Read Kangri 1 कुरिन्थियों 8 Bible Online

1 कुरिन्थियों 8 - Kangri bible

1 कुरिन्थियों 8

¹हुण मूर्तियां जो चढ़ाईयां चीज्जां दे बारे च अहां जाणदे हन कि “अहां सारे जेह्ड़े ज्ञानी हन।” अपर ज्ञान घमंड पैदा करदा ऐ, अपर प्यार अहां दी तरक्की करदा ऐ।

²जे कोई समझदा ऐ कि मैं कुच्छ जाणदा, तां सैह़ अह्ल्ली तिकर एह़ नीं जाणदा, कि किंआं जाणना चाइदा।

³अपर जे कोई परमात्मे नैं प्यार रखदा ऐ, तां परमात्मा तिसियो जाणदा ऐ।

⁴इसतांई मैं चढ़ाईयां चीज्जां जो खाणे दे बारे च तुहां दे सवालां दा जवाब दैणा चांह़दा ऐ, अहां जाणदे हन कि एह़ सच्च ऐ कि मूर्तियां सच्च-बिच्च जिन्दियां नीं हन, अहां एह़ भी जाणदे हन कि सिर्फ इक्क ई सच्चा परमात्मा ऐ।

⁵अपर भिरी भी अम्बरे च कने धरतिया पर मते लोक ईश्वर कने प्रभु कैहलांदे हन, अपर अहां दा इक्क ई परमात्मा ऐ, कने सैह़ अहां दा पिता ऐ, तिन्हीं सारियां चीज्जां बणाईयां कने तिसदे जरिये अहां जीआ दे हन, तिंआं ई अहां दा इक्क ई प्रभु ऐ कने सैह़ प्रभु यीशु मसीह ऐ, तिसदे जरिये सब कुच्छ बणाया गेआ कने अहां तिसदे जरिये जिन्दे हन।

⁷अपर कोई भी इन्हां गल्लां जो नीं जाणदा ऐ, कुच्छ लोक ऐदेय हन, जेह्ड़े अह्ल्ली तिकर भी मूर्तियां जो जिन्दियां समझदे हन, कने सैह़ मूर्तियां सामणै चढ़ाईयां चीज्जां जो खाणा समझी करी खांदे हन। तिन्हां दी कमजोर अन्तर आत्मा असुद्ध होई गियो ऐ।

⁸खाणा अहां जो परमात्मे अल्ल नीं पज्जांदा। जे अहां नीं खान तां अहां दा कुच्छ भी घाटा नीं, कने जे खान तां कुच्छ फायदा नीं।

⁹अपर चौकन्ने रेह्आ। कुत्थी इआं ना होयैं कि तुहां दी एह़ अजादी कमजोर बसुआसी लोकां तांई ठोकरा दी बज़ाह नीं बणी जां।

¹⁰क्जोकि जे कुसी दी अन्तर आत्मा कमजोर ऐ कने सैह़ तिज्जो साइआं ज्ञानिये माणुये जो मूर्तियां दे मंदरे च खाणा खांदे दिक्खी लैं, तां क्या तिसियो भी मूर्तियां जो चढ़ाईयां चीज्जां खाणे दी हिम्मत नीं पोंगी?

¹¹इसतांई तुहां दा ज्ञानी होणा तिसदे विनाशे दी बज़ाह बणी गेआ, जिस तांई यीशु मसीयैं अपणे प्राण दित्ते।

¹²इस तरीके नैं बसुआसी भाऊआं दे खलाफ पाप करणे ते कने तिन्हां दी अन्तर आत्मा जो जेह्ड़ी कमजोर ऐ, ठोकर लगाणे दे जरिये तुहां यीशु मसीह दे खलाफ पाप करदे हन।

¹³इसतांई जे मूर्तियां सामणै चढ़ाईयां चीज्जां खाणे ते दूये बसुआसी भाऊ बसुआसे च कमजोर हुंदे हन, तां मैं इन्हां चीज्जां जो कदी नीं खांगा, जिसते कि मैं कुसी बसुआसी भाऊये तांई ठोकरा दी बज़ाह नीं बणैं।