Read Kangri 1 कुरिन्थियों 10 Bible Online

1 कुरिन्थियों 10 - Kangri bible

1 कुरिन्थियों 10

¹हे मेरे प्यारे साथी बसुआसियो, मैं नीं चांह़दा ऐ, कि तुहां इसा गल्ला ते अणजाण रेह्आ कि परमात्मे अहां दे पूर्वजां दी अगुआई इक्की बदल़े जो घल्लणे दे जरिये कित्ती, जेह्ड़ा तिन्हां गांह-गांह चलदा था, कने तिन्हीं तिन्हां जो तिस लाल समुंदरे दे पांणिये ते सही-सलामत पार पज्जाया।

²जिंआं कि तिन्हां सारेयां बदल़े च कने समुंदरे च बपतिस्मा लेआ, एह़ इसा गल्ला दे बारे दस्सदा ऐ, कि सैह़ मूसा दे पचांह़ चलणे आल़े थे।

³कने तिन्हां सारेयां रोटी खादी जेह्ड़ी परमात्मैं तिन्हां जो सुअर्गे ते दित्ती।

⁴कने तिन्हां सारेयां पाणी भी पीता, जेह्ड़ा परमात्मैं तिन्हां जो चट्टाना ते दित्या था, जेह्ड़ी तिन्हां सौगी-सौगी चलदी थी, कने सैह़ चट्टान मसीह था।

⁵अपर परमात्मा तिन्हां च मतेआं ते खुस नीं था, इसतांई सैह़ सुनसाण जगाह च ई इस संसारे जो छड्डी करी चली गै।

⁶एह़ सारियां गल्लां अहां तांई इक्क चतौणियां दियां हन, कि जिंआं तिन्हां लालच कित्ता, तिंआं अहां बुरिआं चीज्जां दा लालच नीं करन।

⁷कने ना तुहां मूर्तिपूजक बणा, जिंआं कि तिन्हां च कितणे बणी गियो थे, जिंआं पवित्रशास्त्रे च लिख्या ऐ, “सैह़ लोक बैठे तां खाणे पीणे तांई, अपर खड़ोते तां नचणे तांई।”

⁸कने ना अहां ब्यभिचार करन, जिंआं तिन्हां च कितणेयां लोकां कित्ता; कने नतीजा एह़ होएया कि इक्की दिने च त्रैई हज़ार लोक मरी गै।

⁹कने ना अहां प्रभु यीशु मसीह जो परखन, जिंआं तिन्हां च कितणेयां लोकां परखेया, कने सर्पां दे डसणे दे जरिये मारी दित्ते गै।

¹⁰कने ना तुहां बुड़बुड़ा, जिस तरीके नैं तिन्हां च कितणे लोक बुड़बुड़ाये थे, कने इक्की दूते दे जरिये सैह़ लोक मारी दित्ते गै, जिसियो परमात्मैं घल्लेया था।

¹¹अपर एह़ सारियां गल्लां, जेह्ड़ियां तिन्हां पर होईयां, इक्क चतौणियां साइआं थियां; कने सैह़ अहां जो चतौणी दैणे तांई लिखियां हन, जेह्ड़े इस संसारे दे आखरी बग्ते च रैंह्दे हन।

¹²इसतांई जेह्ड़ा कोई समझदा ऐ, कि “मैं बसुआसे च मजबूत ऐ,” सैह़ चौकन्ना रैंह्, कि कुत्थी बसुआसे ते भटकी नीं जां।

¹³तुहां कुसी ऐदई परीक्षा च नीं पै, जेह्ड़ी माणुये दे झेलणे ते बाहर ऐ। परमात्मा सच्चा ऐ कने सैह़ तुहां जो सामर्थ ते बाहर परीक्षा च नीं पोणा दिंगा, अपर परीक्षा ते बाहर निकल़णे दा रस्ता कड्डगा कि तुहां झेली सकन।

¹⁴इसा बज़ाह ते, हे मेरे प्यारे साथी बसुआसियो, मूर्तिपूजा करणे ते बची रेह्आ।

¹⁵मैं तुहां जो मसीह च अक्लमंद समझी नैं ग्लांदा ऐ, जेह्ड़ा मैं ग्लांदा ऐ, तिसदे बारे च जरा सोचा, सैह़ ठीक ऐ कि नीं।

¹⁶जाह़लू अहां इक्की कटोरे ते अंगूरा दा रस पींदे हन, जेह्ड़ा अहां प्रभु भोज च इस्तेमाल करदे हन, जिस तांई अहां परमात्मे दा धन्यावाद करदे हन, अहां सच्च-बिच्च मसीह दे खूने च साझी हुंदे हन। कने अहां खाणे तांई रोटी तोड़दे हन, तां अहां सच्च-बिच्च मसीह दे सरीरे च साझी हुंदे हन।

¹⁷क्जोकि इक्क ई रोटी ऐ तां अहां भी जेह्ड़े मत्ते हन, इक्क सरीर हन क्जोकि अहां सारे तिसा इक्की रोटिया च साझी हुंदे हन।

¹⁸इस्राएली लोकां दे बारे च जरा सोचा, जेह्ड़े वेदिया पर चढ़ाईया बल़िया खांदे हन, क्या इसदे जरिये सैह़ साझी नीं हन?

