Read Kangri 1 कुरिन्थियों 13 Bible Online

1 कुरिन्थियों 13 - Kangri bible

1 कुरिन्थियों 13

¹जे मैं माणुआं कने सुअर्गदूतां दियां भासां च गल्लां करैं, कने दूयेयां नैं प्यार नीं रखैं, तां मेरा ग्लाणा ठणठणादे पीतल कने झन्झणादी झांझरा साइआं हुंगा।

²कने जे मिन्जो भविष्यवाणी करणे दा वरदान मिल्लेया ऐ, कने मैं सारे भेतां जाणने आल़ा कने ज्ञानी ऐ, कने जे मिन्जो परमात्मे पर पूरा बसुआस होयैं कि मैं प्हाड़ां जो हटाई सकदा ऐ, अपर दूयेयां नैं प्यार नीं रखैं, तां मैं कुच्छ भी नीं ऐ।

³जे मैं अपणी सारी धन-दौलत गरीबां जो बंड्डी दैं, कने अपणा सरीर भस्म होणे तांई बलिदान करी दैं, कने दूयेयां नैं प्यार नीं रखैं, तां मिन्जो इसते कोई फायदा नीं।

⁴प्यार सबर रखणे आल़ा ऐ कने दया करणे आल़ा ऐ; प्यार जल़ण नीं करदा; प्यार अपणी बड़ेयाई नीं करदा, कने घमंड नीं करदा,

⁵प्यार बुरा बर्ताब नीं करदा, मतलबी नीं हुंदा, तौल़ी गुस्सा नीं करदा, कने सैह़ तिन्हां बुरिआं गल्लां जो याद नीं रखदा जेह्ड़े दूये तिस नैं करदे हन।

⁶प्यार बुरे कम्मां ते खुस नीं हुंदा अपर सच्चाईया ते खुस हुंदा ऐ।

⁷सैह़ सारियां गल्लां झेली लैंदा ऐ, सारियां गल्लां दा बसुआस करदा ऐ, सारियां गल्लां दी आस रखदा ऐ, सारियां गल्लां च सबर रखदा ऐ।

⁸प्यार सदा तिकर बणी रैंह्दा ऐ, जित्थु तिकर भविष्यवाणियां दा सवाल ऐ, सैह़ थोड़े बग्ते तांई हन; भासां मौन होई जांगियां, कने ज्ञान मुक्की जांगा।

⁹क्जोकि अहां दा ज्ञान अधुरा ऐ, कने अहां दी भविष्यवाणी करणे दा वरदान भी अधुरा ऐ।

¹⁰अपर जाह़लू सिद्धता दा बग्त ओंगा, तां एह़ अधूरियां चीज्जां बेकार होई जांगियां।

¹¹जाह़लू मैं जागत था, तां मैं जागतां साइआं गल्लां करदा था, जागतां साइआं सोचदा कने समझदा था; कने जागतां साइआं बैंह्सबाजी करदा था; अपर जाह़लू स्याणा होईया तां जागतां साइआं बर्ताब करणा छड्डी दित्ता।

¹²हुण अहां जो सीशे च धुदंल़ा दुस्सा दा ऐ, अपर तिस बग्त अहां आमणै-सामणै दिक्खगे, इस बग्त मेरा ज्ञान अधुरा ऐ, अपर तिस बग्त मेरा ज्ञान तिंआं ई हुंगा, जिंआं इस बग्त मेरे बारे च परमात्मे दा ऐ।

¹³अपर हुण बसुआस, आसा, कने प्यार एह़ त्रीनो हमेसा बणी रैंह्दे हन, अपर इन्हां सबना ते ऊपर प्यार ऐ।