Read Kangri 2 कुरिन्थियों 1 Bible Online

2 कुरिन्थियों 1 - Kangri bible

2 कुरिन्थियों 1

¹एह़ चिठ्ठी पौलुस कने अहां दे भाऊ तीमुथियुसे दे पास्से ते ऐ। मैं पौलुस जेह्ड़ा परमात्मे दी इच्छा ते यीशु मसीह दा प्रेरित ऐ। मैं एह़ चिठ्ठी परमात्मे दी तिसा कलीसिया दे नांऐ पर लिखा दा ऐ, जेह्ड़ी कुरिन्थुस सैहरे च ऐ, कने परमात्मे दे सारे पवित्र लोकां दे नांऐ पर जेह्ड़े अखाया प्रदेसे च रैंह्दे हन:

²अहां दे पिता परमात्मा कने प्रभु यीशु मसीह दे पास्से ते तुहां जो अनुग्रह कने सांति मिलदी रैंह्।

³अहां दे प्रभु यीशु मसीह दे पिता परमात्मे दा धन्यावाद होयैं। परमात्मा दया दा पिता कने हर किस्मां दा सुख-सांति दैणे आल़ा ऐ।

⁴परमात्मा अहां दी सारियां मुसीबतां च सुख-सांति दिंदा ऐ, तांजे अहां तिसा सांति दिया बज़ाह ते जेह्ड़ा परमात्मा अहां जो दिंदा ऐ। तिंआं ई अहां भी होरनी लोकां जो सांति देई सकन, जेह्ड़े कुसा भी मुसीबता च पैयो हन।

⁵क्जोकि जिंआं मसीह दे मते दुखां च साझी हुंदे हन, तिंआं ई अहां सांति च भी मसीह दे जरिये जादा साझी हुंदे हन।

⁶जे अहां पर मुसीबत ओंदी ऐ, तां एह़ अहां दी सांति कने उद्धारे तांई ऐ। कने जे अहां सांति पांदे हन, तां एह़ तुहां दी सांति तांई ऐ। जिसदे प्रभावे ते तुहां सबर रखी नैं तिन्हां मुसीबतां जो झेली लैंदे हन, जिन्हां जो अहां भी झेलदे हन।

⁷अहां दी आस तुहां दे बारे च पक्की ऐ, क्जोकि अहां जाणदे हन, कि जिंआं तुहां अहां दे दुखां च साझी हन, तिंआं ई तुहां भी अहां दी सांति च साझी होन।

⁸हे प्यारे साथी बसुआसियो, अहां चांह़दे हन कि तुहां अहां दी तिसा मुसीबता जो जाणी सकन, जेह्ड़ी आसिया प्रदेसे च अहां पर आई; कि अहां इतणे भारी बोझे नैं दबोयो थे, जिसियो अहां नीं झेली सकदे थे, ऐत्थु तिकर कि अहां जीणे दी आस भी छड्डी दित्तियो थी।

⁹अपर अहां अपणे मने च समझी लेआ था, कि अहां पर मौत्ती दा हुक्म होई चुकेया ऐ, तांजे अहां अपणे पर भरोसा नीं रखन, अपर परमात्मे पर जेह्ड़ा मरेयां जो जिन्दा करदा ऐ।

¹⁰तिन्हीं अहां जो मौत्ती दे देहय् बड्डे खतरे ते बचाया, कने बचांदा भी ऐ। कने तिस पर अहां दा एह़ बसुआस ऐ, कि सैह़ गांह भी बचांदा रैंह्गा।

¹¹कने तुहां भी मिल्ली नैं प्रार्थना दे जरिये अहां दी मदत करदे हन, कि जेह्ड़ा वरदान मतेआं दे जरिये अहां जो मिल्लेया, तिसदिया बज़ाह ते मते लोक अहां दिया तरफा ते धन्यावाद करन।

