Read Kangri 1 कुरिन्थियों 6 Bible Online

1 कुरिन्थियों 6 - Kangri bible

1 कुरिन्थियों 6

¹जे तुहां च कुसी दा भी दूये बसुआसिये सौगी झगड़ा होयैं, तां तुहां जो कचेहरिया च नीं जाणा चाइदा, अपर तुहां जो अपणिया कलीसिया दे बसुआसियां सौगी फैसला करी लैणां चाइदा कि तुहां दून्नी च कुण ठीक ऐ,

²क्या तुहां नीं जाणदे, अहां बसुआसी लोक इक्क दिन इस संसारे दा न्याय करगे? कने इसतांई कि तुहां इस संसारे दा न्याय करणे आल़े हन, तां क्या तुहां अप्पु इन्हां छोटे-छोटे झगड़ेयां दा फैसला नीं करी सकदे।

³क्या तुहां नीं जाणदे कि अहां सुअर्गदूतां दा न्याय करगे, तां तिसदी तुलणा च एह़ संसारिक झगड़े क्या हन?

⁴जे ऐदेय झगड़े सामणै ओन, तां तुहां जो तिन्हां अल्ल नीं जाणा चाइदा, जिन्हां दी कलीसिया दे बसुआसी इज्जत नीं करदे।

⁵मैं तुहां जो एह़ सर्मिंदा करणे तांई ग्लांदा ऐ। क्या तुहां च कोई भी अक्लमंद नीं ऐ, जेह्ड़ा तुहां च इन्हां लड़ाईयां-झगड़ेयां दा फैसला करी सकैं?

⁶अपर इसदिया जगाह इक्क बसुआसी दूये बसुआसिये दे खलाफ इस मुद्दे जो कचेहरिया च लेई नैं जांदा ऐ।

⁷जाह़लू तुहां च कोई दूये जो कचेहरिया च लेई करी जांदा ऐ, तां इसदा मतलब एह़ ऐ, कि तुहां बिलकुल भी मसीह नियमां दे मताबक नीं जीआ दे हन, इसदी बजाये तुहां ई अन्याय कने नकसान क्जो नीं झेली लैंदे?

⁸अपर तुहां तां गलत करदे कने धोखा दिंदे हन, कने एह़ तुहां अपणे बसुआसी भाऊआं सौगी करदे हन।

⁹क्या तुहां नीं जाणदे कि अन्यायी लोक परमात्मे दे राज्जे दे वारस नीं हुंगे, धोखा मत खा; ना वैश्यगामी, ना मूर्तिपूजक, ना दूईआं जणासां सौगी नाजायज रिस्ते, ना लुच्चे, ना मर्दे दे मर्दां सौगी नाजायज रिस्ते,

¹⁰ना चोर, ना लालची, ना पियक्कड़, ना गाल़ी दैणे आल़ा, ना ठग-बाजी करणे आल़े परमात्मे दे राज्जे दे वारस हुंगे।

¹¹कने तुहां च कितणे ऐदेय ई थे, अपर तुहां दे पाप प्रभु यीशु मसीह दे नांऐ ते कने अहां दे परमात्मे दिया आत्मा दे जरिये धोणे दिया बज़ाह ते पवित्र कने धर्मी बणैं।

¹²तुहां च कुच्छ एह़ ग्लांगे, कि सारियां चीज्जां मिन्जो तांई ठीक हन, क्जोकि मैं इक्क बसुआसी ऐ, अपर सारियां चीज्जां फायदे दियां नीं हन; सारियां चीज्जां मिन्जो तांई ठीक हन, अपर मैं कुसी गल्ला दा गुलाम नीं बणगा।

¹³तुहां च कुच्छ ग्लांगे, कि खाणा अहां दे सरीरे तांई, कने अहां दे सरीर खाणे तांई हन, सैह़ सच्च ऐ अपर परमात्मा सरीरां जो भी कने खाणे जो भी नास करगा, जाह़लू अहां सुअर्गे च होणा। अहां जो अपणे सरीरां दे जरिये सैई करणा चाइदा, जेह्ड़ा प्रभु चांह़दा ऐ, क्जोकि एह़ सरीर प्रभु दे हन।

¹⁴इसते अलावा अहां दे सरीर बड़े भरी खास हन, क्जोकि जिंआं परमात्मैं अपणिया सामर्थी दे जरिये प्रभु यीशु मसीह जो मरेयां ते जिन्दा कित्ता, तिंआं ई सैह़ अहां जो भी मरेयां ते जिन्दा करगा।

¹⁵क्या तुहां नीं जाणदे कि तुहां दे सरीर मसीह दे सरीरे दा हिस्सा ऐ? क्या एह़ मिन्जो तांई ठीक ऐ, कि मैं मसीह सरीरे दे हिस्से जो वैश्या दे अंग बणाई दैं, नीं कदी भी नीं।

¹⁶क्जोकि पवित्रशास्त्रे च लिख्या ऐ, “सैह़ दोयो इक्क सरीर होई जांगे, इसतांई तुहां जो एह़ जाणना चाइदा, कि जेह्ड़ा कोई वैश्या नैं संगति करदा ऐ, सैह़ तिसा सौगी इक्क सरीर होई जांदा ऐ।”

¹⁷कने जेह्ड़ा प्रभु दी संगति च रैंह्दा ऐ, तिसदी आत्मा कने प्रभु दी आत्मा इक्क होई जांदी ऐ।

¹⁸ब्यभिचारे ते दूर रेह्आ। माणुये दे जरिये कित्ते गै होर पाप तिसदे सरीरे ते बाहर हन, अपर ब्यभिचार करणे आल़ा अपणे सरीरे दे खलाफ पाप करदा ऐ।

¹⁹क्या तुहां नीं जाणदे कि तुहां दा सरीर पवित्र आत्मा दा मंदर ऐ, जित्थु सैह़ वास करदा ऐ, कने जेह्ड़ा तुहां जो परमात्मे दे पास्से ते मिल्लेया ऐ; कने हुण तुहां अपणे नीं हन, अपर परमात्मे दे हन।

²⁰क्जोकि परमात्मे यीशु मसीह दे बलिदाने दे जरिये इक्क बड्डा मुल्ल देई नैं खरीदी लेआ ऐ, इसतांई अपणे सरीरे दे जरिये परमात्मे दी महिमा करा।