Read Kangri 2 कुरिन्थियों 11 Bible Online

2 कुरिन्थियों 11 - Kangri bible

2 कुरिन्थियों 11

¹मैं चांह़दा ऐ, कि तुहां मेरी थोड़ी देहई वेबकूफिया जो झेली लेआ, सच्ची च जिंआं तुहां इस बग्त झेला दे भी हन।

²क्जोकि मैं तुहां दा ध्यान कने प्यार परमात्मे साइआं करदा ऐ। इसतांई कि तुहां तिसा पवित्र कुआरिया साइआं हन, जिसादी मंगणी मैं सिर्फ यीशु मसीयैं कित्तियो ऐ, तांजे तिसियो तिसदे हुआले करी दैं।

³अपर मैं डरदा ऐ, कि जिंआं सैताने सर्पे दे रूपे च अपणिया चलाकिया नैं पैहल्ली जणासा हव्वा जो भकाया, तिंआं ई सैह़ तुहां दे मनां दी सच्चाई कने पवित्रता जेह्ड़ी मसीह तांई ऐ, कुत्थी भरष्ठ नीं करी दैं।

⁴जे कोई माणु तुहां अल्ल आई नैं कुसी दूये यीशुये दा प्रचार करदा ऐ। जिसदा प्रचार अहां नीं कित्ता, या कोई होर आत्मा तुहां जो मिल्ली जां, जेह्ड़ी पैहल्ले नीं मिलियो थी, या होर कोई सुसमाचार सणा जिसियो तुहां पैहल्ले नीं सुणेया था, जे तुहां तिन्हां गल्लां जो मनदे हन, तां तुहां गलत हन।

⁵मैं तां समझांदा ऐ, कि मैं कुसी गल्ला च बड्डे ते बड्डे प्रेरितां ते घट नीं ऐ।

⁶जे मैं बोल चाल च अनाड़ी ऐ, अपर मसीह दे ज्ञाने च नीं ऐ। अपर अहां इसियो हर गल्ला च सबना पर तुहां तांई प्रगट कित्ता ऐ।

⁷क्या इस च मैं कोई पाप कित्ता; कि मैं तुहां जो परमात्मे दा सुसमाचार मुफ्ते च सणाया, कने अपणे आप्पे जो छोटा कित्ता कि तुहां ऊचे होई जान?

⁸तुहां इआं नीं ग्लान कि मैं होरनी कलीसियां जो लुटी लेआ ऐ, अपर मैं तिन्हां ते दान लेआ, तांजे तुहां दी सेवा करी सकैं।

⁹कने जाह़लू मैं तुहां सौगी था, कने मिन्जो पैसेयां दी कमी होई तां मैं कुसी पर भी बोझ नीं बणेया। क्जोकि बसुआसी भाऊआं मकिदुनिया प्रदेसे ते आई नैं पैसे देई करी मेरी जरूरत पूरी कित्ती। मैं हर गल्ला च तुहां पर बोझ नीं बणेया, कने ओणे आल़े दिनां च भी नीं बणगा।

¹⁰जे मसीह दी सच्चाई मिन्जो च ऐ, तां अखाया प्रदेसे च कोई मिन्जो इसा गल्ला च अपणी बड़ेयाई करणे ते नीं रोकगा।

¹¹मैं क्जो तुहां ते पैसे दी मदत नीं लेई? क्या मैं एह़ इसतांई कित्ता कि तुहां नैं प्यार नीं करदा? परमात्मा एह़ जाणदा ऐ, कि मैं तुहां नैं कितणा प्यार करदा ऐ।

¹²अपर जेह्ड़ा कुच्छ मैं करदा ऐ, सैई करदा रैंह्गा कि जेह्ड़े लोक मौका तोपदे हन, तिन्हां जो मैं मौका नीं दिंदा, तांजे सैह़ तिन्हां कम्मां च घमंड नीं करी पान, तिन्हां दे कम्म अहां ई साइआं हन।

¹³क्जोकि देहय् लोक झूठे प्रेरित, कने छले नैं कम्म करणे आल़े हन, कने मसीह दा प्रेरित होणे दा ढोंग करदे हन।

¹⁴एह़ कोई हरानी दी गल्ल नीं क्जोकि सैतान अप्पु भी ज्योतिर्मय सुअर्गदूत होणे दा ढोंग करदा ऐ।

¹⁵इसतांई जे सैताने दे सेवक भी धार्मिकता दे सेवकां साइआं होणे दा ढोंग करन, तां कोई बड्डी गल्ल नीं, अपर तिन्हां दा अन्त तिन्हां दे कम्मां मताबक हुंगा।

¹⁶मैं भिरी ग्लांदा ऐ, कोई मिन्जो मूर्ख ना समझैं। जे तुहां मिन्जो मूर्ख समझी लेआ ऐ, तां इआं ई समझी नैं मेरी झेली लेआ, तांजे थोड़ा देहया मैं भी घमंड करी सकैं।

