Read Kangri 1 कुरिन्थियों 11 Bible Online

1 कुरिन्थियों 11 - Kangri bible

1 कुरिन्थियों 11

¹जिंआं मैं मसीह साइआं ज़िन्दगी जींदा ऐ, तिंआं ई तुहां भी मिन्जो साइआं ज़िन्दगी जीआ।

²हे मेरे प्यारे साथी बसुआसियो, मैं तुहां दी तारीफ करदा ऐ कि हर बग्त तुहां मिन्जो याद करदे हन; कने जेह्ड़ियां सिक्षां मैं तुहां जो दित्तियां हन, तिन्हां दा बड़े ध्याने नैं पालण करदे रेह्आ।

³अपर मैं चांह़दा ऐ कि तुहां एह़ जाणी लेआ कि हर इक्क मर्दे दा सिर मसीह ऐ, कने जणासा दा सिर मरद ऐ, कने मसीह दा सिर परमात्मा ऐ।

⁴जेह्ड़ा मरद सिरे ढक्की नैं प्रार्थना या भविष्यवाणी करदा ऐ, सैह़ अपणे सिरे दा अपमान करदा ऐ।

⁵अपर जेह्ड़ी जणांस नंगे सिरे प्रार्थना या भविष्यवाणी करदी ऐ, सैह़ अपणे सिरे दा अपमान करदी ऐ, क्जोकि तिसा जणासा कने गंजिया जणासा च कोई फर्क नीं ऐ।

⁶जे जणांस चादरुये ना उढे तां बाल़ां भी कटाई लैं; जे जणासा तांई बाल़ कटाणा या गंजा होणा सर्मा दी गल्ल ऐ, तां चादरुये नैं अपणे सिरे ढकें।

⁷हाँ मर्दे दा अपणा सिर ढकणा ठीक नीं ऐ। क्जोकि परमात्मैं तिसियो अप्पु साइआं बणाया ऐ; कने अपणा सभाव तिसियो दित्या ऐ, अपर जणांस मर्दे दी सोभा ऐ।

⁸क्जोकि पैहल्ला मरद आदम जणासा ते नीं होएया, अपर पैहल्ली जणांस हव्वा मर्दे ते होईयो ऐ।

⁹कने परमात्मैं मर्दे जो जणासा दी मदत करणे तांई नीं बणाया, अपर जणासा जो मर्दे दी मदत करणे तांई बणाया ऐ।

¹⁰इसा बज़ाह ते, क्जोकि सुअर्गदूत भी दिक्खदे हन, कि जणासा जो अपणा सिर ढकणा चाइदा, जेह्ड़ा एह़ दस्सदा कि सैह़ अधिकारे दे अधीन ऐ।

¹¹तां प्रभु दे बसुआसियां च ना तां जणांस मर्दे ते लग्ग ऐ, कने ना मरद जणासा ते लग्ग ऐ।

¹²हलांकि परमात्मैं पैहल्लैं जणासा जो मर्दे ते बणाया ऐ, अपर हुण जणांस मर्दां जो जन्म दिंदी ऐ, कने सैह़ दोयो परमात्मे दे पास्से ते हन, जिन्हीं सब कुच्छ बणाया ऐ।

¹³तुहां अप्पु ई सोचा, क्या जणासा जो नंगे सिर परमात्मे नैं प्रार्थना करणा सोभा दिंदा ऐ?

¹⁴क्या कुदरती एह़ साफ नीं ऐ, कि लम्मे बाल़ रखणा मर्दे तांई सर्मा दी गल्ल ऐ।

¹⁵अपर जे जणांस लम्मे बाल़ रखैं; तां तिसा तांई सोभा दी गल्ल ऐ, क्जोकि एह़ तिसा जो सिर ढकणे तांई दित्यो हन।

¹⁶अपर जे कोई मिन्जो नैं इसा गल्ला च सेहमत नीं ऐ, तां एह़ जाणी लैं कि ना अहां दी कने ना परमात्मे दियां कलीसियां च अहां अल्ल इसियो छड्डी करी होर कोई रवाज नीं ऐ।

¹⁷एह़ हुक्म देई करी मैं तुहां दी कोई तारीफ नीं करा दा ऐ, इसतांई कि तुहां दे अराधना सभां च किठ्ठे होणे ते भलाई नीं अपर बुराई ई हुंदी ऐ।

