Read Kangri 1 कुरिन्थियों 7 Bible Online

1 कुरिन्थियों 7 - Kangri bible

1 कुरिन्थियों 7

¹हुण मैं तिन्हां सवालां दा जवाब दिंगा, जेह्ड़े तैं अपणिया चिठ्ठिया च लिख्यो, तू पुछया, क्या लोकां तांई एह़ खरा ऐ कि सैह़ ब्याह नीं करन।

²अपर मैं एह़ सलाह दिंदा ऐ, कि ब्यभिचारे ते बचणे तांई हर इक्क मरद ब्याह करैं, कने अपणिया लाड़िया सौगी बफादार रैंह्।

³लाड़ा अपणिया लाड़िया दा हक्क पूरा करैं; कने तिंआं ई लाड़ी भी अपणे लाड़े दा।

⁴लाड़िया दा अपणे सरीरे पर हक्क नीं अपर तिसादे लाड़े दा हक्क ऐ; तिंआं ई लाड़े दा भी अपणे सरीरे पर हक्क नीं, अपर लाड़िया दा हक्क ऐ।

⁵तुहां इक्की दूये ते लग्ग मत रेह्आ; अपर तुहां दोयो पैहल्लैं कुच्छ बग्त तांई लग्ग होणे तांई अप्पु च सेहमत होई जा, कि तुहां प्रार्थना करी सकन, कने इसते बाद दुवारी भिरी तुहां सौगी मिल्ली नैं रेह्आ, कुत्थी इआं ना होयैं कि तुहां दे सबरे दिया कमिया दिया बज़ाह ते सैतान तुहां जो भटकाई दैं।

⁶अपर मैं जेह्ड़ा एह़ ग्लांदा ऐ, सैह़ सिर्फ मेरी सलाह ऐ ना कि हुक्म।

⁷मैं एह़ चांह़दा ऐ, कि जिंआं मैं कुआरा ऐ, तिंआं ई सारे लोक होन, अपर हर इक्की जो परमात्मे दे पास्से ते खास वरदान मिल्लेयो हन; परमात्मे कुसी जो ब्याह दा वरदान, कने कुसी जो कुआरे रैहणे दा वरदान दित्या ऐ।

⁸अपर कुआरेआं कने बिधवां तांई मेरी एह़ सलाह ऐ, कि सैह़ कुआरे रैह़न, जिंआं मैं ऐ।

⁹अपर जे सैह़ सबर नीं रखी सकन, तां ब्याह करी लैन; क्जोकि सरीरे दियां इच्छां च जल़णे दे बजाये ब्याह करणा खरा ऐ।

¹⁰जिन्हां दा ब्याह होई गेआ, तिन्हां जो मैं नीं, अपर प्रभु हुक्म दिंदा ऐ कि लाड़ी अपणे लाड़े जो तलाक नीं दैं।

¹¹कने जे तिन्हां च तलाक होई भी जां, तां दूआ ब्याह कित्ते बगैर रैह़न; या अपणे लाड़े सौगी भिरी मिल्ली करी रैंह्, कने ना लाड़ा अपणिया लाड़िया जो तलाक दैं।

¹²दूयेयां सौगी प्रभु नीं, अपर मैंई ग्लांदा ऐ, जे कुसी बसुआसी भाऊये दी लाड़ी बसुआसी नीं होयैं कने तिसा सौगी मिल्ली करी रैहणे ते खुस ऐ, सैह़ तिसा जो तलाक नीं दैं।

¹³जिसा जणासा दा लाड़ा बसुआसी नीं होयैं कने तिस सौगी रैहणे ते खुस ऐ; सैह़ लाड़े जो तलाक नीं दैं।

¹⁴क्जोकि जेह्ड़ा लाड़ा बसुआसी नीं ऐ, परमात्मा तिसियो भी अपणा समझदा ऐ, क्जोकि तिसदी लाड़ी बसुआसी ऐ। कने तिंआं ई जेह्ड़ी लाड़ी बसुआसी नीं ऐ, कने तिसा जो भी परमात्मा अपणा समझदा ऐ, क्जोकि तिसादा लाड़ा बसुआसी ऐ। जे एह़ सच्च नीं हुंदा, तां परमात्मा तुहां दे बाल बच्चेयां जो अपणा नीं समझदा, अपर हुण तुहां दे बच्चे भी परमात्मे दे अपणे हन।

