Read Kangri रोमियो 8 Bible Online

रोमियो 8 - Kangri bible

रोमियो 8

¹इसतांई हुण जेह्ड़ा यीशु मसीह च ऐ, तिन्हां पर सज़ा दा हुक्म नीं। क्जोकि सैह़ सरीरे मताबक नीं अपर पवित्र आत्मा मताबक चलदे हन।

²क्जोकि पवित्र आत्मा तुहां जो सैह़ ज़िन्दगी दित्तियो ऐ, जेह्ड़ी यीशु मसीह दे जरिये मिलदी ऐ, कने तुहां जो पापां ते कने मौत्ती ते अजाद करदी ऐ।

³क्जोकि जेह्ड़े कम्म मूसा दिया व्यबस्था अहां दे पापी सभावे दिया बज़ाह ते कमजोर होई नैं नीं करी सकी। सैह़ कम्म परमात्मैं करी दित्ते हन, मतलब जिन्हीं अहां दे पापां दी माफी तांई अपणे पुत्तरे जो बलिदान होणे तांई घल्लेया, कने जिन्हीं अहां पापी माणुआं साइआं सरीर धारण कित्ता, कने परमात्मैं मसीह दे सरीरे च पापे जो सज़ा दा हुक्म दित्ता।

⁴इसतांई कि अहां च, जेह्ड़े पापी सभावे मताबक नीं अपर पवित्र आत्मा दे मताबक सभाव रखदे हन, व्यबस्था दियां उम्मीदां पूरियां होई जान।

⁵क्जोकि पापी सभावे मताबक जीणे आल़ा माणु सरीरे दियां गल्लां पर मन लगांदे हन; अपर आत्मा दे मताबक जीणे आल़ा माणु आत्मिक गल्लां पर मन लगांदे हन।

⁶सरीरे दियां गल्लां पर मन लगाणा तां मौत्त ऐ, अपर आत्मा दियां गल्लां पर मन लगाणा तां ज़िन्दगी कने सांति ऐ।

⁷सरीरे दियां गल्लां पर मन लगाणा तां परमात्मे नैं बैर रखणा ऐ। क्जोकि ना तां पापी सभाव परमात्मे दिया व्यबस्था दे अधीन ऐ कने ना तिसदिया व्यबस्था जो मन्नी सकदा ऐ।

⁸कने जेह्ड़े पापी सभावे दे बसे च हन, सैह़ परमात्मे जो खुस नीं करी सकदे।

⁹अपर जाह़लू कि पवित्र आत्मा तुहां च बसदा ऐ, तां तुहां पापी सभावे दे बसे च नीं, अपर आत्मा दे बसे च हन। जे कुसी च मसीह दा आत्मा नीं तां सैह़ तिसदा जण नीं।

¹⁰हुण इसतांई कि मसीह तुहां च वास करदा ऐ, तां पापे दिया बज़ाह ते सरीरे दे मरने पर भी धार्मिकता दिया बज़ाह ते तुहां दी आत्मा जिन्दा ऐ।

¹¹कने जे परमात्मे दिया आत्मा जिन्नै यीशु मसीह जो मरेयां ते जिन्दा कित्या, तुहां च वास करदी ऐ; तां जिन्हीं मसीह जो मरेयां ते जिन्दा कित्या, सैह़ तुहां दे नास होणे आल़े सरीरां जो भी अपणिया आत्मा दे जरिये जेह्ड़ी तुहां च वास करदी ऐ, जिन्दा करगा।

¹²इसतांई हे प्यारे साथी बसुआसियो, अहां सरीर दे कर्जदार नीं कि सरीरे दे मताबक ज़िन्दगी जीन,

¹³क्जोकि जे तुहां पापी सभावे मताबक ज़िन्दगी जींगे तां परमात्मे ते दूर होई जांगे, जे पवित्र आत्मा दिया सामर्थी दे जरिये पापी सभावे जो मारगे तां जिन्दा रैंह्गे।

