Read Kangri 1 कुरिन्थियों 14 Bible Online

1 कुरिन्थियों 14 - Kangri bible

1 कुरिन्थियों 14

¹इक्की दूये नैं प्यार करणे दी कोसस करा, कने आत्मिक वरदानां दी इच्छा करदे रेह्आ, खास करी नैं एह़, कि परमात्मे दा वचन सणा।

²क्जोकि जेह्ड़ा लग्ग-लग्ग भासा च गल्लां करदा ऐ सैह़ माणुआं नैं नीं अपर परमात्मे नैं गल्लां करदा ऐ; इसतांई कि तिसदियां गल्लां कोई नीं समझदा, क्जोकि सैह़ भेते दियां गल्लां पवित्र आत्मा च होई नैं ग्लांदा ऐ।

³अपर जेह्ड़ा परमात्मे दे वचने जो सणांदा ऐ, सैह़ बसुआसी लोकां जो तिन्हां दे बसुआसे च मजबूत होणे तांई कने तिन्हां दे मने जो हौंसला कने दिलासा दैणे तांई मदत करदा ऐ।

⁴जेह्ड़ा लग्ग-लग्ग भासा च गल्लां करदा ऐ, सैह़ सिर्फ अपणे ई बसुआसे जो मजबूत करदा ऐ; अपर जेह्ड़ा परमात्मे दा वचन सणांदा ऐ, सैह़ कलीसिया दे सारे बसुआसियां दे बसुआसे जो मजबूत करदा ऐ।

⁵मैं चांह़दा ऐ कि तुहां सारे लग्ग-लग्ग भासा च गल्लां करन, अपर मैं इसते जादा एह़ चांह़दा ऐ कि तुहां परमात्मे दा वचन सणा; क्जोकि जे लग्ग-लग्ग भासा ग्लाणे आल़ा कलीसिया दे बसुआसे जो मजबूत करणे तांई भासा दा मतलब नीं दस्सगा, तां परमात्मे दा वचन सणाणे आल़ा लग्ग-लग्ग भासा ग्लाणे ते जादा बधी नैं ऐ।

⁶इसतांई हे मेरे प्यारे साथी बसुआसियो, जे मैं तुहां अल्ल आई नैं लग्ग-लग्ग भासा च गल्लां करैं, तां मिन्जो ते तुहां जो क्या फायदा हुंगा? अपर जे मैं तुहां तांई सैह़ वचन दैं जेह्ड़ा परमात्मे मिन्जो दित्या ऐ, या सच्चा ज्ञान या परमात्मे दा वचन या सिक्षा जेह्ड़ा तुहां दी मदत करगा।

⁷तिंआं ई जाह़लू तुहां गाणे बजाणे दियां चीज्जां जो जिन्हां ते सुर निकल़दे हन, जिंआं बंसरी या बीण, जे तुहां तिन्हां जो ठीक ढंगे नैं नीं बजान, तां दूये किंआं पणछैणी सकगे कि एह़ बंसरी या बीण ऐ?

⁸कने लड़ाईया तांई जे तुरही साफ तरीके नैं नीं बज्जें, तां सपाई किंआं लड़ाईयां तांई त्यार होई सकदे हन?

⁹तिंआं ई, जे लग्ग-लग्ग भासा च ग्लांदे बग्त तुहां दे बोल साफ नीं हन, तां कुण समझगा कि क्या ग्लादा ऐ? एह़ तां हौआ नैं गल्लां करणे आल़े साइआं होएया।

¹⁰संसारे च जितणियां भी भासा हन, तिन्हां च हर इक्की भासा दा मतलब ऐ।

¹¹क्जोकि जे मैं कुसी भासा दा मतलब नीं समझैं, तां मैं ग्लाणे आल़े दिया नजरा च परदेसी हुंगा, कने ग्लाणे आल़ा मेरिया नजरा च परदेसी हुंगा।

¹²इसतांई तुहां भी जाह़लू आत्मिक वरदानां जो हासल करणे दी इच्छा रखदे हन, जेह्ड़े पवित्र आत्मा तुहां जो दिंदा ऐ, तां तिन्हां वरदानां दा इस्तेमाल करणे तांई ऐदई कोसस करदे रेह्आ कि तिन्हां वरदानां दे जरिये कलीसिया पूरे तरीके नैं बसुआसे च मजबूत होई जां।

¹³इसा बज़ाह ते जेह्ड़ा कोई लग्ग-लग्ग भासा च ग्लां, तां सैह़ प्रार्थना करैं कि तिसदा मतलब भी समझाई सकैं।

¹⁴इसतांई जे मैं लग्ग-लग्ग भासा च प्रार्थना करैं तां मेरी आत्मा प्रार्थना करदी ऐ अपर मैं नीं समझदा कि मैं क्या ग्लादा ऐ?

