Read Kangri 1 कुरिन्थियों 12 Bible Online

1 कुरिन्थियों 12 - Kangri bible

1 कुरिन्थियों 12

¹हे मेरे प्यारे साथी बसुआसियो, मैं नीं चांह़दा कि तुहां आत्मिक वरदानां दे बारे च अणजाण रेह्आ।

²तुहां जाणदे हन कि जाह़लू तुहां मसीह पर बसुआस नीं करदे थे, तां कोई तुहां जो गूंगी मूर्तियां दे पचांह़ चलणे कने तिन्हां दी अराधना करणे तांई भटकाई दिंदा था।

³इसतांई मैं चांह़दा ऐ कि तुहां जाणी सकन, जेह्ड़ा कोई परमात्मे दिया आत्मा दी अगुआईया नैं ग्लांदा ऐ, सैह़ नीं ग्लांदा कि यीशु श्रापित ऐ; कने ना कोई पवित्र आत्मा दे बगैर ग्लाई सकदा ऐ कि यीशु प्रभु ऐ।

⁴आत्मा दे जरिये मिल्लेयो वरदान तां लग्ग-लग्ग हन, अपर आत्मा इक्क ई ऐ।

⁵कने सेवा दे कम्म भी लग्ग-लग्ग हन, अपर प्रभु इक्क ई ऐ।

⁶कने कम्म करणे दे तरीके भी मते हन, अपर परमात्मा इक्क ई ऐ, जेह्ड़ा सारेयां लोकां च तिन्हां दा असर पैदा करदा ऐ।

⁷परमात्मे दा आत्मा हर इक्क बसुआसिये जो अपणी सामर्थ दिंदा ऐ, तांजे दूये सारे बसुआसियां जो तिसदा फायदा भी होयैं।

⁸क्जोकि परमात्मे दा आत्मा इक्की माणुये जो बुद्धिया दियां गल्लां सणाणे दा वरदान दिंदा ऐ, कने सैई आत्मा दूयेयां जो ज्ञाने दियां गल्लां सणाणे दा वरदान दिंदी ऐ।

⁹कुसी जो तिसा आत्मा दे जरिये मसीह च बसुआस करणे दा कने कुसी जो तिसा आत्मा दे जरिये बमारां जो चंगा करणे दा वरदान दिंदी ऐ।

¹⁰कुसी जो सामर्थी दे कम्म करणे दा, कुसी जो परमात्मे दा वचन सणाणे दा, कने कुसी जो आत्मा दी परखणे दा, कुसी जो लग्ग-लग्ग भासा च ग्लाणे दा, कने कुसी जो भासा दा मतलब दस्सणे दा वरदान दिंदी ऐ ।

¹¹एह़ सब कुच्छ सिर्फ परमात्मे दिया आत्मा दे जरिये कित्ता जांदा ऐ, कने सैह़ अपणिया इच्छा दे मताबक हर इक्क जो लग्ग-लग्ग वरदान दिंदी ऐ।

¹²क्जोकि जिंआं माणुये दा सरीर इक्क ऐ कने तिसदे अंग मत्ते हन, कने सरीरे दे मते अंग होणे पर भी सरीर इक्क ई ऐ, तिंआं ई मसीह भी कने तिस पर बसुआस करणे आल़े बसुआसी भी इक्क हन।

¹³क्जोकि अहां सारे क्या यहूदी हन क्या यूनानी, क्या दास, क्या अजाद इक्क ई आत्मा दे जरिये इक्क सरीर होणे तांई बपतिस्मा लेआ, कने अहां सबना जो इक्क ई आत्मा मिलियो ऐ।

¹⁴अहां दे सरीरे च इक्क ई अंग नीं अपर मते हन।

¹⁵जे इक्क पैर ग्लां, कि “मैं हत्थ नीं, इसतांई सरीरे दा अंग नीं,” तां क्या तिसदे इआं ग्लाणे ते सैह़ सरीरे दा अंग नीं ऐ?

