Read Kangri 2 कुरिन्थियों 12 Bible Online

2 कुरिन्थियों 12 - Kangri bible

2 कुरिन्थियों 12

¹घमंड करणे ते मिन्जो कोई फायदा नीं, भिरी भी मिन्जो इआं करणा पोंदा ऐ। इसतांई मैं प्रभु दे दित्यो दर्शना कने प्रकाशणा दी चर्चा करगा।

²मैं मसीह च चौदा साल पैहल्ले सुअर्गे जो चुक्की लेआ गेआ। मैं अपणे सरीर च या सरीरे ते बाहर था, मैं नीं जाणदा, सिर्फ परमात्मा जाणदा ऐ।

³हाँ सिर्फ परमात्मा ई जाणदा ऐ, कि मैं सरीरे च था या सरीरे ते बाहर। अपर मैं जाणदा ऐ

⁴कि मैं सुअर्गे पर चुक्की लेआ था, कने देहई गल्ल सुणी जेह्ड़ी ग्लाणे आल़ी नीं ऐ। कने जेह्ड़ा मुँऐ पर लेयोणा माणुये जो ठीक नीं ऐ।

⁵ऐदई घटनां पर घमंड करणा खरा ऐ, अपर मैं इआं नीं करणे आल़ा ऐ। मैं सिर्फ अपणिया कमजोरिया पर घमंड करदा ऐ।

⁶क्जोकि जे मैं घमंड करणा चां भी तां मूर्ख नीं ऐ, क्जोकि सच्च ग्लांदा ऐ। तमी मैं अपणे आप्पे जो घमंड करणे ते रोकदा ऐ। क्जोकि मैं नीं चांह़दा ऐ कि कोई इसते जादा बड़ेयाई करैं, जेह्ड़ा मेरिया ज़िन्दगिया च दिक्खदे हन, कने मिन्जो ते सुसमाचार सुणदे हन।

⁷इसतांई कि मैं परमात्मे दियां अनोखियां गल्लां ते घमंडी नीं बणैं, मेरे सरीरे च कन्डा चुभाया। सैह़ कन्डा सैताने दा इक्क दूत ऐ, जेह्ड़ा मिन्जो तकलीफ दिंदा ऐ, तांजे मैं घमंड नीं करैं।

⁸इसदे बारे च मैं प्रभुये नैं त्रै बरी विणती कित्ती, कि मिन्जो ते दूर होई जा।

⁹अपर प्रभुयैं मिन्जो नैं ग्लाया, “मेरा अनुग्रह तेरे तांई काफी ऐ। क्जोकि मेरी सामर्थ कमजोरिया च खरे कित्ते कम्म करदी ऐ।” इसतांई मैं बड़ी खुसिया नैं अपणी कमजोरियां पर घमंड करगा, कि मसीह दी सामर्थ मिन्जो पर छौं करदी रैंह्।

¹⁰इसा बज़ाह ते मैं मसीह तांई कमजोरियां च, कने निंदा च, कने दीनता च, कने सतांवा च, कने मुसीबतां च खुस ऐ। क्जोकि जाह़लू मैं कमजोर हुंदा ऐ, तां मैं मसीह दी सामर्थी नैं मजबूत हुंदा ऐ।

¹¹मैं वेबकूफिया दियां गल्लां करा दा ऐ, अपर तुहां लोकां मिन्जो एह़ करणे तांई मजबूर कित्ता। तुहां जो तां मेरी सपारस करणी चाइदी थी, क्जोकि जे मैं कुच्छ भी नीं, तमी जेह्ड़े अपणे आप्पे जो बड्डे ते बड्डा प्रेरित समझदे हन, तिन्हां ते मैं कुसा गल्ला च घट नीं ऐ।

¹²जाह़लू मैं तुहां सौगी था, तां एह़ साबित कित्ता, कि मैं असली प्रेरित ऐ। कने मैं सबर रखी नैं तुहां बिच्च मते सारे चमत्कार, अनोखे कम्म कने सामर्थी दे कम्म करी नैं दस्से।

¹³दूईआं कलीसियां दे मकाबले तुहां लोकां च कुसा गल्ला दी कमी रेई गेई ऐ? हाँ, मैं तुहां लोकां पर बोझ नीं बणेया, तुहां मिन्जो इसा भुल्ला तांई माफ करा।

¹⁴दिक्खा, हुण मैं त्री बरी तुहां अल्ल ओणे जो त्यार ऐ, कने मैं तुहां पर कोई बोझ नीं बणगा। क्जोकि मैं तुहां दिया धन-दौलता जो नीं, अपर तुहां जो ई चांह़दा ऐ। क्जोकि बच्चेयां जो माँऊ बुढ़े तांई धन-दौलत नीं कठ्ठेरणी चाइदी, अपर माँऊ बुढ़ेआं जो बच्चेयां तांई धन-दौलत कठ्ठेरणी चाइदी।

¹⁵मैं तुहां लोकां तांई बड़ी खुसिया नैं सब कुच्छ खर्च करी दिंगा, कने अपणे आप्पे जो भी देई दिंगा। जे मैं तुहां नैं इतणा प्यार करदा ऐ, तां क्या तुहां मिन्जो नैं घट प्यार करगे?

¹⁶भिरी भी तुहां जो एह़ मन्नणा पोणा, कि मैं तुहां पर बोझ नीं बणेया, अपर कोई ना कोई मिन्जो पर दोस जरूर लगाई सकदा ऐ, कि “सैह़ बड़ा चलाक ऐ कने तिन्हीं तुहां जो धोखा देई नैं फसाई लेआ।”

¹⁷तुहां दस्सा, जिन्हां लोकां जो मैं तुहां अल्ल घल्लेया, क्या तिन्हां लोकां च कुसी दे जरिये भी मैं धोखा देई नैं तुहां ते कुच्छ गलत फायदा लेआ?

¹⁸मैं तीतुसे जो समझाई नैं तिस सौगी तिस भाऊये जो घल्लेया, तां क्या तीतुसें धोखा करी नैं तुहां ते कुच्छ गलत फायदा लेआ? क्या अहां इक्की पवित्र आत्मा दे जरिये नीं चल्ले, क्या इक्क ई रस्ते पर नीं चल्ले?

¹⁹तुहां लोक एह़ समझदे हुंगे, कि अहां तुहां सामणै जवाब दै दे हन। अपर अहां तां परमात्मे जो सामणै समझी करी मसीह च ग्लांदे हन, कने हे प्यारे साथी बसुआसियो, सारियां गल्लां तुहां दे बसुआसे दे फायदे तांई ग्लांदे हन।

²⁰क्जोकि मिन्जो डर ऐ, कुत्थी इआं ना होयैं कि मैं आई नैं जिंआं चांह़दा ऐ, तिंआं तुहां जो नीं पां; कने मिन्जो भी जिंआं तुहां नीं चांह़दे तिंआं ई पान; कने तुहां च झगड़ा, जल़ण, गुस्सा, बरोध, नफरत, चुगली, घमंड कने बखेड़े होन।

²¹कने कुत्थी इआं ना होयैं कि जाह़लू मैं बापस औयें तां मेरा परमात्मा तुहां सामणै मिन्जो सर्मिंदा नीं करी दैं, कने मिन्जो मतेआं तांई भिरी सोक करणा पोयैं, जिन्हां पैहल्ले पाप कित्या था कने गंदे कम्म, ब्यभिचार कने लुचपण ते, जेह्ड़ा तिन्हां कित्ते, मन नीं बदलेया।