Read Kangri रोमियो 9 Bible Online

रोमियो 9 - Kangri bible

रोमियो 9

¹मैं मसीह च सच्च ग्लांदा ऐ, झूठ नीं ग्लांदा कने मेरा जमीर भी पवित्र आत्मा च गवाही दिंदा ऐ।

²कि मिन्जो बड़ा दुख ऐ, कने मेरा मन हमेसा मेरे लोकां तांई दुखी रैंह्दा ऐ।

³क्जोकि मैं ऐत्थु तिकर चांह़दा था, कि अपणे यहूदी भाऊआं तांई जेह्ड़े मेरी अपणिया जातिया दे लोक हन, अप्पु ई मैं मसीह ते श्रापित कने लग्ग होई जांदा ऐ।

⁴सैह़ इस्राएली लोक हन, कने परमात्मे दे बच्चे होणे दा हक्क कने महिमा, वादे, व्यबस्था, परमात्मे दी भक्ति कने करार तिन्हां दे हन।

⁵अब्राहम, इसहाक कने याकूब भी तिन्हां दे पूर्वज हन, कने माणु होणे दे नाते मसीह भी इस्राएली था। कने सैह़ परमात्मा ऐ जेह्ड़ा सारियां चीज्जां पर राज करदा ऐ, कने हमेसा स्तुति जोग्गा ऐ। आमीन।

⁶अपर एह़ नीं कि परमात्मा अपणे वादे पूरे करणे च नाकामयाब होई गेआ ऐ, इसतांई कि इस्राएले दे सारे वंश परमात्मे दे सच्चे लोक नीं हन;

⁷कने अब्राहम दे वंशे च जन्म लैणे ते ई सारे परमात्मे दी सच्ची औलाद नीं होई जांदे हन, क्जोकि परमात्मे अब्राहमे नैं ग्लाया था, कि “जेह्ड़े इसहाके दे वंशे ते जन्म लैंदे हन, सैई तेरे वंशे दे मन्ने जांगे।”

⁸इसदा मतलब एह़ ऐ जेह्ड़े सरीरे दिया इच्छा मताबक पैदा होएयो, सैह़ परमात्मे दी औलाद नीं, अपर सिर्फ वादे दी औलाद अब्राहमे दे वंशे दी मन्नी जांदी ऐ।

⁹क्जोकि वादे दा वचन एह़ ऐ, “अगले साल मैं इसी बग्त दुवारी ओंगा, कने ताह़लू सारा जो इक्क पुत्तर पैदा हुंगा।”

¹⁰कने सिर्फ ऐई नीं, अपर जाह़लू रिबका अहां दे पूर्वज इसहाके ते गर्भवती होई, कने तिसादे गर्भे च जुड़वा बच्चे थे,

¹¹कने अह्ल्ली तिकर तिन्हां दे दून्नी जागतां दा जन्म भी नीं होएया था, कने तिन्हां तिस बग्त तिकर कोई बुरा या खरा कम्म नीं कित्या था, जाह़लू रिबका नैं एह़ ग्लाया गेआ, “कि जेठा जागत लोक्के जागते दा दास बणगा।” एह़ इसतांई होएया कि परमात्मे दा मकसद तिन्हां दे चुणी लैणे दे मताबक बणी रेह्आ। जेह्ड़ा माणुआं दे कम्मां दिया बज़ाह ते नीं, अपर सदणे आल़े दे फैसले दिया बज़ाह ते ऐ।

¹³जिंआं पवित्रशास्त्रे च लिख्या ऐ, “मैं याकूबे नैं प्यार कित्ता, अपर एसावे जो प्यारा नीं जाणेया।”

¹⁴इसतांई अहां इसदे बारे च क्या ग्लान? क्या परमात्मा कदी कुसी नैं गलत करदा ऐ? नीं, कदी भी नीं।

¹⁵क्जोकि परमात्मे मूसा नैं ग्लाया था, “मैं जिस कुसी पर दया करणा चां, तिस पर दया करगा, कने जिस कुस पर कृपा करणा चां तिस पर कृपा करगा।”

¹⁶कने एह़ ना तां चाहणे आल़े दी, ना दौड़णे आल़े दी, अपर दया करणे आल़े परमात्मे दी इच्छा ऐ।

¹⁷क्जोकि पवित्रशास्त्रे च परमात्मा मिस्र देसे दे राजा फिरौने नैं ग्लांदा ऐ, “मैं तिज्जो इसतांई राजा बणाया ऐ, कि तिज्जो च अपणी सामर्थ दस्सें कने मेरे नांऐ दा प्रचार सारिया धरतिया पर होयैं।”

¹⁸इसतांई परमात्मा जिस पर चांह़दा ऐ, तिस पर दया करदा ऐ, कने जिसियो चांह़दा ऐ, तिसियो कठोर बणाई दिंदा ऐ।

¹⁹कने तू भिरी मिन्जो नैं ग्लांगा, “तां, परमात्मा माणुये जो क्जो दोस दिंदा ऐ? तिसदिया इच्छा दा बरोध कुण करी सकदा ऐ?”

