Read Kangri 1 कुरिन्थियों 15 Bible Online

1 कुरिन्थियों 15 - Kangri bible

1 कुरिन्थियों 15

¹हे मेरे प्यारे साथी बसुआसियो, हुण मैं तुहां जो सैई सुसमाचार याद दुआंदा ऐ जेह्ड़ा तुहां जो पैहल्लैं सणाई दित्या ऐ, जिस पर तुहां बसुआस भी कित्ता, कने जिस च तुहां मजबूत हन,

²कने जिसदे जरिये तुहां जो उद्धार हासल होएया ऐ। जे तुहां तिस सुसमाचारे च जेह्ड़ा मैं तुहां जो सणाया ऐ, बसुआसे च मजबूत होई जा, नीं तां तुहां दा बसुआस करणा बेकार ऐ।

³इसा बज़ाह ते मैं सबना ते पैहल्लैं तुहां जो सैई जरूरी गल्ल दस्सी दित्ती, जेह्ड़ी मिन्जो प्रभु दे पास्से ते मिलियो थी कि पवित्रशास्त्रे दे वचने मताबक यीशु मसीह अहां दे पापां तांई मरी गेआ,

⁴कने दब्बेया गेआ, कने पवित्रशास्त्रे मताबक त्रीये दिने जिन्दा भी होई गेआ,

⁵कने ताह़लू पतरसे जो कने तिन्हां बारांह चेलेयां जो दुस्सेया।

⁶भिरी सैह़ पंज सौ ते जादा चेलेयां जो इक्की बग्ते पर दुस्सेया, जिन्हां च मते सारे अह्ल्ली तिकर जिन्दे हन अपर कुच्छ इस संसारे जो छड्डी करी चली गियो हन।

⁷भिरी सैह़ याकूबे जो दुस्सेया तां इसते बाद सारे प्रेरितां जो दुस्सेया।

⁸सबना ते बाद मिन्जो भी दुस्सेया, जेह्ड़ा मन्ना गलत बग्ते पर जम्मेया ऐ।

⁹क्जोकि मैं सारे प्रेरितां च जादा खास नीं ऐ, अपर प्रेरित कैहलाणे जोग्गा भी नीं ऐ, क्जोकि मैं परमात्मे दिया कलीसिया च बसुआसी लोकां जो बड़ा सताया था।

¹⁰अपर मैं जेह्ड़ा कुच्छ भी ऐ, परमात्मे दे अनुग्रह नैं ऐ। तिसदा अनुग्रह जेह्ड़ा मिन्जो पर होएया, सैह़ बेकार नीं गेआ; अपर मैं तिन्हां दूये प्रेरितां ते भी बधी करी मेहनत कित्ती, तमी एह़ मेरे पास्से ते नीं होएया अपर परमात्मे दे अनुग्रह नैं जेह्ड़ा मिन्जो पर होएया था।

¹¹इसतांई चां मैं ऐ, चां सैह़ दूये प्रेरित हन, अहां सारे ई मसीह दा प्रचार करदे हन, कने इसी पर तुहां बसुआस भी कित्ता।

¹²इसतांई जाह़लू कि मसीह दा एह़ प्रचार कित्ता जांदा ऐ कि सैह़ मरेयां ते जिन्दा होएया, तां तुहां च कुच्छ लोक एह़ क्जो ग्लांदे हन कि मरेयां ते जिन्दा होणा ऐ ई नीं?

¹³जे मरेयां ते जिन्दा होणा ऐ ई नीं, तां मसीह भी जिन्दा नीं होएया।

¹⁴कने जे मसीह जिन्दा नीं होएया, तां अहां दा प्रचार करणा कने तुहां दा मसीह पर बसुआस करणा दोयो बेकार हन।

¹⁵इसते भी बधी करी एह़ कि अहां परमात्मे दे झूठे गवाह ठैह़रा दे हन; क्जोकि अहां परमात्मे दे बारे च एह़ गवाही दित्ती कि तिन्हीं मसीह जो मरेयां ते जिन्दा करी दित्ता, अपर जे मरेयो सच्च बिच्च जिन्दे नीं कित्ते जांदे तां परमात्मे मसीह जो भी मरेयां ते जिन्दा नीं कित्ता।