¹⁴इसतांई कि जितणे लोक परमात्मे दिया आत्मा मताबक ज़िन्दगी जींदे हन, सैई परमात्मे दे बच्चे हन।

¹⁵क्जोकि तुहां लोकां जो गुलामी दी आत्मा नीं मिलियो, जिसाते भिरी डरणा लग्गी जान, अपर पवित्र आत्मा अहां जो परमात्मे दे बच्चे बणांदा ऐ, जिसियो अहां “हे अब्बा, हे पिता” ग्लाई नैं पुकारदे हन।

¹⁶पवित्र आत्मा अप्पु ई अहां दिया आत्मा सौगी गवाही दिंदा ऐ, कि अहां परमात्मे दी औलाद हन।

¹⁷कने जे अहां औलाद हन, तां वारस भी, अपर परमात्मे दे वारस कने मसीह दे संगी वारस हन, जाह़लू अहां तिस सौगी दुख झेलन तां तिस सौगी महिमा भी पान।

¹⁸मैं जाणदा ऐ, कि इस बग्ते दे दुख कने मुसीबत परमात्मे दिया महिमा दे सामणै कुच्छ भी नीं हन, जेह्ड़ी अहां पर प्रगट होणे आल़ी ऐ।

¹⁹क्जोकि सारी सृष्टि बड़ी आस लगाई नैं तिस बग्ते दा इन्तजार करा दी ऐ, कि काह़लू परमात्मा अपणे बच्चेयां जो प्रगट करगा।

²⁰क्जोकि परमात्मे दे जरिये बणाईयो हर चीज्जा अपणिया कीमता जो खोई दित्ता, एह़ ऐदेया नीं कि सैह़ अपणे आप्पे ते चांह़दियां थियां, अपर परमात्मे ऐदेया होणे तांई कित्ता ऐ, भिरी भी इक्क आसा ऐ

²¹कि सृष्टि भी अप्पु ई विनाशे दिया गुलामिया ते छुटकारा पाई नैं, परमात्मे दियां औलांदी दी महिमा दी अजादी हासल करगी।

²²क्जोकि अहां जाणदे हन, कि सारी सृष्टि अह्ल्ली तिकर जाह़लू ते आदमे पाप कित्या ऐ, मिल्ली नैं किलदी कने पीड़ां च पियो तड़फदी ऐ।

²³कने सिर्फ सृष्टि नीं अपर अहां भी जिन्हां अल्ल पवित्र आत्मा दा पैहल्ला फल़ ऐ, अप्पु ई अपणे अंदर ई अंदर किलदे हन; अपर हुण अहां इन्तजार करदे हन, कि परमात्मा अहां जो अपणे बच्चे बणाई लैं, मतलब अहां दे सरीरे जो बुरे कम्मां ते छुटकारा देई दैं।

²⁴इसा उम्मीदा सौगी तां अहां दा उद्धार होएया ऐ; अपर जिसा चीज्जा दी उम्मीद कित्ती जांदी ऐ, जाह़लू सैह़ दुस्सी जां तां भिरी आस कुत्थू रेई? क्जोकि जिसा चीज्जा जो कोई दिक्खा दा ऐ, तिसा चीज्जा दी उम्मीद क्या करणी?

²⁵अपर जिसा चीज्जा जो अहां नीं दिक्खदे, जे तिसा दी उम्मीद रखदे हन, तां सबर करी नैं तिसादा इन्तजार भी करदे हन।

²⁶इसी तरीके नैं पवित्र आत्मा भी अहां दे बसुआसे दिया कमजोरिया च अहां दी मदत करदा ऐ, क्जोकि अहां नीं जाणदे, कि प्रार्थना कुस तरीके नैं करणा चाइदी, अपर पवित्र आत्मा अप्पु ई घुटी-घुटी करी रोई नैं, जिसादे बारे च दस्सी नीं सकदे, अहां तांई विणती करदा ऐ।