²⁰हे साथी, तू कुण ऐ, जेह्ड़ा परमात्मे नैं बैंह्सबाजी करदा ऐ? क्या बणाईयो चीज्ज अपणे बणाणे आल़े नैं ग्लाई सकदी ऐ, कि “तैं मिन्जो ऐदेया क्जो बणाया ऐ?”

²¹क्या कुम्हारे दा एह़ हक्क नीं कि सैह़ चिक्का दे इक्की पेड़े ते इक्क भांडा खास इस्तेमाल करणे तांई, कने दूये भांडे जो रोज इस्तेमाल करणे तांई बणां?

²²जे परमात्मैं अपणा कोप दस्सणे तांई कने अपणी सामर्थ प्रगट करणे दे मकसदे ते बड़ा सबर रखी नैं गुस्से दे तिन्हां भाडेयां जो झेलेया, जेह्ड़े विनाशे तांई त्यार थे, तां कुण बाधा बणी सकदा ऐ?

²³तिन्हीं ऐदेया इसतांई कित्ता कि दया दे तिन्हां भाडेयां पर अपणी महिमा दी सान प्रगट करणा चांह़दा था, जिन्हां जो तिन्हीं पैहल्ले ते ई तिसा महिमा तांई त्यार कित्या था।

²⁴मतलब दया दे भांडे अहां लोक हन, जिन्हां जो तिन्हीं ना सिर्फ यहूदियां ते, अपर होरनी जातिआं ते भी चुणेया।

²⁵जिंआं परमात्मा होशे भविष्यवक्ता दिया कताबा च होरनी जातिआं दे बारे च भी ग्लांदा ऐ, “जेह्ड़े लोक मेरी प्रजा नीं थे, तिन्हां जो मैं अपणी प्रजा ग्लांगा; कने जेह्ड़े मिन्जो प्यारे नीं थे, तिन्हां नैं मैं प्यार करगा।”

²⁶कने, “जिसा जगाह पर परमात्मे एह़ ग्लाया था, कि ‘तुहां मेरे लोक नीं हन, तिसा जगाह पर परमात्मा तिन्हां जो अपणी औलाद ग्लांगा।’ ”

²⁷कने यशायाह भविष्यवक्ता इस्राएल देसे दे लोकां दे बारे च जोरे नैं डड्डी करी ग्लांदा ऐ: “चाहे इस्राएल देसे दे लोकां दी गिणती समुंदरे दिया रेता दे कणां बराबर क्जो नीं होयैं, तिन्हां च थोड़े ई लोक उद्धार पांगे।

²⁸क्जोकि प्रभु अपणा वचन धरतिया पर पूरा करी नैं, संसारे दे सारे लोकां दा न्याय बड़ी तौल़ी करगा।”

²⁹जिंआं यशायाह भविष्यवक्तैं पैहल्ले भी ग्लाया था: “जे सर्वशक्तिमान प्रभुयैं अहां तांई कुसी भी वंश नीं छड्डदा, तां अहां सदोम कने अमोरा साइआं नास होई जांदे।”

³⁰इसतांई इसदे बारे च अहां क्या ग्लान? एह़ कि होरनी जातिआं दे लोक जेह्ड़े धार्मिकता दे कम्म नीं करदे थे, तिन्हां बसुआसे दे जरिये परमात्मे ते धार्मिकता पाई।

³¹अपर इस्राएली लोक, जेह्ड़े परमात्मे सौगी धर्मी बणने तांई मूसा दिया व्यबस्था दा पालण करणे दी कोसस करदे थे, कने सैह़ तिसा धार्मिकता जो नीं पाई सके।

³²एह़ किंआं होई सकदा ऐ? इसतांई कि सैह़ बसुआसे ते नीं, अपर मना खरे कम्मां करी नैं मूसा दिया व्यबस्था दा पालण करदे हन। तिन्हां दे पैर च पत्थरे दी ठोकर लग्गी, कने सैह़ पेई गै।

³³जिंआं पवित्रशास्त्रे च लिख्या ऐ, “दिक्खा, मैं यरूशलेम सैहरे च इक्क ठोकर लगणे दा पत्थर कने चट्टान रखगा, तिन्हां नैं लोक ठोकर खाई नैं पेई जांगे, कने जेह्ड़ा तिस पर बसुआस करगा, सैह़ कदी सर्मिंदा नीं हुंगा।”