक धर्मी बणगे।

²⁰वादे च मूसा दी व्यबस्था दित्ती तांजे लोक एह़ समझी सकन कि सैह़ कितणे पापी हन। अपर जित्थु पाप जादा होएया, तित्थु अनुग्रह इसते भी बड़ा जादा होएया,

²¹कि जिंआं पापें मौत्ती जो फैलाई करी सारे लोकां पर राज्ज कित्ता, तिंआं ई अहां दे प्रभु यीशु मसीह दे जरिये परमात्मे दा अनुग्रह भी सदा दी ज़िन्दगिया तांई धर्मी बणाई करी राज्ज करदा ऐ।