²⁷कने मनां जो परखणे आल़ा परमात्मा पवित्र आत्मा दिया मनसा जो जाणदा ऐ। क्जोकि सैह़ परमात्मे दे पवित्र लोकां तांई तिसदिया इच्छा दे मताबक विणती करदा ऐ।

²⁸अहां जाणदे हन, कि जेह्ड़े लोक परमात्मे नैं प्यार रखदे हन, तिन्हां तांई सारियां गल्लां मिल्ली नैं भलाई ई पैदा करदियां हन, मतलब तिन्हां ई तांई जेह्ड़े तिसदिया इच्छा दे मताबक चुणेयो हन।

²⁹क्जोकि जिन्हां जो तिन्हीं पैहल्ले ते चुणी लेआ ऐ, तिन्हां दे बारे च ऐदेया इरादा भी करी लेआ ऐ कि तिसदे पुत्तर यीशु मसीह साइआं होन, तांजे यीशु मसीह सारे बसुआसियां च जेठा पुत्तर बणी सकैं।

³⁰भिरी जिन्हां जो परमात्मे पैहल्ले ते चुणेया ऐ, तिन्हां जो सद्देया भी, कने जिन्हां जो तिन्हीं सद्देया ऐ, तिन्हां जो धर्मी बणाया भी, जिन्हां जो तिन्हीं धर्मी बणाया ऐ, तिन्हां जो महिमा भी दित्ती ऐ।

³¹इन्हां सारियां गल्लां जो ध्याने च रखी नैं अहां इस नतीजे च पुज्जे हन, जे परमात्मा अहां दे पास्से ऐ, तां अहां दा बरोधी कुण होई सकदा ऐ?

³²जिन्हीं अपणे इकलौते पुत्तरे जो भी नीं रखी छड्डेया, अपर अहां पर दया करी नैं तिसियो भी अहां सबना तांई देई दित्ता। तां इतणा कुच्छ दैणे ते बाद भी सैह़ अहां जो अपणे पुत्तरे सौगी सब कुच्छ क्जो नीं दिंगा?

³³परमात्मे दे चुणेयां पर दोस कुण लगाई सकदा ऐ? परमात्मा ई ऐ, जेह्ड़ा तिन्हां जो धर्मी बणाणे आल़ा ऐ।

³⁴भिरी कुण ऐ जेह्ड़ा अहां पर दोस लगाई सकदा ऐ? कोई भी नीं। क्जोकि यीशु मसीह ई ऐ जिन्हीं अपणे प्राण अहां तांई देई दित्ते, कने जेह्ड़ा मरेयां ते जिन्दा भी होई गेआ, कने परमात्मे दे सज्जे पास्से ऐ, कने अहां तांई विणती भी करदा ऐ।

³⁵कुण अहां जो मसीह दे प्यारे ते लग्ग करगा? क्या मुसीबत, या खतरे, या दंगा, या अकाल, या कंगाली, या जोखिम, या तलवार ते मौत्त?

³⁶जिंआं पवित्रशास्त्रे च लिख्या ऐ, “तिज्जो तांई अहां हर दिन मौत्ती दे खतरे च रैंह्दे हन; अहां बल़ि होणे आल़िआं भेड्डां साइआं गिणेयो हन।”

³⁷अपर इन्हां सारियां गल्लां च अहां तिसदे जरिये ते जिन्हीं अहां नैं प्यार कित्या ऐ, अहां अल्ल उम्मीदा ते बधी करी जीत्त ऐ।

³⁸क्जोकि मैं खरे कित्ते जाणदा ऐ, अहां जो परमात्मे दे प्यारे ते जेह्ड़ा अहां दे प्रभु यीशु मसीह च ऐ कोई लग्ग नीं करी सकदा। ना मौत्त ना ज़िन्दगी, ना सुअर्गदूत ना दुष्टआत्मां, ना वर्तमान ना भविष्य, ना सामर्थ ना ऊंचाई, ना गेहराई कने ना कोई होर सृष्टि।