¹⁵अपर जेह्ड़े लाड़ा या लाड़ी बसुआसी नीं हन, जे सैह़ अप्पु च तलाक लैणां चांह़दे हन तां तिन्हां जो तलाक लैणां देआ, जाह़लू इआं हुंदा ऐ, तां सैह़ बसुआसी भाऊ या बैहण तिस ब्याह दे बंधने ते अजाद हन। अपर जे होई सकैं तां दोयो अप्पु च इस ब्याह दे बंधने च बणी रैह़न, क्जोकि परमात्मैं अहां जो सांतिया नैं ज़िन्दगी जीणे तांई सद्देया ऐ।

¹⁶क्जोकि हे जणांस, क्या तू जाणदी ऐ कि तू परमात्मे ते अपणे लाड़े दा उद्धार कराई लैंगी? तिंआं ई हे मरद, क्या तू जाणदा ऐ कि तू परमात्मे ते अपणिया लाड़िया दा उद्धार कराई लैंगा?

¹⁷हर इक्क कलीसिया दे लोकां जो मैं एह़ ग्लांदा ऐ, जिंआं जिसा हालता च परमात्मैं तुहां जो चुणेया कने तुहां जो अपणे लोक होणे तांई सद्देया ऐ, तिंआं ई कलीसिया च बणी रेह्आ। सारियां कलीसियां तांई मेरा ऐई संदेस ऐ।

¹⁸उदारणे तांई इक्क माणु जिसदा बसुआसी बणने ते पैहल्ले खतणा होएया, सैह़ हुण खतणा कित्ते बगैर ना रैंह्। जेह्ड़ा माणु बसुआसी बणने ते बाद भी खतणा कित्ते बगैर ऐ, सैह़ हुण खतणा ना करां।

¹⁹चाहे माणुये दा खतणा होएया ऐ या नीं होएया ऐ, इसते कोई फर्क नीं पोंदा, अपर परमात्मे दे हुक्मां जो मन्नणा बड़ा जरूरी ऐ।

²⁰हर इक्क तिसा हालता च बणी रैंह्, जिसा हालता च परमात्मैं तिसियो चुणेया कने अपणे लोक होणे तांई सद्देया था।

²¹क्या तू इक्क दास था जाह़लू परमात्मैं तिज्जो चुणेया? इसदे बारे च फिकर मत कर, अपर जे तिज्जो अजाद होणे दा मौका मिल्लैं, तां तिस मौके दा फायदा जरूर लै।

²²क्जोकि जिसियो तिस बग्त प्रभुयैं सद्देया, जाह़लू सैह़ इक्क दास था, हुण सैह़ प्रभु च अजाद कित्या माणु ऐ। ठीक तिंआं ई जिसियो तिस बग्त प्रभुयैं सद्देया, जाह़लू सैह़ अजाद था, हुण सैह़ मसीह दा दास ऐ।

²³परमात्मे तुहां तांई इक्क बड्डा मुल्ल चुकाया ऐ। इसतांई माणुआं दे नीं अपर परमात्मे दे दास बणा।

²⁴हे मेरे प्यारे साथी बसुआसियो, जेह्ड़ा कोई जिसा हालता च परमात्मे चुणेया कने अपणे लोक होणे तांई सद्देया ऐ, सैह़ तिस सौगी बणी रैंह्।

²⁵हुण मिन्जो अल्ल कुआरियां दे बारे च प्रभु दे पास्से ते कोई हुक्म नीं ऐ, अपर प्रभुयैं अपणी दया करी नैं मिन्जो बुद्धि दित्तियो ऐ, जेह्ड़ी भरोसेमंद ऐ, कने मैं तिसादे मताबक ई अपणी सलाह दिंदा ऐ।

²⁶क्जोकि मेरिया समझा च एह़ खरा ऐ कि अज्जे दिया मुसीबता दिया बज़ाह ते, जेह्ड़े लोक कुआरे हन, सैह़ कुआरे ई रैह़न।

²⁷जे तू ब्याया ऐ, तां अपणिया लाड़िया ते लग्ग होणे दी कोसस मत कर; कने जे तू कुआरा ऐ, तां ब्याह करणे दी कोसस मत कर।

²⁸अपर जे तू ब्याह भी करैं, तां कोई पाप नीं; कने जे कुआरी कुड़ी ब्याह करैं तमी कोई पाप नीं। अपर ऐदेय लोक इस संसारे च दुख मुसीबत झेलगे, कने मैं तुहां जो इन्हां ते अजाद करवाणा चांह़दा ऐ।