¹⁸सबना ते पैहल्लैं तां एह़: कि जाह़लू तुहां कलीसिया च किठ्ठे हुंदे हन, तां एह़ सुणने जो मिलदा ऐ कि तुहां च बैर हुंदा ऐ, कने मैं कुच्छ हद तिकर बसुआस भी करदा ऐ।

¹⁹अपर हाँ एह़ सच्च ऐ कि तुहां च बैर होणा जरूरी भी ऐ, तांजे जेह्ड़े लोक परमात्मे दे जरिये चुणेयो हन, सैह़ प्रगट होई जान।

²⁰जाह़लू तुहां इक्की जगाह च अहां दे प्रभु यीशु मसीह दिया मौत्ती जो याद करणे तांई किठ्ठे हुंदे हन, तां तुहां इसा गल्ला दा ध्यान नीं रखदे कि प्रभु भोज च किंआं सामिल होणा चाइदा।

²¹क्जोकि इस प्रभु भोजे च जाह़लू खाणे दा बग्त ओंदा ऐ, तुहां अपणा खाणा दूये दा इन्तजार कित्ते बगैर झटपट खाई लैंदे हन, इसदा नतीजा एह़ ऐ कि कोई तां भुखा रेई जांदा ऐ कने कोई जरूरत ते जादा मतवाल़ा होई जांदा ऐ।

²²क्या खाणे पीणे तांई तुहां दे घरे नीं? या परमात्मे दी कलीसिया दा अपमान कने गरीबां जो सर्मिंदा करणा चांह़दे हन? हुण मैं तुहां नैं क्या ग्लां? क्या मैं इसा गल्ला च तुहां दी तारीफ करैं? नीं कदी भी नीं।

²³क्जोकि एह़ गल्ल मिन्जो प्रभु ते पुज्जी, कने मैं तुहां जो भी पज्जाई दित्ती कि प्रभु यीशुयैं जिसा राती सैह़ पकड़ुआ गेआ, रोटी लेई,

²⁴कने परमात्मे दा धन्यावाद करी नैं रोटी तोड़ी कने ग्लाणा लग्गा, “एह़ मेरा सरीर ऐ, जेह्ड़ा तुहां तांई दित्ता जांदा ऐ, मेरिया यादा तांई ऐई करा-करा।”

²⁵इस तरीके नैं तिन्हीं खाणा खाणे ते बाद अंगूरा दे रसे दा कटोरा लेआ कने ग्लाणा लग्गा, “एह़ कटोरा मेरे खूने च नौआं वादा ऐ; जाह़लू कदी भी पीआ, तां मेरिया यादा तांई ऐई करा-करा।”

²⁶क्जोकि जाह़लू कदी तुहां एह़ रोटी खांदे कने इस कटोरे ते पींदे हन, तां प्रभु दी मौत्ती जो जाह़लू तिकर सैह़ नीं औयें, प्रचार करदे हन।

²⁷इसतांई जेह्ड़ा कोई गलत तरीके नैं प्रभु दी रोटी खां कने तिस कटोरे ते पींये, तां सैह़ प्रभु दे सरीरे कने खूने दा अपराधी बणगा।

²⁸इसतांई माणु अपणे आप्पे जो परखी लैं कने इस तरीके नैं इसा रोटिया च खां, कने इस कटोरे ते पींये।

²⁹क्जोकि जेह्ड़ा खांदे पींदे बग्त प्रभु दे सरीरे जो नीं पणछैणे, सैह़ इस खाणे पीणे ते अपणे ऊपर सज़ा लेयोंदा ऐ।

³⁰इसा बज़ाह ते तुहां च मते सारे कमजोर कने रोगी हन, कने मते इस संसारे जो छड्डी करी चली भी गै।

³¹जे अहां अपणे आप्पे जो परखी लैंदे, तां सज़ा नीं पांदे।

³²अपर प्रभु अहां जो सज़ा देई नैं अहां जो सुधारदा ऐ, इसतांई कि अहां संसारे सौगी दोसी नीं बणन।

³³इसतांई, हे मेरे प्यारे साथ बसुआसियो, जाह़लू तुहां प्रभु भोजे च सामिल होणे तांई किठ्ठे हुंदे हन, तां इक्की दूये दा इन्तजार करा-करा।

³⁴जे कोई अपणिया भुखा जो बरदासत नीं करी सकैं तां सैह़ अपणे घरे च खाई लैं, तांजे जाह़लू तुहां किठ्ठे होन तां तुहां दा बर्ताब ठीक होयैं जिसते तुहां जो परमात्मा सज़ा नीं दैं, कने बाक्कि गल्लां जो मैं आई नैं सुधारगा।