¹⁷इस बारे च मैं जेह्ड़ा कुच्छ भी ग्लांदा ऐ, सैह़ प्रभु दे हुक्मे दे मताबक नीं अपर नासमझा साइआं बेझिझक घमंड नैं ग्लांदा ऐ।

¹⁸जाह़लू कि मते लोक संसारे दे लोकां मताबक घमंड करदे हन, तां मैं भी घमंड करगा।

¹⁹तुहां तां समझदार होई नैं खुसिया नैं मूर्खां दी झेली लैंदे हन।

²⁰क्जोकि जाह़लू तुहां जो कोई दास बणाई लैंदा ऐ, या तुहां अल्ल जेह्ड़ा कुच्छ ऐ, तिसियो भी लेई लैंदा ऐ, या धोखा देई नैं फायदा चुक्की लैंदा ऐ, या अपणे आप्पे जो तुहां ते बड्डा बणांदा ऐ, या तुहां दे मुँऐ पर चपेड़ मारदा ऐ, तां तुहां तिसदी झेली लैंदे हन।

²¹सायद मिन्जो सर्मिंदा होणा चाइदा, कि मैं तुहां लोकां सौगी ऐदेया बर्ताब करणे च बड़ा कमजोर ऐ। अपर जिसा कुसा गल्ला च कोई घमंड करदा ऐ, मैं वेबकूफिया नैं ग्लांदा ऐ, मैं भी घमंड करी सकदा ऐ।

²²क्या सैई इब्रानी हन? मैं भी ऐ। क्या सैई इस्राएली हन? मैं भी ऐ। क्या सैई अब्राहमे दे वंश हन? मैं भी ऐ।

²³क्या सैई मसीह दे सेवक हन? मैं पागल माणुये साइआं ग्लांदा ऐ, अपर मैं तिन्हां ते बधी नैं सेवक ऐ। मैं तिन्हां ते जादा मेहनत कित्तियो ऐ, तिन्हां ते जादा मैं जेला च गेआ, बड़ी बरी मारेया ऐ, हमेसा ई मेरे प्राण मुसीबता च पै हन।

²⁴मैं पंज बरी यहूदी अगुआं दे हत्थे ते उन्तांली-उन्तांली कोड़े खादे।

²⁵त्रै बरी मैं डंडे खादे; इक्क बरी मिन्जो पर पत्थर मारे; त्रै बरी जाह्ज टूटी गै, जिन्हां पर मैं बैठेया था; इक्क दिन कने इक्क रात मैं समुंदरे दे पांणिये च कटेया।

²⁶बार-बार मिन्जो सफर करणा पै, कदी नदियां दे खतरेयां च; कदी डाकुआं दे खतरेयां च; कदी अपणी जाति आल़ेआं ते खतरेयां च; होरनी जातिआं आल़ेआं ते खतरेयां च; सैहरे दे खतरेयां च; सुनसाण जगाह दे खतरेयां च; समुंदरे दे खतरेयां च; झूठे बसुआसी भाऊआं बिच्च खतरेयां च रेह्आ।

²⁷मैं कड़ी मेहनत कित्ती, कने बड़ियां रातीं जागदे कटीं। मिन्जो जयादातर भुखा रैहणा पेआ। भुख प्यास च, बार-बार ब्रत करणे च, ठंडी च कने कपड़ेयां दिया कमिया च, इन्हां सबना तकलीफां जो झेलदा रेह्आ।

²⁸कने होरनी गल्लां जो छड्डी नैं जिन्हां दा बखान मैं नीं करदा, सारी कलीसियां दी फिकर हर रोज मिन्जो हुंदी रैंह्दी ऐ।

²⁹जाह़लू कोई कमजोर हुंदा ऐ, तां मैं भी कमजोर मसूस करदा ऐ। जाह़लू कोई पापे च पोंदा ऐ, तां मेरा मन बड़ा दुखी हुंदा ऐ।

³⁰जे मिन्जो घमंड करणा ई ऐ, तां मैं अपणिया कमजोरियां दियां गल्लां पर घमंड करगा।

³¹प्रभु यीशु मसीह दा पिता परमात्मा जेह्ड़ा सदा धन ऐ, जाणदा ऐ कि मैं झूठ नीं ग्लांदा।

³²जाह़लू मैं दमिश्क सैहरे च था, तां अरितास राजे दे हाकमे मिन्जो पकड़णे तांई दमिश्कियां दे सैहरे पर पैहरा लगाई दित्ता,

³³कने मैं डल्ला च खिड़किया ते होई नैं सैहरे दी चार दीवारी ते लौआई दित्ता, कने हाकमे दे पैहरे ते बची करी निकल़ी गेआ।