²⁹हे मेरे प्यारे साथी बसुआसियो, मैं एह़ ग्लांदा ऐ, कि अहां अल्ल इस संसारे च जादा बग्त नीं बचेया ऐ, इसतांई इसा गल्ला दे बारे जादा फिकर मत करा कि तुहां दी लाड़ी ऐ कि नीं, अपर यीशु मसीह दी सेवा करणे दे बारे च सोचदे रेह्आ।

³⁰कने रोणे आल़े ऐदेय होन, मन्ना रोंदे नीं; कने खुसी करणे आल़े ऐदेय होन, मन्ना खुसी नीं करदे; कने मुल्लैं खरीदणे आल़े ऐदेय होन मन्ना तिन्हां अल्ल कुच्छ ऐ ई नीं।

³¹कने इस संसारे च अहां अल्ल जेह्ड़ा कुच्छ ऐ, अहां जो एह़ सोचणा कि सैह़ सब कुच्छ अहां तांई जादा जरूरी नीं ऐ, क्जोकि इस संसारे च सब कुच्छ नास होई जांगा।

³²मैं एह़ चांह़दा ऐ, कि तुहां सारे कोई फिकर नीं करन। कने इक्क कुआरा मरद एह़ फिकर करदा ऐ कि परमात्मे दी सेवा किंआं करैं।

³³अपर कुआरा माणु संसारे दियां गल्लां दी फिकर करदा रैंह्दा ऐ कि किंआं अपणिया लाड़िया जो कुस तरीके नैं खुस रखैं।

³⁴ब्याईया[3] कने कुआरिया च भी फर्क ऐ, कुआरी कुड़ी परमात्मे दी सेवा करणे दे बारे च फिकर करदी रैंह्दी ऐ कि सैह़ अपणे मने कने सरीरे जो प्रभु तांई लग्ग करणा चांह़दी ऐ अपर ब्याईयो संसारे दियां चीज्जां दी फिकर करदी रैंह्दी ऐ कि किंआं अपणे लाड़े जो खुस रखैं।

³⁵मैं एह़ गल्ल तुहां दे फायदे तांई ग्लांदा ऐ, ना कि तुहां जो फसाणे तांई, अपर इसतांई कि जिंआं ठीक ऐ तिंआं ई कित्ता जां, तांजे तुहां इक्क मन होई नैं प्रभु दी सेवा करदे रेह्आ।

³⁶जे तुहां च कोई अपणिया कुड़िया जो कुआरिया रखैं, कने हुण एह़ समझैं कि एह़ करणा ठीक नीं ऐ क्जोकि ब्याह करणे तांई तिसा दी जुआनी ढल़ा दी ऐ, कने हुण तिसादा बुढ़ा एह़ समझैं, कि कुड़िया जो ब्याह करी लैणां चाइदा, तां तिसियो तिसादा ब्याह कराई दैणा चाइदा, इआं करणा कोई गलत गल्ल नीं ऐ।

³⁷अपर जे इन्हीं माणुये बगैर कुसी जबरदस्ती ते अपणे मने च एह़ पक्का फैसला करी लेआ ऐ, कि तिसदिया कुड़िया जो कुआरिया रैहणा ठीक ऐ, तां सैह़ परमात्मे दिया नजरा च ठीक करदा ऐ।

³⁸इसतांई जेह्ड़ा अपणिया कुआरिया कुड़िया दा ब्याह करदा ऐ, तिसदा फैसला भी ठीक ऐ, कने जेह्ड़ा तिसादा ब्याह नीं करवाणे दा फैसला करदा ऐ, सैह़ होर भी खरा करदा ऐ।

³⁹लाड़ी ताह़लू तिकर लाड़े सौगी बणी रैंह्दी, जाह़लू तिकर लाड़ा जिन्दा रैंह्दा ऐ, अपर जे तिसादा लाड़ा मरी जां, तां सैह़ जिस नैं चां ब्याह करी सकदी ऐ, अपर जरूरी एह़ ऐ कि सैह़ माणु भी प्रभु च बसुआसी होयैं।

⁴⁰अपर मेरी सलाह एह़ ऐ कि सैह़ जणांस ब्याह नीं करैं, कने मैं एह़ समझदा ऐ कि जाह़लू मैं तुहां नैं इआं ग्लादा ऐ, तां परमात्मे दिया आत्मा दे पास्से ते ग्लांदा ऐ।