¹⁶कने जे इक्क कंन्न ग्लां, “मैं अख नीं, इसतांई सरीरे दा अंग नीं,” तां क्या तिसदे इआं ग्लाणे ते सैह़ सरीरे दा अंग नीं ऐ?

¹⁷जे सारा सरीर अख ई हुंदा तां सुणना कतांह हुंदा? जे सारा सरीर कंन्न ई हुंदा तां सिंघणा कतांह हुंदा?

¹⁸अपर सच्च-बिच्च परमात्मैं अहां दे सरीरे दे अंगा जो अपणिया इच्छा मताबक इक्क-इक्क करी नैं सरीरे च रखेया ऐ।

¹⁹जे सैह़ सारे इक्क ई अंग हुंदे, तां सरीर कतांह हुंदा?

²⁰अपर हुण सरीरे दे अंग तां मते हन, अपर सरीर इक्क ई ऐ।

²¹अख हत्थे नैं नीं ग्लाई सकदी, “मिन्जो तेरी जरूरत नीं ऐ,” कने ना सिर पैरां नैं ग्लाई सकदा ऐ, “मिन्जो तुहां दी जरूरत नीं।”

²²अपर सरीरे दे सैह़ अंग जेह्ड़े दूयेयां ते कमजोर लगदे हन, बड़े ई जरूरी हन।

²³कने सरीरे दे जिन्हां अंगा जो अहां आदरे जोग्गा नीं समझदे हन, तिन्हां जो अहां जादा आदर दिंदे हन; कने अहां दे सैह़ अंग जेह्ड़े दुस्सणा नीं चाइदे, तिन्हां दा बड़ा ध्यान रखदे।

²⁴भिरी भी अहां दे सैह़ अंग जेह्ड़े दुस्सदे हन, तिन्हां अंगा जो इसदी जरूरत नीं। अपर परमात्मैं सरीरे दे अंगा जो इस तरीके नैं बणाई दित्या ऐ कि नीं दुस्सणे आल़े अंगा दी कीमत भी समझी जां।

²⁵तांजे सरीरे च बैर ना पोयैं, अपर हर इक्क अंग इक्की दूये दा ध्यान रखन।

²⁶इसतांई जे इक्क अंग दुखी होयैं, तां सरीरे दे सारे अंग तिस सौगी दुखी हुंदे हन; कने जे इक्की अंगे दी तारीफ होयैं, तां तिस सौगी सारे अंग तिसा खुसिया च साझी हुंदे हन।

²⁷तिंआं ई तुहां भी सारे मिल्ली नैं मसीह दा सरीर हन, कने तुहां च हर इक्क तिसदे सरीरे दे अंग हन।

²⁸मसीह दे इस सरीरे च जेह्ड़ी कलीसिया ऐ, परमात्मैं अहां जो लग्ग-लग्ग सेवा दित्तियो: पैहल्ले तिन्हीं प्रेरित, दूये भविष्यवक्ता, सिक्षा दैणे आल़े, भिरी सामर्थी दे कम्म करणे आल़े, चंगा करणे आल़े, भलाई करणे आल़े, प्रबन्ध करणे आल़े, कने लग्ग-लग्ग भासा ग्लाणे आल़े नियुक्त कित्ते।

²⁹क्या सारे प्रेरित हन? क्या सारे भविष्यवक्ता हन? क्या सारे सिक्षा दैणे आल़े हन? क्या सारे सामर्थी दे कम्म करणे आल़े हन?

³⁰क्या सबना जो चंगा करणे दा वरदान मिल्लेया ऐ? क्या सारे लग्ग-लग्ग भासा ग्लांदे हन?

³¹क्या सारे लग्ग-लग्ग भासा दा मतलब दस्सणे आल़े हन? मैं चांह़दा ऐ कि तुहां बड्डे ते बड्डे वरदानां दी इच्छा रखन। कने हुण मैं तुहां जो सबते खरा रस्ता दस्सदा ऐ।