¹⁶कने जे मरेयो जिन्दे नीं हुंदे, तां मसीह भी मरेयां ते जिन्दा नीं होएया।

¹⁷कने जे मसीह जिन्दा नीं होएया, तां तुहां दा मसीह पर बसुआस करणा बेकार ऐ, कने तुहां अह्ल्ली तिकर अपणे पापां च जीआ दे हन।

¹⁸इसा हालता च, सारे जेह्ड़े मसीह पर बसुआस करी नैं मरी गियो हन, सैह़ सारे भी नास होई गियो हन, कने परमात्मे ते हमेसा तांई दूर होई गियो हन।

¹⁹जे अहां सिर्फ इसा ज़िन्दगिया च मसीह ते आस रखदे हन तां अहां इस संसारे दे सारे लोकां ते जादा अभागे हन।

²⁰अपर सच्च तां एह़ ऐ कि मसीह मरेयां ते जिन्दा होई गेआ ऐ, कने सैह़ अहां जो इसा गल्ला च पक्का करदा ऐ कि दूयेयां जो भी सैह़ मरेयां ते जिन्दा करगा।

²¹इसतांई तुहां दिक्खदे हन कि इस संसारे च मौत्त पैहल्ले माणुये दे जरिये आई, जेह्ड़ा आदम था, कने हुण मौत्ती ते नौई ज़िन्दगी दूये माणुये दे जरिये आई, जेह्ड़ा मसीह ऐ।

²²कने जिंआं अहां आदमे दा वंश होणे दे नाते अहां सारे मरदे हन, तिंआं ई मसीह सौगी अहां दे मजबूत रिस्ते दिया बज़ाह ते अहां जो नौई ज़िन्दगी दित्ती जांदी ऐ।

²³अपर हर इक्क अपणिया बारिया मताबक ज़िन्दगिया च बापस ओंगा, सबते पैहल्ले मसीह मरेयां ते जिन्दा कित्ता गेआ, कने जाह़लू मसीह बापस ओंदा ऐ तां सैह़ सारे जिन्हां दा तिस सौगी मजबूत रिस्ता ऐ दुवारी जिन्दे कित्ते जांगे।

²⁴इसते बाद इस संसारे दा अन्त होई जांगा। तिस बग्त सैह़ सारी हकुमत, सारा अधिकार, कने सामर्थी दा अन्त करी नैं राज्जे जो परमात्मा पिता दे हत्थे च देई दिंगा।

²⁵एह़ जरूरी ऐ कि सैह़ तिस बग्ते तिकर राज्ज करैं जाह़लू तिकर सैह़ अपणे सारे बैरियां जो अपणे बसे च नीं करी लैं।

²⁶जिस बैरिये जो सबना ते आखरी च खत्म कित्ता जांगा, सैह़ मौत्त ऐ।

²⁷क्जोकि पवित्रशास्त्रे च लिख्या ऐ, कि “परमात्मा सब कुच्छ मसीह दे अधीन करी दिंगा,” अपर जाह़लू सब कुच्छ तिसदे अधीन करी दित्या ऐ तां एह़ साफ ऐ कि परमात्मा इस च सामिल नीं, अपर सैई ऐ जिन्हीं मसीह जो एह़ अधिकार दित्या ऐ।

²⁸तां जाह़लू सब कुच्छ मसीह दे अधीन करी दित्या ऐ, ताह़लू पुत्तर अप्पु भी परमात्मे दे अधीन होई जांगा, जिन्हीं सब कुच्छ तिसदे अधीन करी दित्या ऐ, तांजे सारेयां च परमात्मा ई सब कुच्छ होयैं।

²⁹हुण जे मरेयां दा दुवारी जिन्दा होणा ऐ नीं, तां सैह़ क्या करगे, जिन्हां मरेयां दे पास्से ते बपतिस्मा लेई लेआ ऐ? जे परमात्मा मरेयां जो दुवारी जिन्दा नीं करगा, तां भिरी लोक तिन्हां दे पास्से ते क्जो बपतिस्मा लैंदे हन?

³⁰तां भिरी अहां क्जो हर बग्त अपणिया ज़िन्दगिया जो खतरे च पांदे रैंह्दे हन?

