Read Kangri 1 कुरिन्थियों 3 Bible Online

1 कुरिन्थियों 3 - Kangri bible

1 कुरिन्थियों 3

¹हे प्यारे साथी बसुआसियो, तुहां इस संसारे दे लोकां साइआं दखावा करा दे हन, इसतांई मैं तुहां नैं आत्मिक लोकां साइआं नीं ग्लाई सकेया, क्जोकि मसीह दे बसुआसे च तुहां बच्चेयां साइआं हन।

²मैं तुहां जो परमात्मे दे वचने ते सिर्फ बुनियादी सिक्षा दित्ती, कने सक्त सिक्षा नीं दित्ती, क्जोकि तिस बग्त तुहां इसा सिक्षा जो पाणे तांई त्यार नीं थे,

³क्जोकि तुहां अह्ल्ली भी इन्हां संसारिक लोकां साइआं जीआ दे हन। इसतांई कि जाह़लू तुहां च जल़ण कने लड़ाई झगड़े हुंदे हन, तां क्या सैह़ एह़ साबित नीं करदा? कि तुहां संसारे दे हन, क्या तुहां इन्हां संसारिक लोकां साइआं नीं जीआ दे हन?

⁴क्जोकि जाह़लू इक्क ग्लांदा ऐ, “मैं पौलुसे दा ऐ,” कने दूआ ग्लांदा ऐ, “मैं अपुल्लोसे दा चेला ऐ,” तां क्या तुहां संसारे दे लोकां साइआं नीं जीआ दे हन।

⁵आखर च सिर्फ अपुल्लोस कने मैं दास हन, जिन्हां तुहां दा मसीह च बसुआस करणे तांई मदत कित्ती, एह़ प्रभु ई था जिन्हीं एह़ सब कुच्छ कित्ता।

⁶मैं तुहां दे मनां च परमात्मे दे वचने दा बीई लगाया, कने अपुल्लोसैं इसियो सग्गेया, अपर परमात्मा ई था जिन्हीं इसियो बधाया।

⁷इसतांई ना तां लगाणे आल़ा कुच्छ ऐ कने ना सग्गणे आल़ा, अपर परमात्मा ई सब कुच्छ ऐ जेह्ड़ा बधाणे आल़ा ऐ।

⁸जेह्ड़ा बीई लगांदा ऐ कने जेह्ड़ा सग्गदा ऐ तिन्हां दून्नी दा इक्क ई मकसद ऐ; अपर इक्क माणु अपणिया ई मेहनता मताबक परमात्मे ते अपणा इनाम पांगा।

⁹क्जोकि अहां परमात्मे तांई कम्म करणे आल़े तिसदे साथी हन; तुहां इक्की खेते साइआं हन, जेह्ड़ा परमात्मे दा ऐ, कने मैं तुहां दी इक्क ऐदेय घरे साइआं तुलणा करा दा ऐ, जिसियो परमात्मा बणांदा ऐ।

¹⁰परमात्मे दे तिस इनामे मताबक जेह्ड़ा मिन्जो दित्या ऐ, मैं अक्लमंद राजमिस्त्रिये साइआं नींई पाई, कने दूआ तिस पर रद्दा लगांदा ऐ। अपर हर इक्क माणु चौकन्ना रैंह् कि सैह़ तिस पर कदेया रद्दा लगांदा ऐ।

¹¹नींई जेह्ड़ी पैहल्ले ते भरियो ऐ, सैह़ यीशु मसीह ऐ, कने कोई दूई नींई नीं भरी सकदा।

¹²जे कोई इसा नीआ पर सोन्ना या चाँदी या कीमती पत्थर या लकड़ी या घाह या भूये दा रद्दा लगांदा ऐ,

¹³अहां जेह्ड़ा कुच्छ भी इसा नीआ पर बणांदे हन, तां सैह़ न्याय आल़े दिने अग्गी नैं परखेया जांगा; ताह़लू सारे एह़ दिक्खगे कि तिन्हां इसा बणाणे तांई सोन्ना, चाँदी, कीमती पत्थर, लकड़ी, घाह, भूये दा इस्तेमाल कित्या ऐ।

¹⁴जिसदा कम्म तिसा नीआ पर जेह्ड़ा तिन्हीं कित्या ऐ, जे नीं फकूंगा, तां सैह़ इनाम पांगा।

¹⁵अपर जे कुसी दा कम्म फकौई जांदा ऐ, तां सैह़ इनाम नीं पांगा; भिरी सैह़ सदा दिया ज़िन्दगिया जो नीं गुआंगा, जेह्ड़ी परमात्मे तिसियो दित्तियो ऐ।

¹⁶क्या तुहां नीं जाणदे कि तुहां परमात्मे दा मंदर हन, कने परमात्मे दा आत्मा तुहां च वास करदा ऐ?

¹⁷जे कोई माणु तुहां जो जेह्ड़े परमात्मे दे मंदरे साइआं हन, परमात्मे ते लग्ग करदा ऐ, तां परमात्मा तिसियो नास करगा; क्जोकि परमात्मे दा मंदर पवित्र ऐ, कने सैह़ मंदर तुहां हन।

¹⁸जे तुहां च कोई सोचैं कि तुहां इस संसारे दे लोकां च बड़े भरी ज्ञानी हन, तुहां जो इस संसारे दे लोकां च मूर्ख बणी जाणा चाइदा, इसतांई तुहां परमात्मे दिया नजरा च अपणे आप्पे जो ज्ञानी बणाई सकन।

¹⁹क्जोकि सच्च एह़ ऐ कि संसारिक ज्ञान परमात्मे दिया नजरा च मूर्खता ऐ, जिंआं पवित्रशास्त्रे लिख्या ऐ, “परमात्मा ई ऐ, जेह्ड़ा ज्ञानियां जो तिन्हां दी चलाकिया च फसाई दिंदा ऐ,”

²⁰कने भिरी पवित्रशास्त्रे च एह़ भी लिख्या ऐ, “प्रभु ज्ञानियां दे बचारां जो जाणदा ऐ कि सैह़ बेकार हन।”

²¹इसतांई माणुआं च इक्क खास अगुऐ दे बारे च घमंड करणा कने तिसदे पचांह़ चलणा छड्डी देआ, क्जोकि परमात्मे तुहां दिया भलाईया तांई सब कुच्छ दित्या ऐ।

²²खास करी नैं चाये मैं पौलुस, अपुल्लोस, पतरस, इस संसारे दियां चीज्जां, संसार, चांये तुहां मरन चाये जीन, चाये वर्तमान, चाये भविष्य, तुहां जो एह़ सारियां चीज्जां परमात्मैं तुहां दिया भलाईया तांई दित्तियां हन,

²³कने तुहां जो मसीह दे बारे घमंड करणा चाइदा, ना कि अपणे अगुआं दे बारे च, क्जोकि तुहां मसीह दे हन, कने मसीह परमात्मे दा ऐ।