¹²अहां अपणिया समझा पर घमंड करदे हन, क्जोकि एह़ बिलकुल ठीक ऐ, कि संसारे च कने खास करी नैं तुहां बिच्च, अहां दा चाल-चलण परमात्मे दे जरिये दित्ती गेई पवित्रता कने सच्चाईया सौगी था, जेह्ड़ा संसारे दे ज्ञान ते नीं, अपर परमात्मे दे अनुग्रह सौगी था।

¹³अहां तुहां जो हमेसा चिठ्ठी लिखदे हन, तांजे तुहां तिसा जो पढ़न कने समझन, कने मिन्जो आसा ऐ कि जेह्ड़ियां गल्लां मैं लिखा दा ऐ, तिन्हां गल्लां जो अन्त तिकर मनदे रैंह्गे।

¹⁴जिंआं तुहां च कितणेयां मन्नी लेआ कि अहां तुहां दे घमंडे दी बज़ाह हन। तिंआं ई तुहां भी प्रभु यीशुये दे बापस ओणे दे दिन अहां तांई घमंड करणे दी बज़ाह बणगे।

¹⁵इसी भरोसे नैं मैं चांह़दा था कि पैहल्ले तुहां अल्ल औयें तांजे इस तरीके नैं मेरे तुहां अल्ल दो बरी ओणे नैं तुहां जो दुगणी आसीष मिल्लैं।

¹⁶मेरी सलाह थी कि मैं मकिदुनिया प्रदेस जांदे बग्त तुहां अल्ल औयें; कने तित्थु ते बापस ओंदे बग्त भी, कने इसते बाद तुहां मेरी यहूदिया प्रदेसे दे सफरे तांई मदत करदे।

¹⁷इसतांई जाह़लू मैं एह़ सलाह कित्तियो थी तां क्या मैं लापरवाही दस्सी? या जेह्ड़ा करणा चांह़दा ऐ, क्या संसारे दे लोकां साइआं करणा चांह़दा ऐ कि जेह्ड़े हुण तां “हाँ दी हाँ” ग्लांदे हन, कने बादे च “ना दी ना” करी दिंदे हन?

¹⁸जिंआं परमात्मा सच्चा ऐ, कने तिंआं ई अहां जेह्ड़ियां गल्लां तुहां नैं ग्लांदे हन, “हाँ” दा मतलब “हाँ” कने “ना” मतलब “ना” ई हुंदा ऐ।

¹⁹क्जोकि परमात्मे दा पुत्तर यीशु मसीह जिसदा अहां दे जरिये मतलब मेरे कने सिलवानुस कने तीमुथियुसे दे जरिये तुहां बिच्च भी प्रचार होएया, तिस च “हाँ” कने “ना” दोयो नीं थे, अपर तिस च “हाँ” दी “हाँ” होई ऐ।

²⁰क्जोकि परमात्मे दे सारे वादे मसीह च “हाँ” सौगी हन। कने इसतांई अहां ग्लांदे हन, “आमीन” जिसते अहां दे जरिये परमात्मे दी महिमा होयैं।

²¹परमात्मा ई ऐ, जेह्ड़ा अहां जो तुहां सौगी मसीह च मजबूत करदा ऐ, परमात्मे अहां पर अपणी छाप लगाई करी बयाने दे रूपे च अपणी आत्मा अहां दे मनां च रखी करी अहां दा अभिषेक कित्या ऐ।

²³परमात्मा मेरी इसा सच्चाईया दा गवाह ऐ, कि मैं दुवारी कुरिन्थुस सैहरे च इसतांई नीं आया, कि मैं तुहां दी निंदा नीं करणा चांह़दा था।

²⁴इसदा मतलब एह़ नीं कि अहां तुहां दे बसुआसे पर हक्क जतान, क्जोकि तुहां अपणे बसुआसे च मजबूत रैंह्दे हन। अपर अहां तां तुहां दिया खुसिया च साझी हन।