³¹हे मेरे प्यारे साथी बसुआसियो, हर दिन मैं मौत्ती दा सामणा करदा ऐ, कने जेह्ड़ा मैं ग्लादा ऐ, सैह़ बिलकुल सच्च ऐ, कने एह़ भी सच्च ऐ कि अहां दे प्रभु यीशु मसीह च तुहां दे बसुआसे दिया बज़ाह ते मैं बड़ा भरी खुस ऐ।

³²ऐत्थु इफिसुस सैहरे च मेरे बैरी खतरनाक जानवरां साइआं हन, जेह्ड़े मिन्जो नकसान पजाणा चांह़दे हन। जे मेरा इनाम सिर्फ इस संसारे च ई ऐ, तां मिन्जो एह़ सब कुच्छ झेलणे दी क्या जरूरत ऐ। जे एह़ सच्च हुंदा कि आखरी दिनां च मैं दुवारी जिन्दा नीं कित्ता जांगा तां एह़ खरा ऐ कि मैं खुसी मन्ना, जिंआं एह़ इक्क काहवत भी ऐ। “तां ओआ, अहां खान पींन, क्जोकि सायद कल तां अहां जो मरना ई ऐ।”

³³जेह्ड़े एह़ गल्लां ग्लांदे हन तिन्हां दे जरिये मूर्ख मत बणा, “बुरी संगति खरे चाल-चलणे जो बगाड़ी दिंदी ऐ।”

³⁴सतर्क होई जा, कने पाप करणा छड्डी देआ। क्जोकि तुहां च कुच्छ लोक ऐदेय हन जेह्ड़े परमात्मे जो नीं जाणदे, मैं तुहां जो सर्मिंदा करणे तांई एह़ ग्लादा ऐ।

³⁵जे उदारणे तांई कोई एह़ पुछैं, कि “परमात्मा मरेयां जो किंआं जिन्दा करगा? कने तिन्हां दा सरीर कदेया हुंगा?”

³⁶मेरा जवाब एह़ ऐ कि मूर्ख मत बणा, जेह्ड़ा कुच्छ तुहां बांदे हन, जाह़लू तिकर सैह़ फुटदा नीं ताह़लू तिकर सैह़ लुंगदा नीं।

³⁷जाह़लू तुहां बांदे हन, तां तुहां तिसियो नीं लगांदे हन जेह्ड़ा बूटा लुंगणे आल़ा ऐ, अपर तुहां सिर्फ इक्क बीई बांदे हन, चां कणका दा चां कोई होर।

³⁸अपर परमात्मा अपणिया इच्छा मताबक तिस बूटे जो रूप दिंदा ऐ। कने हर किस्मा दा बीई अपणे रूपे च बधदा ऐ।

³⁹जे अहां इसा धरतिया पर रैहणे आल़े जानवरां दे बारे च भी सोचन तां सैह़ इक्क देहय् नीं लगदे। माणुआं दा सरीर इक्क देहया ऐ, अपर पंछियां दा सरीर मच्छियां दे सरीरे ते लग्ग ऐ।

⁴⁰सरीर सुअर्गीय भी ऐ, कने धरतिया दा भी ऐ। अपर सुअर्गीय सरीरां दा रूप होर ऐ, कने धरतिया दे सरीरां दा होर।

⁴¹सूरज चन्द्रमे साइआं नीं ऐ, कने चन्द्रमा तारेयां साइआं नीं ऐ। क्जोकि इक्क तारा दूये तारे ते लग्ग ऐ।

⁴²इसतांई मरेयां दा दुवारी जिन्दा होणा भी इआं ई हुंदा। जिंआं इक्क सरीर दब्बी दित्ता जांदा ऐ, तां सैह़ गल़ी जांदा ऐ, अपर जाह़लू एह़ दुवारी जिन्दा हुंदा ऐ तां एह़ ऐदेया सरीर हुंगा जेह्ड़ा दुवारी भिरी कदी गल़ी नीं सकदा।

⁴³जाह़लू अहां दे सरीरे दब्बी दित्ते जांदे हन, तां एह़ बड़े भदे कने कमजोर हुंदे हन। अपर जाह़लू एह़ दुवारी जिन्दे हुंदे हन तां एह़ बड़े खुबसूरत कने ताकतवर हुंदे हन।

⁴⁴धरतिया दा सरीर दब्बी दित्ता जांदा ऐ, कने आत्मिक सरीर जिन्दा हुंदा ऐ। जे धरतिया दा सरीर ऐ, तां आत्मिक सरीर भी ऐ।

⁴⁵जिंआं पवित्रशास्त्रे च लिख्या भी ऐ, कि “इसा धरतिया दा पैहल्ला माणु मतलब आदम जिन्दा माणु बणेया,” कने आखरी आदम मतलब मसीह, जेह्ड़ा सदा दी ज़िन्दगी दिंदा ऐ।