¹⁵तां मिन्जो क्या करणा चाइदा? मिन्जो इक्क बग्त आत्मा नैं प्रार्थना करणी चाइदी, कने मिन्जो इक्क बग्त बुद्धिया नैं भी प्रार्थना करणी चाइदी। कुच्छ बग्त मिन्जो आत्मा नैं गाणा चाइदा, कने कुच्छ बग्त मिन्जो बुद्धिया नैं भी गाणा चाइदा।

¹⁶नीं तांजे तू आत्मा नैं ई धन्यावाद करगा, तां भिरी अणजाण माणु तेरे धन्यावाद करणे बाद “आमीन” किंआं ग्लांगा, क्जोकि सैह़ तां नीं जाणदा कि तू क्या ग्ला दा ऐ।

¹⁷बेसक तैं तां खरे तरीके नैं परमात्मे दा धन्यावाद कित्ता, अपर दूये दा बसुआस मजबूत नीं हुंदा।

¹⁸मैं अपणे परमात्मे दा धन्यावाद करदा ऐ, कि मैं तुहां सारेयां ते जादा लग्ग-लग्ग भासा ग्लांदा ऐ।

¹⁹अपर कलीसिया च लग्ग-लग्ग भासा च दस हज़ार गल्लां ग्लाणे ते एह़ मिन्जो होर भी खरा लगदा ऐ, कि दूयेयां जो सिर्फ तिन्हां पंज गल्लां जो सखाणे तांई ऐदेय सब्दां दा इस्तेमाल करैं कि जिन्हां जो लोक समझी सकन।

²⁰हे मेरे प्यारे साथी बसुआसियो, तुहां इन्हां गल्लां जो समझणे तांई बच्चे मत बणा; बुराईया तांई तां बेकसूर बच्चे साइआं बणा, अपर ऐदिआं गल्लां जो समझणे तांई स्याणे बणा।

²¹पवित्रशास्त्रे च प्रभु ग्लांदा ऐ, “मैं लग्ग-लग्ग भासा ग्लाणे आल़ेआं दे जरिये, कने अणजाण लोकां दे मुँऐ ते अपणे लोकां नैं गल्लां करगा भिरी भी सैह़ मेरी नीं सुणगे।”

²²इसतांई लग्ग-लग्ग भासा च गल्लां करणा बसुआसियां लोकां तांई नीं, अपर जेह्ड़े मसीह पर बसुआस नीं करदे तिन्हां तांई इक्क नसाण ऐ, कने परमात्मे दा वचन सणाणा मसीह पर बसुआस नीं करणे आल़े लोकां तांई नीं अपर बसुआसियां लोकां तांई इक्क नसाण ऐ।

²³जे कलीसिया इक्की जगाह पर किठ्ठी होई, कने सारे दे सारे लग्ग-लग्ग भासा च गल्लां करन, कने तिसी बग्त तित्थु ऐदेय माणु आई जान, जेह्ड़े इसा भासा जो नीं समझदे या जेह्ड़े मसीह पर बसुआस नीं करदे हन, तां क्या सैह़ तुहां जो पागल नीं समझगे?

²⁴अपर जे सारे परमात्मे दे वचने जो सणाणा लग्गी पोन, कने तिसी बग्त तित्थु ऐदेया माणु आई जां, जेह्ड़े इन्हां वचनां जो नीं समझदे या जेह्ड़ा मसीह पर बसुआस नीं करदा ऐ, तां सैह़ अपणे आप्पे जो पापी समझगा कने तुहां दे इआं ग्लाणे दिया बज़ाह ते सैह़ अपणे रस्ते जो बदली लैंगा।

²⁵कने तिसदे मने दे भेत खुली जांगे कने ताह़लू सैह़ मुँऐ भार पेई नैं परमात्मे जो प्रणांम करगा, कने मन्नी लैंगा कि सच्च-बिच्च परमात्मा तुहां दे बिच्च ऐ।

