Read Kangri रोमियो 6 Bible Online

रोमियो 6 - Kangri bible

रोमियो 6

¹परमात्मा अपणे अनुग्रह नैं अहां दे पापां जो माफ करदा ऐ। तां अहां क्या ग्लान? क्या अहां पाप करदे रैह़न कि अनुग्रह मता सारा होयैं?

²नीं, कदी भी नीं। अहां जाह़लू पाप तांई मरी गै तां भिरी गांह जो तिस च किंआं ज़िन्दगी कटगे?

³अहां जाणदे हन कि अहां सारेयां जिन्हां यीशु मसीह दा बपतिस्मा लेआ ऐ, तां तिसदिया मौत्ती दा बपतिस्मा लेआ।

⁴इसतांई जाह़लू अहां बपतिस्मा लेआ तां अहां यीशु मसीह सौगी मारे कने दब्बे गै। तांजे जिंआं मसीह पिता परमात्मे दी महिमा दे जरिये मरेयां ते जिन्दा होई गेआ, तिंआं ई अहां भी इक्क नौई ज़िन्दगी जीन।

⁵क्जोकि जाह़लू अहां तिसदी मौत्ती दिया समानता च तिस सौगी जुटी रैह़न, तां सच्ची च तिसदे जिन्दे होणे दिया समानता च भी जुटी रैंह्गे।

⁶अहां जाणदे हन कि अहां दा पराणा इन्सानी रूप मसीह सौगी सूल़िया पर टूंगेया तांजे पाप दा सरीर बेकार होई जां, कने अहां गांह जो पापे दे दासे दे रूपे च नीं रैह़न।

⁷जाह़लू अहां यीशु मसीह सौगी मरी गै, तां अहां पापे ते बसे ते छुटी नैं धर्मी बणी गै।

⁸इसतांई जे अहां मसीह सौगी मरी गै, तां अहां दा बसुआस एह़ ऐ कि तिस सौगी अहां नौई ज़िन्दगी जींगे भी।

⁹क्जोकि एह़ जाणदे हन कि मसीह मरेयां ते जिन्दा होई नैं सैह़ भिरी कदी नीं मरगा। तिस पर भिरी कदी मौत्त नीं ओंगी।

¹⁰क्जोकि जाह़लू मसीह मरी गेआ तां पापे तांई इक्की ई बरी मरी गेआ; अपर हुण जेह्ड़ा जिन्दा ऐ, तां सैह़ परमात्मे तांई जिन्दा ऐ।

¹¹तुहां लोक भी इआं ई अप्पु जो पापे तांई मरेया समझा, कने परमात्मे तांई यीशु मसीह च जिन्दा।

¹²इसतांई तुहां दे नास होणे आल़े सरीरे ऊपर पाप दा बस ना चल्लैं, तांजे तुहां तिसदियां इच्छां दे बसे च रैह़न।

¹³कने ना अपणे सरीरे दे अंगा जो बुरे कम्मां दे हत्थयार होणे तांई पाप जो सौंपा, अपर अप्पु जो मरेयां ते जिन्दा होएया जाणी नैं अपणी ज़िन्दगी परमात्मे जो देआ, कने अपणे सरीरे दे अंगा जो धार्मिकता दे हत्थयार होणे तांई पूरी ज़िन्दगी परमात्मे जो देई देआ।

¹⁴ताह़लू तुहां लोकां पर पाप दा कोई हक्क नीं रैंह्गा, क्जोकि तुहां हुण व्यबस्था दे बसे च नीं अपर परमात्मे दे अनुग्रह दे बसे च हन।

¹⁵तां क्या होएया? क्या अहां इसतांई पाप करन कि अहां व्यबस्था दे बसे च नीं अपर अनुग्रह दे बसे च हन? नीं, कदी भी नीं।

¹⁶क्या तुहां नीं जाणदे हन कि जाह़लू कुसी दा हुक्म मन्नणे तांई तुहां अप्पु जो दासां साइआं सौंपी दिंदे हन। दास चाहे पापे दे होन, जिसदा नतीजा मौत्त ऐ, चाहे परमात्मे दे होन, जिसदा हुक्म मन्नणे दा नतीजा धार्मिकता ऐ?

¹⁷अपर परमात्मे दा धन्यावाद होयैं, कि तुहां जेह्ड़ा पापे दे दास थे हुण मने ते तिसा सिक्षा जो मन्नणे आल़े होई गै, जिसदे सांचे च ढालेयो थे,

¹⁸कने तुहां जो पापां ते छुटकारा मिल्ली गेआ कने तुहां धार्मिकता दे दास बणी गियो हन।

¹⁹मैं तुहां दे सरीरे दी कमजोरिया दिया बज़ाह ते माणुआं दे नजरिये नैं ग्लांदा ऐ। जिंआं तुहां अपणे सरीरे दे अंगा जो बुरे कम्मां कने बुराईया दे दास बणाई नैं दित्या था, तिंआं ई हुण अपणे सरीरे दे अंगा जो पवित्रता तांई धार्मिकता दे दास बणाई नैं देई देआ।

²⁰जाह़लू तुहां पापे दे दास थे, तां धार्मिकता दे पास्से ते अजाद थे।

²¹तुहां बुरे कम्म कित्ते हन कने हुण तुहां तिन्हां गल्लां ते सर्मिंदा हुंदे हन, तिन्हां सारे बुरे कम्मां ते तुहां दा क्या फायदा होएया ऐ? क्जोकि इन्हां दा नतीजा तां मौत्त ऐ।

²²अपर हुण पापे ते अजाद होई नैं परमात्मे दे दास बणी नैं तुहां जो फायदा होएया जिसते पवित्रता हासल हुंदी ऐ, कने तिसदा नतीजा सदा दी ज़िन्दगी ऐ।

²³क्जोकि पापे दी मजदूरी तां बस मौत्त ई ऐ, अपर परमात्मे दा वरदान अहां दे प्रभु यीशु मसीह च सदा दी ज़िन्दगी ऐ।