⁴⁶सैह़ ज़िन्दगी जेह्ड़ी सुअर्गे च सदा दी ऐ, पैहल्ले नीं ओंदी, अपर सैह़ ज़िन्दगी जेह्ड़ी पैहल्ले ओंदी ऐ, सैह़ अहां दी ऐ जेह्ड़ी इसा धरतिया पर ऐ, कने तिसते बाद ई सुअर्गे दी ज़िन्दगी ऐ।

⁴⁷पैहल्ला माणु जेह्ड़ा आदम था धरतिया ते मतलब चिक्का ते बणाया। दूआ माणु भी जेह्ड़ा मसीह था, सैह़ सुअर्गे ते आया।

⁴⁸जेह्ड़े लोक इसा धरतिया दे हन, सैह़ तिस पैहल्ले माणुये साइआं हन जेह्ड़ा आदम था, अपर जेह्ड़े लोक सुअर्गे दे हन सैह़ तिस माणुये साइआं हन जेह्ड़ा सुअर्गे च ऐ सैह़ मसीह ऐ।

⁴⁹कने जिंआं अहां धरतिया दे माणुये दे रूपे पैदा होये, तां अहां जो तिस माणुये दा रूप भी मिलगा जेह्ड़ा सुअर्गे च ऐ।

⁵⁰हे मेरे प्यारे साथी बसुआसियो, मैं एह़ ग्लांदा ऐ, कि अहां दे धरतिया दे सरीर जेह्ड़े मांस कने खूने नैं बणोयो हन, सैह़ परमात्मे दे राज्जे च नीं रेई सकदे, इसदा मतलब एह़ ऐ कि एह़ सरीर नास होई जांदे हन, क्जोकि सुअर्गे च मौत्त ऐ ई नीं।

⁵¹सुणा, मैं तुहां जो भेतां दियां गल्लां दस्सा दा ऐ, कि अहां सारे बसुआसी नीं मरगे, अपर अहां सारेयां दा रूप बदली जांगा,

⁵²एह़ चाणचक होई जांगा, ठीक तिंआं ई जिंआं कोई अपणियां अखीं झपकदा ऐ। जाह़लू आखरी तुरही बजगी तां जेह्ड़े मरी गियो हन सैह़ सदा दी ज़िन्दगी जीणे तांई दुवारी जिन्दे होई जांगे कने अहां दे सरीर भी जेह्ड़े जिन्दे हन बदली जांगे।

⁵³क्जोकि अहां दा एह़ सरीर जेह्ड़ा बड़ी असानिया नैं मरी कने गल़ी जांदा ऐ, जरूरी ऐ, कि इसदा रूप इक्क ऐदेय सरीरे च बदली जां, जेह्ड़ा ना तां कदी मरदा कने ना ई कदी गल़दा।

⁵⁴जाह़लू एह़ हुंगा तां सैह़ गल्ल पूरी हुंदी ऐ, जेह्ड़ी पवित्रशास्त्रे च लिखियो ऐ: “मौत्त पूरे तरीके नैं हराई दित्ती जांगी, कने इसादा अन्त होई जांगा।”

⁵⁵तिंआं ई एह़ भी पूरा हुंगा जेह्ड़ा पवित्रशास्त्रे च लिख्या ऐ: “हे मौत्त, कुत्थू ऐ तेरी जीत्त? हे मौत्त, कुत्थू रेह्आ तेरा डंग?”

⁵⁶क्जोकि पाप ऐदेया डंग ऐ जिसदा नतीजा मौत्त ऐ, कने पाप दी ताकत व्यबस्था ऐ।

⁵⁷अपर परमात्मे दा धन्यावाद होयैं, जेह्ड़ा अहां दे प्रभु यीशु मसीयैं अहां तांई कित्ता, जिसदे जरिये परमात्मा अहां दे पापां कने मौत्ती पर अहां जो जीत्त दिंदा ऐ।

⁵⁸इसतांई हे मेरे प्यारे साथी बसुआसियो, अपणे बसुआसे मजबूत च बणी रेह्आ, कने प्रभु दे कम्मां च हमेसा बधदे जा, क्जोकि एह़ जाणदे हन कि जेह्ड़ा कुच्छ तुहां प्रभु तांई करदे हन तिसदा इनाम तुहां जो जरूर मिलगा।