²⁶हे मेरे प्यारे साथी बसुआसियो, क्या नतीजा निकल़ेया, जाह़लू तुहां अराधना तांई किठ्ठे हुंदे हन, तां तुहां च कोई भजन गांदा ऐ, कोई सिक्षा दिंदा ऐ, कोई प्रभु दे जरिये दित्या वचन दस्सदा ऐ, कोई लग्ग-लग्ग भासा च गल्लां करदा ऐ, कने कोई इन्हां दा मतलब दस्सदा ऐ। इन्हां सारियां गल्लां जो करणे दा एह़ मकसद होणा चाइदा कि कलीसिया दे बसुआसियां दा बसुआस मजबूत होयैं।

²⁷जे लग्ग-लग्ग भासा च गल्लां करणियां हन तां दो या त्रै लोक ई ग्लान, कने सैह़ किठ्ठे नीं अपर इक्क-इक्क करी नैं ग्लान, कने तित्थु कोई ना कोई जरूर होणा चाइदा कि तिन्हां भासां दा मतलब दस्सी सकैं।

²⁸अपर जे भासा दा मतलब दस्सणे आल़ा ना होयैं, तां लग्ग-लग्ग भासा ग्लाणे आल़ा कलीसिया च सांत रैंह्, कने अपणे मने च परमात्मे नैं गल्लां करैं।

²⁹भविष्यवक्तां च दो या त्रै ग्लान, कने सैह़ किठ्ठे नीं अपर इक्क-इक्क करी नैं ग्लान, कने बाक्कि लोक तिन्हां दे वचनां बड़े ध्याने नैं सुणन।

³⁰अपर जे कुसी जो जेह्ड़ा तिसा सभा च बैठेया ऐ, परमात्मे दे पास्से ते कुच्छ वचन मिलदा ऐ तां जेह्ड़ा ग्लादा ऐ तिसियो चुप होई जाणा चाइदा, तांजे दूआ माणु ग्लाई सकैं।

³¹क्जोकि तुहां सारे इक्क-इक्क करी नैं परमात्मे दा वचन सणाई सकदे हन, तांजे सारे सीखन कने हौंसला पाई सकन।

³²कने परमात्मे दा वचन ग्लाणे आल़े जो अपणे वरदाने जो बसे च रखणा चाइदा।

³³क्जोकि परमात्मा गड़बड़ी दा नीं, अपर सांति दा परमात्मा ऐ। परमात्मे दे लोकां दी सारी कलीसियां च ऐई नियम ऐ जेह्ड़ा लागू हुंदा ऐ,

³⁴कि जणासां जो कलीसिया दिया सभा च चुप रैहणा चाइदा, क्जोकि तिन्हां जो गल्लां करणे दा हुक्म नीं, अपर अधीन रैहणे दा हुक्म ऐ, जिंआं व्यबस्था च लिख्या भी ऐ।

³⁵जे सैह़ कुच्छ जादा सीखणा चान, तां घरे च अपणे-अपणे लाड़े ते पुछन, क्जोकि कलीसिया च जणासा दा कुच्छ भी ग्लाणा ठीक नीं ऐ।

³⁶तुहां क्या सोचा दे हन कि परमात्मे दा वचन तुहां ते ई सुरू होएया? क्या सिर्फ तुहां ई हन जिन्हां जो एह़ वचन दित्या ऐ?

³⁷जे कोई माणु अपणे आप्पे जो भविष्यवक्ता या आत्मिक माणु समझदा ऐ, तां सैह़ एह़ जाणी लैं कि जेह्ड़ियां गल्लां तुहां जो मैं लिखा दा ऐ, सैह़ प्रभु दे हुक्म हन।

³⁸अपर जे कोई इन्हां जो नीं अपनांगा, तां परमात्मा भी तिन्हां जो नीं अपनांगा।

³⁹इसतांई हे मेरे प्यारे साथी बसुआसियो, भविष्यवाणी करणे दे वरदानां जो पाणे दी इच्छा करदे रेह्आ कने लग्ग-लग्ग भासा ग्लाणे ते मना मत करा;

⁴⁰तुहां जेह्ड़ा कुच्छ कलीसिया च करदे हन, सैह़ ठीक ढंगे नैं कने सफाईया नैं कित्ता जां।