Read Kangri 2 कुरिन्थियों 13 Bible Online

2 कुरिन्थियों 13 - Kangri bible

2 कुरिन्थियों 13

¹हुण त्री बरी मैं तुहां अल्ल ओआ दा ऐ। पवित्रशास्त्रे च लिख्या ऐ, “दो या तीन गवाहां दे जरिये हर इक्क गल्ल साबित कित्ती जांगी।”

²जिंआं मैं जाह़लू दूई बरी तुहां सौगी था, तिंआं ई हुण दूर रैंह्दे-रैंह्दे तिन्हां लोकां जो जिन्हां पैहल्ले पाप कित्या था, कने बाक्कि सारे लोकां जो हुण पैहल्ले ते ग्लाई दिंदा ऐ, कि जे मैं भिरी ओंगा, तां छड्डगा नीं।

³क्जोकि तुहां तां इसदा सबूत चांह़दे हन, कि मसीह मिन्जो च ग्लांदा ऐ। तुहां जो सधारणे तांई मसीह कमजोर नीं ऐ, अपर तुहां च सामर्थी ऐ।

⁴सैह़ कमजोरियां दिया बज़ाह ते सूल़िया पर टूंगेया तां गेआ, भिरी भी परमात्मे दी सामर्थी नैं जिन्दा ऐ। अहां भी तिस च कमजोर हन, अपर परमात्मे दिया सामर्थी नैं जेह्ड़ी तुहां तांई ऐ, तिस सौगी जींगे।

⁵अपणे आप्पे जो परखा, कि बसुआसे च हन कि नीं। अपणे आप्पे जो जांचा, क्या तुहां अपणे बारे च एह़ नीं जाणदे, कि यीशु मसीह तुहां च ऐ? नीं तां तुहां परखणे च नकम्मे निकल़े हन।

⁶अपर मेरी आसा ऐ कि तुहां जाणी लैंगे, कि अहां नकम्मे नीं निकल़े हन।

⁷अहां अपणे परमात्मे नैं एह़ प्रार्थना करदे हन, कि तुहां कोई बुराई ना करन, इसतांई नीं कि अहां खरे दुस्सन, अपर अहां चांह़दे हन, कि तुहां भलाई करा, चाहे अहां नकम्मे ठैह़रन।

⁸क्जोकि अहां सच्चाईया दे बरोध च कुच्छ नीं करी सकदे, अपर सच्चाईया सौगी सदा खड़े रेई सकदे हन।

⁹जाह़लू अहां कमजोर हन, कने तुहां ताकतवर हन, तां अहां खुस हुंदे हन, कने एह़ प्रार्थना भी करदे हन, कि तुहां बसुआसे च मजबूत होई जा।

¹⁰इसा बज़ाह ते मैं तुहां अल्ल ओणे ते पैहल्ले इन्हां सारियां गल्लां जो लिखदा ऐ, तांजे मिन्जो अपणे हक्के दा इस्तेमाल करी नैं तुहां जो सज़ा दैणे दी जरूरत नीं, जेह्ड़ा हक्क मिन्जो परमात्मे दित्या ऐ। क्जोकि मैं अपणा हक्क तुहां दे बसुआसे जो मजबूत करणे तांई चांह़दा ऐ, ना कि तिसियो नास करणे तांई।

¹¹कने हे प्यारे साथी बसुआसियो, मैं इन्हां सब्दां सौगी चिठ्ठी बंद करदा ऐ। खुस रेह्आ, सिद्ध बणदे जा, इक्की दूये जो हौंसला दिंदे रेह्आ, इक्क मन रेह्आ, मिल्ली जुली नैं रेह्आ। ताह़लू प्यार कने सांति दा परमात्मा तुहां सौगी रैंह्गा।

¹²इक्की दूये जो प्यारे नैं गल़े मिल्ली करी नमस्कार करा।

¹³सारे परमात्मे दे लोक तुहां जो नमस्कार करदे हन।

¹⁴प्रभु यीशु मसीह दा अनुग्रह कने परमात्मे दा प्यार कने पवित्र आत्मा दी सेहभागिता तुहां सबना सौगी हुंदी रैंह्।