¹⁹भिरी मैं क्या ग्लादा ऐ, क्या मूर्तिया सच्चे ईश्वर हन, जिन्हां जो एह़ बलिदान चढ़ाया जांदा ऐ कने एह़ बलिदान कुच्छ खास हन?

²⁰नीं कदी भी नीं। अपर एह़ कि होरनी जातिआं दे लोक जेह्ड़े बलिदान करदे हन; सैह़ परमात्मे तांई नीं अपर दुष्टआत्मां तांई बलिदान करदे हन कने मैं नीं चांह़दा कि तुहां दुष्टआत्मां दे साझी बणन।

²¹तुहां प्रभु दे कटोरे कने दुष्टआत्मां दे कटोरे दून्नी ते नीं पी सकदे। तुहां प्रभु दे भोज कने दुष्टआत्मां दे भोज दून्नी दे साझी नीं होई सकदे।

²²क्या अहां प्रभु जो गुस्सा दुआंदे हन? क्या अहां तिसते ताकतवर हन?

²³तुहां च कुच्छ एह़ ग्लांगे, कि सारियां चीज्जां मिन्जो तांई ठीक हन, क्जोकि मैं इक्क बसुआसी ऐ, अपर सारियां चीज्जां फायदे दियां नीं हन; सारियां चीज्जां मिन्जो तांई ठीक हन, अपर सारियां चीज्जां तरक्की तांई नीं।

²⁴तुहां च हर इक्क अपणिया भलाईया दे बारे च नीं अपर दूयेयां दिया भलाईया दे बारे च भी सोचैं।

²⁵जाह़लू तुहां बजारां च जाई नैं मीट खरीद दे हन, तां तिसियो खाई लेआ, अपर एह़ मत पुछा कि एह़ मूर्तियां जो चढ़ाया कि नीं चढ़ाया ऐ, कने इआं करणे नैं तुहां दी अन्तर आत्मा परेसान नीं हुंगी।

²⁶क्जोकि पवित्रशास्त्र ग्लांदा ऐ, कि “धरती कने धरतिया च जेह्ड़ा कुच्छ भी ऐ सैह़ प्रभु दा ई ऐ।”

²⁷जेह्ड़े लोक बसुआसी नीं हन, जे सैह़ तुहां जो खाणे तांई सदन कने तुहां जाणा चान, जे कुच्छ तुहां दे सामणै खाणे तांई रखेया जां, तां अपणिया अन्तर आत्मा दिया भलाईया तांई, बगैर कोई सवाल कित्ते सैह़ खाई लेआ।

²⁸अपर जे कोई तुहां नैं ग्लां, “एह़ तां मूर्तियां जो बल़ि कित्तियो चीज्ज ऐ,” तां तिस दस्सणे आल़े दिया कने अन्तर आत्मा दिया भलाईया तांई मत खा।

²⁹मेरा मतलब, तेरिया अन्तर आत्मा ते नीं, अपर तिस दूये माणुये दिया अन्तर आत्मा ते ऐ, मेरी अजादी भला दूये दिया अन्तर आत्मा दे जरिये क्जो परखी जां?

³⁰जे मैं धन्यावाद करी नैं खांदा ऐ, तां जिस पर मैं धन्यावाद करदा ऐ तिसदिया बज़ाह ते मिन्जो पर दोस क्जो लगदा ऐ?

³¹मेरा ग्लाणे दा मतलब एह़ ऐ, तुहां चाहे खा, चाहे पीआ, चाहे जेह्ड़ा कुच्छ करा, सब कुच्छ परमात्मे दिया महिमा तांई करा।

³²तुहां ना यहूदी लोकां, ना यूनानी लोकां कने ना परमात्मे दी कलीसिया तांई ठोकरा दी बज़ाह बणा।

³³जिंआं मैं भी सारियां गल्लां च सबना जो खुस रखदा ऐ, कने मैं अपणिया नीं अपर दूयेयां दिया भलाईया दे बारे च सोचदा ऐ तांजे सैह़ उद्धार पान।