Read Kangri 1 कुरिन्थियों 5 Bible Online

1 कुरिन्थियों 5 - Kangri bible

1 कुरिन्थियों 5

¹ऐत्थु तिकर सुणने च ओंदा ऐ, कि तुहां दी कलीसिया च कुच्छ लोक ब्यभिचार करदे हन, अपर देहया ब्यभिचार जेह्ड़ा होरनी जातिआं दे लोकां च भी नीं हुंदा ऐ, कि इक्क मरद अपणिया सौतेलिया माँऊ जो रखैल बणाई नैं रखदा ऐ।

²कने तुहां अपणे आप्पे च बड़ा घमंड करदे हन, अपर तुहां जो दुख कने सर्म होणा चाइदी, कने तुहां जो ऐदेय माणुये जो अपणिया कलीसिया ते बाहर कड्डणा चाइदा।

³हलांकि मैं अप्पु भी तुहां सौगी नीं ऐ, अपर भिरी भी मैं आत्मा च तुहां सौगी ऐ, कने मैं तिस बुरा करणे आल़े दे खलाफ अपणा फैसला सणाई दित्या ऐ, समझा मैं अप्पु तित्थु हाजर ऐ।

⁴जाह़लू तुहां अहां दे प्रभु यीशुये दे नांऐ च किठ्ठे हुंदे हन तां मैं आत्मा च तुहां सौगी हुंदा ऐ कने अहां दे प्रभु यीशु मसीह दी सामर्थ भी तुहां सौगी हुंदी ऐ।

⁵ताह़लू तिस बुरा करणे आल़े जो सैताने दे हुआलैं करी दित्ता जां, कि तिसदा सरीर तां नास होई जांगा, अपर प्रभु दे बापस ओणे दे दिने तिसदी आत्मा उद्धार पांगी।

⁶तुहां जो घमंड करणा खरा नीं; क्या तुहां नीं जाणदे कि थोड़ा देहया खमीर पूरे गुन्नेयो आटे जो खमीर[2] बणाई दिंदा ऐ।

⁷जिंआं यहूदी अपणे घरां ते फसह दा त्योहार मनाणे ते पैहल्लैं सारा खमीर कड्डी दिंदे हन, तिंआं ई तुहां जो भी इस बुरे माणुये जो इसा कलीसिया ते कड्डी दैणा चाइदा, तां तुहां इक्क ताजी रोटिया साइआं हुंगे, जेह्ड़ी बिना खमीरे ते बणियो ऐ, कने असल च तुहां ऐई हन। क्जोकि अहां दे फसह दा त्योहार असल च मसीह दे बलिदाने दे जरिये पूरा होएया ऐ।

⁸इसतांई ओआ अहां इस त्योहारे च खुसी मनान, ना पराणी रोटिया दी बुराईया ते कने ना दुष्टता ते, अपर इमानदारिया कने सच्चाईया दी नौईआं रोटिया नैं।

⁹मैं अपणिया पिछलिया चिठ्ठिया च तुहां जो लिख्या ऐ कि ब्यभिचारियां दी संगति मत करदे।

¹⁰एह़ नीं कि तुहां बिलकुल इस संसार दे ब्यभिचारियां या लालचियां, या धोखा दैणे आल़ेआं या मूर्तिपूजकां दी संगति मत करा; क्जोकि इसा हालता च तां तुहां जो संसारे ते जाणा ई पोंगा।

¹¹अपर मेरे ग्लाणे दा मतलब एह़ ऐ कि तुहां दा ऐदेया बसुआसी भाऊये सौगी, जेह्ड़ा ब्यभिचारी, लालची, मूर्तिपूजक, गाल़ी दैणे आल़ा, पियक्कड़, या ठग होयैं, तां तिसदी संगति तां दूर; अपर तिस सौगी खाणा भी मत खा।

¹²क्जोकि जेह्ड़े लोक बसुआसी नीं हन, अहां तिन्हां लोकां दा न्याय क्जो करन? अहां जो दूयेयां नैं क्या कम्म? अपर तुहां जो जरूर तिन्हां लोकां जो झिड़कणा चाइदा, जेह्ड़े तुहां दी कलीसिया दे हन।

¹³अपर जेह्ड़े लोक बसुआसी नीं हन, तिन्हां दा न्याय परमात्मा करदा ऐ। अपर जिंआं पवित्रशास्त्रे च लिख्या ऐ, कि “सैह़ बेबसुआसी कलीसिया दा हिस्सा नीं होई सकदे।”