Read Kangri 1 कुरिन्थियों 16 Bible Online

1 कुरिन्थियों 16 - Kangri bible

1 कुरिन्थियों 16

¹हुण तुहां दा एह़ सवाल जेह्ड़ा यरूशलेम सैहरे च परमात्मे दे लोकां तांई पैसा किठ्ठा करणे दे बारे च दस्सदा ऐ, तिसदा जवाब एह़ ऐ कि जेह्ड़ा मैं गलातिया सैहरे दियां कलीसियां जो दस्सेया ऐ तिंआं ई तुहां भी करा।

²हर तवाआरे जो तुहां च हर इक्क अपणिया आमदनिया मताबक अप्पु अल्ल कुच्छ रखी लैं तांजे मेरे ओणे पर पैसे किठ्ठे नीं करणा पोन।

³कने जाह़लू मैं तुहां अल्ल ओंगा, तां जिन्हां जो तुहां चुणेया ऐ, तिन्हां दे हत्थ मैं चिठ्ठियां देई नैं घल्ली दिंगा कि सैह़ किठ्ठा कित्यो पैसे जो यरूशलेम सैहरे च पज्जाई दैन।

⁴जे मेरा भी जाणा ठीक होएया, तां सैह़ मिन्जो सौगी जांगे।

⁵मैं मकिदुनिया प्रदेसे ते होई नैं तुहां अल्ल ओंगा, क्जोकि मैं मकिदुनिया प्रदेस जो जाणे दी सलाह बणा दा ऐ।

⁶अपर सायद होई सकदा ऐ कि मैं तुहां सौगी कुच्छ बग्त या पूरा स्याल़ा कटैं, कने तां तुहां मिन्जो जित्थु कुत्थी मैं जाणा चांह़दा ऐ घल्ली सकन।

⁷क्जोकि मैं हुण रस्ते च तुहां नैं मिलणा नीं चांह़दा; अपर मिन्जो आसा ऐ कि जे प्रभु चां तां कुच्छ बग्ते तिकर तुहां सौगी रैंह्गा।

⁸अपर मैं पिन्तेकुस्त दे त्योहारे तिकर इफिसुस सैहरे च रैंह्गा।

⁹क्जोकि मिन्जो तांई ऐत्थु बड़े असरदार कम्म करणे तांई इक्क बड़ा बधिया मौका मिल्लेया ऐ, हलांकि ऐत्थु बड़े लोक मेरे बरोधी हन।

¹⁰जे तीमुथियुस आई जां, तां तिसदी खरे कित्ते आदर-खातर करनेयों। क्जोकि सैह़ मिन्जो साइआं प्रभु दे कम्म करदा ऐ।

¹¹इसतांई कोई तिसियो बेइज्जत ना करैं, अपर तिसियो खुसिया नैं विदा करी दिनेयों तांजे सैह़ मिन्जो अल्ल सही-सलामत पुज्जी जां। क्जोकि मैं तिसदा इन्तजार करा दा ऐ कि सैह़ बसुआसी भाऊआं सौगी औयें।

¹²बसुआसी भाऊ अपुल्लोसे नैं मैं बड़ी विणती कित्ती ऐ कि सैह़ तुहां अल्ल दूयेयां बसुआसी भाऊआं सौगी जां; अपर तिन्हीं इस बग्त जाणे दी कुच्छ भी इच्छा नीं कित्ती, अपर जाह़लू ठीक मौका मिलगा ताह़लू आई जांगा।

¹³चौकनै रेह्आ, बसुआसे च बणी रेह्आ, हौंसला रखा, बसुआसे च मजबूत बणा।

¹⁴जेह्ड़ा कुच्छ करदे हन प्यारे नैं करा।

¹⁵हे प्यारे साथी बसुआसियो, तुहां स्तिफनास दे परवारे जो जाणदे हन कि सैह़ अखाया प्रदेसे च पैहल्ले मसीह दे बसुआसी बणैं, कने परमात्मे दे लोकां दी सेवा करणे तांई त्यार रैंह्दे हन।

¹⁶इसतांई मैं तुहां नैं विणती करदा ऐ कि ऐदेयां दे अधीन रेह्आ, अपर हर इक्की दे जेह्ड़े इस कम्मे च कड़ी मेहनत करदे हन।

¹⁷मैं स्तिफनासे, फूरतूनातुसे कने अखइकुसे दे ओणे ते खुस ऐ, क्जोकि तिन्हां मेरी मदत कित्ती, जेह्ड़ी तुहां नीं करी सके।

¹⁸तिन्हां मेरे कने तुहां दे मनां जो बड़ा हौंसला दित्ता ऐ, इसतांई तुहां जो ऐदेयां लोकां दी इज्जत करणी चाइदी।

¹⁹आसिया प्रदेसे दी कलीसियां दे पास्से ते तुहां जो नमस्कार; अक्विला कने तिसदिया लाड़िया प्रिसका दा नमस्कार, कने कलीसिया जेह्ड़ी तिन्हां दे घरे च अराधना तांई किठ्ठी हुंदी, तिसादा भी तुहां जो प्रभु च बड़ा-बड़ा नमस्कार।

²⁰सारे बसुआसी भाऊआं दा तुहां जो नमस्कार। इक्की दूये सौगी प्यारे नैं गल़े मिल्ली करी नमस्कार करा।

²¹दिक्खा, मैं किंआं बड्डे-बड्डे अखरां च तुहां जो अपणे हत्थे नैं एह़ चिठ्ठी लिखा दा ऐ, तुहां जो मेरा नमस्कार। जे कोई प्रभु नैं प्यार ना रखैं तां सैह़ श्रापित होयैं।

²²हे अहां दे प्रभु, आ।

²³अहां दे प्रभु यीशु मसीह दा अनुग्रह तुहां पर हुंदा रैंह्।

²⁴जेह्ड़े यीशु मसीह च इक्क हन तुहां सबना जो मेरा प्यार। आमीन।